giovedì 15 dicembre 2011

Il cartel par Udinese - Celtic

Lu sai, lu sai... il cartel nol è ispirât. Ma ogni tant a son altris prioritâts, e alore ancje tirâ fûr la nestre divignince celtiche magari nol fasarà ben al balon ma a lu fasarà a cualchi tifôs, che magari al scuvierç.
Ce che si à di vê dubits al è che o vin di lâ indenant! Nol esist che la Udinese di chest an si fâsi butâ fûr de Europe league... Sperìn di jessi brâfs e fortunâts. Jo di chescj scozzês o ai pôre... A son ducj grinte e pachis, e ancje un pôc di balon... Ma jo o ponti intun gol di Floro... :)

domenica 11 dicembre 2011

Il cartel par l'Udinese cul Chievo

No sai... la viôt dure vinci siet partidis su siete in cjase... la leç dai numar grancj e je daûr il cjanton a spietâ di verificâsi... Ma la Udinese di chest àn e je buine di mandâ a cais ogni leç.
Podopo vuê al segne Badu, o speri... al ven sù un grant zuiadôr, chel li. :)

venerdì 25 novembre 2011

Il cartel par l'Udin cu la Rome

Vulevi fâ un pôc miôr, ma il timp mi scoreave e soi rivât adore dome a fâ chest...
Sperant che la zebrute lu meti in ... sachete ae Lupe.

mercoledì 23 novembre 2011

Libris che o compri, libri che o presenti

Ve chi, dôs gnovis di chest fin setemane, che o podês meti dongje ae fieste di Sante Catarine, cuant che o sês ator pes barachis e o vês frêt e no savês dulà poiâ il cûl par scjaldâsi.
Il Dree al presente il so tierç lavôr dai gnognosaurs, chest colp ducj a zirâ films a Holliwood, anzit, pardon, a Gnognowood!
Jo varès di cumbinâle di jessi, cussì di chê strade o saludi il Dree che guai a lui se no mi piture il gno gnogno preferît sul librut che o regali ae frute, ven a stâi, la vedrane! 
aahhahaahah.
Ve chi, se no us ai convint a cjoli i gnognos, gjoldeit cul booktrailer, che no mi fâs embeddâ, chest cjastron


La seconde gnove dal fin setemane,invezit, e je simpri sui libris, ma chest colp un libri par talian, ma di un autôr furlan, che o presenti ae Librerie Moderne, domenie di sere aes 5 e mieze sot sere. Ancje par chest, prime o vais a mangja la fritule, e podopo o vignês a sintî "10 italiani che hanno conquistato il mondo" il libri di 10 contis curtis di Simone Marcuzzi, autôr di Pordenon, che o ai za vût il plasê di presentà timp indaûr.
Ve chi la mê recension par talian sul libri, cussì o viodês se us pues interessâ.

Si viodin!

domenica 20 novembre 2011

Masai Mara: une conte sul Kenia, ma par furlan


Che o soi un pôc matuç, bielza lu san in tancj, e cheste che us lassi achì sot e je une dimostrazion di plui. E ven dal gno concors che o met adun sul blog gelostellato, che si clame Fun Cool!
Come che o podês viodi de classifiche finâl, jenfri i maraveôs premis e je ancje une traduzion dal talian al furlan. Chest colp le à vinte Gloria Gerecht, scritore che e à pene publicât un libri di contis curtis, Caduta massi, e che e ten un blog di sonets in romanesc, che o cjati une vore inteligjents e biei. 
Ven a stâi, insome, che e à decidût di dâmi, come conte pe traduzion, cheste conte ambientade in Kenia, e che o ai voltât par furlan cun plasê e mi pâr, tornant a leile, che ancje par furlan e rivi a rindi vonde ben.
Ve chi, par chel che al à voie di leile, la si cjate ancje par talian achì, ma a mi mi plâs di plui in cheste version chi sot. :)


MASAI MARA
di Gloria Gerecht

Kenya 1950

Andrew Douglas al controlà la sclope in sul cricâ dal dì.
Al veve durmît pôc, mo scorsenât dai vencui, mo intune vee niçade des urladis dai siacai e dal ronfâ lizêr de femine.
Al provâ il cjariadôr, al viodè des canis: al jere dut a puest. I ocjai i strenzevin il nâs fasintlu sudâ no cate il fresc de buinore. Ju gjavà, intrigât, e si suià lis gotis che i colavin dilunc i smursiei ruans, sbrissant tes mostacjis sâl e pevar.
Il pensîr de cjace che e veve di rivâ i procurave simpri une vore di morbin.
E no par une stupide cjace ae bolp, ma par chê gruesse, chê che e rive a fâti sintî ardît e onipotent.
«Buana?» Simel, il zovin masai, al metè fûr la muse par domandâi se al volès un tè.
Andrew al tornâ a meti i ocjai e lu scrusignâ di sot in sù vandintlu. Lu veve cjolt a vore di pôc: un frutat scûr, minût e salt inte sô shuka rosse e nere, che al veve inmò di jessi usât al rispiet dal paron.
«Sì», al rispuindè sut, «e viôt di puartâmal intune tace nete».
Simel al fasè moto di sì e al fuì cidin. Si moveve tant che une gazele e alc che al cognosseve fintremai dai timps dal college si movê intai sens inçussîts di Andrew.
Francis al durmive ancjemò. Le cjalà scontent. Par tant che al cirìs di tignî la lôr relazion sul plan di une acetabile formalitât, nol podeve platâ une bocje di fastidi ogni volte che al stazave la sô fisionomie delicade. E jere une femine flevare e cence caratar, devote ae posizion sociâl e aes tradizions, rassegnade al om che i jere tocjât come se al fos un intop inevitabil de vite. Cun di plui e jere sterpe come une musse. La sole reson che lu veve sburtât a maridâsi e jere restade dal dut dislassade.
Si alçà e al le fûr. Il cjamp al contave dome dôs tendis: la sô e une plui piçule, di front, doprade di Simel e dal vecjo Lembui. Al lumà propit lui li che finive le largjure intant che al jere daûr a cjapâ sù lens. Si fermà sul soiâr a cjalâ il frutat, in cugulute, che al tignive di voli une cjalderie che e fumave su une foghere. Simel si voltà cuntune ridade legre: «Pront, Buana, cumò puartâ».
«Lu bêf chi: lady Frances e duar.» al disè Andrew jentrant e sentantsi su la brande. Simel si svicinà dantji un bussulot di late.
Lui lu cjapà par la conole tirantlu a se, il tè si strucjà su la cuvierte cussì come il frutat, che si cjatà sdrumât sul jet, il braç pleât par daûr, un zenoli sclizzât cuintri la schene.
La lungje zemude e sunà intal cidinôr dal cjamp. Un trop di ucei si jevà dai arbossits rivocantju intun ciulâ sclendar.

