martedì 26 febbraio 2008

Triangui


– Dispò Flavio… – j veve domandât Checo, intant ch’al pedalave – ce isal… un Biotòpo?
– Il nemì di un Biogatto ve! – j veve rispundût chel altri, ridint come un mat.
– Coion! – al veve tirât su il nâs Checo, permalôs tant che un cai – Dai, fermìnsi a viodi!
E cussì disint al veve voltât la bici e al jere tornât indaûr, cjapant la strade di cjamp li ch’a jere l’indicazion.
Flavio nol veve podût fa altri che spiegâi ce ch’al ere chel puest pene fûr Flambri, là che tal mieç da la tiere mole di palût a vevin fat su un cjaminament di breis rialçât. Il puest, a di il vêr, al jere une vore bielin, cuiet e pôc salvadi.
– Bon, cumò però a nin indenant, che vin di lâ ju fin a Teôr e tornâ su par Palaçûl.
Checo nol rispundeve. Al jere restât imbambinît a cjalâ trê arbui, metûts a triangul, come sa fossin cuissà ce maraveôs. Invezit di montâ su la bici, Checo al veve scugnût lâ a viodi chei trê pôi fin dongje, cjareçantju cu la man come sa fossin gjatuts.
A le fin, a jerin rivâts cjase a scûr, cu lis machinis gnervosis dal sabide di sere ch’a j pivetavin.


Ta la sere stesse, tor miezegnot, Checo al veve cjolt la machine e l’ere tornât ta chel puest. Si sintivin crots cjantâ di scjafoiâ lis orelis. Cence savè ben parcè che lu faseve, si ere cugulât tal mieç di chel triangul, cul cûl ch’al cjapave su dute l’umiditât. Nancje il timp di disgropâ il flât che subit al veve sintût chês vôs.
– Ven cun noooo… Ven cun nooo… – a cjantavin framieç il cracra dai crots E in chel, dal scûr, issio fasi viodi une zovine. Sameave vignude fûr dal len di un di chei trê arbui. Crote, ma cui cjavei cussì luncs di platâ lis tetis e la nature, e soredut, biele di fa pôre. Checo no l’ere sigûr, ma j pareve che ridés, intant ch’a si faseve dongje.
– Mandi, biel fantat! – al veve sintût un’altre vôs daûr di lui. E zirantsi robis ch’a no j vegni un colp a viodi altris dôs fantatis, compagnis di che ch’al veve denant, o forsit ancjemò plui bielis.
Di chel moment in poi Checo no si visave scuasit nuie. Al saveve dome di sedi stât doprât come un imprest, pi che come omp: dopo velu scrotât, chês trê lu vevin supât e messedât come sal fos une caramele.
Lu veve sveât un cjaçadôr, la matine dopo, berghelant come un mat.
– Sporcacjon! Sporcacjon! – j diseve corintji daûr cu la sclope.
Al veve scugnût platâsi in t’un fossâl, a fasi becâ dai moscjins fintremai ch’a no jere tornade sere.


Flavio, cuant ch’al ere vignût a cjoilu e lu veve cjatât vistût dome dai coprisedii da la machine, no podeve parâsi di ridi. Checo al veve cirût di spiegai, ma al jere come tirâ un clap tal Tôr.
Di che volte però, ogni sabide, Checo a meteve un cambi di vistîs in machine e al stave fûr dute la gnot.


________________________________________
A stoi gjoldint a scrivi contis ch'a nassin di une imagjine, come in chest câs, e podopo a voltalis par talian. Pensi che chest blog al deventarâ di spès la cjase di chestis contis.
Sa vuleis lei la conte par talian, ch'a no simpri a je compagne, fracait a chi.

