mercoledì 5 gennaio 2011

Il me bon principi

 
E par chest an
Cirint di visâmi
Che no soi altri che un balon
Di un pâr di euros
Che al galegje sul mâr
E che un pinguin
Al podarès cjamina suntune gru,
O cirarai di intindi i dîs che a àn di vignî
Come une misture di chei che a son stâts
E no dismenteâmi mai
Che no esistin falopis
Ma dome stradis cjoltis
E che i unics cuarp celescj che o cognos
A son i puffos
E la uniche veretât
E dîs che mê none... podeve jessi une carriole
 

venerdì 31 dicembre 2010

Cassis par casselis, par finî l'an

Ve chi, l'ultin post dal an.
O comenci propit a sierâ il blog di chest Salvadeat, il blog che o ai metût adun par ultin, dai miei trê, e chel che o cirarâi di tignî plui di cont in chest an che al ven.
Pocjis peraulis di lassâ.
In chest 2010, pur vint scrit di plui, par furlan, o ai scrit une vore mancul contis, sedi par talian, sedi par furlan. 
Poben... nuie pôre. 
Al vûl dî che o varai fat altri, e di ce che o ai fat o soi content. :)
Ven a stâi che us lassi dome il bon finiment e i bon principi.

Come regâl, ancje se nol è par furlan, ma par talian, us lassi chel che aromai di cualchi an in ca o lassi simpri: cualchi conte di lei!
Chest an l'ebook si clame "Bare per barattoli" e la gnove e je chê che se par câs a us àn regalât un kindle (un letôr di ebook, insome) l'ebook al è disponibîl anche in tal formât epub (che no je une robe di bevi, ma a covente par che il kindle nol lei i file pdf).
Se o vês voie ancje voaltri di fâsi impagjinâ lis vuestris storiis par metilis in formât ebook, jo lu ai fat fâ a chel di eBook&Book, che al è brâf ma al à un piçul difiet: al è triestin.
Ma va ben... sicome mi à fat un bon lavôr lu perdoni, par cheste volte.

Par chei che a son passionâts di Signore degli anelli, invezit, a podin lei une altre conte, che si cjate simpri intun ebook. Chest si scjame simpri di ebookgratis, (par furlan ebookdirivejù). La conte e je un spin-off dal famôs romanç di Tolkien. Si imagjine che Sauron al vedi vint, e che il mont al sedi a patràs.
L'ebook si clame Il Ripostiglio (e dentri o cjatàis anche une conte dal triestin di prin)

Bon, al è dut.
Us saludi voltant par furlan la poesie che a dâ il non al ebook



Cassis par casselis
O ai metût lis mans in sachete
E no soi stât plui in câs di cjatâlis.

Di subit a pît
Mi soi insegnât a cjaminâ
E o dât vie cassis
Par casselis.

Ma tu tu mi âs bigulât
O vevi il cûr in bocje
E tu mi âs lassât
A scjafoiâ.

sabato 25 dicembre 2010

sabato 18 dicembre 2010

Visions di visionaris, poesiis cence peraulis

Un piçul post volant, par contâ la serade di martars di sere, al Visionari. Al inizi no vevi tante voie di lâ, sedi parcè che e jere un zornade luuuuungje, sedi parcè che no vevi ispirazion di sintâmi a viodi films. Daspò o ai pensât che doi agns fâ o jeri lât a viodi ancje se no vevi vinçût nuie e che chest an, che o vevi cjapât la menzon speciâl par la storie pa cine che o vevi scrit, al sarès stât un pôc di maleducazion, no lâ.
Us esaurìs subit la part de cronache dai vincidôrs de serade, fasint un biel "cupìe e intache" cjolt dal comunicât:

Pe sezion dedicade aes senegjaturis al à vinçût il prin premi Il cjapitani e il tamon scrit a cuatri mans di Andro (Andrea) Peressutti e Riccardo Sabbadini cun cheste motivazion: “La senegjature e dopre une lenghe vive e inceose par une storie che e insuaze un toc di Friûl, ancje periferic, intune fantasie sureâl e vivarose fasintlu deventâ protagonist di une ‘grande storie’”.
Pe sezion saçs il prin premi al è lât a Une ridade par simpri di Francesco Della Mora cun cheste motivazion: “Si trate di un saç che al fronte intune maniere aprofondide cun riferiments precîs, il film Der letzte Mann di Friedrich Wilhelm Murnau sedi tal contest produtîf dal regjist stes che tal contest dal gjenar Kammerspiel, cuntune buine scriture che e pant une cognossince de storie dal cine e de analisi critiche”.
Pe sezion storiis par film la jurie e à volût segnalâ cuntune mezon speciâl Arbui vistûts di Raffaele Serafini cun cheste motivazion: “Une storie origjinâl li che e ven preseade in mût particolâr la scriture e la lenghe”.
Il premi “Mario Quargnolo”, ricognossiment che al ven dât ogni doi agns a personalitâts che a àn contribuît ae incressite e ae valorizazion dal cine in lenghe furlane, al è lât chest an a trê professioniscj dal setôr: Marcello De Stefano “par jessi stât il precursôr, sedi sul plan teoric che sul plan regjistic, di un cine furlan in lenghe furlane”; Lauro Pittini “che cul so cine, za a tacâ dai agns Otante, al à screât une gnove e dinamiche gjenerazion di cineascj furlans” e Bruno Beltramini “pal so contribût al cine furlan, no dome tecnic sul plan de fotografie, ma cumò ancje a nivel regjistic”.
Mi plaseve di plui cjacarâus, pluitost, des proiezios fatis in chê sere (lassant stâ la interviste a Cappello, che e jere stade proietade ancje doi agns fa).
In particolâr, la prime proiezion, bilengâl (occitan-furlan), e jere une vore interessante sedi dal pont di viste etnografic, che di chel storic-romantic. E tratave dai Cjavelârs, ven a stâi chei che a vignevin dal Piemont (dal comun di Elva) e a straviersavin dute la plane fintremai a rivâ in Friûl, par vicnî a comprâ i cjavei par fa piruchis. Che si vendès i cjavei, za lu savevi, ma viodi che documentari al è stât interessant par almancul trê motîfs. Un, che no savevi che i cjavelârs si cjatavin a codroip, di spes, a menâ zarde soredut; doi, che al jere une vore interessant viodi chel mistîr de bande dai compradôrs; trê, che al è stât biel sintî cjacarâ par occitan e cirî di capî cence lei i sot titui.
Il secont documentari che al merete une vore di preseament, al jere chel su Federico Tavan, che jo, fin martars, o cognossevi une vore pôc.
Il documentari al è une vore ben fat, e no us dîs altri, si no di cirî di viodilu. Dôs riflessions, però, mi sint di fâlis. Une e je chê che in cuasi dutis lis intervistis. ducj a cjacaravin di lui al timp passât. Cuasit mai doprant il presint, pur jessint che ancjemò, Tavan, nol è lât cun i plui. Che altre considerazion, invezit, mi è vignude cjalant lis performance e cjalant il sô jessi poete, lontan des poesiis. O ai cuasi pensât che, in dî di vuê, dulà che la poesie no esist cuasi plui, une des pocjis manieris di tirâle in ca e sedi chê di rindi poesie la vita, pluitost che fâle cu lis peraulis. E i vûl coraç, o mancjance di cussience, par fâlu, ma e sta deventat une des pocjis stradis pussibilis par jessi poetis pardabon.