Andrew si tornà a meti a puest i ocjai, al regolà la sahariane e al le fûr de tende cence voltâsi. «Prepare la jeep», al comandà, «o nin a cjace».
Frances e jere sveade. Lu saludà fastiliose.
«Ti secjiie se vuê no ti compagni?» e domandà cuntune vôs vaiulinte.
«No, no: reste pûr achì. Ti lassi Lembui», al sgnargotà cence cjalâle intant che al cjapave sù carabine e cartatucjis.
Simel al steve in pîts sul ôr dal baracament. Al lumà la sô presince scalembre cence cjapâ nissune sodisfazion. Al tornâ a pensà a lis canais indianis cuntune ombre di nostalgjie. Par lôr e par l’Imperi. Biei timps, mai masse vaiûts. Il ’47 al veve dite vonde ae sô cariere e ai siei passetimps preferîts: il polo, la cjace aes tigris, i boys che a servivin in cjase.
Par chel, a cuasi cincuante agns, al veve vût miôr il Kenya une volte tornât in Patrie. Ta lis coloniis al podeve ancjemò doprâ il so podê blanc cence vê misuris. Frances no si jere mai usade ae Afriche, da rest nancje ae Indie, ma di chest lui si infotave.

Simel, dongje de jeep, al jere di schene. Voltât viers il cîl dal mont al intonave une cantilene smamide niçulant il cjâf.
Di lontan lis nulis a anunciavin la stagjon des ploies e un lamp subitani li sbregà piturantlis par un baticei di un ros inspietât e menaçôs.
«Moviti! Tu preiarâs dopo. A nin!» al comandà.
Sustât si metè al volant. Simel al saltâ inte jeep cence une peraule.
Andrew al partì cuntun scat viers il bush. Al vuidave sigûr su la tiere sgrumbulade lant viers la aghe dulà che il vecjo Lembui la sere prin i veve dite di vê viodût un trop di bufai.
Pene che al vualmâ lis bestiis inte savane al fermà la jeep daûr di une schirie di agacis e al pensà di lâ indenant a pît tignintsi sotvint.
I bufai, neris, bocognons, a jerin daûr a passonâ. Il cjâf, furnît di cuars possents e arcâts, tacâts su cerneli intune sole madrîs coriace, ju meteve al sigûr parfin dai leons. La tressadure e faseve pôre a cualsisei predatôr, ma cussì no al om blanc.
L’inglês al saveve lis regulis dal zûc e al fasè moto a Simel di lai daûr cul fusil di cambi e lis cartucjis, par cirî un puest bon par smicjâ. Si metè a distance di sigurece daûr di une boschete e al començà a studiâ il nemì.
Un mascjo bocognon al jere fûr dal trop fat soredut di feminis e dai fiis. Al jere grandonon, pardabon un esemplâr in plen de sô maturitât. E al jere propite ce che al cirive: un trofeu mertevul par la sô colezion. Une volte copât al sarès tornât al imbrunî cun Lembui par taiai il cjâf e puartâlu tal incjampament. A lis vanziduris a varessin fat front i siacai.
Cul voli tal mirin, «passimi lis cartucji», al cisicà slungjant la man. La tirà indaûr vueide. Si voltà: Simel al jere sparît.
Un sbisiament sec lu mostrà intant che al vignive fûr de boschete.
Il paron de mandrie al tirà sù il mustic nasant l’aiar. Simel al vigneve indenant salmodeant viers di lui. Il zovin si moveve a scats, di ca e di là e indenant, intun pas di un bal ritmât di un cjant gargarôs.
«Maledizion!» al businà Andrew «Torne chi subit! Vûstu fâti copà?»
Ma Simel al leve indenant a strafidâ la bestie fintremai che no si fermà di bot e al molà une vuicade che e revocà come une fusilade. Il bufal al tacà a talpetâ e al sbassâ il cjâf pront a fâi cuintri. Simel si voltà viers di Andrew cuntun estri di trionf metintsi denant par no fâlu sparâ.
Podopo, di bot al si butà in bande e al discomparî dal mirin. L’inglês al sparâ i soi doi colps che al veve cjariât. Il rumôr al spaventà dute la mandrie, che si rompè par tornâ dongje subit daûr intune nule di polvar, tacade cui piçui tal mieç, pronte a difindisi. Il mascjo, che al jere stât cjapât di stris, al daspà la tiere furiôs cui çocui e al si butà di corse cuintri il so assalidôr.

Andrew al capì che il so ripâr no lu varès parât e si voltà svelt viers la jeep. Si inçopedà, al pierdè i ocjai. Daûr di lui il davoi dal galop si svicinave veloç come une lavine. Masse svelt, al pensà terorizât, tant che la jeep e someave slontanâsi svelte compagn.
Al alçà i voi farcadiçs viers il cîl e la ultime robe che al viodè a forin lis nulis neris dal temporâl che si sbassavin viers di lui come une mandrie feroce.
Simel al vuidà la jeep fin al bush, daspò la bandonà. Dret, il camesot ros che al svoletave, si indreçà viers l’incjampament.

domenica 6 novembre 2011

Il cartel par l'Udin cul Siena

Ve chi, vuê o ai decidût di lassâ in bande lis batudis e doprâ il cartel pe partide par sostignî Guidolin, par che la strade che al à sielt a mi mi plâs. Joibe si saveve che vevin di pierdi, al jere clâr. Si podeve pierdi pe classifiche e par che di sigûr, se e je une cualificazion a la Europa League di cjolisi, no la si cjoleve in cjase dal Atletic Madrid. Sigûr, al da fastidi cjapâ cuatri papins, e viodi une scuadre che e va in campo come se e ves za pierdût e che la uniche robe che a fâs al è cirî i dribbling. Fabbrini, Ekstrand, Pereyra, Battocchio, Doubai... a jerin fastidiôs. Ma lu erin come che lu sarès stât cualsisei zuiadôr che al cjape la bale tai pîts e la piert, e dopo magari no i côr nancje daûr. E al vûl dî ben pôc che a son zovins. 
Tal balon un dribbling al è tant,. doi a son masse, soredut se no tu sês bon di fâju.
E alore va ben cussì, che a cjapin cuatri papins e che a comencin a capî che no tu puedis stâ a spietâ che l'arbitro ti sivili o che chei altris a fasin autogol, par segnâ.
E alore ve chi, il cartel di vuê al è dut par Guidolin, che al ledi invant cussì, che al va benissim.

