martedì 22 gennaio 2019

Scjapinele


Dulà setu?
Dulà atu poiât lis mês scarpis?

La plete stuarte dal jet jevât
Mi inçopede lis zornadis
Discolç
L.ôr de scudiele
Sbecât scunît scjassât dal lat
                                     [cjalt
Al sbrove i lavris
Cu la lôr premure.

Cjase mê si svuede.
Sanc che al cor sburtât
Dal consumâ dal timp
E dal brantiel di scusis
Vendemât adore.

Garp il glotâr vanzât
Al om cence brame,
Mareôs il voli
               [cence code
De codebuie:
No si è plui là dentri,
No si è plui te pôre dal doman.
Magaricussìno.
 La plane zimie
Lis scjalis si jemplin di çocui e çavatis
Lis spalis di vistîts
La place
           [cence vôs
Mi clame par no lassami lâ vie
Cjapâ une androne, ficjâsi dentri
Sledrosâ il borc
Fin tal ultin curtîl.
No jerino cussì, forsit, nô salvadis?
No jerino cussì i nestris nemîs
                                            [e amîs.

E cumò
Do sono lis mês scarpis
No varai mica di vivi
In scjapinele?

Il cartel par Udinese - Parme


lunedì 7 gennaio 2019

Ultins cartei par l'Udin dal 2018

Veju chi, i ultins trê, che no mi visi neancje cun cui che o vin zuiât.


martedì 30 ottobre 2018

Ancje tu ninine


Scolti dome i muarts
Muarts e int che a veve
Alc di dî.

Di gnot, dutis li rosis
Che ai robadis tai agns
                           [e son tantis
Si metin in rie
Pal funerâl di mê mari
Me pari
Il me
Denant de puarte
Dilunc la strade
Daûr dai orts
E in bande dal timp
Che si rive adore a robâ
Al chel straçât.

Ancje tu, ninine
Là tu che tu jeris
Insieme cun chê che no jere
Cu me, 
Tu, pituriti
In muse
                   [une muse
E va indenant
Cence scoltami me
Che come plete tal vueli
Soi deventât forest.

lunedì 22 ottobre 2018

No soi


Jo no soi chest
Che nol sa jessi
                    [adore
Dopo jessi stât
                    [tart
No soi chest
Ma no soi neancje 
Chest altri,
Mi cambiais ogni volte
In miôr o in piês
In plui o in mancul
Cuntune idee di me
Che no je la mê.

Bessôl
In bande
Indaûr.
Chest al è il gno inniò, 
Chi o torni
               [simpri
Cjasâl bandonât
Cjacaronât di favitis
E madracs,
Sglonf di pomis 
E di baraçs

venerdì 19 ottobre 2018

Contimi mame


Tu mi âs insegnât
A cjalâ i cuadris
Piturâts
Su lis telis
               [di rai

Contâ i dêts
Intune tace, un pugn
Un sfuei di cjarte
E mai
Palanchis, mai
Nie a cui che al gjave
Vie
La clâf de puarte.

Contimi cumò
Che za tu mancjis
Di ce che al mancje
                              [ancjemò
Di ce che al dure
Pluitost che no.

Contimi di ce che si disnice
Inta lis placis 
                        [vueidis
Di chel parint
Mai cognossût
In fidance des tristeriis.

Contimi di chês contis
                                    [mame
Miezis restadis
Tal grumâl dal sium
De strache che rive adore,
De premure
Di lâ a meti un blec
Tai miei bregons di dîs di vore.

martedì 9 ottobre 2018

Cori a matine


Cori a matine
Un paîs che tu cjatis
    Sveât
Che ti permet di robâ
                          [une rose
Che ti compagne
Un cjan
Un mierli
Un bandarot che al disnice
Melodie.
Incrosâ un bundì
Une cjalade di brut
Un rivâl sglonf di zulugne.
Ce isal il dì
Che si romp denant dal pas?
Une sabide?
Un doman?
Un aromai?
I grignei di sudôr
A slusin i voi
Dut li cumò
Il to jessi siôr.