lunedì 13 dicembre 2010

"Vorrei star fermo mentre il mondo va" di Simone Marcuzzi

No ai intenzion di tornâ a cjacarâ di chest libri, che o ai let di pôc, e che se a cualchidun i interesse al pues lâ cence fastidis a lei la cjacarade sul libri par talian, su chel altri blog.
Achì o aprofiti dome par dî il parcè che o ai let chest libri: "Vorrei Star fermo mentre il mondo va".
Joibe cheste, ai 16 di Dicembar, di fat, o sarai a Orgnan (19.00) ,inte ostarie in bande de glesie, propit a presentâ Simone Marcuzzi, e a fâ une partide di discors su la sô prime jessude leterarie cuntun romanç, capitade cuntune major de editorie taliane.
Dôs peraulis sul libri, tant par che o savedis se us pues interessâ o mancul.
La storie e je une tipiche storie di vite "adolesenziâl", che e cjacare di trê zovenots di 18-19 agns che a frecuentin la cuinte superiôr intun istitût di Pordenon (un liceu, tant par dâus cualchi particolâr) e a vivin lis cuistions di ogni dî, dai zovins di cumò.
Cuntune scriture lizere e elegante, Simon Marcuz nus conte cemût che Rodolfo, il protagonist, al vîf il passaç da la etât dal mont di frûts a chê di une realtât di grancj, passant par une schirie di cuistions personâls come la fin dal matrimoni dai siei e la mancjance dal pari. A inricjî il libri, par nô furlans, e je une ambientazion fate inte provincie di Pordenon che e je fate une vore ben e che a puartê a vivi la storie intune maniere plui intime di un cualcisei letôr. Se cualchidun al à un regâl di Nadâl di fâ a un frutat di 16-20agns che magari nol è usât a lei, us dîs subit che cheste e je une buine sielte, parcè che la descrizion des storie dai zovins de province e je une vore bene fate. Par chel che invezit al volès passâ a Orgnan dome par bevi un tai... ben che al vegni, si viodìn joibe!

sabato 11 dicembre 2010

L'ultin cartel dal an, par l'Udin


I coments anonims spiritôs dal post prin di chest mi àn ispirât e o ai decidût di doprâ il sugjeriment dal codiç comunicatîf de province, jessint che al pâr che al funzioni :)
Ve chi il cartel de partide dal Udinese di vuê!
Sperin che chei de Fiorentine a vadin plui planc... :)

venerdì 10 dicembre 2010

Sino sigûrs di jessi plui sigûrs?

Al un pôc che o ai di scrivi chest post che al dà il vie a une gnove rubriche. 
Il gnûf tag al sarà: "Nus cjolino pal cûl?"
Di resint mi capite simpri plui di spes di pensâle, cheste frase, e no dome cjalant i gjornâi radio nazionâi, ma ancje zirant ator par chestis bandis.
O pensi che par chei che ancjemò no àn vût ocasion di viodi un di chei pipinots, su lis stradis de province di Udin, al sedi nât un pensîr une vore dongje ai miei, dome cjalant cheste fotografie.
Sì, inutil dineâ, dome a viodi la foto tu ti domandis se a si sin rincoionîts ducj cuancj e a ce gjenar di proteste che a sedi peât un pipinot di cheste fate.
Stano protestânt cuintri la tessare dal tifôs?