martedì 1 novembre 2011

Il cartel par l'Udin cul Palermo

Dopo la partide cul Napoli, brutute e zuiade un pôc come se a fossin cussients che prin o dopo bisugne pierdi e se si pierdeve a Napoli nissun al diseve nuie (e difat cussì al è stât) no jeri sigûr che l'Udin al tornàs a zuiâ cun chê ande di prin, ven a stâi, zuiâ par vinci, simpri e in ogni câs
Di Natale di sigure al è un grant e lu disin ducj, no stoi chi jo a tornâ a dîlu.
Però forsit une robe in plui e va marcade. Ven a stâi che al sedi si un gran zuiadôr, ma che al sedi ancje un dai pôcs, forsit l'unic, che al à la mentalitât juste, di grande scuadre, e no di provinciâl, tal sen bon dal tiermin.
Di sigure al è par che Totò, aromai, lu cognossin ducj. I arbitros, la int, chei altris zuiadôrs e tifôs... Nol è un cualsisei dai tancj. Però lui al va in campo cul cjâf di un che al à di vinci simpri, che al tire cence fastidis, ancje sbaliant, che al prove a zuiâ la bale ancje cuant che un altri al varès sielt di no zuiâ. Insome, al è un leader. E di leader, par rivâ lontan, nol covente mai dome un. Chest an no sai cui che al pues sedi un di chescj, in bande di Di Natale. Un Handanovic, par dî, nol sarà mai un di chel tipo di zuiadôr. Par caratar e personalitât. 
Forsit Armero... forsit, ma forsit ancje no. L'an passât, a mi mi dave la impression che un di chescj al fos Inler, e jessint che cuant che al zuie, a Napoli, la scuadre e je plui scuadre, al devi jessi propit cussì.
Boh, viodarìn, se al salte fûr. Par cumò, pene che al è totò, ancje chei altris a zuin miôr, al è un fat.
Cjalait Basta, ce partide che al à fat îr e ce disastro che al veve fat a Napoli.
A ogni mût, ve chi parsore il cartel pe partide, in pûr coce-style, che se a metevin dentri un pâr di goi, a fasevin il zuf pardabon, cul Palermo dal simpaticissimissim Zamparin...
Ben cussì. E cumò vie indevant, viers i 40ponts... (di fâ ducj tal ziron di andade, al è clâr!)

domenica 23 ottobre 2011

Il cartel par l'Udin cul Novare

Sì, e je vere. No soi propit in vene vuê, nancje di cjalâ la partide, e difat no la cjalarai.
Ma il cartel al è il cartel, ancje se vuê forsit, se l'Udin al à voie di començâ a pierdi, e je la zornade juste, jessint che ogni pierdite, vuê, e sarà plui lizere.
Îr di sere o ai distudât la radio a un cuart d'ore de fin de partide de juve, e no pensavi propit che no vincès.
No sai se vuê l'Udin al rive adore a fâ ponts, viodin. Zuiadôrs che a àn polsât 'nd è. Se nol zuie Di Natale - facil, jessint che di sigure nol à voie di pierdisi il Napoli - o vin un Torje che al è ore che al tiri fûr i tabars e un Floro che ancje se al à corût, joibe, voie di fâ 'nd à sigure. E al è fuart, lu vin viodût.
Alore sperìn ben, di jessì cul cjâf alt, dopo de partide.
Se cussì al fos, al sarès dut biel, cuntun unic difiet... dopo tocje rindisi: si incacuarzaràn dal Udin, almancul par une setemane...

Notis:
il cartel scartât, cheste volte, che al jere sigûr plui biel - come calembour - ma lu cjatavi mancul impuartant, dal pont di viste dal significât, al jere: "NO VARÊS mico di vigni a vinci?"
Jo vevi pensât a NO VARAn mica di..., dopo gno pari al veve vût la idee di Novarês, ma ae fin al è miôr stâ cui pîts par tiere (si, lu sai che o vevi di scrivi tiere, e no tiare, ma al stadio a disin tiAre, e jo o ai sielt di jessi popolâr pluitost che coret. :)

giovedì 20 ottobre 2011

Il cartel par l'Udin cun

Al plôf... e jo no vevi cuissâ ce ispirazion, par il cartel di vuê. 
Si podeve la a cirî alc sui colchoneros, ma boh... dopo no la capìs nissun e alore mi soi limitât dome al Atletic, fin masse facile, come soluzion. Pluitost, sperin che e sedi vere che i nestri a corin.
Insome... Floro Flores a nol zuie di une vite, Armero domenie al à polsât, Pinzi al à zuiât cuasi un timp di mancul... A coraràn no? No mi displâs nancje che nol zui Di Natale... Ancje se al polse, une buine partide a pues vignî fûr istes, ancje se vuê no ai buinis sensazions, ma forsit al sarà dome par che soi cence dolçs di parâ jù intant che o cîr di viodi la partide in streaming... bon, viodarin! 

giovedì 13 ottobre 2011

Se sabide sês ator...

Vuê o soi a tocs e o zui di pigrizie, profitant dal comunicât stampe us invidi ducj sabide di sere a mortean, ancje se o dubiti che a mi sarà tornade voie di bevi une bire, par sabide, a podin simpri bevi une alcaltri...
Ve chi sot, il gno esercizi di cupie e tache:

RADIO ONDE FURLANE
SABIDE AI 15 DI OTUBAR 2011
FIESTE-CONCIERT
DI AUTOFINANZIAMENT
L’apontament si tignarà ai 15 di Otubar, a tacâ des sîs sot sere (18.00), alì de aree di Festintenda a Cjasielis di Mortean (10 euros di jentrade).
Ai 15 di Otubar Kultur Shock, Mellow Mood, Radio Zastava, Carnicats e tancj altris in conciert a Mortean a pro de “radio libare dai furlans”
Dopo dal sucès straordenari dal an passât, cu passe 1.500 personis e un grant numar di zovins, e torne “Viva Onde Furlane”, la fieste – conciert di autofinanziament metude adun de storiche emitente che si conferme une des realtâts culturâls furlanis plui seguidis e preseadis. L’apontament si tignarà ai 15 di Otubar, a tacâ des sîs sot sere (18.00), alì de aree di Festintenda a Cjasielis di Mortean (10 euros di jentrade).
I efiets dai tais pesants che la aministrazion regjonâl e à fat sui invistiments pe tutele de lenghe furlane si fasin sintî ancjemò, massime su chei che al è in prime linie intal promovi e intal doprâ la lenghe proprie dal Friûl. Cun di fat, cundut di cualchi piçul segnâl di cambiament, lis risorsis pes trasmissions radiotelevisivis par furlan previodudis des leçs regjonâls di tutele a son lontanis di ce che al coventarès.
La fieste – conciert e je duncje une rispueste a ducj chei che in Regjon a van dilunc cu la politiche di limitazion des ativitâts di tutele e di promozion dal furlan, setôr là che Onde Furlane e davuelç une funzion di prin plan no dome cu la sô programazion radiofoniche, ma ancje cuntune vore di altris progjets. Poiâ la radio, dut câs, al vûl dî ancje difindi une vôs libare e indipendente che e contribuìs al pluralisim de informazion regjonâl, cence dismenteâ po la impuartance che la emitente e à intal sburtâ lis produzions musicâls di chenti.
Nol è un câs, di fat, se ancjemò une volte “Viva Onde Furlane” e pues poiâsi sul contribût volontari di cetancj rapresentants de sene musicâl furlane e no dome. Cussì, sul palc de manifestazion, si podarà viodi un pôcs dai ultins nons di Musiche Furlane Fuarte (etichete di riferiment de radio) tant che Ulisse e i Ciclopi e Orchestra Cortile, che a àn vinçût lis ultimis edizions dal Premi Friûl, e i Mig 29 Over Disneyland che a presentaran la ultime produzion discografiche di MFF, o sei il cd “2+2 nol fâs 4”. A sunaran po ancje i innomenâts Carnicats, i spetacolârs Radio Zastava, i eletrics-ipnotics Arbeiter e i Mellow Mood, un dai grups miôr dal panorame reggae talian che pe ocasion a varan tant che ospit speciâl DJ Tubet.
Il moment plui spietât de serade al è però chel de esibizion dai Kultur Shock, grup american in stât di traspuartâ il public cul so miscliç potent di grunge, balkan e metal. Chê di Cjasielis, tra l’altri, e je la uniche tape intal stât talian de lôr tournée europeane.
Ae musiche dal vîf dai grups si alternaran i DJ sets di Gerovinyl, Green Beats, Tommy, Tunnel, Sister Blister, Abrasive, Stîl Salvadi, Notonlynoise e Hybrida: ducj protagoniscj dai dopodimisdîs e des seradis musicâls de radio.
Dal numar grues di telefonadis e di adesions za rivadis par mieç dai social networks, ancje chest an “Viva Onde Furlane” si presente tant che un event in stât di confermâ la grande poie popolâr che cheste radio e à simpri vût intai siei passe trente agns di storie. Un segnâl che ancje lis istituzions a fasaressin ben a tignî cont.
“Viva Onde Furlane” e je inmaneade de associazion “Lenghis dal drâc – Amîs di Onde Furlane”, nassude propite cun chê di meti adun iniziativis par judâ la “radio libare dai furlans”, cu la colaborazion dal circul “il Cantîr” di Mortean e cun Hybrida.

