domenica 17 gennaio 2016

Un presepe tal cjôt


 Mê mari ogni tant mi romp i coions, ce âstu di fâ, al è plui fuart di jê. E à il vizi di cjapâ impegnos par chei altris, e di cuant che o scrîf (di simpri, in pratiche) la robe e va in piês.
Al ven ben rafaele a viodi, al ven ben rafaele a fotografà, al ven ben rafaele a scrivi che storie, a lei ben rafaele lis tos robis...
No, di solit no. No ai timp, se tu as simpri al minimo 3 lavôrs che a cambiin in numar e tipo, al è dificil gjavasi une mieze zornade libare... 
Ma ae fin, nol coste tant e si ven simpri a savê di bielis piçul robis.
Come dal muini vieli di Talmassons, che cumò mi scjampe ancje il non, ma nol impuarte, che al à jempre di santuts e al à gust di fâ il presepe. E insome, tant i à prometût, mê mari, che o soi lâ a viodiju, chescj presepis.
E difat, ve chi, che us lassi cualchi fotofrafie.
Un al jere  intal cjôt, biel, cu lis statuonis grandis e une location che e saveve tant di furlanetât.
Ae fin, se fos capitade ca, se no jere libare une stale, al jere un cjôt.
Un altri, plui sot, fat cu lis fotografiis vieris di so pari in vuere, tal Nadâl, 
Un altri cun mieç presepe tradizionâl e mieç ambient roman, ancje parcè che e jere cussì che e jere, no?
E po ancje chel tal mûr.
Insome, a vê un blog al è biel ancje par lassâ une olme de robe in rêt, che disfat il presepe, e reste chi, fintremai che google al volarà.
Buine domenie!







Il strisson par Udinese - Juventus



E alore sì, ogni volte, pardabon, si è propite stufs di viodi dute cheste int, chest voltegabane, che fin tal dì prin tu ju cjatis in osterie, a discuti di udinese, di colantuono, di di Natale, di Watford di ogni sorte di cazade balonare che i passe pal cjâf e che cuant che e rive la scuadre cui plui sotans a si somet tirant ju i bregons e ju a bati li mans come mats e a jemplâ il stadio... stait cjase, o pûr, almancul, tignisi lis mans in sachete, e sperin vuê di riva a puartâi vie un pont, ancje se al sarà come viodi un scuadre di tierce categorie cuintri une di serie A...

mercoledì 6 gennaio 2016

Il strisson par Udinese - Atalanta


Prime partide dal 2016 e si zuie par fortune a misdì, che magari il frêt al criche un pôc di mancul. E sperin di puartâ cjase pardabon i trê ponts, va, che il 2015 al à fat vonde riviel, par l'udin e insome, une vitorie e podarès propit fâ comencçâ ben l'an.
No sai nancje cui che al zuie o mancul, doman... starin a viodi la partide cence tantis menadis, e doi cartei, un par gno pari e un par un frut ospit. che insome, ancje se e je dute la sere che si matee parsore, al è simpri gust.

lunedì 4 gennaio 2016

Ce raze di nêf

Ce raze di nêf!
Simpri biele, sì, a viodile, chê blancje, ma ancje chês altris, che no parin vê frêt ne preocupâsi masse pe neveade che e à vierzût l'an.
Migo come la gjate, Badu, che no le veve mai viodude e che al jere inte stale, plene di pôre, e i è volût un moment par che saltàs fûr.
Vele chi, platade sot de gabie de blave...
Obama invezit, al è dut di une altre opinion...
pûr di jessi cocolât, al rive di corse come un treno e ti salte intor... Insome, la nêf, e je une di chês robis che no si rive adore a dî trop biele che e je, ma a cjalâ lis bestiis che la frontin, si rint une vore ben la idee!

venerdì 1 gennaio 2016

Lavâ lis tacis

Lavâ lis tacis
Sù il cafè, piât il fûc
Un bon principi

***

Lavare i bicchieri
Sul fuoco il caffè, acceso il fuoco
Un buon inizio anno.

mercoledì 23 dicembre 2015

I haiku di Nadâl


Sflandôrs sui lens
Talpassât il muscli e
Nol rone il mus.

***
Sfavillio sugli alberi
Calpestato il muschio e
Non raglia l'asino.

___________________________________ 

Fîcs e bagjigjis,
Cjocolate, ma lis miôr
A son lis stelis.

***
Fichi e bagigi,
Cioccolata, ma le migliori
Sono le stelle.

domenica 20 dicembre 2015

Domenie clipe


Domenie clipe.
No spieti Gjesù Bambin
Mangji pan e fîs.

***

Domenica tiepida.
Non aspetto Gesù Bambino
Mangio pane e fichi.

mercoledì 9 dicembre 2015

Ti viodei

Ti viodei, 
Biele come un gjat in glesie, 
Il vert dai voi al piturave la muse interie, 
E la maluserie
S'inviave in scjampinele par un troi
Di glerie. 

Di lontan, ti viodei,
Spiçant i miei
Di voi
Par cjarinâti il cûl
E olmant
Invezit un nûl 
Di regjinis e cjastiei
E puescj masse biei
Di li ai zenoi
O viodei.

Ti viodei,
Ridi nete e sclete
E curiose,
No contentâti di spiâ a la man drete
Lis brauris de ledrose
E rose
Odorose framieç
Midisinis ti viodei
Mugnestrâ doprant lis orelis
Pipinis e cjavei.

lunedì 30 novembre 2015

Une frambue


Une frambue!
Smicjavie forsit Nadâl?
Al mancjave pôc...

***
Un lampone!
Puntava forse Natale?
Mancava poco...

domenica 22 novembre 2015

Il strisson par Udinese - Sampdorie


E ae fin e je lade ben.
Un pocje di fortune e Colantuono che pe prime volte al induvine la formazion e i cambis. Une Samp che no je stade cuissà ce, ancje se al va dit che a ficjâ dentri un gol prin di nô la storie e jere dute diferente. Di bon, un Aguirre che al à di cressi une vore ma si viôt che al à alc ce dî, un Edenilson, soredut a cuvierzi, che al è tornât ai nivei di cuant che si veve tacât il campionât, e un Iturra che al à dât il so contribût. Forsit il miôr al è stât Badu, par che cence chel gol e cence tante sostance no varessin trê ponts in plui. Un batimans in plui a un emotivamentri coinvolt Thereau e al so assist, di un atacant di raze, di chei che a san fâ segnâ chei altris. No masse in forme Widmer, che al pâr no jessi bon plui di saltâ l'om, e invezit indispensabil ancje se no tant visibil, Lodi. Al covente.
Nol sarà un top player, ma un om di ordin al scugne sei.
Il zûc? No, chel no 'nd jere masse, ma tante voie di fâ ben, tant pressing, che la Samp e pative, e par une scuadre che e à di salvâsi al è ce che al covente.
Va ben cussì!