venerdì 10 dicembre 2010

Sino sigûrs di jessi plui sigûrs?

Al un pôc che o ai di scrivi chest post che al dà il vie a une gnove rubriche. 
Il gnûf tag al sarà: "Nus cjolino pal cûl?"
Di resint mi capite simpri plui di spes di pensâle, cheste frase, e no dome cjalant i gjornâi radio nazionâi, ma ancje zirant ator par chestis bandis.
O pensi che par chei che ancjemò no àn vût ocasion di viodi un di chei pipinots, su lis stradis de province di Udin, al sedi nât un pensîr une vore dongje ai miei, dome cjalant cheste fotografie.
Sì, inutil dineâ, dome a viodi la foto tu ti domandis se a si sin rincoionîts ducj cuancj e a ce gjenar di proteste che a sedi peât un pipinot di cheste fate.
Stano protestânt cuintri la tessare dal tifôs?
Cuintri i decoder che a costin dai vincj euro in sù e valin doi?
Cuintri chei che a àn un cûr masse grant e cul lôr bati a disturbin cuant che a van in biblioteche o in glesie?
Insome, ce robe ise?
Al pâr, cussì mi pâr di vê capît, che chês sagomis alì a sedin un progjet (un progjet... disin une cjatade, dài) de province par judâ i incidents de strade, oh no, spietait, a judâ a no fâ incidents su la strade.
Jo no sai i studis che a son daûr cheste iniziative. Us dîs la veretât, no mi soi informât. Però soi un che al vuide une vore, pes stradis dai nestri comuns, sedi pa lâ a vore, sedi par lâ a frice, e une schirie di fats peâts a cheste iniziative mi pâr che a sedin une vore clârs.
La prime robe e je une sensazion personâl, di cuant che o ai viodût pe prime volte, a scûr, chestis sagomis. O ai cjapât pôre. O ai mot la machine de corsie, scartant bande çampe, come cuant che si viôt un a pît. Subît daûr o ai vût cuasi l'istint di fermâmi a viodi ce che al jere, e dopo o ai pensât a un mateç, a une proteste. 
Di cuant che o soi vignût a savê la veretât, al è clâr, cuant che o passi pes stradis li che o sai che a son lis sagomis, no mi fâs nancje un fastidi, tant o sai che a son e no mi met di sigûr a ralentâ o a prestâ plui atenzion e vie indevant. Anzit, mi capite di dediâ atenzion aes sagomes (e no a la strade) par viodi se i àn fat alc e se a son ancjemò dutis interiis. Chê di Varian lant a Bresse, par dî, di un pâr di dîs in ca e mostre un biel bigon piturât cul spray blanc, e chel che jal à piturât, se par câs al lei chestis riis, che al sepi che al à une bire paiade. Ancje dôs va.
A ogni mût, za chest mi fâs capî che lis sagomis a gjavin atenzion, invezit di regalale.
Podopo une altre considerazion: vait dongje e cjalait cemût che a son tignudis in pîts. Plastiche? Compensât? Polistirolo? Materiâl ecologjic? 
Ma ce, une biele anime di fier. Sì, a vês capît ben. Fiêr. Cumò jo mi domandi, se lis colonutis de strade di ciment a son stadis gjavadis par fâ spazi a chês di plastiche, al sarà un parcè, nomo? (anzit, 'nd è plui di un)
E alore, se za i pâi de lûs, i pôi e il ciment dai puints a son une vore pericolôs par cui che, par sfighe o coiononerie, al vâ fûr di strade, al coventavie che a zontassin un altri pericul? 
(Tignint ancje cont che a son metudis propit in ponts dulà che al è facil lâ fûr di strade!)
Nol covente rispuindi, o disarès.
In ultin un judizi su chel cûr une vore kitch che i àn pitûrât. Al coventavie? E chês scritis? A coventavino?
Lis scritis a sono plui eficacis par gjavâ pericul? A ano cualchi podê magjic tipo mantra che a ti drecin il volant de machine se tu stâs par lâ fûr di strade?
Insome... jo no sai voaltri ce che a pensais, ma cuant che o viôt deviazions fatis cui pîts (di une simie), marcjepîts cence nancje l'aces par i puartadôs di handicap, stradis tignudis come il troi dal me ort... la uniche robe che mi ven di pensâ e je: ma nus cjolino pal cûl?

7 commenti:

  1. Sêstu sigûr che no sedin sagumis che a visin de presince di prostitudis???
    Chel cûr al podarès jessi il simbul dal amôr (a paiament, clâr!)... e a dîle dute: ce cirivistu tu ator par chês stradis???
    Vergogne, vergogne!!!

    RispondiElimina
  2. Jo, di brâf blogger, o soi lât a fotografâlu di pueste! :)

    e po... ai tant cirût, ma di patatis, li dongje, nancje une!

    RispondiElimina
  3. Frice, patatis... ma che simpatica goliardia. Ragionando per metonimie con te la Provincia ha trovato il codice comunicativo più adatto. Dovresti ringraziarli, non lamentarti,

    RispondiElimina
  4. Mah... mi pâr che chel il codiç comunicatîf che al è un probleme al è chel di un che a nol à nancje il coraç nancje di firmâsi :)
    Ma probabil che a chest pont a tu lavoris pe province :D

    par il rest no, mi splâs, dificil che un che al à vût un brut incident di strade al podi ringraciâ une iniziative di cheste fate, se no altri pe pôre che ogni volte al cjape viodint oms sul cei de strade.

    RispondiElimina
  5. Non lavoro per la Provincia, trovo l'iniziativa inutile tanto quanto una sacco di altre cose, scrivo in italiano per rispetto, non essendo in grado di farlo correttamente in friulano, ritengo che tu non abbia capito per nulla il mio commento, non firmo perché non sono nessuno. Per te. Quindi che senso ha dire che mi chiamo Nadia.

    RispondiElimina
  6. a) cualchidun si isal lamentât che no tu âs fevelât par furlan? no mi pâr.
    b) isal tant dificil interpretâ chest: :)
    e chest: :D
    Secont ce lis aio metudis a fâ? aio di scrivi (attanzione! attenzione! questi simboli significano "risata!" questa quindi è una battutta") :D
    c) firmâsi, tal web, al à un signîficât di vierzisi a la discussion, di cjoli la tô identitât web, che non à e no pues vê un corispuindent fisic. Ancje se tu firmîs nadia, picepuce o vercingetorige, al è compagn. Jo o sai che nadia, picepuce o vercingetorige a son disporcj a discuti/cjacarâ/scherçâ cun me. invezit "anonimo" al anche chel dal coment di prin, che o crôt che a nol sedi to.
    Anonim, invezit, al vol dì fâ part di un grup. il grup dai anonims.

    O resti simpri plui convint che chestis robis a van insegnadis a scuole. :)
    Mandi!

    RispondiElimina
  7. Juste par dî che ancje jo, la prime volte che mi soi cjatât denant une di chês sacumis (o jeri suntun volt des bandis di Dalnì) o ai vût l'istint di scartâ a çampe. Al jere scûr e si le viodeve propit al ultin. Disìn che l'efiet nol è stât propit chel di sensibilizâmi su la cuestion de sigurece stradâl...
    Su chel cûr grant ben in evidence, mi ven di pensâ plui a di un bersai che no a alc altri. E nancje chest mi da un grant sens di sigurece.
    Sperìn ben! ;)
    Mandi.

    CRL

    RispondiElimina