lunedì 3 ottobre 2011

Il cartel par l'Udinese cul Bologne

Eh sì, o soi un pôc lunc, a inzornâ chest blog. No sai nancje jo parcé. Ma par i inzornaments su la Udinese, no pues fâ di  mancul di fâju di corse e cun plasê. 
"Bravo mone" disarês voaltris, "al è prin in classifiche, sigûr che tu âs plasê!"
E invezit no, anzit, propit îr, leint ca e là e sintin la television locâl ca e là, mi soi rindût cont dal parcè che no furlans, cu la Udinese, no vinçarìn mai un caz di nuie. No podevi crodi che îr, dopo che jessi prins, vê zuiât ben, e jessi rivâts a fâ ben cun chel pôc che a si veve, a fos ancjemò int che si lamente.
E pûr, e jê.
Il biel al è che plui che une lamentele a somee int che i dâ cuasi fastidi che l'Udin al vinci, che al sedi prin, che al zui ben, e vie indevant. A somee int che come grifons no viodin la ore che al pierdi par podê saltâ sù cun "Jo lu vevi dite". Int che invezit di sei cussientementri contente e je fastidiosamentri contente.
Ma pussibil che no rivin a jessi un pôc inteligjents?
Pussibil che ancje di balon a capìn cussì pôc?
No si rive, propit, a saltâ fûr dal provincialism... o sin provinciâi dentri... nuie di fâ.
Ma lassin stâ dut chest.
Ve chi il cartel pe partide di îr.
Gno pari a mi à dit che no si capive masse, ma jo o vevi gust di fâ un cartel par Torje, parcè che ben o mâl, se al impare in premure, o crôt che al sarà un grant jutori par dute le scuadre e soredut par Di Natale, che îr, cun dut il ben che i vuei, jo in padiele i varès dât 6--, parcè che la bale e à di lâ dentri, cuant che e à di lâ.
Ma tornìn al Udin.
E je vere. Bologne e Lecce a son scuadris che a varan plens i coions a salvâsi. Cul Rennes e cul Celtic, se o piardevin, nol jere nuie ce dî, a vevin meretât. Ma a part chest, al sarès ore di finîle di pensâ simpri de bande contrarie. La Udinese di une volte, la Udinese "provinciâl", la partide di Cagliari e Milan lis varès pierdudis. Cul Rennes compagn, e cul Bologne, forsit, a varès rivât a concedi un paregjo in mischie al ultin minût. Invezit, l'udin al è deventât pôc provinciâl, in chest. Al paregje partidis che al meretave di pierdi, al vinç, parfin. 
I arbitros a comencin a viodinus come una semi-grande, e no come une piçule. 
Nus dan i rigôrs, ju segnìn. Nus condonin cualchi amonizion, cualchi fal.
Cuant che Di Natale al cjacare, in campo, nol è arbitro che nol stedi a sintîlu.
Nons come Badu, Benatia, Danilo, Basta, Torje... a comencin a zirà. A cjacarìn ducj di lôr e dal Udin.
Purtrop, i timps di stagjons come chês che al veve fat il Verone o la Sampdorie, cuant che a vevin vinçût un scudet, a son finîts. Dome une scuadre cun 20-22 zuiadôrs di alt nivel e une vore di bêçs daûr a pues competi su la lungje distance par il tricolôr. Une Udinese come chê di l'an passât, indiscutibilmentri - par un mês o doi - il miôr balon de serie A, a pues pensâ a un cuart o tierç puest, no di plui.
E pûr, no sai se cierts tifôs si son inacuarts, la Udinese di chest an, se lis promessis di chei 5-6 gnûfs a vegnin mantignudis, no 'nd à plui 11 titolâr e il rest robe scarte. O vin 15-16 zuiadôrs che a valin compagn. Se nol è un al è chel altri. 
Cui podial permetis di gjavâ un Asamoah, o un Pinzi e ficjâ dentri un Badu? E in difese? Si fâs mâl Domizzi, che al pareve jessi deventât insostituibil, e Guidolin ti tire fûr un Ferronetti! 
Insome. Stin contents e cjalin cheste Udinese come che a va cjalade. E je une buine scuadre, cun 15-17 plui che bogns zuiadôrs e un campion. A vignarà la ore che o pierdìn, ma fin cumò, lamentâsi, al è di stupits. :)
Ve chi ancje une altre foto, va:

martedì 20 settembre 2011

Parchegjâ a Lignan...