Cuintri i decoder che a costin dai vincj euro in sù e valin doi?
Cuintri chei che a àn un cûr masse grant e cul lôr bati a disturbin cuant che a van in biblioteche o in glesie?
Insome, ce robe ise?
Al pâr, cussì mi pâr di vê capît, che chês sagomis alì a sedin un progjet (un progjet... disin une cjatade, dài) de province par judâ i incidents de strade, oh no, spietait, a judâ a no fâ incidents su la strade.
Jo no sai i studis che a son daûr cheste iniziative. Us dîs la veretât, no mi soi informât. Però soi un che al vuide une vore, pes stradis dai nestri comuns, sedi pa lâ a vore, sedi par lâ a frice, e une schirie di fats peâts a cheste iniziative mi pâr che a sedin une vore clârs.
La prime robe e je une sensazion personâl, di cuant che o ai viodût pe prime volte, a scûr, chestis sagomis. O ai cjapât pôre. O ai mot la machine de corsie, scartant bande çampe, come cuant che si viôt un a pît. Subît daûr o ai vût cuasi l'istint di fermâmi a viodi ce che al jere, e dopo o ai pensât a un mateç, a une proteste. 
Di cuant che o soi vignût a savê la veretât, al è clâr, cuant che o passi pes stradis li che o sai che a son lis sagomis, no mi fâs nancje un fastidi, tant o sai che a son e no mi met di sigûr a ralentâ o a prestâ plui atenzion e vie indevant. Anzit, mi capite di dediâ atenzion aes sagomes (e no a la strade) par viodi se i àn fat alc e se a son ancjemò dutis interiis. Chê di Varian lant a Bresse, par dî, di un pâr di dîs in ca e mostre un biel bigon piturât cul spray blanc, e chel che jal à piturât, se par câs al lei chestis riis, che al sepi che al à une bire paiade. Ancje dôs va.
A ogni mût, za chest mi fâs capî che lis sagomis a gjavin atenzion, invezit di regalale.
Podopo une altre considerazion: vait dongje e cjalait cemût che a son tignudis in pîts. Plastiche? Compensât? Polistirolo? Materiâl ecologjic? 
Ma ce, une biele anime di fier. Sì, a vês capît ben. Fiêr. Cumò jo mi domandi, se lis colonutis de strade di ciment a son stadis gjavadis par fâ spazi a chês di plastiche, al sarà un parcè, nomo? (anzit, 'nd è plui di un)
E alore, se za i pâi de lûs, i pôi e il ciment dai puints a son une vore pericolôs par cui che, par sfighe o coiononerie, al vâ fûr di strade, al coventavie che a zontassin un altri pericul? 
(Tignint ancje cont che a son metudis propit in ponts dulà che al è facil lâ fûr di strade!)
Nol covente rispuindi, o disarès.
In ultin un judizi su chel cûr une vore kitch che i àn pitûrât. Al coventavie? E chês scritis? A coventavino?
Lis scritis a sono plui eficacis par gjavâ pericul? A ano cualchi podê magjic tipo mantra che a ti drecin il volant de machine se tu stâs par lâ fûr di strade?
Insome... jo no sai voaltri ce che a pensais, ma cuant che o viôt deviazions fatis cui pîts (di une simie), marcjepîts cence nancje l'aces par i puartadôs di handicap, stradis tignudis come il troi dal me ort... la uniche robe che mi ven di pensâ e je: ma nus cjolino pal cûl?

