giovedì 29 gennaio 2009

Un cartel par furlan su "strisse la gnove"

Ben po sì! E jere propit ore!
E jere ore che la Udinese e vincès
E jere ore che mê pari cul mê cartel al les a finîle sul gjornâl
E cun di plui, cuant che a si dîs che a son ladis dutis dretis, il manifest anti-peule di îr al è lât a finîle ancje su "strisse la gnove"
(o strissine la gnove, o striscia la notizia o cemût che a volês clamâle)
A podês fracâ a chi, par viodi il filmât di "strissine il strission" che àn fat viodi usgnot.
E pensâ che chist colp, par jessi scaramantic, no vevi nancje metût sul blog il cartel prin de partide (ancje parcè che no vevi vût timp :)
Ad ogni mût e jere ore ancje di viodi i zuiadôrs che a corin. I trê ponts di îr a son stâts propit une biele sodisfazion!

martedì 27 gennaio 2009

Aldo Rossi - Un cd... Furlan

Cuant che l'artist in persone a ti regale il so cd no tu puedis fâ di mancul di spindi dôs peraulis sul disc... ancje par fâ capî che tu lu as scoltât :)
Ve chi, duncje, un pâr di peraulis, o ancje cuatri dai.

Comencin dal imprin. Aldo Rossi lu ai viodût a sunâ pe prime volte a musiche furlane fuarte, l'an passât, dulà che se no voi sbaliant al à presentât i tocs di chest cd.
Mi visi ancjemò vonde ben che la performance a no mi jere plasude masse, par un pâr di motîfs. Un di caratar personâl, che al cole su la mê preference musicâi, che si slontanin da le part plui "pop" di musiche di Aldo; la seconde invezit, pe part purementri tecniche. Lis cjançons, cjantadis di Aldo di bessôl, cun ghitare in braç, e base regjistrade daûr, a àn scontât il fat di vignî fûr fredutis e aprossimativis. Di chi il mê judizi al jere restât incjastrât intun "nol fâs par mê" che se no ves cognossût di persone l'artist al sarès ancjemò fêr a li.

Ce isal cambiât scoltant il disc? Dut!
Al è cambiât che il bon Aldo Rossi al è un pôc come il Lenny Kravitz furlan. No, no stêt capî mâl, nol è neri, muscolôs e plen di frice par ducj i cjantons. Al è come Lenny intal sens che al fâs dut di bessôl, messedant ducj i suns, sedi chei eletronics, sedi chei peâts ai struments.
Ven a stâi che il so lavôr al mostre in plen lis sôs tindincis musicâls che a son une vore ecletichis e diferenziadis. Chest disc, se par câs us capite sot man, al è dificil che us plasi dut a la stesse maniere. A saran cjançons che vegnin incuintri ai vuestris guscj e altres che invezit i dan cuintri.
Podopo al è evident che bisugne viodi la vierzidure mentâl di chel che al scolte, ma in ogni câs al è ancje une vore dificil che no cjatedis il vuestri toc.

Us fâs l'esempli dal mê câs.
"Brache chel cjan" par dî, no mi plâs masse, e no mi jere plasude nancje dal vîf. Chest, vûstu parcè che il campionament (jump around) al è ancje masse classic, vûstu parcè che il toc di test par talian mi sa di sfuarçat.
"Furlan" invezit, a lu cjati tai miôr tocs furlans di simpri, ancje se il debit al prin Tizian Fier (chel di perdono) al è vonde fuart. In ogni câs il toc al è une vore ben misturât e a un test cuntune metriche une vore induvinade si tache une eletroniche semplice ma no scontade. Un dai miei preferîts insome.
Daspò, di une bande no soi lât mat par lis sugjestions dance di "Desire", ma o ai cjatât bon "A la sù", il toc intimist, inte tradizion dai songwriters classics vôs e ghitare.
Se dopo o voi a cjalâ i toc che a son une vore lontans dai miei guscj musicâi, ancje chi o rivi a cjatâ alc di bon. Il latin-merecanegjant "Su pa muse", pûr jessint jo un che cheste musiche i fâs cressi il pêl su lis plantis dai pîts, al è un toc che si sint cun plasè. E simpri in cheste categorie jo o cjati une vore bon il toc lounge "Gno pais" dulà che secont mê Aldo al è rivât a pleâ la lenghe furlane come un vistît perfet, intor de musiche post-dance.
Dopo ce altri vêso voie di savê?
Se a volês une opinion personâl, Aldo, pur jessint un personaç ironic e une vore peât a sensazions di ligrie e musiche lizere, al è pront par rindi une vore ben intun contest di cjançon "serie", che e strice un voli ancje ai moments mancul zuarins de vite. Ma ce âstu di fâ... a voli al è un inguaribil peter pan, e al larà indenant cussì. :)

Se us ai metût curiositât a podês sintê un pocjis de sôs cjançons sul so myspace.