Cjalait chestis bielis strissis pedonâls, a Lignan.
Ce viodêso? Al mancje alc, vere?
Sì, al mancje che se tu sês in carozele o tu âs il frut piçul tal passegjin, li, al è il marcjepît e par podê straviersâ la strade tu scuegnis lâ plui indenant, e fa il zîr, fûr des strissis, e dopo, se propite tu i tegnis, tornâ parsore. (Di chê altre bande, comunque, al è ancjemò un marcjepît... cun buine pâs des barieris architetonichis).
E pûr Lignan al un Comun turistic, nomo?
Al varès di stâ atent a chestis robis, soredut in chest câs, che al à pene pituradis, lis strissis.
Cun di plui, se no sês convints de scjarse atenzion, di cui che al à decidût di piturâ lis cheste "zebre" cul cjâf di une gjaline, us mostri lis strissis ancje di une altre posizion.
Ce vedêso?
Us al dîs jo. Lis strissis a li àn metudis propit pene daûr di une curve!
Ven a stâi che lu savin, lis machinis a varessin di lâ planc, ma a savin ancje che no je vere. E alore, ogni volte che o viôt cualchidun che al tire une frenade parcè che si cjate un che al stravierse la strade, subit daûr di une curve, a mi domandi: "ma nus cjolino pal cûl?"

Sì, parcè che si come a Lignan o voi di spes, o sai ben cuâl che al è il motîf che al fat piturâ strissis pedonâls a coion vie, e no i vûl une lauree par capîlu. Al Comun di Lignan i dâ une vore di fastidi che la int e parchegji a gratis. Lassin stâ i presits dai parcometros, lassin stâ il fat che a ju tegnin vergnognosamentri vierts fintremai a trê di gnot, lassin stâ la lôr politiche tignî impegnade une vore di int a fâ multis par "divieto di sosta" o ticket scjadûts (e uno vore di mancul, invezit, par viodi chei che a van a robâ in spiaze, o tai apartaments, o ta lis machinis).
Lassìn stâ dut chest.
Provait a viodi, però, cemût che 'nd àn piturât lis strissis dai parchegjos gratis chest Unvier passât.
Anzit, us al fâs viodi jo, cun cheste imagjine chi in bande.
Chest al è il standard di cemût che a àn piturât lis strissis dongje des jentradis. In pratiche, dulà che 'nd jerin 3 puescj a son deventâts 2, dulà che 'nd jere 2 uno sôl e ogni tant, par rivâ a fâ sparî un parchegjo, ce ano pensât? Ma sigûr! Di piturâ strissis pedonâls e se par câs al vanze un metro, che no si sa mai che al parchegji une machine piçule, metin pûr un bidon par lis scovacis in plene curve, cussì che no si sa mai che a tirin sot ancje cualchi disgraciât che al fâs la racuelte diferenziade.
Cemût?
A àn piturât i parchegjos in cheste maniere par no dâ fastidi a chei des cjasis cuant che a vegnin fûr cu la machine? Ah sì? E alore, la mê domande e je: parcé i parchegjos a paiament, chei cu lis strissis celestis, a son tacâts!?
Insome, jo soi un che no si è mai fat fastidis par parchegjâ la machine lontan, e mi plâs cjaminâ. E par me nol è sigûr un probleme. Però mi dâ fastidi jessi cjolt pal cûl, e cussì, ogni volte che o viôt cualchi mari che e riscje di jessi cjapade sot par meti une multe di plui in casse dal Comun, a mi zirin... e cussì us al ài dite ancje a voaltris.
Mandi!

domenica 18 settembre 2011

Il cartel par l'Udinese cu la Fiorentine


Vuè no podevi crodi a la formazion dal Udine.
Anzit, o pensavi di vê capît mâl. Basta di une bande  e Pasquale di chê altre. Okay, mi soi dit.
Guidolin al è un grant. Armero e isla, che joibe cul Rennes a jerin fûr fase, in panche. Brâf il guido.
Podopo, però, o sint che al segne Isla. E che caz.... in dulà l'ajal fa zuiâ?! A centrocampo!
E alore, cence savê, mi soi dit che il cartel, che o vedês e che jo o vevi pensât e scrit ancjemò vinars di sere, al jere propit vêr.
Joibe, cul Rennes, pardide fortunade ma disastrose, par zûc e falopis, si viodeve che un centrocampo cun dubai e badu, cumò come cumò, nol è in grât di tignî sù il rest de scuadre. E alore, Pinzi al devente zuiadôr di fonde. Anzit, i coventaressin doi, come lui.
E ve li che il Guido al à inventât un altri centrocampist di chei che a corin come mats par novante minûts: Isla!
Bon... Nuie ce dî. Il mago nol è lât al Villareâl... Il vêr mago al è Guidolin.
E Fuarce Udin, e sperìn di no colâ mâl, dopo chestes trê partides vintes...

giovedì 15 settembre 2011

Il cartel par l'Udinese cul Rennes

No, sperìn propit di no jessi Babbo Natale, usgnot. Dut al plui, Di Natale, se propit o volìn zuiâ cu lis Rennes...
Bon, insome. O sìn. O ai une riunion, ma o mandarai vie ducj tor siet e mieze, cjase di corse, nuie friuli doc, nuie alenament, nuie gjelato al mâr, trê biris tal frigo, cjase di bessôl e vie, mi cjalarai la partide.
Secont me vuê al segne Abdì... no sai parcè...
Boh, starìn a viodi.
Fuarce Udin!

martedì 6 settembre 2011

Il cartel par l'Udinese cun l'Arsenal

CUL! 
PUTANACE CHE SCROVE.
E no, il cûl, no lu vin vût, nuie ce dî.
Va ben, va ben... o soi un pôc tart, cul cartel de partide cun l'Arsenâl, ma par completece ve chi che lu met, juste par fâ come che al à dit il Guido: cjapâle come la ultime partide de passade stagjon.
Cumò spietìn chês gnovis, ven a stâi la prime partide di Europa league, ca di un setemene...
Ce dî... jo soi content, a diference di ducj chei altris tifôs.
La scuadre mi plâs, o viôt biele int e biei zuiadôrs. Ca o son ducj che si lamentin che no vin cjolt chel o ches altri... pos jessi, ma a mi, a dîle dute, Dos Santos mi steve altamentri sui coions e no lu varès volût nancje se al paiave lui, par vignî ca (cun di plui chel li a Udin nol vignive, che no 'nd è vonde discotechis), chel altri çus dal Barcelone, che dopo a no sai nancje se al è finît ae Rome, al veve tante braure ma masse mierde...
Torje, invezit, mi plâs. Al à çate e al côr. Chel li, tu viodarâs che si cjape il puest di titolâr e ancje al va in dople cifre di goi. Par rest, fun châ altre dî, Badu al jere "no avonde" ma cun la partide cu l'Arsenâl ai voie di viodi cui che al è bon di dî che nol è un bon zuiadôr... al à dome di fâsi... pussibil che la int no si visi di trop che o vin spietât int come asamoah, par dî un a câs.
Podopo no mi displâs nancje Danilo, e nancje Neuton... cun dute la mierde che i àn butât parsore... Insome, in champions no larìn... ma la scuadre par gjavâsi plui di cualchi sodisfazion, jo la viôt.
Si dopo a tornin in ca Basta e cuissà... chel Barreto che o vin cognossût... 
Starin a viodi.
Par intant... Alè Udin!

