mercoledì 19 dicembre 2012

Il strisson par Udinese - Fiorentine

Vuê o vin di vinci e no fâ monadis.
E speri propit che Luis la buti dentri,
Chel li al è bulo... e cumò che lu àn dreçât inmò di plui.

sabato 15 dicembre 2012

Il cartel par Udinese e Palermo

O ai decidût che...
O voi al stadio!
E diseimal che il strisson di vuê al è une figade, dai!

sabato 8 dicembre 2012

Blancjis mans di nêf

Blancjis mans di nêf
Sburtin lontan i arbui
Cence spostâju.

martedì 4 dicembre 2012

Li pignatutis par Udinese - Cagliari

Viodìn mo... no soi sigûr di vê voie di fâ lis piagnatutis, vuê, che tant 'nd àn za cjacarât un pôc ducj dapardut, ma jessint che - ben o mâl - îr al stadio mi soi divertût, (a part i pîts glaçâts) o fâs un sfuarç.

Duncje...
Us dîs subit che il 4 a 1 al è un pocut bausâr... Inte prime mieze ore, il Cagliari al jere organizât, cuadrât e ben metût in campo. E se al jere un che al podeve segnâ, forsit, al jere lui.
No parcè che chei dal Udin no i metessin impegn, ma soredut parcè che a jerin plens di pôre di falâ. 
Cui che al zuie a balon al sa ce che o intint... che sensazion che se tu provis a fâ alc al pues dome lâ mâl e se al va mâl dopo si larà dome in piês... Insome. La trancuilitât e je saltde fûr dome dopo il secont gôl, parcè che prin a jerin ducj come se a vessin mangjât il vinavil prin di tacâ!
Si che duncje...

Brkic 3/5: sul gôl nol podeve nuie, okay, ma disin che chê sensazion di sigurece no ta la da mai... ogni volte che al à la bale tai pîts o che a tirin lui ti fâs deventâ une vore religjôs, fasint dî di continuo: "odiudiudiu!". Ah, la gnove e je che îr la curve e à risolt il problema dal non cambiant di "brkic-brkic" a "zeliko-zeliko"... ma no che al sedi cambiât masse. :)

Angella 4/5: al è une vore biel viodi un zuiadôr che al sta cuiet, nol zuie, e cuant che e togje a lui al è in grât no dome di zuiâ ben (a part la capele finâl) ma adiriture di segnâ! Il zovin al à i numâr par jessi une buine alternative a Domizzi, ancje parcè che al à dome un pôc mancul di cativerie, ma al recupere cui pîts. 

Hertaux 3/5... insome... ogni tant, cuant che un dal cagliari al decieve di fâlu fûr, lu à fat fûr. Nol à zuiât mâl, ma se lu metin di front a un atacant di chei bulos, lu schiribice prin ancjemò che al disi il so non. Al pues cressi, per, e al cressarà.

Danilo. 4/5 E jere ore! Ancje lui, di cuant che o vin segnât, si è visât di dôs robis: di jessi brasilian (ven a stâi di savê doprâ i pîts) e di jessi un dai miôr centrâi dal campionât passât (che al à il sens de posizion e no i covente cori tant)

Allan 4/5 inte prime mieze ore ancje lui al coreve di ca e là ma cence mai dâ une bale in profonditât e pierdint plui di une. Dopo al à capît che cul rientro di Lazzari (che al continue a coventâ, par dâi al centrocampo geometrie) lui al podarès jessi chel che al dà fantasie, e difat... insome, un zuiadôr di cjoli al Fantacalcio a Zenâr!

Di Natale 4/5 Disêt ce che a volês, ma îr Totò al à fat une siore partide. Par gno cont il miôr in campo. Inte prime mieze ore al è stât lui a fâ capî che bisugne provâ e riscjâ (tirant di çampe) e po dopo al à zuiât come un vêr numar 100, cjolint balis e dantlis... di spes no si cjate ancjemò cun Fabbrini, ma a dî il vêr al è il mancul piês. Forsit bisugnave no vê dûl e, sul tre a zero, gjavâlu. Ancje se a fasevin fâ une corsute e Barreto, par dî une, no mi someave mâl.

Pereyra. 3/5 Mi è plasût mancul di altris voltis, ancje se ducj a cjacarâ bel di lui par il gol che al à cambiât la partide. Però visinsi che al è stât un regâl e che fin ta chel moment nol è che si lu veve viodût plui di tant,

Faraoni. 3/5 super imbambinît inte prime mieze ore, podopo al à capît di jessi bon di cori e cuissà, forsit pe prossime volte si inacuarzarà che al è bon ancje di saltâ l'om. A mi mi somee un che al à un grant potenziâl, ma emotivamentri nol è ancjemò pront a gjestî la partide. Cjalait la mischie cul gôl di Angella... al veve di butâle dentri lui tirant une sglavinade, e no chê fufigne li!

Badu 3/5 Cuasi ducj a dî che al jere tra i mancul incisîfs... ma jo invezit o dîs une robe: kilometros! Al à fat kilometros... al jere mo di ca e mo di là, e dopo al è clâr che al pierdeve balons che che il passaç plui just che al à fat al jere cinc metros lontan dal compagn... ma insome... al è un zuiadôr di cuantitât e se il centrocampo al à tignût no si pues no dâi un piçul merit ancje a lui.

Fabbrini 3/5, ma insome, al à ancjemò tant di imparà, e no dome par il fat di jessi simpri par tiere. Fintremai che i sivilin il fal al va ben. Plui che altri al da la sensazion che se al fases i moviments diferents al podares cjatâsi plui spes di front dal portîr... starin a viodi.

Pasquale 3/5. A part il gôl, al varès di provâ di plui e fâ viodi che al sa cori, cun e cence bale al pît. E magari viodi di meti i cross cence smicjâi al prin om di che altre scuadre che al cjate. par il rest.. brâf.

domenica 2 dicembre 2012

Il cartel par Udinese - Cagliari

Vuê pôc ce dî.
Al plôf, al è frêt, o varès altri setantevotmilions di robis di fâ, ma vuoi al stadi instes
parcè che se no si va cuant che a àn bisugne, alore si pues fâ di mancul simpri.
Podopo, la scrite lu sai benissin che e je falade, che si varès di dî ploie e voie, ma ogni tant, cualchi regule, al fâs ben no rispietâle.

domenica 18 novembre 2012

Lis pignatutis par Udinese e Parme

Ve chi, intant che o cîr di digjerî la mangjade che o ai fat dal nervôs, us lassi lis pignatis, ma curtis curtis...
pignatutis, insome.

Brkic.2/5
Une siore parade su Amauri, par il rest, si capìs che al è una vore gjenerôs, jessint che al sta fasint di dut par dâi un pôc di spazi a Padelli... forsit e sarès ore di provâ...

Basta. 4/5
Spiegade finalmentri la origjine dal so non. Di tant che al cor a duc i aversaris i ven dome di disi "Basta correre... basta!"
Il miôr insiemit a Totò.

Di Natale 4,5/5
Un che al fâs un gôl cussì al pues za dî vonde. Invest al faseve parfin pressing. Al à dât une vore di balis, di ca e di là... Pardabon une partide di qualitât e quatitât... pecjât che nol vedi un che i dedi une bale juste par metilu un cuintri un...

Pasquale. 3/5
Ducj a cjararan ben di Pasquale, ma par gno cont, vuê, nol è stât cuissà ce... anzit, su chê fasse al veve di fâ di plui, jessint che al zuiave cuintri i muarts. Ae fin, just il cambio. No 'nt veve plui.

Coda. 2/5
Su doi goi cussì, un centrâl al à simpri un pocje di colpe. Posizion, la clamin, ma Coda nol è Baresi e bisugne perdonâlu. Da rest il fûr zûc lu veve clamât just, ma Domizzi al cjalave une frice in curve e no si è inacuart. Però il passaç di testa a brkic par daûr al è un mieç suicidi.