lunedì 19 gennaio 2009

Il cjant



– Moveisiii! – e vuicave il cjâf di Fiona, poiât sul comodin.
Chel altri toc di jê, cence vistîts e vergogne, al pocave ta la mobilie e su pai mûrs da la cjamare, spandint cun dispiet pissin e mierde tor pal paviment.
I vevin taiât il cjâf intant che a durmive, cjoche in bale di Guinness e sglonfe di salmon fumât. Al jere stât Liam a vê voie di provâ, istintîf come simpri. La none Abigail i al veve dit, che non sarès coventât a nuie, ma lui, cjastron come so pari, nol veve volût sinti nissune altre cjampane. Cuant che al veve plantât la manarie inta chel cuel tombadiç, Fiona e veve rutât cussì fuart di fâ tramâ lis tendis. Po dopo, intant che il cjâf al rodolave par tiere e i cjavei, luncs e ros, a si ingropavin tor il nâs e lis orelis, jê e veve tacât a ridi. E jere une ridade sgrasaiote, scuasit un vuicâ. Al pareve il ciulâ di un cjan striçât di une machine. A vevin ducj metût lis mans su lis orelis, gjavantlis cun solêf cuant che chel cuel taiât al someave vê finît di patî. Invezit, dopo un cidinôr durât un lamp, Fiona e veve començât, se pûr trabascjant e pastroçant lis peraulis, a cjantâ
E leve indevant a dî e tornâ a dî che litanie fastidiose, ancje se no come il ridi di prin. Lôr a capivin dome cualchi peraule: machine, triangul, budiei, rôl, gjugjule… ma nissun, in chês vocâls slungjadis fin spacâsi, al rivave adore a cjatâ une logjiche. A vevin crodût ducj che al fos un ultin deliri prin di tirâ su i scarpets. Dome la none e jere vignude blancje e ju veve obleâts a lâ subit fûr di che cjamare, sierant a clâf la puarte.
Lôr, cence bati voli, a vevin subit ubidît, plens di pôre par dut chel cjantâ sfuarçât e par chel cuarp che al cirive di dismontâ dal jet. Cuant che forin fûr de cjamare però, a vevin començât a riduçâ e a fâ i compliments a Liam. Prin o dopo Fiona e varès fermât di scjassâsi e lôr a varessin podût sintisi liberâts di chê malsane presince. Dome none Abigail, no si sintive plui cjantâ, no si jere dismolade. E stave cidine, cuntune muse a mieç fra il malcuiet e il rassegnât.
Tal imprin a vevin tacât ducj a ridile, disint che e jere la solite pessimiste, ma a vevin scugnût tornâ a mangjâsi lis peraulis dome un pâr di oris dopo, cuant che un poliziot da la Garde al veve sunât il campanel par dîsi che barbe Seamus al jere lât a sbati.
La ploie… l’asfalt slichignot… une distrazion… In chel cidinôr fûr di scuare chês peraulis a rodolavin come glaç intune tace vueide, ma lôr no lis sintivin plui.
Dut chest al capitave pôc mancul di un mês indaûr.
Di chê volte, dopo jessi stât tirât fûr dal acuari, dulà che Liam lu veve butât par scjafoiâlu, o almancul par fâlu tasê, chel cjâf al jere deventât simpri plui esigjent. Dal comodin dulà che lu vevin poiât, al veve cjantât une altre volte, par cunvinci ducj che la muart di barbe Seamus no jere un câs. Cussì e jere muarte la puare Eileen, sô cusine, ancje se i soi novante e passe agns, e il sô mastià e spudâ tabac di continuo, a vevin fât deventâ che tombule mortâl scuasit benvignude
A nissun però al jere scjampât il sô cjant, che pôcs minûts prin, stiçade par il blood pudding che no i vevin puartât, e veve intonât la litanie, contant cun particolâr gjonde il corot che ancjemò al veve di rivâ. Il telefon da la nonute al sunave za dibant, cuant che rivarin adore a intindi ce che al jere sucedût. Daspò di chel moment, par ducj, al jere stât un deliri.
– Eehh! Eeeh! Eeeehh! – a businave ancjemò Fiona, une altre volte cjoche – Cuant al rivie il mê Powers!
Abigail, che di whiskey no si intindeve, a mateave cul telefonin, cirint di clamâ a un dai fîs, o a sô brût, o a un cualsisei dai nevôts.
A saveve che Doreen e jere dal rivendicul a cirî lis patatinis cul pevar, Sinead a cjoli il gjelat aromatizât cun la Guinness, Roan pai boscs cun Neil, a sgarfâ fûr tartufulis. Brenda e Cormac no si visave nancje dulà che a jerin lâts a pierdisi, par contentâ l’enesim estri. Il rest de famee al jere a durmî, scanât di chê continue tension che no vevin rivât a cjatâ altre soluzion, se no chê di ubidî.
Çuetant su la sô mace e jere lade dongje al cjadin li che e jere dentri il cjâf di chel spirt, cun l’idee di spiegâi che e veve di vê un pocje di pazience, e magari butantji tal glutâr altre bire, sperant che la volès. Masse tart. Fiona, cun mieze muse in muel inta ce che a veve za bevût e veve i smursiei ruans. E veve cjalât fis la puare Abigail cui soi voi verts, li che no jere nuie che al ricuardàs il judizi cjapât su i tancj secui di vite, ma e si viodeve dome morbin e matetât. Daspò si jere sclaride il cuel cuntun colp di tos, e veve començât a cjantâ.
Abigail, distrute, si jere sintade sul jet, cence fâ plui câs al cuarp cence cjâf che ogni tant i leve a sbati intor. La disperazion a le veve ingropade intune maniere che scuasit e sperave di jessi jê la protagoniste da la cjançon di chest colp. Jessi une famee numerose al jere il piês ingòs che ti podeve capitâ, se la tô banshee e dave di mat.
Si jere fate anim e jere jessude de cjamare, sierantsi le puarte su la schene, e jere lade a sintâsi dongje la puarte, cul telefon sui zenoi. Dome a chel pont e veve començât a vaî, cence savê par cui.