domenica 22 maggio 2011

Il cartel par la ultime partide: Udinese - Milan


Lu sai, lu sai... nol è cui sa cè, il cartel, ma insome, e je la ultime zornade di campionât e ancje lis ispirazions a son strachis. E i ogni câs o ai evitât ogni riferiment ae champions, chest colp, per che soi abituât a lis ingenuitâts, cul Udin, e mi visi ancjemò chê partide che ducj o savin, dulà che chei dal Barcelone, cul cûr in man, no àn podût fâ di mancul di segnâ.
La Lazio, lu savìn ducj, e vinçarà, par che al è normâl, par une scuadre motivade. Il Milan, se al à voie di fâ afârs cul Udin, un al podarès pensâ, al à di lassâi il pont, ma la realtât e je une altre. Par l'Udine, la Europe, e je une grande robe, ma par i zuiadôrs plui fuarts dal Udin, che a laràn justementri vie a fin dal an, no je cussì.
Se o cjapìn la champions ducj i zuiadôrs a costaràn di plui, parcè che nissun al mole una champions par là intune scuadre blasonade che no le à, si no par bêçs. Ven a stâi che no je dite che il Milan al vedi istruzions di zuiâ cun calme... Ciert, se jo fos un zuiadôr dal Milan, no ven sigûr no a fâmi mâl a Udin par une partide che a no vâl nuie, e il pidut lu tire vie volintîr...
In ogni câs, o varès gust di viodi un 2-2, un gôl di totò, un di sanchez e une doplete di inzaghi... ma fate tal ultim minût eh... :)

A proposit, 'nd è int che a ven da la Argjentine, par viodi l'Udin, e alore, ve chi, doi cartei!

mercoledì 4 maggio 2011

Simone Marcuzzi presentât di un Salvadeat

Une gnove piçule piçule, juste par dî che vinars di sere, ai 6, o sarai in Feltrinelli a Udin, a presentâ il libri di Simone Marcuzzi, "Vorrei stare fermo mentre il mondo va".
Us ai za dite alc di chest libri su chest blog, e ancje su chel par talian, o ai plasê, prime di lâ a fâ serade ae fieste de bire, di presentâ Simone.
Ae fin, si sa, di spes lis presentazions di libris a son standard, ancje par che, come che al disevê Zappa al rivuart la musiche (che cjacarâ di jê al è come balâ di architeture) fevelâ di un libri al è come cirî di lei un la man a un madrac (sì, le ai inventade cumò, ma al jere par rindi la idee).
Difat, cun Simone, autôr che o ai scuviert di no vê dongje di me dome la passion pe scriture, ma ancje chê pe musiche e pe leture - e parcè di no, ancje il gust di savê cjolisi in zîr cuant che al covente - a si cjacararà dal so libri, ma ancje di altri.
Ce saio... di libris in gjenerâl, di narative, di leteradure, di musiche, magari ancje di balon... viodarìn.
Se o passais di chês bandis e vês di passâ mieze ore prin dal aperitîf o de cene, aes 18.00 o sin a li, al plan di sore. Si no... si cjatin ae fiete de bire al Fiera. :)

sabato 23 aprile 2011

Il cartel par Udinese Parme

Lu sai... lu sai... al sarès stât miôr un cartel che al tiràs dentri il presiut, jessint che al è il derby dai presiuts di cualitât, ma pe partide di vuê o vevi voie di scrivi alc su Guidolin, che propite, pe maniere cemût che al sta lavorant, une Champions in regâl se meretares tant che i zuiadôrs.
Vuê intant sperìn ben... che a mi, chel Amauri alì, mi fâs une vore di pôre...
Al è bulo... ma a son bulos ancje i nestris... :)

giovedì 21 aprile 2011

Emozions di ingjustri e no dome chel

Viodìn se o rivi adore a tornâ a cjapâ in man chest blog. Tant par començâ us lassi cuntune gnove di sabide stade. E jere la premiazion dal concors par poesiis par furlan "Emozions di ingjustri" di Basilian e o jeri premiât cul prin premi. Benon, brâf, o disarês voaltris. E o soi content, une vore, us disarai, ma dome pe vincite, ma par altris robis, che us conti, cussì, tant par fâ une cjacarade.

La prime e je la poesie, in gjenerâl.
La int, ogni tant, mi dîs "tu che tu scrivis poesiis" o ancjemò piês, "tu che tu sês un poete"...
E jo, ogni volte, un pôc o rît, a chês peraulis.
Jo, di poesiis, i rispuint, 'nt varai scritis, te me vite, sì e no une desene, forsit vincj, cjo.
Al è clâr, pensîrs poetics ju scrîf, a seconde dai moments , une volte ogni doi dîs, ma la poesie, e je une robe che i vûl studiât une vore, prime di butâ jù une, e vûl pensât une vore prime di rivâ a tirâ fûr un viers che al sedi bon, che al sedi adat, che al sedi metricamentri a puest. Che dopo, al sedi ancje origjinâl... ben, chel al è pratindi masse. Cun di plui, i vûl ancje studiât une vore par rivâ a preseâlis, lis poesiis. 
E cussì, cheste poesie, e je une di chês 15 o 20 che o crôt che a sedin vonde buinis, e par chel o ai gust che e sedi stade ricognossude. I ai metût plui o mancul un mês, par scrivile, zirant e voltant lis peraulis e cirint di partî di une imagjine, e rivâ a cambiâ, tal cors dai viers, l'aiar (il mood), fasintle passâ dal simpatic al dolorôs, rivant al finâl dal timp lât che mai al torne. 

Po dopo, seconde robe che volevi contâus, e je la sô nature di poesie sintude, personâl, privade, che però o volevi cirî di rindi in maniere gjenerâl. Il Re al jere gno barbe, persone une vore particolâr, une vore facile di viiodi, ma une vore dificile di capî. Par tancj, al finive sot la categorie dai "mieç mats", dai borderline, ma par chei pôcs che a rivavin a lei daûr de aparince, al jere une persone uniche, dificile di dismenteâ, ancje cence vê nuie a ce fâ cun jê, si no une batute o un mandi, passant pe place di Sclaunic. 
Insome, al è stât biel, a part mê mari e gno pari, che al jere prevedibîl, viodi ancje altre int che si è emozionade, (jo comprendût) intant che o leievi la poesie. Mi à fat pensâ al podê des peraulis, e parcè di no, ancje de lenghe. "Il Re" e je une poesie che no sarès mai podude nassi par talian, ancje se o pensi di rivâ adore a dominâ ben ancje chel, come lenghe. E pûr, il podê vêr des peraulis, lu ai cjatât tal furlan.

Us al à lassi chi sot, cheste poesie. 
Intune cierte maniere al è un salût a gno barbe, e speri che a chel che al passe par chi i plasi.

IL RE



Ti viôt ancjemò,
In pîts su la puarte a cjalâ la place,
Simpri cun chê gjachete,
                              [sporcje,
Che e steve sù di bessole.