Domizzi 2/5
Al fâs la capele dal secont gôl, va ben. ma nol à fat une biele partide.
La veretât e je che lui, dal trio Danilo Benatia, al è l'anel de fuarce, ma cun mancul tecniche. Cun in bande Coda e Angella nol pues e nol podarès cumbinâle. Anzit, plui che altri, àn cumbine!

Angella 2.5/5
No mi sint di butâi la crôs intor, parcè che de difese al è stât il miôr. però... in un cuintri un, no si pues fâsi fâ fûr in chê maniere. al pues deventâ miôr... dai.

Badu 3/5
Jo dîs che al à fat une biele partide. Come conteniment al à zuiât une vore ben. Al à dât dut ce che al veve e forsit al jere lui che al leve cambiât, ae fin. In costruzion, però, une su dôs la piert, e in serie A no si pues... Lazzari al è une altre robe, par cumò

Maicosuel 3/5
Al cor tant. Tantissim. Un pâr di voltis si è cjatât parfin in aree, no si sa a fa cè. Al faseve il centricampist lassant totò cence riferiments, tal prin timp. Miôr dopo, e par un pêl nol segnave. Al à ancjemò di imparâ une vore, ma il zuiadôr al è. Podopo, cumò come cumò, a mi da plui afidament lui che no Ranegie, Fabbrini o Barreto. Al pues dome fâ miôr-

Pereyra 3/5
A fin partide al è cuet. cuetissim. Al à corût come un mat, e al à di imparà a no fâlu. Se al gjestis miôr i timps, e al sfrutas miôr il dribling (vuê nol à imbrocade une) al sarès une roture di coions par ogni scuadre, cussì al da juste un pôc di fastidi.

Allan 3,5/5
Al è chel che al puarte vie plui blestemis de bocje di Guidolin, cuant che al drible inte nestre tre cuarts, ma al va dit che al è chel che al à fat nassi il prin gôl e che al à corût come un sfolmenât par dut il campo. brâf e brâf.

par il rest, Ranegie, Armero e Faraoni no si sa nancje se a son jentrâts o mancul. e tai trê cambios, vuê, si è decidude la partide.

Il strisson par Udinese - Parme

Vuê dome il strisson.
Su la partide al è miôr dî nuie, nancje alè Udin, si no mi deferissin, mi dan la multe e mi tirin cualchi bastonade par daûr e ce sajo jo, miôr no riscjâ.

venerdì 9 novembre 2012

Lis pignatis curtis di Udinese - Young boys

Si che duncje, l'Udin al à rivât a pierdi cuntune scuadre che si clame come un grup di rappers di cespletiscjis o pampalune e jo no ai plui che tant voie di stâ a tornâ a pensâ ae partide di îr, e alore... fasìn instes lis pignatis dai zuiadôrs, ma in curt curt curt.

Brkic- Un gno alenadôr di tancj agns indaûr mi insegnave che se il portîr al cjape gôl su punizion al è brâf il zuiadôr, ma se lu cjape sul sô pâl, e je simpri colpe sô. Se tu vûs pues dâi il to numar di telefonin.

Basta - Chest zuiadôr al covente par insegna la matematiche: 1 Basta = 4 Willians; 1 Basta = 3 Armero; 1 Basta = 2 Danilo; 1 Basta = 1.5 Pereyra o Lazzari e vie indenant. Se o vessin 2-3 come lui a podaressin zuiâ in 8.

Armero - Si impegne, sì. Al cor ancje, sì. Ma si domandiji une robe sole: fâ i cros come un cristian. Lui, îr di sere, il miôr che i è vignût al à copât un colomp.

Di Natale - Il rigôr si pues falâ, no podin lâ simpri dentri, ma boiacane... inutil platâ che al à segnât dome par che i à cjapât mâl e che la travierse no je sfighe, ma smicje... che e mancje.

Pereyra - al jere strac, nol pressave e nol difindeve come che al fâs di solit. Però al è l'unic in grât di saltâ l'om e inventâ alc. Al è ancjemò sierât tal spoliatoio a domandâsi per che Guidolin lu à gjavât.

Fabbrini - cuant che si cjape une bote si à dî sta par tiere a vaî, ma dome se si sta vincint, no cuant che si piert. Lu diseve simpri il gno vieli mister... domandiji il numar a Brkic, va.

Danilo - "Mister posso giocare a centrocampo?" al devi vê domandât. "Mah... almancul li tu fasis mancul dams e se a tirin di plui lontan no segnin" al devi vê pensât tai spoliatoios Guidolin. Purtrop nol jere cussì-

Coda-Domizzi - al è une vore dificil tignî sù une difese in doi, soredut cuant che nol è il centrocampo e chei altris a son fuarts. Di fat, no rivin.

Lazzari - nol à zuiât ben, al à sbaliât une vore di passâcs e al varès podût tirâ un pâr di voltis di plui cence copâ altris colomps. Però "no pos migo fâ dut jo!" al devi vê pensât, e in efiets...

Willians - anche cun lui si impare la matematica. 10 + 1 = 10, o pûr un gol di vantaç par chei altris.

Ranegie - Si impegne il dopli di Basta, cu la metât dal risultât. Par che al segni al somee che a vedin di costruî la puarte ator dal balon che al tire.

Faraoni - Ah, ma parcé, isal entrât?

Bon, dite chest, al va dit che o vin pierdût cuntune scuadre fuarte, che a fasevin zirâ la bale come che i pareve, che par une volte il Guido al à fat capelis (vin fat  l'un a un? Ma putanemiserie, torne tire indaûr Danilo in difese e tignin cussì, par un moment!) e che vin vût ancje un biel pocje di sfighe, par che forsit in plui moments la partide a sarès podude cambiâ. No mi sint di dî nuie, invezit, sul impegno, che le àn metude dute, ducj, par dute la partide... purtrop no si vinç dome cu la voie...

giovedì 8 novembre 2012

Il cartel par Udinese - young Boys

Ogni tant, come îr sere, tu ti domandis parcè che tu âs di fâ i strissons pe partide.
tu rivis strac, tu staressis miôr a poiâti sul divano o lâ a durmî
e invezit tu ti metis a scrivi,
a comprâ penarei, gomis, cartelons,
a pierdi timp a piturâ, in doi, e soredut a pensâ.
Podopo tu vâs al stadio e tu la cjapis tal cûl, come îr, che si è tirât in puarte 20 voltis e segnâts dome doi goi e che, soredut, chei altris a jerin miôr.
Plui fuarts, plui brâfs, plui fortunâts.
E tu ti domandis ancje par cè tignî chest blog, che l'unic coion che al è rivât achi a lei il post al à rivât dome a meti la crosute su "tu podevis fâ miôr"
e tu, ce âstu fat, mi vignarès di domandâi.
E cussì, pene che o ai un moment di timp chês crosutis lis gjavarâi, cussì come che a laressin gjavâts chei che la uniche robe che a san fâ e je criticâ e platâsi, come tancj che îr, mi pâr, no jerin al stadio a cjapâ frêt.
Ma ae fin, l'Udin, îr, al à pierdût di un sbit cuntune scuadre che tecnicamentri, al displâs dîlu, e je stade un vore miôr di nô, e se o vin rivât a stâ in partide, al è dome cu la voie e la grinte, e jo, a chei dal Udin di Ir sere, no mi sintarès propit di dîsi "tu podevis fâ miôr".

sabato 3 novembre 2012

Taulis e ombrenis

Oh, alore, un post curt curt par dîus che chei dal comun di Udin, o cui par lôr, a àn scoltât la siore pozzo.
E cuntune vore di prontece ve chi che a son saltadis fûr lis taulis intal parc Moretti!
 
Wow!
In numar, par cumò, di dôs, a son stâts dîs e dîs a misurâ, tamesâ, mateâ, par viodi dulâ metilis, e ce no ti àn pensât?
Lis taulis a coventin par che la int si senti li, ven a stâi che bisugne metilis inte ombrene!
Ven a stâi sot di un morâl... e difat, (no chê altre, che e je in plen soreli) ma viodêt ce ben che a àn sielt il puest par metile, cheste taule. Propite sot de ombrene dai morâi...
 
