sabato 29 marzo 2008

Il cartel pa l'Udinese cu la Fiorentine


Lu sai, lu sai... o spetais il cartel par doman!
Doman a vierç la pescje, martars al è il prin di avrîl...
e jo ai fat un cartel a tema.
Mandi!

martedì 25 marzo 2008

La fumate clare dai ricuarts

Timp fa me mari mi à dât di tirâ ju cul compiuter, come ch'a dîs je, la fotografie ch'a viodês chi in bande. Sot me nono e me none, partint di çampe, podês viodi doi mei barbis e me agne. l'ultime da la rie, che cu la pipine in braç, a je propit me mari.
Lassant stâ i ricuarts che une foto di cheste fate a po vê, par me, ch'a soi nevôt, soredut cumò che i nonos no son plui, a stavi cjalant tropis robis che si rivin adore a viodi dentri une imagjine cussì.
Me none a è discolce, par ce che si sa che ta che volte nol pareve bon un om plui bas di une femine. Me mari cui lagrimons tai voi, par ce che a vuleve a ducj i coscj tignî su la pipine, ch'a no jere so, ma a jere lì dal fotografo. Me barbe, che a sintî me mari, ta che volte nol jere dome il plui picinin dai fradis, ma ancje il plui biel. Sa fossin cumò, cun che muse ch'a somee ch'a i vedin scliçât voi, nâs e bocje tal mieç, a saressin pronts a dî ch'al è un pôc malfat.
Me nono, a cjalâlu ben, si rive a viodi ch'a i mancje un toc di orele, ch'a jal'à taiade so none, intant ch'a i taiave i cjavei di piçul (cu la scudiele, of course)
Par no cjacarâ dai vistîts, bogns par une gnoce, e da la maniere che ducj, puarets, a cjalavin ta l'obietîf. Si sa, ta che volte fâ une foto al devi sedi stât come la in vuere: satu tu ce che ti podeve capitâ?!
Ad ogni mût, ancje se cumò, ancje jo ch'a no ai mai vût passion pa lis fotos, an fâ a centenârs, no rivi a cjatà nissune ch'a rivi adore a contâ tantis robis come ches ch'a contavin li imagjinis di une volte.
E no stêit dimi ch'a è dome cuestion di ricuarts. Jo pensi ch'a sedi ancje une cuestion di imagjinis ch'a àn alc ce dî. Une volte, lis musis e i cuarps e jerin ce ch'al restave da la fan e da la fature, a jere une dignitât e un plasè di vivi che cumò neancje tal sium a rivin adore a cjatâju. Chel ridi pene pandût, sui lavris di me none, al è il stes ch'a i ai vedût intor simpri, fin che a vût flât, cualsiasi disgracie o fastidi ch'a i fos capitât.
A je propit vere. No son dome lis peraulis, ch'a insegnin.

sabato 22 marzo 2008

Il cartel pa l'Udinese cul Livorno


Ca sa no mi môf a scrivi cualchi artucûl serio al devente il blog dai cartêi pa l'Udinese. Ad ogni mût no pues fâ di mancul di puestâ il cartel pa la partide di vuè.
Profiti par fâ i augurios di buine Pasche a ducj!
E visaisi che l'eeeeeeef si mangje a Pisssssssssssche! :D :D :D

sabato 15 marzo 2008

Il cartel pa l'Udinese cu la Lazio

Eco chi il cartel par usgnot!
Non si capis ben ce che si ul dî, ma miôr cussì. Un po' di misteri al va simpri ben.
A dî il vêr a varés vulût scrivi alc cun "Fel-Lazio" ma non podevi sigûr mandâ ator me pari a cjapâ pachis dai tifôs blanc e celests.
Mandi!

