martedì 30 agosto 2011

LA MUMIE RUANE

Linda e fasè lûs dongje de clavarie piant il telefonin.
Vençon, a chê ore di gnot, al durmive come une pipine, cidin sot dal cidinôr des monts, ancje lôr indurmididis dal frêt. Jê no veve pôre che la viodessin chei dal paîs: za di mês ju saludave, intant che e leve fûr e dentri de cripte, mo cun in man i siei imprescj, mo cun fialis e fialutis di mandâ a analizâ intai laboratoris di Rome. Al sarès stât une vore facil contâ che e leve a cjoli alc che e veve dismenteât jù pal dî, dilunc dai lavôrs.
Se al jere cualchidun che le spaurive, pluitost, al jere Carli, l’impresari che al dirizeve la gnove operazion pe datazion des mumiis. Se le ves brincade chel, a jentrâ di gnot, di scuindon, e lâ a meti mans intai piçui campions di tiessût, le varès licenziade in cuatri e cuatri vot. Altri che la cariere sflandorose intal cjamp de archeologjie che i prometeve, di cuant che a vevin tacât chel lavôr. Da rest, rivâ a dâ une date precise di muart a chei cuindis cadavars scridelîts che i mostravin la ghigne, di daûr di un veri, in chel paisut tornât a fâ sù dopo dal taremot, no jere dal sigûr une operazion di alte archeologjie.
Si tratave dome di doprâ la gnove tecnologjie di datazion al plasma, che di pôc e veve fat fûr chê al carbonio, par rivâ adore a jessi plui precîs. Fin cumò, Linda e veve fat analizâ lis primis dîs mumiis, partint dal gobo, la plui cognossude, e lant indenant par ordin, lassant par ultime chê che jê e veve tacât a clamâ – intal sô cjâf – la mumie ruane, cundut che e jere come chês altris, e jere scure, come se e fos stade di un neri, ancje se la ipotesi e jere subite stade escludude daurman par vie de conformazion dai vues, in dut e par dut di riunde europeane.
Par chel e jere restade cantesemade cuant che a matine, Carli, al jere rivât sù a Vençon, par disi che il campion che e jere daûr a analizâ al sarès stât l’ultin.
«Ma cemût? E par chês altris mumiis cemût fasino? No podìn mica lassâ il lavôr a mieç?» e veve domandât jê, ingjenue.
«Di fat nô il lavôr al sarà come se lu vessin finît» i veve rispuindût Carli, fasintji intindi che no jere pussibilitât di discuti, «Ta chês altris cinc o inventarìn une date a câs de seconde metât dal ‘300 e fieste finide. Ogni analisi al plasma e coste passe cinc mil euros, e di Rome mi àn clamât vuê par dîmi che la prossime che i mandarìn e sarà la ultime. Si sino capîts?»
Linda no veve batût cee, ma dentri si jere mangjade il fiât, par no vê anticipât i timps e vê gjavât de teche la mumie ruane prime di chês altris.
E cussì, vele li, cumò, devant di chei dincj neris e di chê piel scure tirade sui vues, dopo vê viert la teche numar 15, cu lis mans che i trimavin, e no dome pe criure di chel lûc.
E veve cun jê la scjatute cun il numar 10 stampât parsore .
E veve za proviodût di liberâsi dal campion gjavât chê stesse matine, e cumò, cuasi ae fin de sô aventure, e calave planc lis pinzis dentri de bocje spalancade.
Il cur i veve pierdût un colp, cuant che dibot, la mumie ruane e veve sierât i dincj!