Ti viôt cu la cjiche che e dispetene l’aiar
                                                    [in bocje,
                                                         [cun mancul dincj che un piron.
E zulugne o cialis, la barete di lane simpri intor,
Come par dî a ducj
Jo no soi di chest mont, ni di un altri.


E sec, cantesemât, ti viôt che tu ciris di mostrâmi
Che di ce che al è stât e al vignarà
                                                  [cumò,
Tu tu sês il Re.


E ti viôt,
                      [come cumò
In chê matine di Mai, involuçât tai linçûi,
Che a fature a rivavin a platâti
              [il mâl.
Fevelâmi cence peraulis
Come un frut che al cîr di spudâ cuintri lis stelis.


Ma jo no ai volût vioditi
                               [lâ vie
E cumò,
                                [barbe,
Che tu âs traviersât chê puarte
                                                    [cence clâf o mantiis
Mi pâr di vioditi, fer su la place,
Ma al è dome un ricuart.

sabato 9 aprile 2011

Il cartel par Udinese Rome

Masse cjalt vuê par stâ cjase... ma cinc minûts par chest cartel pe partide scugni cjatâju
ancje se çuet, vuê speri propit che i fasìn il cûl madûr a chei sassins zâi e ros :)

domenica 20 marzo 2011

Il cartel par Udinese Catania

Par cumò, e bute ben... ma no la viôt tant ben...
Sperìn di puartâle fûr va...

domenica 6 marzo 2011

No fâ scherçs, eh... il cartel par Udinese - Bari


Viodin se cun meti sù il cartel pe partide cualchi minû prin che e tachi al puarte ben o mâl...
Ah.. sì, lu sai che la grafie e je falade, ma o ai scuegnût mediâ jenfri coretece e comprension... dai tifôs!
:)

giovedì 3 marzo 2011

Su la Gazete di vuê...

Vuê un post di corse, ma di gust.
Dopo il 7 a zero a che puar disgraciâts dal Palemmo, che a àn la sfighe di vê par president un che al à la umiltât e il rispiet di un çus, al somee che ducj, ma propit ducj, a vedin simpri tifât par l'Udinese.
Udin di ca... Udin di là...
La miôr scuadre, il miôr calcio... e bla bla bla...
Fin chê altre dì, invezit, nus cagavin tant che un stitic, ancje se l'udin al zuiave ben, e al vinceve.
A dimostrazion di dut chest cjacarâ dal Udin, no pues no segnalâ la Gazete di vuê, che in prime pagjine e vise di un articul su Udin (la citât) e dentri a nus fâs lei un biel servizi, che o cjatâis in rêt e o podês lei fracant su la imagjine chi parsore. Il servizi, tra l'altri, al è une vore ben fat, e par une volte a cjacarin di robis che a àn un sens e che a son il nestri valôr vêr. Si cjacare di Onde furlane, de int, dai campions che - dutcâs - a son campions ancje come personis, e no dome intal sport che a fasin.
O varês capît, però, che la robe plui fighe di dutis e je la imagjine tal mieç dal servizi. Ven a stâi me pari e mê mari, muse dure e barete fracade, che a mostrin il cartelon, rigorosamentri scrit par furlan.
Cartelon che, se si visais, lu vevi scrit cuant che lis robis no levin masse ben, a  inizi campionât. E no dome par i risultâts (fininle cun chiste comedie des cuatri sconfitis, che ancje che altris a àn pierdût partidis) ma ancje par il clima che al someave no jessi dai miôr... int che a bruntulave... stuarzeve il nâs...
Insome... O soi content di jessi rivât su la gazete.
A son trê agns che i cartei, par sielte, ju scrîf simpri par furlan. E al è stât plui facil rivâ a fâju viodi a dute Italie, che viodiju sul Menzognero Veneto... E chest, al è dut ce dî!

mercoledì 23 febbraio 2011

Frank a Pradaman?

Une piçule gnove in premure, prime che mi indurmidisi denant de tastierrrrrrrrrrrrrrrrrrrrrrrrrrrrrrr
No, o scherçavi :)
Us stavi disint che usgnot, miercus 23 di fevrâr, met câs che no vês voie di stâ a cjase a cjalâ la champions, met che no vis voie di stâ a sintî bruntulâ la femine o l'om, e met che a sîs a un tîr di sclope di Pradaman
Ben po, a podês vignî a fâ un scjampon a cjolimi pal cûl me, che o soi li de biblioteche, aes vot e mieze di sere, a presentâ i doi libris di Frank Spada, il pseudonim plui cognossût di Udin.
Se no savês di ce libris che o stoi cjacarant, podês dâ un cuc achi, dulà che si cjacare dal prin (Marlowe ti amo) e dal secont (Dimmi chi sei Marlowe).
Se a capitais di chês bandis, almancul, a rivarês a scuvierzi alc di plui di chest benedet Marlowe...

domenica 20 febbraio 2011

Il cartel par Udinese Brescia

Nie di fâ! Il cartel di vuê la veve nasade che chei doi a chi no rivavin adore a butâle dentri... e di fat, tant impegn e pocje robe concrete. Ma al va ricognossût al Bresse che al à zuiât une vore ben e metintjale dute... pont meretât. Di positîf che zapata si è tornât a visâ di jessi un mâc... poben, larìn a vinci a Palemmmo!

sabato 5 febbraio 2011

Cartel par l'Udinês cu la Sampdorie

Cartel metût adun in extremis, vuê. Dopo il pari cul Bologne, che jo cjati une vore bon, jessint che chê li e jere la miôr scuadre che o ai viodût intes ultimis partidis, sperin che o rivedin a dâi un colp di gracje a chei disgraciâts de Sampdorie, che puarets, mi fasin ancje un pôc dûl, ma che al sarès ancje il câs di tornâi la eliminzion de cope Italia.
In ogni câs, par vuê, il cartel al invide a tigni lis alutis bassis e no montâsi il cjâf. 
E sperìn che l'avionut Di Natale, vuê, al torni a svolâ, che al à une vore dibisugne.

mercoledì 2 febbraio 2011

Il cartel par Udinese Bologne


Purtrop vuê al pâr che il cartel nol puarti ben
Par cumò... sperin di gafâ almancul un paregjo, ma mi pâr che no segnin nancje se o stin li dute la gnot..
Pazience... e invezit no!
Ve chi che o vin paregjât!
Benon!
Domizzi salvadôr!
Publichin va, che no si sa mai...