Sì, pecjât che chescj doi morâi a fasaràn ombrene su cheste taule plui o mancul tal 2027, ma insome, no vin di jessi choosy, cheste Istât si sintarìn in plen soreli a fâsi vignî la meningjite e o sarìn ducj plui contents :)

giovedì 1 novembre 2012

Il strisson par Udinese - Catania

Îr o ai fat il furbo.
Vevi lavorât cussì tant, par chêst cartel in teme di gnot di ognissants, che dopo vê slungjade la gnot par fâ ancje la coce o ai decidût di no lâ al stadio. E mi displaseve par i miei, jessint che al à plovût par dute la partdide, ancje parcè che dopo jessi stâts in doi, (o ai obleât la murose a judami) par piturà il lôf e frankenstein mi displaseve viodi il cartel slavaçât de aghe.
E la robe si jere metude ancje piês, parcè che jo soi lât tal jet convint che l'udin al ves pierdût, e invezit, o ai scuviert dal telefonin prin di durmì, che al veve paregjât.
Jessint che, cun dute che ploie di îr no crôt che vedin fat la fotografie al strisson, alore us met cheste e us met ancje la foto de coce... un dai doi, îr, al à puartât fortune!

E o zonti ancje, jessint che le ai fotografade, il lavôr preparatori dal strisson:

venerdì 26 ottobre 2012

Sui stops al è plen di grunge

Chê altre dì o rivavi al parcjegjo, come par solit, e... ciò mo, sorpresone! A Udin 'nd àn slungjât i parchegjos!
E però, mi soi dit, mica facil zirâ cussì ator des machinis parcegjadis... poben, varàn inmò di cambiâ la segnaletiche...
Ma no, ma ce, ma va!
Ma no jerino dôs di lôr a cjacarâ in machine cuietis e beadis?
A bon bon... a van vie subit, mi soi dite, insome... no soi mico un di chei rombibalis che a tachin a porconâ par che cualchidun al fâs une fermade al volo...
E insome, voi, parchegjì, fâs un colp di telefono, cjapi sù la robe, cjol la bici, o partis, insome... 10 minûts, forsit 15. Ben po, ancjemò li a contassale! Ve chi, che i ai fat parfin la foto.
Cussì, tun colp, viodint lis dôs musis dutis ispiradis, che ancje a cjalavin di brut chei che a vevi di jentrâ tal parchegjo, par che nol sedi mai che i scussin la machine, o ai vût la ispirazion!
Se tu ti metis cu la machine sui incroços tu puedi rivâ adore a rivâ al nirvana! Insome... e cui sojo jo par nô provâ! mi soi dit.
La dì dopo o ai parcât la machine tal stes puest e o ai spietât... ma o crôt che nol sedi sucedût nuie: cuant che un che al veve di jentrâ tal parchegjo mi à sunât, lu ai mandât a cjapâ sù pedoi di mâr... al jere evident, che no vevi otignût il nirvana.

mercoledì 24 ottobre 2012

Taulis no, mierde sì.

Timp fa o vevi seguît un pôc la polemiche tirade dongje cu la letare sul Messaggero de siore Pozzo, riferide al Parc Moretti.
Poben...
Jo o capiti une vore spes, al Moretti.
Vustu par che o parchegji la machini, vustu par che o puarti mâ mari a fa biciclete, jessint che li le àn compagne a chê fisioterapie e difarente de ciclette.

Jo, intant che o spieti, o voi a cori, o resti a lei, e corint soredut tu viodis un grun di robis e ti vegnis di pensâ a une vore di "Ma nus cjolino pal cûl?"
Us dîs dome un pâr.

Jo o varès plasè, e mi capite, di lâ a lei, o ancje a studiâ, un pâr di oris tal parc. Cun di plui di spes o voi a mangjâ. Ma par lei, studiâ, mangjâ cuntune cierte comoditât la umanitâ e à inventât un imprest... si clame TAULE. Ogjet maraveos, la taule, ti permet di poiâ parsore il carton del pizza, o il pagnut intant che tu ti gratis il nâs, un libri par leilu o magari, pensait, scrivi parsore suntun toc di cjarte. 
La taule e je antigone, e al pâr che sedi stade inventade inte ete preistoriche, par che lis furmiis no ti mangjassin la cuesse di mammuth. 
Jo cumò mi domandi, parcè no meti lis taulis!?
Cjalait la imagjine... che le vedin puartade vie?
Parfin la çore e je li che si domande ce biel che al sarès e trops picnics in plui che si gjoldarès se a vessin metût lis taulis. Parcè che se la panchine e puarte a durmî parsore o a bevi, la taule e puarte e mangjâ e a lavorâi parsore e insome... jo no sai, ma mi somee che un parc al sarès plui dignitôs se rivassin adore a evitâ che e ledi dome la inte de prime categorie. O, sigûr, si bêf e si durme ancje miôr, se e je la taule, ma almancul, ogni tant, cuant che rivin i zovenots plens di butiliis di bire, forsit, a cjataressin ocupât di chei che a son li a studiâ.
E alore, propit cumò che tra pôc vares voie di lâ al parc a studiâ un pâr di pagjinis, mi domandi, parcè no meti lis taulis?!?! Ce al podie vê vût pal cjâf chel che al à decidût di no metilis? Nus cjolino pal cûl?

Seconde robe. 
Il parc Moretti al è biel par che se no tu cjatis lis taulis, tu puedis simpri distirâti sot di un morâl e lei par tiere e magri fâti une durmide. Dut ben... fin che no ti capite... une biele mierde di cjan!
Sì, par che bisugne dî che la plui part des personis a netin. Anzit, mi sint di dî che sedin plui di ce che mi è someât a mi. Però chê altre dì, in trê cuatri zîrs che o ai fat corint, ben dôs di lôr - feminis, una zovine e une siorute - e àn fat fente di no vê viodût che il lôr cjanut, simpatic come un tatzelwurm tes mudantis, al à cagât inte jerbe.
A la siorute no i ai dit nuie, ma a chê altre, se la brincavi dopo il zîr, i cjapavi le mierde dal cjan e je smaltacavi su la maie, e che jê vegni pûr a denunciâmi, che il biel di no vê bêçs al è ch no puedin robâti nuie :)
Ma a part chest, jo pensâvi a une soluzion, fasint chest resonament:
- La int e va educade, come i fruts
- Par educâ i fruts, si cridi o si dâi cualchi scufiot
- I scufiots de int si clamin "multis" o pûr "figuris di mierde"
- Al bastarès meti un pâr di vigjii in borghês tal parc par doi trê dîs a dâ multis (cun dongje la figure di mierde) a chei che a no netin lis mierdis.
 - la int si abitue e e tache a netâ, o pûr e va cul cjan intun altri parc o pai cjamps.
Bon... mi soi dit, mi pâr che al funzioni. Dulâ ise che la robe no va, par cè no la fasino?
Clâr, no 'nd è risorsis umanis che a puedin stâ zornadis interis al parca cjalâ lis mierdis di cjan!
Insome... i vigjii 'nd àn ben robis plui impuartantis, di fâ.
E in efiets, vinars e ancje lunis, doi o trê vigjii, a turni, a son stâts tal cjanton di vie Marco Volpe, par no che la int a jentràs inte ZTL. DUT AL DI'! Ma alore, lis risorsis e son, mi soi dite, ma par dopralis par difindi la ZTL, (dulà che però instes al jere plen di Suv e di Bmw ancje se un pocjis di multis devin vê cjapât, o speri).  Poben... cuissà, magari in curt ju viodarìn cussì motivâts e in fuarce ancje a cjace di mierde di cjan. :)
Mah... no crôt, e no dîs che nus cjolin pal cûl, ma no pues nancje dî che viodi trê di lôr come se a vessin di salvâ il mont e sedi une robe fondamentâl. :)

lunedì 22 ottobre 2012

Lis pignatis di Udinese - Pescara (21-10-2012)

Vuê no varè nancje masse timp, ma fasìn che ancje se curtis us fâs lis pignatis de partide di îr, però lis fâs dome par cualchidun, intant...

