domenica 29 aprile 2012

Il cartel par Udinese - Lazio

Domandâi il timp a un mat, no je une robe sane, ma jo vuê o rivi a cjatâlu e a meti sù chest cartel, par viodi se o rivìn adore e poiâ doi balins, tal cûl de acuile blancjeleste, di maniere che la zebrute furlane e puedi tirâsi sù un tichinin. 
Ah, pe cronache, o volevi fa le zebre cu la scolpe, pe cuistion dai balins, ma jessint che - stant a che cjavrui dai stuarts, - bielzà il cartel de setemane passade al jere masse violent (e pensâ che e jere une citazion de Bibie) o ai pensât di cambiâ la scolpe cu la fionde... tant, par tirâ ju une acuile no coventin masse imprescj...

mercoledì 25 aprile 2012

Il cartel par Udinese - Inter

Ve chi... lu sai, lu sai che lu varês za viodût, ma nol è cambiât nuie: se vincìn o tornìn in corse par il tierç puest, jessint che dopo o vin di cjatâ la Lazio e podìn cjapâju.
In vêr, nol è tant al tierç puest che magari a vin di cjalâ, ma a restâ in Europe, che o pensi che e sedi za une grande robe... si che duncje, fuarce Udin!
E sclizzin chel madracat neri e blu!

lunedì 23 aprile 2012

L'ALIEN

A fuarche di rompimi, il Checo, al à rivât a otignî une conte sul alien che cualchi timp indaûr al jere stât viodût su la rotonde di Talmassons. Jo preferìs pensâ a une creature misteriose, ma di chest mont, e alore ve chi, e je saltade fûr cheste conte - fate par Contecurte - che o met ancje chi, su chest blog salvadi, juste par no viodi dome cartei pe partide.
La imagjine e je personâl e inedite, e il protagonist, mi pâr clâr, no podevi che clamâlu cussì. :)

L'ALIEN

Checo si sbassà a palpâ la tiere ator de poce, glaçade e induride di chel Unvier sut e ruan.
Si viodeve benon la talpassade, lis ongulatis che a vevin grampât, sgrifignât, sbrissât vie par cirî - par sigûr - alc di mangjâ, sedi un fros di jerbe o une fuee sparagnade de criùre.
Al è clâr… par viodi bisugnave savê, parcè che chês cuatri crepis a crôs a podevin someâ di dut, fûr che une olme.
Jù pe gnot, inte taronde dal prin avistament, cualchi coion al veve metût fûr parfin une sagome, taiade e piturade tal compensât, cun plumis e çatis, un bec arcât e un cjâf a spice - une musate robade ai fumuts - metûts forsit par cjoli pal cûl chei che par lis campagnis tor Mortean a levin indenant a viodi l'alien, la creature, o ce dal ostie che i passave pal cjâf di clamâle a lis pioris dal WEB.
Checo al slungjà il pas dilunc la stradelute, par viodi se al cjatave altris indizis, ma cumò che il frêt al jere lât a cirî fortune di altris bandis e che i cividocs a vevin metût fûr i lôr colôrs, al jere cuasi sigûr che chês a fossin dutis monadis.
Tornât indaûr, si sentà in machine e si gjavà il telefonin di sachete, tacant a mateà su internet. Benon! Al jere saltât fûr parfin un profîl Facebook e i avistaments, intal Friûl di mieç, no si contavin plui: di Plain a Pasian, di Sclaunic a Pampalune… Miôr cussì, al pensà metint in moto e cjapant pai cjamps de basse, par stradutis che al cognosseve dome lui. Rivât li che nancje il so cuatri par cuatri al cumbinave, su lis rivis dal Stele, al fermà e al le indenant a pît, fin a rivâ dongje di une cise, dulà che al tignive une piçule barcje, comprade di un vieli pescjadôr di Teôr. Al vierzè il luchet che al tignive peât il piçul motôr e al controlà che e fos vonde benzine, po dopo al studà il telefonin e, compagnât dal cif ciaf de eliche, si invià jù pal flum, intal vert sunsûr de aghe. Fintremai di piçul, cuant che so barbe lu puartave a bisat, tes cjaldis gnots jempladis di griis e umit, al pensave che jù pes rivis di chel flum antîc a fossin puescj dulà che nissun al meteve pît, intrics di arbui e pantan, che dome a fuarce di vitis si podevin viodi e cuissà ce maraveis che a platavin.
Un molec al disegnave rivocs, petenant la corint, e Checo al pleà la schene, pôc prime di distudà il motôr e lassà che la vetroresine de barcje e russàs cuintri la rive, fin a fermâsi.
Lui si fermà cun jê, cul nâs par aiar.
A passarin i minûts, compagnâts di chel cidinôr che la campagne e fâs sù cun fros e fueis, fintremai che adalt intune gruesse ramascje, al rivà adore a viodi ce che al cirive.
Intorteade in tal tronc, palide, lungje e cun dôs çatis bocognonis - vot grifis plantadis tal len - une creature e polsave, il lunc cuel spelât che la vignive fûr des plumis, colôr dal tronc, e il cjâf grant tant che il bec, ancje chel inficjât par tignîsi dûr.
Di lontan, cence abituâ il voli, si sarès dite dome un branc di elare une vore penç, che al travanave une cise un pôc plui imbrussade di altris. Checo ju veve scuvierts par câs, chei grancj uciei che no svualavin, ma si rimpinavin sui morâi plui alts e li, i pareve di capî, a passavin la lôr vite.
La bestie, cuasi par confermâi che e jere vive, e voltà il cjâf e e pontà su di lui un voli neri, dolç, che i rivocà dentri i budiei di tante tenarece che al mostrave.
Checo al impià il motôr e al tornà a frontà il Stele, di rive sù, chest colp. Nol saveve tropis che 'nd jere, di chês creaturis. Almancul cinc o sîs, al veve calcolât.
A podevin jessi i dissendents di un grant uciel che etis indaûr al viveve in Afriche, mudât dal timp e de leç di Darwin, o pûr, pardabon, une bestie aliene, vignude di cuissà in dulà, incjastrade aromai in chest cjanton de basse furlane. Cuissà…
Il frêt forsit al veve mandade une a passonâ pe Napoleoniche, cui pues dîlu… Lui, no di sigûr.