giovedì 20 gennaio 2011

Il mieç just par lis vueris justis

Chê altre dî o vevi domandât al Dree se ancje chest an l'Arlef e faseve i calendaris dai Gnognosaurs. Purtrop no, e ancje se o sai che lis risorsis a son chês che a son, no soi rivât a stratignîmi di porconâ, in sens figurât, e di manifestâ il me fastidi.
Parcè? Disarês voaltris, nol sarà mico chest il probleme.
E je vere, us doi reson, nol è difat un probleme. Però e je une cuistion di marketing, o miôr, di mieç.
Jo o soi vonde bastart, cuant che pensi di jessi tal just
In chest câs, il just, al è chel di difindi la marilenghe, ma no tant in fat che e je la mê, cuant in fat di difese de biodiversitât gjenerâl dal mont. In chest câs jo la pensi come che cualchidun altri al pense de frice: "ogni lasciata e persa!"
Insome... fasintle curte, o ai pensât che par difindi cheste vision, bisugne sielzi i mieçs juscj, e secont me, il calendare dai gnognos (ma a podevin fâlu ancje cu la pimpa, cun berto lôf o cu lis winx che a cjacarin par furlan o inventant un mago e clamantlu Harry il Pote) al jere un imprest formidabil, come marketing a pro de marilenghe. A son bielis lis publicazions, i saçs, i libris... sigûr, ma no coventin cuasi a nuie, in fat di impat dulà che la marilenghe si va pierdint.
Il calendari al è, come che disin i manuâi, un strument che:
  1. al reste devant dai voi par un an intîr
  2. a si lu cjale simpri, dilunc chel an
  3. a lu cjalin ancje chei che no lu àn, anzit, soredut chei
  4. al è compagn, inte struture di fonde, par dutis lis lenghis e culturis (okay, va ben, in Cine e Gjapon no)
L'an passât, che o vevi metût il calendari in ufici, ducj i fruts che a levin sù e jù, ben o mâl, a la fin dal àn scolastic, a savevin cemût che si scrîf joibe, o Avrîl o Zenâr, e no je propit une robe di butâ vie. Cun di plui che l'abinament jenfri fumuts-lenghe, al trasferive par osmosi la simpatie dai prins ae seconde.
Cussì, o pensavi, che no furlans, par solit, o sin propite çus, cuant che si trate di doprâ i struments un pôc bastarts dal marketing e dal bigulâ chei altris (par che di chel, si cjacare).
Dit chest, simpri a proposit dal discors di marketing e di mieç, us invidi a cjalâ, se no lu vês viodût za in rêt, chest fenomeno de comunicazion odierne, metude cun inteligjencie al servizi di cualchi buine cause.
Cjalaitlu, e dopo pensait a trop che al è rivât, doprant il strument de ironie e de satire, a riassumi la situazion in maniere gjornalisticamenti buine, sintetiche e incisive.

venerdì 7 gennaio 2011

Se no tu âs un caz di fâ il sabide di sere

Alore. Cumò, ma propit trê minûts fa, o vevi in man un cd.
Un cd di un un grup furlan, che mi è rivât dongje dal pari dal cusin da la fie dal cugnât dal cusin di une che e je a vore cun me. "Sint mo tu" mi dîs "Tu che tu sês simpri picjât a sintî musiche e che tu cognossis ducj chei grups dal caz che tu sintis dome tu e che tu scoltis di dut"
E jo: "Eh?"
E jê: "Sì, cjape chi chest cd che ma lu à dât il pari dal cusin da la fie..."
"Bon bon o ai capît!"
"Eco dai, prove a sintîlu"
"Parcè?"
"Eh parcè che il pari dal cusin [bla bla bla] al dîs che a son bulos, ma magari tu tu capissis di plui"
"Ah bon, dâmi chi, va"
E alore ve chi che o volevi butâ ju dôs riis su chest EP (Reflections), fat di cinc cjançons dai Rue Blok.
Us disarai che i prins doi tocs no mi vevin impressionât, ma i ultins doi, pur jessint une vore derivatîfs, ma al è normâl, no mi son displasûts. Anzit, ae fin a concuardi cul pari dal cusin de fie [...] e us dîs che a son bulos.
I mancje dome di cjatâ une vie compositive plui personâl e par cè di no, alc di bon sperìn che a rivin a fâ.
A chi podês viodiju al Cormôr, ma par sintî i tocs al è miôr che a vais sul lôr myspace:

A ogni mût il titul di chest post a no si riferìs a chei puarets dai Rue Blok, che no àn colpe, ma a alc altri.
Il titul dal post al è dut par Checo. Ops, scusait, o volevi dî Francis.
Sì, par che cinc minûts fa, intant che o vevi in man il cd che us cjacaravi doi minûts fa, mi è rivât un sms di Francis. Viôt che doman o torni a tacâ, fâmi reclame.
Sì, parcè che doman di sere, aes 9.00, al torne a tacâ Indigo, la sô trasmission su Onde Furlane dulà che mi tocje dîlu, ogni tant, al rive a meti sù tocs che al vâl la pene sintî, ancje par che dispes al va a pescjâ ce che di bon al jere intune decade sfigade come i agns Otante, dulà che però il dark rock al à vût spicis une vore altis, ancje se pôc cognossudis.
Doman di sere, mi a dit che al metarà sù i Japan.
Forsit Ghosts... forsit.
Viodarìn.
Anzit, sintarìn.
Anzit, sintarês, parcè che jo doman a varès di jessi in Toscane e no si cjape Ondefurlane.
Eco! Za ma lu viôt Francis che mi mande un sms: "Tu podis scoltâlu in streaming! Cjastron!"
E jo che i rispuint: "Macaco, o soi che a mangje une fiorentine, lassimi cuiet!"
Però, za che mi à pene dite di fâ reclam par Indigo e lu ai fat, mi cjapi il dirit di domandâi i toc dai Aphex twin... ma no che sabide achì, fasìn chê che e ven. :)
E ancje se no centrin nuie cula musiche di furlans, us saludi cuntun biel video incuietant, che us tegni jevâts di gnot :)


Ah, e se no vês un caz di fâ doman di sere, intant che in machine o stês lant fûr e i palpais la cuesse a la fiote in bande, meteit sul 900... dopo vê sintût la musiche di Indigo a podês fâi ce che volês... i larà ben dut!

giovedì 6 gennaio 2011

Une befane par prin cartel dal an


Ve chi il prin cartel dal 2011, e pensant a la detule che a viôt lis zornadis che a si slungjin o ai decidût di sperâ intun Di Natale che al comenci ben il 2011 cuntun pît di gale, sedi par elegance, sedi par... scjafoiâ chei pandoros dal Chievo, ancje se e je une scuadre che mi stâ une vore simpatiche.
Ma jo o ai simpri vût miôr la gubane... :)

mercoledì 5 gennaio 2011

Il me bon principi

 
E par chest an
Cirint di visâmi
Che no soi altri che un balon
Di un pâr di euros
Che al galegje sul mâr
E che un pinguin
Al podarès cjamina suntune gru,
O cirarai di intindi i dîs che a àn di vignî
Come une misture di chei che a son stâts
E no dismenteâmi mai
Che no esistin falopis
Ma dome stradis cjoltis
E che i unics cuarp celescj che o cognos
A son i puffos
E la uniche veretât
E dîs che mê none... podeve jessi une carriole