BRKIC. 2 pignatis, 1 tapon
Duncje, si conferme la dificoltât de curve a cjatâ un coro valit par in nestri portiron, e chest si riflet siguramentri su lis prestazions.
Cuant che la curve e à provât a impuestâ un "brkic! brckic!" al someave, come simpri, che ducj a vessin il rafredôr. 
Cun di plui lui al à pensât che o fossin un pocut stitics, e alore al à pensât di dânus la purghe.
Cemût? Ma fasintnus vignî il cagot! Par un pêl nol cjapave une puce di tîr e ducj si sin cagâts intor. Ma par gno cont nol è dome chest, che mi fâs dî di no dâi la suficienze. La punizion no je robe di viodi. A mi mi àn insegnât che se il zuiadôr la tiri parsore bariere, al è brâf lui, ma se tu ti movis prin, e tu cjapis gôl sul to pâl... tu sês pierçul tu! Insome... di bon che îr il pescare nol à praticamenti tirât in puarte. Brâf, invezit, su lis ussidis e su la posizion.

BENATIA 3 pignatis, 2 tapons
Alore... Benatia al è brâf come simpri. Puntâl di testa, vonde pront a rivâ prin dal aversari su lis balis lungjis, e forsit un pôc mancul costrutîf dal solit, ma si jere un di mancul e al è comprensibil. Dut câs, o varès une altre pignate, di dâi pal cjâf... Ma le ae sù cun Armero? No, parcè che za o vin problemas, cun lui, ma no si pues dî che il puarin no si proponi. I varà domande la bale, larc a çampe, almancul 10 voltis e mai, ma propit mai, ja la dade subit e par tiere. Al si zirave e al tornave di chê altre bande. Po dopo, chês voltis che le à dade, o une fusilade a mieze altece (e Armero al à i pîts di ghise... si sa) o pûr cuant che aromai al veve l'om intor. Se jo o jeri in Guidolin o cjapavi un cit di aghe e jal tiravi tal cjâf. 

ARMERO 2 pignatis, 2 tapons
Il siorut in bande di me, lu clame un pôc Asamoah, un pôc Armaron. E la seconde, in efiets, e je une definizion induvinade. Cuant che al à l'om dongje al somee di viodi un armaron che al cîr di schivâ une cjadree: nol rive! E ju dute la int a mugugnâ. Ma la int e je un pocut stupide. Armero al jere fuart cuant che l'udin al zuiave di rimesse, cuant che al podeve butâ bale indenant e cori. L'udin di chest àn no je plui chê e o si rindisi cont che bisugne dâi la bale in maniere diferente o chest zuiadôr lu pierdìn. Lui, puaret, cui pîts al è ce che al è, ma par l'impegno che i met, no si pus dî nuie. Nissun si è inacuart, îr, che il puar Armaron al à fat il difensôr cuant che o sin restâts in 10 e dome cuant che al è jentrât Coda al à podût tornâ tal so puest. Ven à stâi che ae fin, lui, il passaç che al à fat saltâ fûr il gôl lu à fat, e de sô bande a son stâts mancul fastidis di chê altre. 

ALLAN 4 pignatis, 4 tapons
Cuant che Quintero al à fat fâ il secont fal di amonizion a Danilo, îr mi soi domandât "Ma barbepantiane, pussibil che chei altris a àn simpri un chel al fâs fûr ducj e no nuie?!" Mi sbaliavi, lu vin ancje nô e si clame Allan. Chest zuiadôr al è bravut e si viôt. Cence Pinzi al tornarâ une vore comut e la uniche robe che si puès dîsi e je di stâ un pôc plui cuiet, che nol pues simpri cori come un sfolmenât daûr ae bale... che al impari di Lazzari, che al cor cuant che al covente. Par rest, si meretarès un gôl!

MAICOSUEL 4 pignatis, 3 tapons
Il gôl al è un regâl dal Pescare su un cross inutil rivât di un Armaron, chesta al va dit, ma al va dit ancje che Maicjossul (lu clamarai simpri cussì, par che no rivi adore a pronunciâ chel non!), disevi, Maicjossul al à i numars e al è brâf. Cun di plui, come Renegade, ancje lui al à chel vizi di lâ a pressâ, corint daûr ai difensôrs. Ben po, al è clâr che tu ti cueis, ma jessint che no jerrin mico dai fenomenos, chei altris, il plui da lis voltis, se propit no tu i cjapis la bale, no tu ju fasis costruî. Tant di cjapiel, duncje. Podopo, se al impare a gjestîs un pôc miôr... viodeit che chel chi al bon di lâ in dople cifre, di goi. (Tant l'è vêr che al è capocanonîr dal Udin insieme a Totò)

DI NATALE 3 pignatis, 1 tapon
Cambiâ Di Natale al è cuasi impussibil, vûstu che lui al tache a ufindisi come i fruts, vustu che no si sa mai ce che ti cumbine. Ma îr, mi displâs dîlu, Totò al sarès stât il cambio di fâ. Ae fin nol à cumbinade une, par cualchi fûr zûc, e ancje se al à corût, se Pinzi no si fos fat mâl al jere lui che al veve di jessî. Poben... al fasarà miôr in Svizzare!

LAZZARI e PEREYRA 4 pignatis, 3 tapons
Alore, se tu restis in 10 e tu stâs dut il timp in te metât campo di chei altri, al vûl dî che cualchidun al cor dopli. E îr, a cori par doi a jerin Allan, Lazzari e Pereyra. Lazzari, par altri, al à vût un par di ocasions che al podeve butale dentri, o almancul tal spieli de puarte (jessin che je stagion, e lui al à un buine cjastine), ma a part chest, lôr doi, insieme a Basta, a saràn lis colonis dal nestri mieç dal campo. Un al è geometric e al difint, chel altri, ancje se ae fin al jere cuet e lu fasevin fûr colp par colp (e Guidolin al veve di cambiâlu prin, che a gjestre o vin riscjât) al è l'unic che al à il dribbling, insiemin cun Allan. Ancje par cè, insome, di chescj timps ni Totò, ni Armaron, e nancje altri a somein visâsi cemût che si schiribice un aversari... Pereyra sì.

DOMIZZI 3 pignatis, 3 tapons
Sù... bisugne dî che îr il Pescare al è vignût chi par il zero a zero e si viodeve a chilometros, ancje cuant che a jerin un di plui. E àn fate la capele dal gôl, e dopo si son sveât, ma no mi sint di dî che par Domizzi e sedi stade une partide dificile.