Mandi mandi

sabato 23 febbraio 2008

Il cartel pa l'Udinese cul Gjenue

O, soi un pôc indaûr cun chest blog, ma no stêt ve pore, o stoi scrivint un grun par furlan.
Us disarai di plui: ài cjapât un biel vizi.
O met une imagjine sul desktop di un cualchi puest ch'a m'ispiri, daspò a buti ju une storie curte su chel puest, e fintremai ch'a no scrîf la storie a no gambii il sfont...
E si che jo soi un ch'a si stufe subit di dut, (no, no stêt pensâ mâl, da la frice no mi soi ancjemò stufât), a soi sburtât a scrivi la storie...
Cun usgnot ài butât ju la seconde, e soi a la tierce imagjine... sperin di no finî li fotografîs!^^

Intant us lassi il cartel pa la partide di doman, sperant che chist colp a parti bon!
Buine domenie!

domenica 17 febbraio 2008

Niari - two pulp tales - coment


Jeri indizis se comentâ chest libri sul blog par furlan o su chel par talian. Tal dubit cirarai di cjacarâ di lui sie di ca che di là. :)
Us ài za dite alc su chest libri un par di post indaûr, cumò lu ài let e pos comfermâus che il libri le bon e al è un plasè leilu.
Nin par ordin.
La prime da lis dos contis a è scrite in cjargnel, tal dialet di For di Voltri, e ài di dì che nol è propit tant sempliç di lei, soredut tal imprin, cuant che dutis ches "o" che sierin ogni peraule, par un come me, ch'al cjacare furlan de base, a son duris di digjerî. Il biel al è che dopo un dîs o vincj pagjinis tu tachis a la indenant spedît e, a la fin da la conte, pôc i mancje ch'a tu cjapis l'acent cjargnel ancje tu.
Cheste da lis dos, vutu pal pathos ch'a si rive adore a fâ su, vutu pa la scriture une vore sclete e pa l'idee di font une vore ninine, a è cence dubis che ch'a ti lasse di plui. Ti samee scuasit di viodilu, Valstorta, il paîs che Fulvio al à inventât tra Rigulât e Gjiviane, su che strade che chei ch'a la cognossin a san ben ce mût ch'a è. E il biel da la conte al è propit chel che tal mieç dai cadavars e dal "thrilling" Fulvio j à metût ancje la so critiche sociâl e i valôr furlans.
La seconde conte, che par talian, a je ben scrite ancje che, ma forsit a piert alc, sia tal fa cjacarà par talian doi personaçs ch'a tu viodis pensâ par furlan, sie tal finâl, un pocut teletonât. Chest però, a nol gjave il biel di viodi une storie cun elements fantastics svulucjâsi tal casel da l'autostrade, pene fûr di Udin. Une conte moderne, ch'a soredut a le fin ti cjape un casin.
Pôc altri ce dì. Sa us capite cjoleilu!
(I link ju cjatai tal post plui indenant)

domenica 10 febbraio 2008

Si lu sai...o spetavis il moment dal cartel par la partide da l'Udinese... Ben pò, che setemane chi âi di dî che o vevi pocje ispirazion, ma almancul, invezit di butâ ju un sôl cartel, o âi butâts ju doi! Un âi ancjemò di finîlu, ma doman parcechè cumò o jevizc î coions di jevâmi par fai une foto e cussì o si tigneis la beta version... Vonde cussì par vuê ch'a soi cuet come un bilite tal microonde! :)
Us lassi i doi cartei in anteprime, per Udinese Giuventus :)


martedì 5 febbraio 2008

L'ostarie di Pieri. (la conte di Carnevâl)

Ciò pò! O stoi metint adun il blog doi dîs di file. Robononis! Il dut grassie al Braf Furlan che mi à visât ch'e al premi di Remanzâs al à vinciût un di Cividât. Cussî, si che a pues puestâ le conte su Carnevâl e Cresime, cence tancj fastidis, come ch'al à fat lui.


Bon Carnevalon a ducj!


P.S. Tenzion che la conte samee lungje ma si lei in t'un moment.


