martedì 30 settembre 2008

Cjolimi

Che altre dî, invezit di stâ atent, a lezion, o eri ispirât... :)


Cjolimi planc
Cjolimi di bot
Cjolimi i vistîts prin di cjolimi crot

Pleimi come un bisat
Jenfri il rivoc dal roiuç
E come l'aghe ator da la lidrîs
Pleiti tu di cjâf a pîts

E dopo di chel
Dopo vêmi cjolt
No ti vanze che lassâmi
Sbrissâ, sbisiâ, pratindi e cjareçâti
Meti adun il flât
E in vore il sintiment
Fintremai che a no lu cjati


martedì 23 settembre 2008

I prins doi cartei par l'Udinese

Ve chi. Par ducj i tifôs da l'Udinese us lassi i prins doi cartei che me mari àn puartât in curve cheste stagjon.
Chest chi in bande, a dî il vêr, al stadio nol è podût jentrâ, parcè che un carbinîr masse tichignôs al à tirât su une cuestion e a le fin no ju à fats jentâ cul strisson.
E sì che a no mi pareve cuissà ce ofensîf pal napoletans, a disarès plui che altri, che al preseave la gjenie da lis nestri trê pontis.
Poben, pâs, la prossime volte cjatarin un carbinîr mancul cocâl.


Za che soi, a ogni mût, us lassi ancje il cartel par la prime zornade di campionât. Chel a lu àn fat pass cence fastidis, e al veve puartât plui che bene, viodint li papinis che vin molât al Palermo.
Ah, O vês di perdonami la cualitât des fotos, ma ai rot l'imprest e fin che a no lu comedi, mi tocje doprâ il telefonin.

Bon
Mandi a ducj!

mercoledì 17 settembre 2008

Jeristu un diaul?

Intant che a stoi imparant a scrivi in maniere cristiane par furlan e che a stoi voltant une conte une tichinin plui lungje, us lassi una poesie.
Un pôc visionarie, ma simpri miôr che tele-visionarie :)


Jeristu un diaul?



Tu eris un diaul


Cumò tu puedis dimal


Cumò che di gust

Bielzà ti ai sgrifignât la muse

E lecât almancul dôs voltis

La stesse feride


Tu eris un di chei

Che denant da lis peraulis cjacaradis

Tu metevis chês scoltadis


Un che intal neri da la pache

Al cjatave il nulôr des rosis

E l’arc di une viole


Tu eris un Carnevâl folcjât

Che a mi colave su la schene


Jeristu un diaul duncje?


O mi soio acuart di te masse

O masse pôc

Par vignîti incuintri?


A la fin

Ti ai lassât un vêl di cjarecis

Cusidis une daûr di che altre


La piel sgarfade da l’agâr

Di une nâf dismenteade

Che a segne il timp

Intun mâr fassât di glaç


Ma la gjonde dal relit

E jerie la me

O la tô?


lunedì 1 settembre 2008

IL CÎL

Soi restât un pôc indaûr cun chest puar blog par furlan. Chest mês speri di dai une remenade. Tachin cuntune conte piçule piçule. Une conte che, par talian, e à vint il concors Horror T-shirt organizât di chest sito ca. Sperin che rindi ancje voltade par furlan. :)


IL CÎL


Vigji al è in terace. Al met plui dongje a la lint il voli, celestissim. Planc planc, intal buligâ caotic al rive adore a ricognossi da lis figuris. Nol induvine i particolâr, ma al viôt mans e çatis. Aromai al è sigûr che chês creaturis a resonin cun cussience. Une a côr, altris cjaminin. Dôs a somee ca si bussin.

Une soredut lu stice. A stâ ferme, gobe, ma subit daûr a si tire su a mostrâ une musate di madrac e lu cjale.

Vigji si stache dal microscopi e al tire dongje la piel dal sô braç, sierantle cuntun cerot. Al pâr il sipari dal teatri, al pense cun maravee, cence imagjinâ trops ca stan pensant come lui in chel moment. Dopo al tire su la muse e al cjale il cîl, celestissim.