DANILO. 2pignatis, 1 tapon.
Perdonabilissim, però no tu puedis lassâmi la scuadre in 10 par no fâ tirâ un aversari. Al jere lent, inutil menâle, e ancje se no i dave il zâl lu varès cjapât pôc dopo, par che Quintero lu faseve fûr colp su colp. Nuie di mâl, une polse no pues fâi che ben! Cun lui a sin a credit di una vore, e anzit, jessin che i prins 20 minûts l'Udinese no zuiave nuie ben, al à il merit di vêi dât une scjassade a ducj! Doi, ponts su trê, ven a stâi, son merit so :)

Cui mancje?
Al volo... Faraoni ben, ma tal imprin al jere no al so puest, e se no altri al à la malicie di stâ par tiere e pierdi timp. Coda cence voto ma al je jentrât ben. Al zuiarâ domenie che e ven,  e ben. Pinzi no ai rivât nancje a viodi che che al à fat, e Willians no mi à dite masse, par che al è masse irruent e al à di calmâsi.

sabato 20 ottobre 2012

Il cartel par Udinese - Pescara

Ve chi! Vuê o jere ispirât...
E lu sai, lu sai che magari Pescara, voltât par furlan, no si disarà pescare, ma a mi mi leve ben di fâ il zugut di peraulis e mi jere vignude voie di disegnâ la zebrute che e pescje e alore... ise o no ise vignude biele? 
E insome, dopo un biel pôc che no si faseve un cartel, e il prossim al podarès jessi chel pe europe, o forsit no, no sai, a ogni mût, mi jere cjapade ben e o vevi gust di disegnâ... podopo mi è vignude ancje la frase juste, e o ai metût in bande di cirî una frase su Pinzi, o alc altri.
Reste che doman al vares di jessi soreli e sperin, se come che disin al ves di zuià Maicjossul e Gabriel Silva, che si rivi adore a tirâ fûr i trê ponts, che insome... nus coventin pardabon par rivâ a començâ chest campionât...
Mandi, e si viodin doman al Stadio!

sabato 13 ottobre 2012

Contis curtis, mostris, gjatuts e alc di bon

E po dopo, chescj gjatuts - i doi che mi son vanzâts - a son teribii. Va che no àn plui la mari, no si sa se ju à dome lassâts pierdi o e je propite sparide, ancje parcè che o vevi 4-5 blancs e neris ducj compagns, salvadis, e sâstu tu se la gjate e je fra chei o se son altris?
Ven a stâi che di tant, aromai, chescj a no son salvadis.
Un al è za lât, un al è lât vie, ma forsit i doi a campin... cuissà...
Ma parcé cjacarà di gjats?
Cjacarìn di altri, no sai, vuê che e je matine, che al è sabide, che îr l'imbrunî al jere une vore biel, soredut se cjalât di tal mieç di un cjamp di blave, cui cjans ator, i Foo fighters che a sunavin tal telefonin e cualchi nûl, cu la muse di ploie, che ti cjalave la schene, come un compagn di viaç pôc afidabil.

O varès, come ducj o tancj, di dâmi une mote, e alore comenci cumò, lant in cjamare a cjoli un pôcs di bregons curts e puartantju vie, par fâ il cambi di stagjon, che a mi, mi fâs simpri un pôc di malinconie, jessint che tignarès l'Istât dut l'an. E varès ancje di fâmi la barbe e taiâmi i cjavei, e insome, di fâ un grum des robis che si fasin di sabide matine... dome che cuant che tu âs mil robis di fâ, sucêt simpri che no tu 'n fasis nancje une!
Via... fasìn!

Fat alc, sì, ma nancje masse.
Prime di jevâmi a fâ la barbe in ogni câs, us cjacari un momenti di cjase Cavazzini.
Sì, sì, lu sai che o savês za dut.
Ma forsit us fâs plasê viodi alc come cheste imagjine chi in bande. Parcè che mi ven di dî che finalmentri, pe prime volte, o ai cjatât che chest progjet di Udin al è pardabon, ma pardabon ben fat. Jo soi vonde passionât di arte, e soredut di chê dal secul passât e di pôc prime.
Ma soi passionât ancje di mostris, inutil dineâ.
E alore ve chi, in bande des cjadrês e divans de Moroso, bielissimis, e di lâ a cjalâ, in bande de stanziis sui Basaldella, di lâ a cjalâ ancje chês, e in bande dal plan cun ducj i cuadris de colezion dade a Udine, ancje chei una vore biei (dentri o cjatais ancje un pâr di Picasso, ma ancje bielissims De Chirico, Guttuso, De Pisis e altris...) e in bande de colezion di merecans regalade tal '76 par saltâ fûr dal taremot, insome, in bande di trê plan che a meretin di spindi i cinc euros di ingres (e difat o tornarai) a son ancje dai afrescs come chescj. Clarementri no ju ai fotografâts jo, ma un gno amì, e jo no podevi fâ di mancul di fâmi dâ lis fotografiis.
Ve chi un altri...
Biei, nomo?
No sai di ce ete che a son e cui che ju à fats, no lu ai cjatât scrit di nissune bande. A son inte stanzie dai Basaldella, e us disarai che al è une vore biel viodi ator ator di chês altris sculturis.
Vait, se us capite, e vait par stâ dentri almancul un'orute, che si no tant vâl. (Jo soi stât dôs oris, ma jo soi bon di stâ ancje 5-10 minûts denant di un cuadri sôl)
Bon... cumò disarès che us ai dit alc di plui interessant.
In veretât chest post, che al è tacât sul blog di gelo e lât indenant sui Pensieri di gelo, al jere un post par dî che di dutis lis robis che non cumbini di fâ chest an, almancul une le ai fate. Cuale? Il librut di contis curtis dal cuâl che o soi curadôr.
Ve chi, mi pâr il minimo, dopo vêus mostrât i mostris di Cjase Cavazzini, mostrâus i zombi de copertine dai Corti viventi, aromai rivât ae tierce stagjon!

Il libri al è une vore picinin e al ven fûr i 22 di chest mês, al coste 5 euros e 90 e al è plen di contis curtis, di 3-4 riis a massime dôs pagjinis. Se o vês voie di fâ un regâl par Halloween... o savês dulâ cjatâlu! 

lunedì 8 ottobre 2012

Teoreme: cori e passâ blave

Enunciât dal teorema: cori e passâ blave son ativitâts no compatibilis

Assiome 1: corint tu viodis une vore di panolis, cjaminant a sparissin

Assiome 2: dopo la prime panole cjatade, ti ven sen di cagâ

Assiome 3: la capience e je 4, dôs panolis par man

Assiome 4: jemplade la capience, ogni panole che si cjate e je plui grande di chês in man

Assiome 5: il verificâsi dal assiome 4 al puarte a cirî di violâ l'assiome 3

Assiome 6: cence blave ator, l'assiome 2 al podarès deventâ un probleme

Corolari 1: o lâ a cori, o lâ a passâ blave

Corolari 2: in ducj i doi i câs dal corolari 1, puartâ vie i fazolets di cjarte, che i scartos a son dûrs e ruspiôs

sabato 6 ottobre 2012

La bielissime vie Poscuel

E tache cumò, par che o vuei fâle tacâ, une gnove piçule rubriche dal Salvadeat.
Il tag?
"salvadeadis!"
Parcè... parcè che vuê, intant che o levi viers cjase Cavazzini, a fâ un zîr, o ai vût la furtune che une siore, viodint che o cjaminavi sul marcjepît, si viôt cu la muse un pôc incocalide, e à pensât ben di dâmi una cjalade di brut, par che no mi spostavi par che jê, cul so suv, e podès fermâsi, e soredut - lu ai capît dome dopo - par cè che no cjalavi trop biele che e je vie Poscuel.
Si che duncje, la siore, e à pensât ben di parchegjâ la sô machinute sul marcjepît, juste par fâmi capî, imagjini, ce spetacul che mi stevi pierdint...
Par fortune!
Ve chi che o ai scuegnût voltâmi e fâ une foto a la bielissime vie Poscuel, cun chel cîl... chês cjasis... parfin un autobus!
Sì... pecjât chê machine li, che mi gjavave un pôc la visuâl... ma insome, no si pues vê dut. 