L’ostarie di Pieri

L’ostarie di Pieri, la sere di martars gras, a jere un glimuç di vôs e di ligrie. In mieç al berlament, però, un zovenot al menave plui sarde di ducj chei altris. Picinin, sgjavelât, ros di cjavej e di muse, vistût di une gjachetute colôr di rose e un pâr di braghessis zâl di stomi. Al saltave su lis cjadreis come un sfolmenât, contant un strambolot daûr che l’altri.

Nissun al capive, ma ducj a ridevin. Sameave cuasit ch’a no fossin furlans, insome!

Ven a stai, che propit cuant ch’al jere picjât sul lampadari, vuicant e batint i peis come un simiot, a è jentrade une vecjute. Gobe, stuarte, piel e vues, dute vistude di neri, cun tun fasolet sul cjâf, come une vedue. Dome chel zovenot estrôs al à viodude intant che si sintave, cucje cucje, dongje dal banc.

– Ciopò! Mandi PanzeSclagne! – i dîs businant e lant dongje.

– Oh, Ve’ chi ch’a tu sês, Bocâl. Ma… setu za cjoc cussì adore?

– Cjoc jo? Ma ce fufignis ditu! – i rispuint lui trabascjant – Sês fûr come une colombe! Anzit… ce bevitu, che vuè pai jo!

– Jo no bêf! – i rispuint che altre, nereose.

– Pieri! – al busine alore il zovenot, saltant fin dongje la vecjute. – un tai di VCPSCT par la nestre amie PartePeule!

– Di pò! Le atu finide di cjolmi pal cûl? Mi clami Cresime! E po, ce vin al saressie il ViCiPiSiCiTi? Ise robe foreste?

– Ah Cresime Cresime…Tu e la to manie di sparagnâ! Scomet ch’a no tu cjolis plui nancje il gjornâl! Ti âi pene ordenât il Vin Che Prin Si Clamave Tocai!

– E tu lu clamitu VCPSCT? No ti parie di sbivicjâ un pôc masse tal dilu? Tu mi as lavade!

– Forsit chest colp tu as reson! Magari ce ditu se cambin bestie e lu clamin Lacai?

– Lacai? Ma setu fûr?

– Ma ce ditu! “Lacai” al è bielonon. O imagjini za il reclam: “Lacai: il vino che lascia una scia!” – E ju a ridi come un mus!

– Ma va là va là, stupidat! – i à dit la vecjute menant il cjâf – Tu âs simpri voe di mateâ e mai di lavorâ!

– Eh no, cjare la me CrichePedôi! Chest colp no tu podis ufindimi di che bande, parcè che stoi cuasit par vê cjatât lavôr!

In chel, l’ostîr, un omenut ros e toront cul grumâl fruçât e maglât di vueli, i poie doi tais di blanc denant dal nâs e al sint ce ch’al à dite Bocâl. Robis ch’a no si scjafoi, a fuarce di ridi.

– Ce riditu tu!? Cocâl ch’a no tu ses altri! – i dîs Carnevâl cun t’une ande di permalôs, e dopo, tornant a cjacarâ cun che sdenteade di Cresime – Par to informazion, a stoi par deventà President!

In chel, un pôcs di chei in mascare, che vevin scoltât dut il tichignâsi jenfri Bocâl e Cresime, a fasin in côr come i mus a cuaiis: Ooooooh!

– President…Cumòvepò! E President di ce? – i domande la vecjute, cjalanlu di sot lis ceis.

– O sint mo… no sai di cè! Tu vâs simpri a cirì il pêl ta l’ûf! Tu ses piês di un vigjil! S’al fos par te tu dopraressis il Velox ancje par chei ch’a corin al gabinet. Cîr di sedi plui positive e viôt di votâ par me!

– Ma setu mat! parcè varessio di votâ par te?!

– Ce mût saressie a dì parcè?! Ti regali une cjarie di crostui e une camionade di fritulis, se tu mi votis!

– Ooooooh – al â fat di gnûf il côr.