mercoledì 14 gennaio 2009

Fotografiis, sbits, curiositâts e contis

Vuê e va cussì:
Soi masse strac par scrivi, masse pôc strac par durmì, ma vonde strac par no podê lei cence indurmidîmi.
Ven a stai che us scrîf chestis riis sul blog par il gust di cjacarâ e contâus alc.
Tant par començâ cjalait ce biele fotografie.
Nol è nuie ce fâ, l'art digjitâl a podarà ancje vê savoltât cheste maniere di mostrâ il mont, ma imagjinis come cheste e àn dentri une anime che al è une vore dificil cjatâ in dì di vuê.
Che in pîts a çampe e je mê mari che cumò 'nd à passâts i sessante e che inta che etât si taiave ancjemò i cjavei cu la scudiele (e si viôt!).
Bon, nuie, dut a chi. A volevi pandi il gust di cjalâ une imagjine di curtîl furlan dal secul passât. :)



Cambiant discors, vuê matine mi è capitât di fracâ su Fantats Furlans, che al jere un pôc che a no lavi a "cjatâju" e o ai scjamât la version pdf di sbit, un fregul fat par ridi, e a di dî il vêr un pâr di ridadis a lis ai fatis. Sarà ancje stât artesanâl, intai disens e inte grafie, ma se o sês int che e vûl e pues cjapâsi cinc minûts di pause in ufici, scjamaitlu e butait un voli.

Tierce robe, cussì, par cjacarà, ma savêso che il non dal repipin (ven a stâi, il regolo, per taliano) al ven dal non dal re (mi pâr dai Avars) che al veve gjestît il Friûl tor i Votcent? Parcè chest ucielut cussì picinin al è stât clamât come un Re. In veretât chest ucielut ancje se piçul, al è une vore voraç. Simpri a nivel di curiositâts o pues dîus che o stoi leint il strolic e che la gnove di vierzidure e jè la origjine furlane di Giulietta e Romeo, che in vie indirete a saressin rivâts ai voi dal bon William, cjapant la ispirazion di doi inamorâts furlans.

Ultime robe che mi fâs plasè segnalâus e je la nassite de prime Ostarie Leterarie Furlane che a podês cjatâ fracant a chi e dulà o ai cjatais une mê conte bielzà publicade su chel altri blog, par talian, ma inedite par furlan.

Bon, vonde par vuê. :)

sabato 10 gennaio 2009

Il cartel par l'Udinese cu la Sampdorie

Ve chi, i vûl començât l'an gnûf cuntune partide che nus dedi sodisfazion, a nô puar tifôs, e ce miôr di un biel incoragjament a la scuadre. Sperìn che doman e ledi drete...

Finiment e principi - une poesie par cambiâ an


Ju vevi scrits par talian, il mê bon finiment e il mê bon principi, ma mi plaseve començâ ancje chest blog cun lôr e cussì ju ai voltâts par furlan.


FINIMENT E PRINCIPI


Prin di scomençâ
I vûl finît
E che il finiment, nol sedi fat a câs
Sierâ i dêts
Intun pugn
E butâju vie
Lontan
Cui rimuars
Che a si fasin
Scontrins fruçâts
I displasès
Aiar
Che chel almancul
Nol coste nuie
Invezit pai prins
Tu âs bielzà finît di paiâ
Pai biei ricuarts
Al contrari
Nol varès di jessi intrigôs
Fâju deventâ coriandui
Emetiju in sachete
Par agns
Cence platâju mai

Dopo di chest o brami
Par ducj voaltris
Di rivâ adore a sporcjâ
Il vuestri ator
Cjocolate intal lat
Pluitost che il contrari
Visâsi che e baste une gote
Par tirâ su un mâr
Dilunc di une pagjine
E cence che lis peraulis
A sedin di burascje
Visâsi che une manece
No jentre inta chê altre man
Ma par ledrôs sì
E al fâs il so lavôr
E in ultin o speri
Di no dismenteâmi mai
Che al è plui impuartant il scat
Che la fotografie