_____ *** ______

Comincia adesso, per il semplice motivo che mi va, una piccola nuova rubrica del Salvadeat.
Il tag?
"salvadeadis" (selvatichezze)
Perché... perché oggi, mentre mi recavo a Casa Cavazzini, a dare un'occhiata, ho avuto la fortuna d'incontrare una signora che, notando il mio incedere sul marciapiedi, probabilmente con l'aria disattenta, ha avuto la pensata di redarguirmi con un'occhiataccia, in quanto non mi spostavo per far sì che lei, suv-munita, potesse sostare, e soprattutto - l'ho capito solo tardi - perché non prestavo sufficiente attenzione alla bellezza di via Poscolle.
Cosicchè, la signora, ha avuto la buona idea di parcheggiare la sua piccola automobile sul marciapiede, al solo fine di farmi capire, immagino, quale spettacolo mi stavo perdendo.
Per fortuna!
Mi sono dovuto voltare e fotografare la meravigliosa via Poscolle, con il suo cielo... le abitazioni... persino un autobus!
Certo... purtroppo l'auto che vedete mi toglieva un po' la visuale... ma insomma, no può essere tutto perfetto.

lunedì 24 settembre 2012

Lis Pignatis di Udinese - Milan (23-09-2012)

E comence vuê une gnove rubriche dal Salvadeat che o rivarai adore e mandâ indevant ogni volte che:
a) o voi a viodi l'Udin
b) o ai coions di fâle :)

Chei altris, da pardut, a dan lis padielis, ma jo, che o cjali la partide de curve, di dulà che si rive ben a distingui Renegie di Pereyra, ma dome par che un al à i scarpets colôr vert miluç crût e chel altri naranze.
Ve a stâi che no mi pues permeti di dâ padielis, che no sarès mai vonde precîs, ma pignatis sì, di chês vieris, che si doprin di agns, duti bozadis e magari cu la croste di frusign...
E za che o soi, magari, o zonti ancje cualchi tapon, che jo no soi mica come il diaul, e se un se ai merete, i doi ben ancje i tapons!
Comencìn!

Brkic 3 pignatis su 5 e 2 tapons
Duncje, il nestri spilungon al à doi difiets, che par cumò nus fasin ancjemò pensâ al bon Handanovic. Tant pac començâ un cognom cence cuasi vocâls, che al rint difici sedi businâi, sedi incitâlu. Ae jentrade no a provin a fâ ducj insieme "Brkic! Brkic!" ma al salte fûr une robe come che a stranudassin ducj, tant al è vêr che di chê altre curve mi pâr che nus vedin rispuindût "Salute!"
Il secont difiet e je la sigurece intes robis facilis. Îr il bon Zeljko, al à fat:
a) une jessude tal prin timp che pôc i mancjave che al vignis a saludâ Zapata
b) un rinvio di pît che par pôc nol dispicjave Pazzini o cui par lui
b) une jessude di pugn su bale altissime che le à cjapade, ma... e se no tu i cjapis?
c) un rinvio che al pareve volê tirâ jù un colomp salvadi, ma che al è colât tipo 10 metros fûr de aree.
Da rest, gjavedis chestis, Zeliko al pare. Se nol jere par lui a vevin bielzâ cjapât il gol tal imprin... ven a stâi... Sperin che al deventi simpri miôr!

Coda 4 pignatis, e 3 tapons
A mi Coda mi è plasût. Visintsi che al tornave di cualchi capele, visintsi che nol zuie mâl, visints che un come lui nol è, di solit, bon di fâ zûc, ma dome ri rompilu. Ben po, îr coda al à zuiât come se al fos stât simpri des partidis, al coreve e al marcjave e la robe che mi è plasude di plui, ae fin, cuant che in 11 cuintri 9 al à dit: dispò, ma parcè ajo di butâ vie la bale ogni volte? cumò le zui! E al à zuiade, fintremai, un colp, al à fin in puarte e tirâ, che tant lu vin capît ducj che al à tirât centrâl di pueste, par che Abbiati al à butàs fûr e podessin vuadagnâ un corner! Insome, come che a disin lis vacjis cuant che a son moscjis, La Code, miôr vêle che no vele!

Danilo, 3 pignatis e 2 tapons.
Ma us disarai, soredut tal prin timp, jo e il siorut sintât dongje si sin dits: Oh, ma cui isal che 5 che al sbalie balis, là tal mieç. Podopo si sin pensât che il nestri 5 al è Danilo e insome, o sin restâts mâl. Lui al sa costruî miôr e un come lui, par capîsi, al podarès zuiâ tal mieç dal campo cuant che al vûl, si che duncje, benon, partide plui che buine, ma soredut cuant che tu zuis cuintri pazzini, che il pressing al è ancjemò convint che al sedi une trasmission viere di Italia 1, tu âs di fâ sù miôr, ches azions, che magari, si cumbina ancje di stâ plui cuiets. In ogni câs, a difindi, simpri il miôr.

Benatia, 4 pignatis e 3 tapons.
O sintevi vôs, ator, tipo "Benatia sta tornando quello di una volta" e bla bla bla. Ma ce caz disino? Benatia al è simpri fuart, al cor, al salte di testa plui di chei altris, e se nol jere par lui nancje a segnavin il prin gôl. La veretât e je che cuant che tu zuis cuntun centrocampo che no ti lasse tirâ flât e tu marcjis il miôr di chê altre scuadre ancje un siôr difensôr al sbalie. Parcè no ducj i tapons? Parcè che a mi mi plâs il Benatia che cuant che il portîr al à la bale in man si slargje par cjolile e al fâs sù l'azion. Îr nol à mai fat, anzit, al coreve indevant come un cjavrûl par cjapâ il rinvio... Cuietiti, che tu âs i pîts, mica i zocui!

Faraoni, 4 pignatis e 3 tapons.
Pôcs si inacuarzin, ma o stin fasint sù un zuiadôr che prest nol fasarà pensâ a Basta, se al mancje e che, forsite, il prossim an, al rivarà a vistîsi di celest, e no par che il colôr al è di mode. Al à zuiât joibe, il zovenot, ma al à corût istes e ogni tant al à metût dai cros che a jerin dome di butâ dentri... (Totò? Pereyra? Pronto? Soi il cross... soi ca... stoi passant! Da sêso?) Al à il difiet che se tu zuis cul Milan tu puedis sconfondilu cun che altri Faraone, ma il nestri al è plui grues e al à ancjemò di dreçâ il pît (joibe, une banane, jessint che al tirât in fal laterâl, îr un piruç, jessint che al tirât dome a vinç metros dal pâl). Par il rest, al sta cjapant sigurece, e di chê bande, tra lui Pasquale, Coda e Armero, a varessin di jessi a puest par dut il an.

Allan, 3 pignatis, 1 sôl tapon.
Ma... insome, o ai di jessi onest, îr o ai pensât: se miercus al torne Lazzari, chest al devente un centrocampo une vore, ma une vore competitîf! E no le ai cul puâr Allan, che îr, un par di colps, al à parfin tacât a schiribiçâ int cun 10 agns di balon di A plui di lui su la schene. Benon, però... dopo tu âs di dâle, barbebilite! E podopo, cuant che tu la pierdis, i vularès cori daûr ae bale, pluitost che fâ fente di. In ogni câs, no sai parcè, ancje chi la viôt ben, plui indevant, e anzi, se invezit di tirâ une puce a Abbiati, che nol è à nancje nasade, al vês tirât une biele fusilade (ancje di ponte, par ce di no) al à varès viodude une vore ben ancje îr!

Pinzi, 4 pignatis e 4 tapons.
Ca disin ce che vuelin, il Pinzi di chest an al è come chel di l'an passât: une vore, ma une vore brâf. Al cor e al cjape balis, al cîr simpri plui spes di passâle e, udite udite, al à capît che al pues ancje tirâ in puarte! Ma la partide di Pinzi, îr, par me, e je stade dute intune azion dal prin timp: Allan al veve tacât a fâ dribbling tipo cu la sô ombre e doi fros di jerbe, Ambrosini o no mi visi cui je veve cjapade e al veve tacât a cori viers la puarte come se al ves il pevar tes mudantis, e ve li, intant che Allan a lu cjalave di lontan, Pinzi, 10 metros plui lontan di lui, i à corût daûr, lu à cjapât, i à gjavât un sgarbel dai voi, e za che al jere al à ancje contrastât il cross! Un pinzi cussì, bisugne dome sperâ che no si fasedi mâl!