– E jo varès di croditi? Aio scrit “Gioconda” sul çarneli?

– Sì ch’a tu as di crodimi. Anzit, sa t’ûs tal met par scrit!

– Sigûr po! Lasse stâ va, ch’al è miôr.

– Eh, no ch’a no lassi stâ. Jo âi ideis straordenaris! Tant par començâ, par podè sedi simpri furnîs di benzine e cjichis, o cirarai di sdrumâ il confin cu la Slovenie!

– Oooooooooh – a fasin inmò une volte chei batecui.

– Di po, Bocâl, ma ce atu tal cjâf! Un sac di coriandui? Ma no satu che il confin nol esist plui?

– Ce mût? Sul serio? E duncje a si pò lâ di ca e di lâ cuant che si ûl?

– Si ve! Baste ch’a tu vedis cun te la casele da lis midisinis…

– Ah…

– il gjubot fosforesent…

– Aah…

– Lis lûs par gambià fanâi sa si rompin…

– Ah Ah

– L’estintôr…

– Ah Aaaaah

– Li cjadenis pa la nêf…

– Eeehhh!

– E un grun di altris robis che cumò no vi visi, parcè che di lâ la Policja no ta la perdone.

– Sint mo, Cresime… ma setu propit sigure che àn gjavât il confin?

– Bocâl! Chi l’unic confin ch’al ten dûr al è chel jenfri te e il sintiment!

– Eh no, cjarissime la me MuseDiCadavar, viôt che jo no ài nissun fastidi cul sintiment! Jo a sint miôr di un gjat! – i dîs chel, puartantsi la man vierte dongje da l’orele.

– Vioditu ch’a no tu capissis nuie! O stoi disint ch’a tu ses plen di vizis!

– No è vere!

– Fumitu?

– No – i dîs chel, platant la cjiche daûr da la schene.

– Bevitu?

– Nooo – i dîs svuedant la tace in t’un glotâr e tiranle a chei che fasevin ‘Ooooh’

– Distu peraulatis?

– E po mierde! No! E no voi nancje a pantianis… si insome, a feminis! – i zonte Bocâl metint in sachete il telefonin.

– Trafichitu cui lamierins?

– Mai vudis fuarpis!

– E Bocâl Bocâl, tu no tu ma la contis juste!

– Cjale mo Cresime, jo no ta la conti propite! Dut al plui a mi sarâ scjampât un zirut discuindon in ta Ztl…

– Aaah issio! – i â dit Cresime, tirant su il dêt come une mestrute.

– Ooooooh – àn fat di gnûf lis mascarutis, menant il cjâf

– Ce vêso capît, un zirut a pît…

– Aaaaaah – chei altris cocâi.

– Pitost, mi tocje propit dilu, soi lât a viodi l’Udinese cul strisson cence bachets di plastiche…

– Issio! mi pareve! – a è tornade a la cariche la vecjute, saneose di podè disi di dut.

– Ooooooh – chei altris daûr.

– Ce vêso capît – al à tornât a spiegâ Bocâl – La partide le âi viodude par television!

– Aaaaaaah – di gnûf i trê çus.

– O, propit a dile grosse, une volte ài guidât dopo ve mangjât un cjocolatin cu la sgnape!

– Oooooooooooh! – ducj a berghelâ.

– Uuuuuuh! Maladet pecjadôr! – i à vosât Cresime!

– Ou, ma ce vêso capît! O âi guidât la biciclete!

– Aaaaaaaaaah – àn fat ancjemò une volte chei trê imbambinîts ch’a i davin cuarde.

A chest pont, Cresime, si ere un pôc stufade di fasi cjoli pal cûl di che sticeboris di Bocâl, cussì ce no ti àe fat.

– Ben po, zovenot! Tu mi maraveis! Tu devis ve metût il cjâf a puest! In chest câs, pensi propit ch’a pues presentâti me sûr! Pense ch’a l’â pene lassade il morôs, e che â juste bisugne di cualchidun che la consoli.

