lunedì 19 maggio 2008

SÎS DI SÎS

Jere passade di pôc le miezegnot e un talpinâ ferbint e jemplave di sunôrs il scûr. Che sorte di besteute a coreve svelte e cence cjalâsi daûr, cu le panze che sfilave l’asfalt. A viodile straviersâ le strade, in machine, podeve sameâ une bilite.
Rivade par le jentrade denant dal Bosco Romagno, jenfri i comuns di Prepot, Cividât e Cuar di Rosaç, a veve cjapât subit le drete, saltant roiuç e bancjutis, fin a fermâsi tal mieç di un prât, la che sîs arbui centenaris a metevin dongje une sorte di cercli.
Che besteute, che altri no jere che un dai plui antîcs sbilfs furlans, e veve començât cussì a tucâ ta ogni tronc, trê voltis, come le lancete di un orloi ch’a côr par contrari.
Pene finît il tierç zîr issio che le gnot, bielzà clare pa le lune gnove e taronde picjade in cîl, a pareve sclarisi ancjemò di plui, par un lusôr che di ognidun dai troncs al pareve butâ fûr.
Tal plui fin dai arbui, framieç l’edare che cuvierzeve le scusse, a si è tacât a viodi une grumbule saltà fûr adalt adalt; une grumbule che cuasit subit a cjapât le fate di une muse di len, scure e plenis di grispis. Di lì a pôc, come se une vene dal arbul, lungje metris e metris, a ciris di saltâ fûr, al veve començât a cjapà forme il cuarp di une femine altissime, che subit a veve començât a spacolâsi il lunc vistît neri.
– Di Sîs jo soi Le Lungje! – a veve businât cun t’une vôs sgrasaote, che mostrave agns fats almancul di trê numars.
Neancje finide le frase, tal tronc di front a si jere ripetude le sene, c’un di diviers che invezit di saltâ fûr une vecje altissime a jere comparide une femenute picinine tant che un frut di un pâr di agns, ancje se l’etât a jere su par jù le stesse di che altre.
– Di Sîs jo soi Le Curte! – a veve vuicât cheste, movint tor ator i braçs.
– Di Sîs jo soi Le Gruesse!
– Di Sîs jo soi Le Stuarte!
Chês altris dôs vôs a jerin rivadis cuasit insiemit, di dôs altris feminis, ancje chestis vistudis di grumalats neris, vignudis fûr di altris doi arbui. Une a jere dute imberlade, cun t’un braç lunc e un curt, un voli su e un jù, une orele piçule e une grande e vie indenant. Che altre a pareve une femine insinte di une femine insinte, une grum di frapis e ravais di no rivâ adore a viodi la che al començave il cuel e là che finive la panze.
Il sbilf, che intant si ere tirât in bande, al restave a gjoldi il spetacul da la comparizion, che ancje sa lu viodeve ogni mês, nol finive mai di maraveâlu. Par altri, al spietave lis ultimis dôs striis, ch’a no dome a jerin lis plui vecjis, ma ancje lis plui estrosis.
Di fat, come a no volè deludi il lôr unic amiradôr, al jere passât cualchi secont prin che ancje lôr tornassin dal len a le cjâr. La prime a jere stade Le Gobe, che jere saltade fûr dal len rodolant come un balon, vosant il so non come une sfolmenade prin ancjemò di fermâsi. L’ultime, come ch’a jere aromai usade, a jere comparide di un fuee, che si ere intacade a un’altre, e vie indenant a veve cjapât su dutis chês ca jerin lì ator, fin a fâ su une femenute che a viodile no tu i varessis dât un franc, ma che cuant che veve berghelât – Di Sîs jo soi Le Ledrose! – cun t’une vôs ch’a pareve un temporâl, a veve parfin fat colâ par tiere un pâr di çuitis che svualavin li ator.
– Come simpri di sedi la plui braurine, eh! – a i veve dit Le Gobe, tirant il cuel par rivâ a cjalâ par su.
– Ce discors! Soio o no soio la plui vecje?
– E la plui cagone – veve zontât subit daûr Le Curte, cu la so vôs lizere.
– Vêso sintût alc? Isal cualchi gjatut ch’al vai?
Ches altres a vevin ridût dutis insiemit, sgatarant e sgrasaiant. A sameavin une schirie di fantacinis cuant che tornin di messe, e a dî il vêr, chel al jere un moment ch’a vevin vivût pardabon, tancj e tancj agns prin.
A jerin ladis indenant cussì, a tichignâsi, par un pôc, fasìnt murì di ridi il sbilf, che ogni clâr di lune gnove al vignive a sveâlis. Dopo vevin fermât subit, parcè che e jere ore fâ fieste par rinovâ l’incjantesim ch’a lis faseve vivi jenfri il len.
Cussì, di lì fin sul cricâ dal dì, lis sîs striis dal Colio a vevin tacât a balâ e cjantâ, mostrant dut il lor
podê. Le Curte, a si ere rimpinade sui ramaçs plui alts e a saltave di ca e là deventant di volte in volte un uciel diferent. Mo un barbezuan, mo un falcuç, mo une schirie di passarins, mo une di çoris! Le Lungje, invezit fasìnsi verde e zale e lusinte, a si ere strissinade ta la jarbe, fintremai ca jere deventade un madracat di une famee ch’a no esisteve plui di mil e mil agns.
Le Gruesse e Le Stuarte a vevin tacât a zuiâ di bale, tirantsi di ca insom a là insom prin un gneur, dopo un fasan, e zontant a ogni zuiade une bestie diferente, si che l’aiar parsore chel prât a jere dut un svualâ di sghirats e pantianis, di viparis e magnis, di farcs e risaltis. A un ciert pont, parfin di bolps e cenglârs!
Le Gobe e Le Ledrose, invezit, a jerin plui cuietis. Lôr a stavin a cjalâ, sentadis par aiar, trabascjant litaniis in t’un furlan di altris timps, sporc di slâf e di todesc, intant che une nule di ragns e furmiis a i zirave ator, lant fûr e dentri dai vistîts, come a tignîlis su.
E propit lôr dôs a jerin chês che, prin che il scûr al scjampi, a si ritiravin par primis dentri il lôr len, cun che altris che vignivin subit daûr e il bosc, come une poçe dopo il sunsûr di un clap, ch’al tornave prest a cuietâsi.


VERSION PAR TALIAN

3 commenti:

  1. Hoilà, simpri in forme tal ô contâ:-)

    RispondiElimina
  2. fin che i mei fan a son pocs ma bunissims :)

    RispondiElimina