Pasquale, 3 pignatis e 2 tapons.
Ma... a mi mi pâr che al vedi un pôc il freno a man tirât. Mi plasarès viodulu olsâ di plui, cuant che si trate di fâ i cros. Ae fin al varès di fâju lui, no, i cross, pluitost che Faraoni o Pereyra? Al va dit, che almancul lui nol cor di bant e che, jessint che si vinceve, al coventâve di plui viodi di chei altri che lâ a fâ gol. Cun di plui, cumò che o vin un pandolo tal mieç, lâ sul font al comence a vê un sens. Poben... al reste che ducj i tifôs a son un pocut stramps, jessint che cuant che îr nol è lât a cjapâ la bale, i àn batût lis mans, par che "al jere strac", ma se al fos stât Armero, eh....

Pereyra, 4 pignatis e 3 tapons
Trê robis mi plasin di Pereyra: al va a pressâ cun chê di cjapâle, e no di fâ fente; al è bon di saltâ l'om e no dome cuant che al è par tiere, i scarpets colôr noranze masse madure. Gjavade la tierce, che tal balon no covente a nuie, lis primis dôs îr, a àn metût in crisi il Milan. Lui, insieme cul pandolo, al è stât la clâf par vierzi la puerte dal no-zuiâ dai Ros e neris. Parcè? Parcè che mo al jere a man drete, mo a çampe, mo tal mieç... E ae fin, magari no si puès dî che al sedi stât decisîf, che la plui part des balis lis à pierdudis, ma al dave un grum, ma un grum di fastidi, e no dome par il colôr des scarpis!

Di Natale, 3 pignatis e 2 tapons
Ma... Totò al à bisugne di un colp di cûl. Îr al à provât doi tîrs al volo di chei che se ti vegnin a cjacarin ducj di te par trê dîs di file. Ma no i son vignûts. E par furtune che al è lui, si no, sâstu ce mugugnadis... E je vere che al jere li, a butâle dentri, cuant e veve di jessi butade dentri, ma ancjemò no si viôt la zuiade iluminante, a vierzi il zûc, che ogni tant al faseve e che, par gno cont, e val tant che i goi. Po dopo, al à segnât il rigôr, e cui timps che a corin nol è miga robe di nuie, soredut cuant che tal cjâf tu stâs disint rosari per che il gol, tu, tu lu vevis za fat! Da rest... Fat ben a cambiâlu, che al jere cuet za tal prin timp, tant al è vêr che al cirive di tirâ flât ancje sui corner, sedi par batiu, sedi par lâ in aree. In ogni câs, cumò che al à tacât a segnâ... i vignaràn ancje i colps di cûl!

Ranègie, 5 pignatis, 4 tapons.
Lui al à in comun cun Brkic dôs robis. Al è alt tant che doi Giovincos un parsore di chel altri, e al à un cognom che no ti ven di dîlu! Lui però al è plui fortunât, par che aromai lu clamin ducj Renegade e fieste finude. In ogni câs, e je ore di dîlu: un pandolo cussì, al udin, al jere dai timps di Bierhoff che no si lu si viodeve. Di testa lis spiçave cuasi dutis, e cuant che nol cumbinave si meteve devant par cjapâ il fal, e cuant che no lu cjapave, lu faseve. Un cussì al covente. Nus à fat tirâ sù la scuadre une vore di voltis, e cun chei scarpets che ju si viodeve parfin di Cjampfuarmit, al pâr che al vedi fat zirâ il cjâf a Mexes piês che no un papavar! Podopo ducj cumò a dîsi brâf par il gôl e il rigôr vuadagnât (ma li al è stât brâf Zapata, altri che balis) ma par gno cont al è brâf a fâ pressing e dâ fastidi inte costruzion des azions. Al cor, chest ca, e al cor tant! Îr Guidolin no lu varess gjavât nancje çuet... No rivi a dai cinc tapons par che cul pît, al è ancjemò masse cincischiôs, cualsisei robe che e vuli dî cheste peraule!

Mi pâr che son ducj,
al mancjarès Badu, Fabbrini e il Guido, ma il prin al è stâf Brâf a fâ parâ fûr Boateng, il secont nol à fat nuie, e il Guido... la imagjine parsore, cul strisson di gno pari, e dîs za dut!

domenica 23 settembre 2012

Il cartel par Udinese e Milan

Alore... us dîs za subit che vuê soi pront a viodi il piês e soi pront a viodi un arbitro che ogni volte che al è di sielzi al sielz par il Milan.
Parcè?
Su mo su mo.
Allegri se al piert al va vie e il milan nol piert dôs voltis di file e insome
l'Udinese no vinçarà.
Sperin, dutcâs, intun paregjo che al fasarès ben un pôc a ducj, tal sens che al lassarès lis robis come che stan, cun dutis dôs lis scuadris che 'nd àn di vinci chê dopo.
E alore, stant cussì lis robis, no ai fat un cartel par il Milan, ma o ai fat un cartel par il Guido, che je ore di finîle che ogni robe che al dîs al salte fûr alc, come dopo joibe che al ven fûr, Messagjero, clâr, che al sarès za pront Del Neri, che la panchine e bale, che nol va dacuardi con pozzo fi e vie di chê ande.
Alore... o vin la panchine d'aur, sentade a Udin, non chê une siore persone, non che un grant profesionist. Dulà cjatistu un altri cussì.
E magari no altris a pratindìn che al inventi campions ogni doi mês, nomo?
Insome.
Di miôr, al moment, no mi pâr di viodi, e chi brâfs, mi parin za ben sentâts.
Tigninsi il Guido, e viodin di tratâlu ben!

giovedì 20 settembre 2012

Il cartel par Udinese - Anzhi

Ma sì, sì... lu savìn, chest colp di zûcs di peraulis cun Eto'h e Anzhi 'nd jere plui che tancj. Plui Totò mancul Eto'h e vie indenant... ma al somee pardabon che buine part dai tifôs si sedi dismenteade a cè che al covente, di simpri, lâ a viodi la scuadre e il zuiâ di balo, ven a stâi par tignî sù, par judâ, par sburtâ a zuiâ miôr e a tirâ fûr dut ce che si à. 
Se dopo son plui fuarts chei altris, mi àn insegnât ducj i miei alenadôrs di balon, va ben distes.
E alore, mi pâr, che un al à plui bisugne di jutori cuant che al à fastidis, pluitost che cuant che lis robis a van ben, e alore usgnot ancje jo o voi al stadio, cuissà, magari a cjapâ cualchi papin di Eto'h, che se lu marcje Domizzi come domenie al è miôr za lâ a Madone di Mont a piâ un pâr di cjandelis, ma in ogni câs a tifâ, che se no tifin cumò che o sin in dificoltât, ce tifôs di mierde sino.
E se al salte fûr un an di barufe par salvâsi, pluitost che par l'Europe... ce isal di mâl, al è biel ancje chel!

domenica 2 settembre 2012

Il cartel par Udinese e Juventus

E va ben, va ben...
Cul Braghe e je lade mâl e je plui che juste cussì, ce che al va dit, al va dit.
Vuê sperin che cun Lazzari tal mieç dal campo, se al zuie, si podedi viodi cualchidun che al ten bale e al cîr di fâ un pôc di zûc, ancje se pur trop, la juve no je sigure una scuadrute, soredut cuntun asamoah in plui... Ma jo soi fiduciôs, la nestre difese no à nuie di invidiâ a le lôr (anzit, jo dîs che un benatia e un danilo a son superiôrs ai lôr bonucci e chiellini cence nancje une plee) e par rest, se magari totò al torne a jessi totò e muriel al devente ce che al à di deventâ... cuissà chel a zebrute strache no rivi adore a meti sot la vecje siorute... ancje se, come che savin za, un rigôr o doi i daràn sigure, e lôr, i rigôrs, no ju tirin sigurnò cu la sedon :)


martedì 28 agosto 2012

Il strisson par Udinese - Braga

E ve chi, il prin cartel de stagjon.
Un strisson par une partide che Guidolin al samee sintî ancje masse e cuntune Udinese che e somee vê il flât un pôc curt, li gjambis a mieç servizi e un zûc ancjemò di fâ sù.
Ma si sa... dulà che nol rive il pît, al pues simpri rivâ il cjâf, e dulà che nol rive chel, e reste la voie... Po dopo, se son brâfs chei altris, larìn a vinci la Europa League, ma intant viodin di tornâ in Champions, va. Che magari, varìn ancje pierdût a Firenze, ma vin rivât a fâ polsâ ben vot di lôr (7 e mieç, forsit), a vin viodût che Muriel, se al coventàs, al è ce che al promet di jessi e che cualchi zovenut, se tirât sù, al promet ben ancje chel.
Se Totò al torne a metisi in vore e Fabbrini si degne di stâ in pîts cinc minûts di file, magari un golut lu fasìn, e podopo, sperant che Brkic al cjapi in man ancje lis balis facilis e no dome chês dificilis, e che i trê daûr a zuin come al andade (che a àn fat un partidon, jessint che àn zuiât cence centrocampo) jo dîs che si pues ancje fâ.
E al Braghe, magari, i augurarìn di vinci lui, la Europe League. :)