domenica 9 marzo 2008

Acrobat a la Cjase Mate

Duncje duncje... Vinars di sere soi stât a fâ un zirut a Blauç, a la Cjase Mate, just par viodi di chest grop ch'a sunave cover dai U2. No che jo a sedi un fan oltri misure di Bono e companie, ma ju âi simpri preseâts pe lis grandis robis che àn fat e pè une sorte di serietât ch'a ju à simpri cjapâts dentri de musiche e no de cagadis.
E po a la Cjase Mate o jeri stât a viodi ancje la cover band dai Litfiba e mi eri divertût un grun.
Ad ogni mût, cirin di fale curte. Dai Acrobat a vevi sintût cjacarâ ben, timp indaûr, e o jeri curiôs di viodi ce tipo di repertori a tiravin fûr, da la sconfinade produzion dai U2. Ben po, us disarai che soi stât une vore, ma une vore content.
Tant par comenzâ, cuant che ài viodût i cuatri dai Acrobat vignî fûr cun dos ghitaris acustichis, bas e batarie, mi soi dit: Ce Figade! Ancje parcè no soi un ch'al dinee il periodo eletronic da la band, ma dal vîf crôt ch'al sedi une vore dificil di rindi, chest tipo di sonoritât.
Invezit la part plui grese dal concert (ch'al è durât passe un ore e trê cuarts) a è state acustiche e jo âi preseât une vore.
Seconde robe: lis cjançons sielzudis. Disin pûr che, in bande di cualchi viaç, al è stât il vecju repertori a fâ di paron, e chest al è sigûr un ben. In fin dai conts chês a son lis cjançons che àn plui sinceritât.
Tierce robe, ch'a è stade une gradide sorprese, ancje se mi pâr che no ducj le vedin preseade, a son stadis lis numerosis scjampadis dal teritori "Ancje Tu": High and dry dai Radiohead, Given to fly dai Pearl Jam, Rockin in the freee world di Neal Young. Par no cjacarâ da lis citazions in tal jenfri di altris cjançons, come Once dai Pearl Jam o Gloria o Bullet in my head dai Rage e altris cjatadis di cheste fate
E o âi gjoldût ancje, e dopo o siari, a sintî ch'a si son permetûs il lusso (e soi sigûr ch'e cualchi frutine à stuart il nâs) di no sunâ la version vajose di One, ma la version country, targade Johnny Cash.
Bon, âi dit ancje masse. Sa us capite di sintiju sunâ da lis vuestris bandis vait a viodiju, ch'a no son une di ches cover band cun maniis di grandece e ch'a samein la brute copie da la brute copie dai origjinâi. Chest cuatri zovenos a omagjin le musiche ch'a ur plâs in maniere origjinâl e cun sintiment.
Mandi

Us lassi cualchi link sa vês voie di fasi un idee. Par sintiju, sul lôr puest

sabato 1 marzo 2008

Il cartel pa l'Udinese cu l'Atalante


Vuè propit non savevi ce scrivi, tal cartel, ma dopo ài vût un colp di volp e si che capitan D'Agostino al à clamât adun i tifôs o ài pensât di rispuindi!
E chest cartel mi plâs un casin!
Mandi a ducj!

BARAÇS


Di cuant ch’al veve cjolt la radio gnove Fredo si sveave simpri content. Al veve scuviert une funzion da la svee maraveose: al podeve meti su un cd e fale sunâ di ce toc ch’al veve miôr.
I plaseve cussì tant sveâsi scoltant “Mueç” dai Pantan, ch’al pontave la svee ancje di sabide e domenie. Di cuant ch’al jere lât a stâ pôc fûr pais, al podeve ancje alçâ il volum a manete, che tant la cjase plui dongje a lu cjalave di cincuante metris dal barcon da la so cjamare.
E propit chel barcon, une matine di fieste, sveantsi cu la cjançon di simpri, lu à cjatât dut plen di baraçs. Une robe di no crodi. Il veri l’ere sparît e un mûr di sterps a j gjavave vie dute la lûs. Si stavie forsit ancjemò sumiant? Vere ch’al veve bevût une bire di masse, la sere prin, ma chest nol displeave che cise spinose ch’a jentrave pal barcon!
Fredo si è russât i voi, gjavantsi i sgarbei cu l’ongule. Al à cjapât su il telefonin e al à cjalât l’ore. Undis e mieze. Putanace che miserie, al à dit ad alte vôs, nol pò sedi cussì scûr!
Al jere alc ch’a nol lave.
Al cjape e si bute fûr dal clip par lâ a viodi di dongje chei baraçs. Cualchidun al jere grues come une magne, cualchidun come une code di pantiane, ma a part lis spinis, spiçotis e di un colôr ch’al partave al ros, a jerin baraçs normalissims. Ma ce fasevino lì, a jemplai il zardin e la cjamare?!
Fredo di solit no si faseve tropis cuestions, ma a chel pont j è vignût un dubi: si viest di corse e al va a viergi la puarte denant, che ch’a dave su la strade.
Dut come simpri: asfalt, soreli ch’al poche, machinis ch’a passin e sioris ch’a van a Messe plui tart, par rivâ adore a sghindâ un pocje di predicje.
Bon, al à pensât, di sigûr no la doi vinte a chei baraçs. E cu l’intenzion di vierzisi un passaç fin ta la cjase dongje al à cjapât su lis fuarpis di vît e al à tacât a taiâ e cerpî dute che sassare di spinis, fin a rivâ adore a saltâ fûr di cjase pal barcon. Cussì al à tacât a mateâ, sbridinant e sbregant, fintremai ca nol jere stuf. Al veve fat su une sorte di galarie lungje un centenâr di metris cence rivâ a cjatâ la cjase di front. Ce mût podevie sedi?
Bon, miôr lassâ pierdi e lâ a cirì cualchidun ch’a i dedi une man!
Cussì al è tornât indaûr, distrigantsi gnûfs baraçs che za a tornavin a cressi.
Al à poiât lis fuarpis di vît ta la cassele da j imprescj, al à studât la radio e al à cjolt su il gjubot.
Cuant che al à viert la puarte, ch’a dave su la strade, al à scugnût fermâsi.
Si è cjatât denant un altri mûr di baraçs.


BARAÇS: VERSION PAR TALIAN