sabato 14 aprile 2012

La strie

O ai gjavât il post cul cartel pe partide di vuê.
Morosini no lu cognossevi, come zuiadôr, ma o leievi simpri il so non, inmò cuant che al zuiave inte primevere e no savevi nancje che al jere lât a livorno.
No vevi nissune voie di lâ al stadio, usgnot, e mi va benissim che a vedin sospendût le partide. No tu zuis plui, cuntune robe cussì. 
Di sigure al sarà cualchidun, ator, che al tirarà fûr il discors "ma parcè" "a môr int ogni altri dî, sedi plui zovins sedi mancul fortunâts" e vie indenant.
Vere, vere...
Ancje se in tal so câs no si pues dì che al vedi vude masse fortune, in famee. 
Ma i discors a stan pîts in ogni câs.
Ma us disarài, di zuiadôr di balon e tifôs che vuê al leve al stadi, che no ti ven voie di fâ fieste, di lâ a businâ. E alore no viôt nuie di mâl a fermâ, ogni tant, lis robis. Tant si dismenteis, doman matine mi jevi, come simpri, o compri il gjornâl, o cjalarai la formule un. Doi e trê dîs e si torne a tacâ, o sari pront di gnûf par lâ al stadi, businâ...
E je cussì che al funzione e di bon di chel.
A ogni mût vuê us lassi cuntune altre robe.
Une poesie.
Anzit, une cuasi poesie, di chês che ogni tant o buti jù. Poesiis veris, inte vite, 'nd ai scritis trê o cuatri.
E o ven cumò cumò di Basilian, dulà che soi stât a viodi lis premizions di Emozions di ingjustri, o ai cognossût Gianfranco Plume d'Ingjustri e ae fin, ancje se no jeri in vene di int e di cjacaris, no mi è displasût lâ.
La cuasi poesie e jere partide su chê strie di mê mari, e dopo e je deventadi plui universâl, partint dal començâ che la prime e forsit uniche strie che e cognossin, te vite, e je propite nestre mari.
Cussì, almancul, o viôt di inzornâ il blog cun alc altri, che no sedin cartei par l'udin.


 
STRIE

Lu vevi scuviert di piçul
che tu jeris une strie.


Tu cognossevis, no sai cemût,
la gjeografie des cjasis
e il dulà di ducj i miei parcês.


Tu jeris buine di stramudâ i cjalcjuts
in cjalçuts
e sierâju intun scansel.
Tu vevis incjantesims intrigôs
Par platâ cetancj savôrs
intune sole sedon
e i bêçs
sot dai cussins.


E tu savevis dulà meti mans,
lis ongulis mai netis,
par mugnestrâ cuviertis, pletis,
taculis,
grops tes scarpis e tal cuel.
E tu svolavis, pardabon
suntune scove, di une stanzie a di chê altre.


Ma cumò,
che tu âs vues di veri,
dincj di piere,
voi di cristal…
no mi vanze mai timp,
mari,
par jemplâ lis tôs sachetis
vueidis.