martedì 30 novembre 2010

"Cuatri stagjons dal an" di Gianfranco Pellegrini

Lu spietâvi di cuant che mi veve dit, slungjantmi la conte che mi veve mandade l'an passât par la Vilie dai Sants, su Contecurte, che chê conte e sarès forsit lade a finîle intun librut.
Ben po, chest al è chel librut, e se disarès che, par chei che ancjemò no le àn lete, la conte de Ostarie e je une buine cerce par savê ce che a podês cjatâ chi dentri.

Ma a nin indevant par ordin.
Come che o vês za let dal titul, o vin di front lis cuatri stagjons, frontadis dal autôr in altretantis contis, e intal mieç, come une cjamare di decompression, dôs contis curtis, sedi une che chê altre publicadis su la Ostarie e peadis a dôs ocasions come il 31 di Otubar e il Nadâl. Ancje chê altre conte curte, il Drâc, la podês lei su la ostarie, e ancje in chest câs e je une buine cerce. Però atenzion. No steit fâsi bigulâ.
La scriture di Pellegrini e je aromai dificile di peâ intune conte curte, e je une scriture che e à bisugne di un pôc plui di spazi, che e à dôs direzions di cjapâ e che se a no lis cjape, a rint di mancul.
La prime direzion e je chê de emotivitât dai personaçs.
I vielis, i fruts, lis feminis, lis canais... ducj chei che a vegnin metûts dentri achì a son personaçs rotonts, pinelâts cun misure e cun colôrs vîfs, che ti pâr di cognossiu, di vêju za cjatâts, ator pe tô vite. E par dâi emozions, Pellegrini al à bisugne di cualchi rie e di peâsi ae tradizion, a lis lidrîs furlanis, sedi doprantlis come fonde dal personaç, sedi par contrast.
La seconde direzion e rivuarde la ambientazion e, ancje chi, i colôrs. 
Lis sieltis lessicâls a son fatis cuntune vore di cure, che si viôt inte pulizie dal furlan dal autôr che al je net, scorevul, e pûr insiorât di tiermins che tu riscjis di no cognossi, magari parcè che aromai cuasi nissun ju dopre plui. Us fâs un esempli, par ce che al è facil fâus capî parcè che al vâl la pene di lei chest libri, mostrantus ce che o intint.
Us gjavi, par esempli, chest tocut de conte "Il pichepôl", dulà che intune lungje analessi si conte la aventure di Vigji e Pieri, daûr a robâ ue di taule, come che i fruts di une volte a jerin usâts a fâ:
Finide la balfurie, par cuietâ l'amì, Pieri al tirà fûr il rap che al veve metût inte cjamese. Picotant un asin par om, a vevin cjapade une stroncje che ju puartave bande cjase. Inte boschete, une moretule e veve tornât a tacâ il so tarlec, e un pichepôl, regolâr, al curave mo ca mo là, adalt, lis scussis caruladis dai lens plui vieris.
Ce disêso? Biel, nomo? Sigûr... 'nd è tiermins che ancje jo, sintintju, mi soi inacuart di capî il sens, ma di no cognossiju ben, ma propit chest mi à stiçât sedi il plasê de leture, sedi il plasê di lâ a recuperâ la peraule, di salvâle e di fâle mê, par magari, cuissâ, plui indevant, podê dominâle e doprâle.
Se magari o vês vût i miei stes dubis, us sparagni di lâ sul DOF e us dîs che "balfuerie" al sta par casin, davoi; che la moretule al sarès il beccafico, e il pichepôl, insome, si capìs che no magari lu clamin dome pic.
In ogni câs, o pensi che o vedis capît di ce bande che al çuete il furlan di Pellegrini: da la bande juste!

Par il rest, o pues dîus che la prime conte, "La volp", chê de Vierte, e cjape la volte di un nono che al ven puartât a cjase dal nevôt e intant che al viôt il scûr de strade si vise di cuant che, insieme a so pari, al veve brusade... une strie!
Inte seconde, "La britule", e je la aventure misteriose che, in plene Istât, a vivin doi fantacins, che forsit, cuissâ, a cognossin nuie di mancul che lis aganis dal Natison.
Inte tierce conte, "Il pichepôl", chê che mi plâs di plui, Pieri al cjale il so vignâl e il sun de nature lu puarte indâur tai agns. E inte ultime, che d'Unvier, "La Nape", une canae, intal frêt di altris timps, e cjate une robe preziose come... un çoc par fâ fûc... e se volês savê alc di cheste conte, baste che o frachedis achì.

Bon. Mi pâr vonde.
O podarês finî spacantus i tabars e spiegant come che la cuarde che e pee insieme dutis chestis contis e je la idee di "de-fantastic sociâl", ven a stâi un fantastic che ae fin al è dome une mascare par descrivi i mudaments sociâi e lis lôr debolecis. Ma mi pâr di vê scrit ancje masse. 
Al sarès une vore miôr se o leiessis il libri, dîs euro, edizions kappa vu e po dopo... gjoldi!

domenica 28 novembre 2010

Ce ano chei dal Udin? Hand àn oviç!

E che a no mi si vegni a dî che no imbrochi i cartei par la partide da la Udinese eh :)
Chê altre volte cun Floro e Totò a àn segnât ducj i doi e mandi Lecce.
Cheste volte, che mi pareve just premiâ ducj i rigôrs che il nestri Samir al à parât fin cumò, ve lì che no dome l'Udin al vinç, ma Handanovic, tant par cambiâ, al à pete une altre volte! 
O vin un grant portîr, altri che fufignis!
(Eh, sì, lu sai che o ai fat un piçul strap ae gramatiche furlane, ma la mê e je une licenze... calcistiche)


post scriptum
A dî il vêr il cartel al veve di jessi scrit cun "arbitros" invezit di "rigôrs", come che si è viodût vuê che a nol à rivât a parâ fûr un dai lôr ancje si devin ai nestris come sassins, ma insome, o ai pensât di no stiçâ masse, jessint che e jere za une partide a risi, e al à puartât fortune cussì. :)

