giovedì 24 luglio 2008

LA NIÇULE

O ai il terôr da lis niçulis.
No stoi cjacarant di niçulâsi, intindìnsi. Chel no mi passe nancje pal cjâf. E je propit la niçule ca mi spaurìs. Cun lis sôs cuardis picjadis, ca si movin insiemit come un binari dismenteât, copât da l’aiar, mi puarte simpri a pensâ al timp cal passe e a la muart. O ai cussì pôre ca no rivi nancje a movimi, cuant che viôt une.
A disin ca sedi une metafore de vite, la niçule. Si va su… si va ju… Sigûr, o pensi. Àn reson. Ma intant ch’a pensi cussì za mi ven tal cjâf che la metafore sedi un’altre.
La niçule si ferme. Simpri.
Par chel no voi mai tai zardins publics o ta chês fameis la che àn fruts. Plui di cualchi volte a mi è sucedût ti tacâ a cori di bot e sclop, nancje ca mi stes colant un arbul sul ju pe schene.
Jo lu sai, soi sigûr, ch’al è un moment, cjacari di un secont o doi, la che je si ferme. E soi sigûr, no sai parcè, che pal voli ch’al viôt che fermâsi, la vite e je finide.
Fin cumò o ai vût cûl, e no mi è mai capitât. Ma ancje sa stoi simpri atent, no rivi a fâ di mancul di pensâ, che chel fermâsi al podarès jessi platât dapardut.
Parcè? Voaltris no pensaressiso compagn?


1 commento:

  1. finalmentri tu sês tornât, par fortune che al è http://macoragregador.blogspot.com/

    RispondiElimina