Ve chi la foto fate al stadio:
 E anche questa va:

lunedì 13 agosto 2012

In bici par Udin

Mi capite di zirâ par Udin in biciclete, ogni tant.
Disin no masse, anzit, mi capitave, fin chê altre dì, di lâ dal parchegjo Moretti fin in vie Zanon.
Sì, propit la tant cjacarade vie che e àn tornade a fâ cumò.
Lassin stâ il fat che dute Udin e je une citât che no je fate par lis pistis ciclabilis a mancul di rindisi cont che a) al è bisugne di intervents fuarts, e no strissis par tiere e fiorierîs volants b) la convivence machinis e bicicletis no je pussibile.
Lassin stâ chest, si diseve.
Chê altre dì, no soi passât in vie Zanon ma sul viâl Ledre, par lâ dal plaçâl Cavedalis a plaçâl XXVI Lui. 
Lu varês za viodût de foto e jo, che cheste strade par solit mi capite di fâle a pît, no mi jeri mai rindût cont di trop che al è ridicul meti adun une piste ciclabile e podopo interompile cui bidons des scovacis e de diferenziade!
Sì... jo capìs un pont dificil, dulà che no si podeve fâ di mancul, dulâ che par scugnî bisugne che sedi i ciclist, sedi i scovacins si adatin un pôc a fâ cualchi manovre in plui.
Ma no mi pâr che in cheste vie al mancji il puest e insome, la domande mi è vignude subite, apene che o ai riscjât di fâ il bot cuntune vecjute che e vignive di chê altre bande e che, beade, no à neancje cjalâde la strade e se no vevi i frenos a cheste ore di je e restave ben pocje.
Voaltris a disarês... sì, la vecjute e jere in cuintri sens... okay, certo, ma ce vino, di dâi la multe (ah ben i nestri simpaticons de municipâl son bogns ancje di chê ma o speri propit di no)? Posigûr! Se la siorute (e ancje jo tornant indaûr) a vès vût di seguî lis indicazions des ciclabilis (a dî pôc stranis, jessint che 'nd è plui sens unics che intes stradis del machinis) a cheste ore e sarès vignude a cjase mê, invezit che cjasê sô!
Poben... mi soi dite, puartin pazienze. Doi porcos par sot (la siorute a mi, eh, mica contrari!) mi soi fermât a fâ le foto, e pôc dopo ce ti cjatio? Ma cjale chi ze fenomenos!
Us lassi la foto, jessint che a àn ancje vût il coragjo di porconâmi daûr ancje chescj, maraveâts che jo no fos bon di svolâ e a vês scuegnût smontâ de biciclete par lâ sù sul marcjepît... Robis che a vès di domandâi scuse jo. O stavi, insoma, cuasi par rispuindi, ma mi soi dite... ce diferenze ise jenfri cheste machine e il bidon des scovacis di prime?
Migo tante...
E alore, domandantmi inmò une volte se mi stevin cjolint pal cûl, o soi lât indevant pe mê piste ciclabile a ostacui...

martedì 7 agosto 2012

Confin


A disevin
Che un ream nol va mai bandonât.

I sotan non àn mai fan
E lis plantis sêt
Fintremai che il sorestan al sarà
Denant dai lôr voi.

A disevin
Che i cjavai a scuvierzin di bessoi
Il troi che al puarte in paîs
E i orcui
Prin o dopo
A mostrin la ghigne
Ta l'aghe dal fossâl che strache il cjastiel.


E a tabaiavin di bêçs
magheçs,
fadis,
Platâts tes sachetis dai paiasos.

E ancjemò, 'nt disevin,
Ma lis ultimis peraulis
Spindidis pal gno ream
No lis ai nancje sintudis:
Masse lontan vevi puartât i pîts,
Masse dongje il confin.
da Esilio

lunedì 6 agosto 2012

Il drâc




Scjamparìn,
Ecuilibriscj picjâts intor di une canucje
Cu lis suelis a grampâ
Il sglinghinâ de glace.

Sarìn mans di colôr inte cjamare
D'aiar
Di une biciclete che je stade a torzeon
Pal mont intîr
Cuntune pedalade sole.

Fasarìn sù univiers di vistîts
Fruçâts
E la astronâf par rivâ li.

O varìn minûts
Di ficjâ di scuindon
Tes mudantis dal timp
Intant che cun chê altre man
I robìn i sgrisui,
Lis oris
E la malegracie.

E a darìn di mangjâ
A un drâc grandonon,
Salvadi,
Che al vîf intun mâr fof,
Stiçât di tancj
Ma cun nô mugnestri

domenica 5 agosto 2012

Une cjarece vanzade


Cisichimi
Par domandâmi se ai cjatât di parchegjâ
Dongje de Lune,
O se ai scugnût cjaminâ
Dentri dal fum
Tornât fûr di chês stelis
Aromai masse strachis par stralusî.

Ti contarai
Che ai une valîs fate di capis,
Jemplade di mantiis e lampadinis,
Che o ai distacât a lis peresons
Dentri dulà che o vevi sierât
Dutis lis mês covis.

Ti contarai ancje,
Che a cjase tô,
Jenfri la vetrine e il cîl dal mont,
Ti ai lassât une cjerece,
Che mi jere vanzade,
Vûstu mai che ti coventàs,
Par te
O pai tiei nemîs.

sabato 4 agosto 2012

Morâi di savalon



Cjacarimi,
domandimi di lâ a cirî,
Inte plane fruçade dal cjalt
Chês rispuestis che ai supât cuntune ridade
O scjafoiât di bussadis
O samence;
Domandimi di lâ a cjoilis e contimi
Di dut il nuie
E des sôs sfumaduris cuinçadis di ombrene
E abandon.

Ma tu,
Intant,
Cjacarimi.

Sdrume i podês dal cidinôr doprant monts
Di nature, flât e claretât.
Monts cun çatis sclagnis e sforadis
Ma ongulis lungjis,
Sporcjis di piel e zucar.
Jo ti scolti,
E o fâs sù
Tal desert che al vignarà,
Morâi di savalon,
Dulà cressi plantis e flôrs disterminâts
Di trisculis e frambui
Peâts come telis di rai
Che a van daûr dal svol
Di un gnotul fat di estri e sgrisui,
Cuasi cjoc,
Ma no strac,
Ne stupit.

venerdì 27 luglio 2012

Musis crevadicis


O ai metût in crôs lis peresons
Cui clauts di sclopon,
Picjâts pal cuel lis cuardis,
Smenteât il troi de sêt
E dal sparagn,
Disarmât lis rosis des pomis
E lis stradis dal paîs di dutis lis sirenis.
O ai metût a suiâ
I flum parsore la glerie o il ciment,
Lis pocis slargjadis a cjapâ aiar
Dongje de blave e dai noglârs
E lis musis,
Crevadicis,
Da lis rosis di baraç,
Secjadis dal scjafoiaç,
Mi à voltât la schene,
Come un sium rivât e subit
Dismenteât.