martedì 25 marzo 2008

La fumate clare dai ricuarts

Timp fa me mari mi à dât di tirâ ju cul compiuter, come ch'a dîs je, la fotografie ch'a viodês chi in bande. Sot me nono e me none, partint di çampe, podês viodi doi mei barbis e me agne. l'ultime da la rie, che cu la pipine in braç, a je propit me mari.
Lassant stâ i ricuarts che une foto di cheste fate a po vê, par me, ch'a soi nevôt, soredut cumò che i nonos no son plui, a stavi cjalant tropis robis che si rivin adore a viodi dentri une imagjine cussì.
Me none a è discolce, par ce che si sa che ta che volte nol pareve bon un om plui bas di une femine. Me mari cui lagrimons tai voi, par ce che a vuleve a ducj i coscj tignî su la pipine, ch'a no jere so, ma a jere lì dal fotografo. Me barbe, che a sintî me mari, ta che volte nol jere dome il plui picinin dai fradis, ma ancje il plui biel. Sa fossin cumò, cun che muse ch'a somee ch'a i vedin scliçât voi, nâs e bocje tal mieç, a saressin pronts a dî ch'al è un pôc malfat.
Me nono, a cjalâlu ben, si rive a viodi ch'a i mancje un toc di orele, ch'a jal'à taiade so none, intant ch'a i taiave i cjavei di piçul (cu la scudiele, of course)
Par no cjacarâ dai vistîts, bogns par une gnoce, e da la maniere che ducj, puarets, a cjalavin ta l'obietîf. Si sa, ta che volte fâ une foto al devi sedi stât come la in vuere: satu tu ce che ti podeve capitâ?!
Ad ogni mût, ancje se cumò, ancje jo ch'a no ai mai vût passion pa lis fotos, an fâ a centenârs, no rivi a cjatà nissune ch'a rivi adore a contâ tantis robis come ches ch'a contavin li imagjinis di une volte.
E no stêit dimi ch'a è dome cuestion di ricuarts. Jo pensi ch'a sedi ancje une cuestion di imagjinis ch'a àn alc ce dî. Une volte, lis musis e i cuarps e jerin ce ch'al restave da la fan e da la fature, a jere une dignitât e un plasè di vivi che cumò neancje tal sium a rivin adore a cjatâju. Chel ridi pene pandût, sui lavris di me none, al è il stes ch'a i ai vedût intor simpri, fin che a vût flât, cualsiasi disgracie o fastidi ch'a i fos capitât.
A je propit vere. No son dome lis peraulis, ch'a insegnin.

4 commenti:

  1. mi è capitade le stesse robe cjalànt les fotos di me none, cuant che o ai sgarfât tai soi scansei… O soi restade a viodi come o si sameìn… e mi è vignude une tristeze uniche al pensiar di piardi dut, les tradizions, les musis, i caratars……. E intune foto si scuviârç un mont!!!!!

    RispondiElimina
  2. Lis musis e i cuarps a jerin diferents, cjacaravin di plui di cumò, vevin di chês espression che ti contavin un mont. Chês di cumò a muerin subite dopo fatis za no contin un nie di plui di ce che si viôt. Isal masse, mancjin di dignitât.

    RispondiElimina
  3. jo o invidi ducj a notâ che Raffaele al è COMPAGN a so nono (a part le altece): jo lu ai viodût di persone, ma baste cjalâ l'avatar. :-D

    RispondiElimina
  4. Cumó al nevôt a i baste fâsi muardi le vorêle di cualchidune e le tradizion a continue:-)
    Po al puès lassâsi cressi i cjavei par platâ le vorêle sbregade come ch'al veve fat Garibaldi:-)

    RispondiElimina