giovedì 25 novembre 2010

Il libri cence pagjinis



Ducj chei che a doprin il web, ancje chel pôc, aromai a lu àn capît: il mont dai libris e de editorie in gjenerâl al è rivât dongje a un grant ribalton. La clâf che e vierzarà la puarte di un gnûf mût di concepî la leture si clame ebook, e di pôcs mês al somee che la man che e zirarà cheste clâf e sarà l’iPad e ducj i prodots similârs che a vignaràn. A stin cjacarant, in gjenerâl, dai libris in formât eletronic e dal imprest in dì di vuê plui avanzât che al permet di leiju.
Ma parcè sino dongje a chest cambiament?
Al è dibant ricuardâ, come prin fat, ce che al è sucedût al marcjât musicâl cu la difusion, plui o mancul libare, des cjançons in formât mp3. La stesse robe e je une vore dongje a capitâ cui libris: disponibilitât a presits bas, o ancje di rive jù, di ogni prodot editoriâl dal marcjât.
Al è clâr che no sin ancjemò rivâts, tal nestri paîs, a un pont di svolte, ma tai Stâts Unîts i leaders de editorie a son za rivâts a dividi la lôr ativitât a miezis fra libris di cjarte e libris eletronics.
Fasìn un struc des motivazions che a puartaran, cul jutori dal miorament tecnologjic, l’ebook a incressi la sô difusion.
Doncje de pussibilitât di piraterie sul prodot, al va dit che, in gjenerâl, il presit al podarà jessi une vore contignût, sedi pai coscj plui bas, sedi pal fat che l’ogjet di valôr al deventarà propit il libri di cjarte.
Zontant a chescj motîfs economics chei tecnics, a nassin gnovis manieris di consumâ la leture: selezionâ tocs, voltâ lis lenghis, cirî aprofondiments, comprâsi i libris, zontâ efiets multimediâi e vie indenant. Lis pussibilitâts a deventin infinidis se si pense al cjamp scolastic e universitari o a chel dai manuâi o des vuidis turistichis. In ultim, ma no pôc impuartants, a son i vantaçs di conservazion, scjars intric e indenticitât di dutis lis copiis, che a puartaràn al discomparî de idee di «ogjet origjinâl».
Di chê altre bande, si sa, e je la resistence normâl a bandonâ la «cjarte» e la sô superioritât intal plasê a doprâle, mentri che al reste dubi l’impat ecologjic dal cambiament, che al sparagnarès arbui par fabricâ plui machinaris.
In ogni câs, la rivoluzion dal ebook e vierç puartis che a interessin ancje la leterature e la interie produzion di une lenghe minoritarie.
Tant par comença si rivarà a une sorte di democratizazion de ufierte, parcè che di fat, il piçul al varà la concrete pussibilitât di puartâ sul marcjât prodots di cualitât compagne dal grant.
Ancje pe visibilitât, doprant in maniere eficiente la rêt, si podarà rivâ su un marcjât che al sarà, prin o dopo, une vore plui larc e variegât, ancje se al tirarà dongje une vore di sogjets che, se prime e jerin filtrâts de filiere editoriâl, cumò a cjatin lis puartis spalancadis. Ven a stâi, ae fin, che ancje se l’ebook al darà une scosse che e movarà l’intîr implant editoriâl, par realtâts minorizadis come la lenghe furlane, si stan vierzint ancje gnovis, interessantis ocasions par sparniçâsi.

GLOSSARIUT:
ebook: e je la contrazion des peraulis eletronic book, ven a stâi «libri eletronic», o miôr in formât digjitâl. Al è duncje un file consultabil su computer, telefonins di ultime gjenerazion, palmârs o dispositîfs di puest clamâts ebook readers, letôrs digjitâls. 
mp3: il MPEG1-Layer3 al è un formât audio digjitâl une vore comprimût, tant di podê jessi discjamât di corse di internet, ma cence pierdi cualitât par chel che al rivuarde la percezion pe orele dal om.
iPad: al è il gnûf dispositîf portatil prodot de Apple che al permet intun unic imprest di podê viodi fotos, videos, e-mail, web e duncje ancje lei i libris eletronics.

di Raffaele Serafini