***

Platât intal scûr, Rafaêl si tocjave la muse: la bote i faseve ancjemò mâl.
Il pugn i jere rivât intor cence che s’al spietàs e lui al veve strenzût i dincj a pêl, rivant a cjapâ il colp cence vê masse dams, a part finî sdrumât par tiere, sul paviment di piere dal palaç dai Janis.
Nol veve fat in timp a jevâsi sù, par tornâ la ofese, che Checo, il fi plui grant di chê famee di Çambarlans, i veve tirât tal cjâf un sacut di panine, e prime ancjemò che lu tocjàs, Rafaêl al veve cognossût intal sglinghinâ dai bêçs un bon motîf par stâ cuiet.
«Chest al è par fâti capî che i Janis no schercin,» i veve dit Checo, cjalantlu dal alt in bas, «e se dopo al ves di scjampâti alc su ce che o stoi par dîti, tu sâs za ce fin che tu fasarâs».
«E chei chi?» al veve domandât Rafaêl, vierzint il sacut e contant i bêçs cun voli di marcjadan.
«Chei li a coventin a dâti un bon motîf par jentrâ intal palaç dai Blancons, doman, vie pe gnot…»
«Jentrâ par fâ ce… Doman e je Joibe Grasse, al sarà plen di int ator pes stradis…»
«Di chest no stâ a vê pôre… Une massarie ti fasarà jentrâ» i veve rispuindût Checo Janis, sierant il discors.
Rafâel al sivilà ancjemò une volte, poiant par tiere, dongje dai pîts, il fiasc che al veve jemplât di vueli e la piçule lampade – za piade – taponade cuntun peçot neri, par che des tal voli il mancul pussibil. Par dî la veretât, in chê gnot di baldoriis e di cjantis, cun lûs che a balicavin par ogni cjanton, e jere stade une premure che no sarès coventade, ma lui nol jere propit un delincuent di raze, e ancje se i jere capitât di fâi sparî un poleç dal gjalinâr dal plevan, o un pâr di miluçs ogni tant, propit dal zardin di chei Strumîrs massepassûts dai Blancons, al veve un pôc di fastidis, par fâ ce che al stave par fâ.
Dâi fûc al palaç, di fat, no i someave une robe di cristians, ancje se – par dîle dute - nancje la fan che i lamicave il stomi ogni dî, a lui e a dute la sô famee, i someave une robe di cristians. Par chel al veve pensât ben di tignî chei bêçs e chel pugn te muse. Viodi la vite di siôrs, sot l’ombrene di chei flocs ros ae strumiere, che a someavin vergognâsi pe miserie di dute la puare int, lu veve stiçât a meti in bande la morâl e a tirâ fûr la tristerie. Lu saveve benon che ancje i Janis a jerin dâi lazarons, ma tant, pîes di cussì no podeve lâ, e lazaron par lazaron, almancul al sarès rivât a saltâ fûr di chela palaç cuntun sac plen di mangjâ.
Pierdût in chei pensîrs, no si jere nancje inacuart che une femine, di une puartute in sfrese, e veve metût fûr il mustic di surie e e lumave il scûr.
«Soi chi» al veve dit svicinantsi, e chê altre, cuasi fasint un salt, lu veve cjalât di sot insù, i veve dât in man une clâf, e si jere fate in bande par lassâlu jentrâ.
«Fâs ce che tu âs di fâ, e dopo scjampe pe puarte daûr, cun chê clâf che ti ai dade».
Rafaêl no i veve nancje rispuindût e al jere corût dentri, cirint daurman lis scjalis e rivant subit tes cjamaris. Sigûr, par che al ardès di bot al varès vût di dâ fûc ai plans plui bas, ma lui al veve vude une altre idee…
Al butâ il vueli su lis cuviertis, sui tendons, sul len de mobilie e cu la flame de lampade ju fasè ardi.
Po dopo, cence une polse, al corè jù pes scjalis, dant une voglade a une puarte di len, cuntune barconete tal mieç, che i varès coventât par scjampâ, ca di un moment.
Lui però al le insot, fin te umiditât des cantinis, e cuant che al rivà nol crodè ai siei voi…
Salams, presuts, formadis… La panze e scomençâ a roseâ prin ancjemò che al tiràs fûr il sac e al tacàs a jemplâlu!
Al sintive i trâfs cricâ e ciulâ, involuçâts des flamis. Al veve di movisi! Se il palaç al vignive jù, li sot, di lui no varessin cjatât nancje il cadavar. Al corè di gnûf sù, viers de puarte, cul sac plen di robe su la schene e la clâf in man. Al provà a vierzi e… nuie!
La puarte e jere sierade… nol jere pussibil, lu vevin bigulât!
Al provà a cjalâ inte barconete, tal scûr de gnot, e cuasi i vignì un colp cuant che si cjatà enant la muse di Checo, chel bastart di un lechepîts dai Savorgnans, che al riduçave, cul nâs tacât tal veri.
A Rafaêl, cun dute la fuarce che al veve in cuarp, no i restà che tirâ un pugn inte barconete.

***

Linda e cjapà in man la buste cui risultâts de datazion e e corè di corse inte cripte.
Di chê sere che i someave che la mumie ruane e ves cirût di muardile, ancje se al jere dome un cediment del massele, ogni volte che e leve a cjatâ i siei cuindis amîs imbalsamâts, i vignivin i pei drets.
Cumò a vevin ducj bielzà la lôr etichete, cul an che si presumeve che a fossin muarts.
Ancje la mumie ruane e veve il so biel biliet, denant dai pîts, ma jê e saveve che e jere une bausie.
Come che i veve ordenât Carli, a vevin scrit un an che al fos coerent cun chei altris, za otignûts cu lis primis datazions, e cumò si spietave dome la date di meti su la mumie numar 10.
Linda e vierzè la buste a planc, denant di chê musate scure, che e someave plene di rabie ancje dopo muarte. Dome in chel moment si jere rindude cont che la sô e jere stade dome curiositât, par chel cuarp che al jere cussì diferent di chei altris, cundut che al veve subît il stes procès fisic e chimic.
Ancje se e ves scuviert alc, no varès podût dal sigûr dîlu, e anzit, a chel pont cuasi e sperave che la date scrite intes cjartis che e veve in man e fos propite une di chês che a vevin za metudis a chei altris.
E cussì vele a platâ cuntun dêt il sfuei di cjarte, e a tirâlu incà ben planc, come un zuiadôr di poker che al vierç la sô man, une cjarte ae volte.
1…
5…
1…
1.
«Eh?!» lu veve dite a vôs alte, ancje se li nol jere nissun a sintîle. La datazion al plasme e podeve falâ di trê, forsit cinc agns, in plui o in mancul. Ma, chel istès, al restave che il 1511 al vignive passe cent agns dopo di ducj chei altris!
Cemût jerial pussibil? O plui che altri: pussibil al jere pussibil, però ce che no rivave a spiegâsi al jere chel colôr ruan. E jere sigure che no podeve jessi colpe di chei cent agns di diference.
Anzit, se propit e ves scugnût fâ une ipotesi, e varès dite che chel cuarp, prin di murî, al fos stât fintremai… fumigât!
«E alore? Âstu finît cun chestis mumiis? Cualchi probleme?»
No si jere inacuarte di Carli, che al jere rivât inte cripte.
«No, no…» e veve trabascjât jê «Ancje cheste ultime e je come dutis chês altris».
«Bon, scrîf e moviti a vignî sù, che o firmìn dut e o gjavìn lis tendis».
«O rivi cumò» i veve dite Linda, cjapant timp.
E de une ultime voglade ae mumie ruane, e ae sô muse sfracaiade.
E pensà, prin di lâ vie, che se une analisi chimiche e ves podût spiegâ di dulà che al vignive il colôr de piel, nol jere nuie che al varès podût contâi cui che, prime che al murìs, i veve spacât il nâs.