– Ce mût!? – i à dit Bocâl, discocolant i voi – E tu, vecje e plene di grumbulis come ch’a tu ses, tu varessis ancje une sûr?

– Certo! Anzit, cumò le clami, cussì tu le cognossis! Tu i plasarâs di sigûr!

E subit la vecjute, cu la lenghe di fûr, e à començât a mateâ cul telefonin, par rivâ adore a fa il numar. Bocâl, ch’al veve fat une muse come se i vessin struncjât sui peis une cariole di ledan, al à molade une ridade di marcjadan e al à començât a movisi viers il cagadôr.

– Clamile clamile! Jo voi dome un moment a lavâmi lis mans e petenâmi un tichinin.

E cussì, intant che Bocâl al ere zà mieç fûr dal barcon, pront a cori vie pa lis stradis dal borc come un gneur il dì dai cjaçadôrs, in te ostarie a è jentrade une fantate. Alte, cui voi celescj, i cjavêi luncs fin tal cûl, toronde la che covente e cun t’une musute di pipine.

– Oh mandi Pasche! – i dîs Cresime, pene ch’a le viôt su la puarte.

– Oh, buinesere. – i rispuint che altre cun t’une vôs di fade – dal saressie chel zovenot che tu disis simpri di presentâmi?

– Mah… – i dîs so sûr, cjalant l’orloi – âi pôre che nancje par chest àn no si cognossarês.

E in chel, il cjampanili al tacave a sunâ la miezegnot.

lunedì 4 febbraio 2008

Officina del suono - Mask & Rock

Ier di sere soi stât a viodi chei sîs bintars ch'a viodês ta le foto chi in bande. E vuatris si domandarês: Ma cemût àno fat a fati movi il cûl, pelandron come ch'a tu ses?
Beh, sempliç: the power of myspace!
Claudio, chel disgraciât dal tastierist, o saran trê mês ch'a mi lamiche par fami vignî a viodi chest concert. Un colp âi scugnût rispuindi ch'a no covente ch'a ma lu disi tant prin, par ce che jo âi la memorie curte dai pes e mi visi li robis dome se ma li diis un moment prin ch'a capitin. Bisugne dî ch'a le stât di peraule e mi â visât propit sabide... e cussì soi lât.
Disin subit une robe. Ogni tant no covente fa simpri maraveis par cumbinâ alc di bon, e chei sîs zovenots a chi las maraveis no li fasin. No pensi ch'a si rabiin sa dîs che no bisugne spetâsi i Led Zeppelin furlans sul palc (ancje se une cover dai Zeppelin podaressin ancje fale, nomo?). Gli Officina del Suono, no son un grop musicâl, ma son une associazion ch'a sune par beneficence e par il gust di sta insiemit. No j interese sigûr proponi la cover fighete e sofisticade cun finecis di sun e di performance. Lor semplicementri a sunin rock (cover di bon jovi, stadio, pfm, queen, nomadi, toto e vie indenant) o cjantin, o cjacarin, o sberlin e ogni tant i scjampe cualchi vuicade o cualchi sgrasaiade. L'important al è passâ une serade in ligrie e casin, e rivâ adore a cjapâ su un franc par che frutats che ân cualchi problema plui di no, come chei da l'associazion LaPannocchia di Codroip. Insomit, da lis tantis manieris di da une man a chei altris cheste a è sigûr une buinissime idee.
Come ch'a podês cjatà sul lôr vuvuvu e sul lôr myspace, sabide ca ven a son a Pagnâ, la fin dal mês no mi visi dulà, ma vignaran lôr a dilu tai coments. Se par câs us capite di sedi di che bandis, e soredut par chei come mè, che ta la vite di ogni dî a fasin une vore pocje di beneficence, vait, che i francs ben spindûts a tornin simpri.
Chi sot une da lis fotos ch'a la contin lungje su la serade di iêr