Il cartel par Udinese Cagliari

no time par peraulis, contentaisi dal cartel, par cumò :)
Jo a Floro i crôt ancjemò... sperìn...

Edit:
E o ai sperât mâl. Purtrop al è stât ancje sfortunât, sul colp di cjâf viers la fin de partide, lât fûr par tre pêi di cûl, ma insome... un tîr in puarte al è masse pôc!

Il cartel par Udinese Paok

Ma sì, vuê al il Paok.

E jo che o soi di Sclaunicco o podevi tirâ fûr alc sul zûc di peraulis Sclaunicco/Salonicco, ma us disarai che ai grecs no vevi voie di dâ masse impuartance. In fin dai conts a mi je someât che si cjacari ancje masse di lôr. E che a vegnin in tancj... e che a fasaràn casin... e che chi e che là...

Ma vonde! 

Viodìn di tirâ fûr i coions, e zuiâ un bon balon, cirint di meti in bande la sfighe e lis cjacaris. Al è cumò che si viôt se o sin o no une scuadre che pues rivâ di cualchi bande... 

E alore, o ai pensât, i vûl propit il spirt furlan, che cuant che la robe e je dificile, a pedale di plui e al cumbine!

Fuarce Udin, e vuê o speri intune doplete di Floro, che e je ore di fâlu deventâ un dai nestris, e non un a miezis :)

Parchegjâ a Udin... Facil meti un mus tal frigo!

Mi plasarès dâ une vore plui spazi ae rubriche "nus cjolino pal cûl" ma ogni volte va a finîle che o pensi che chei che nus cjolin pal cûl no meretin il gno timp.

Usgnot, però, o ai pocje sun, e alore ve chi che us met la foto di vuê matine, in via Moretti, dulà che mi son zirâr i coions a mil...

Il probleme?

Il gnûf sisteme de SSM, par parchegjâ in tai parcament sot tiere. Tu as une tessare, tu metis la machine e ti scalin i bêçs cuant che tu vâs fûr.

Se tu sês abonât no ti scale nuie.

Se no, tu fasis il biliet, tu pais prin di vignî fûr, come par dut.

Bon.

Dut ben.

Ma vuê matini jo o ai fat mieze ore di code par podê meti jù la machine!

Soi rivât a vore 10 minûts plui tart di ce che o vevi di rivâ e parcè, dut chest? Ma clâr, cul frêt il gnûf e perfetissim sisteme di soste al va in tilt, a doi a l'ore, e cussì chei puârs coions che a àn ancje di paiâ par meti la machine a rivin a rivâ tart a vore, ancje cuant che a son partîts mieze ore prime.

Cence contâ ce ben che stan i polmons di chei che son a stâ li ator, che a àn une vore di gust di viodi machinis incolonadis a sbolfâ gas di scaric sot cjase.

Sì, okay, e je une cuistion di mieze ore, a matine, ma no mi interesse, chei de SSM a podin vignî li in chê mieze ore e vierzi le sbare, o pûr pissâi parsore, che magari si scjalde e a fasin di mancul di stuerzi la zornade a un pocje di int.

Mi va di cjacarâ dal Udin

Vuê, su la sezion media dal sito dal Udin, no jere nissune fotografie cul cartel fat par la partide dal Milan, forsit parcè che - o crôt - la frase par une volte no je stade profetiche...

Va ben... va ben...

Però chest mi fâs pensâ.

Sabide di sere soi lât ancje jo al stadio, a viodi la partide.

Soi tornât cjase cence pîts, che ju ai viodûts tornâ dongje tor 10-11 di sere, dopo un tratament a base di Coccolo e di cuviertis. In ogni câs, nol è dal frêt che o vuei cjacarâus... ma dal Udin.

Sabide o sin restâts ducj di mierde, al è clâr, ma ae fin, o vin pôc ce reclamâ... plui chê altri al è di pensâ e di metisi adun, parcè che - come che nus àn insegnât i zaponês intal marketing - al è propit intai moments di dificoltâts che si cree il suces, e l'udin al varès di fâ cussì.

E alore, ancje se nissun nol lei chest blog, mi va di dî cemût che la pensi.

Nin par ponts.

Di Natale al è fûr un mês.

Bon, al è clâr che al displâs, al è clâr che se o cjalin i numâr l'Udin cumò al sarès in zone retrocession, ma...

Floro Florer al è un prime ponte, e vonde. Podìn metilu chi o là, tichignâlu, stiçâlu, metilu in panche, ma lui al è une ponte di chês che a stan tal mieç, vonde. E alore, çuet o no çuet, jo mi spetarès che lui al fâsi ce che al à fat Totò in chescj mês. Se al ves ancje un pôc di sostegno, e no dome int pronte a bruntulâ cuant che al sbalie, al sarès un zuiadôr diferent. Inutil pratindi che al ledi su ogni bale, che al ledi a fâ pressing... lassinlu cjaminâ, une buine volte, framie di dôs azions... 'nd è mil pontis, in Italie, che a fasìn cussì, e dopo, un gol a partide tal ficjin instes... E risolt il problema di Totò. Se dopo rivìn a viodi ancje Barreto...

Isla al à finît il campionât.

Mâl, malissim. Ma par lui. Par l'Udin nol à di jessi mâl. Sigûr, al jere il zuiadôr plui in forme, determinant tant e forsit di plui di totò, par cè che la cuantitât di zûc che al fâs Isla no je paragonabile a chê di nissun altri (Forsit Basta, sì, ma chel a lu vin ancjemò, par fortune).

Però forsit nissun al à cjalât cemût che àn zuiât i doi gnûfs, Pazienza e Fernandes. 

Nissun dai doi al è un Asamoah, Ducj i doi a tindin a tornâ, mentri che l'african al tint a vierzi il zûc cjalant indenant, ma di chi a dî che l'Udine al deventi mancul competitive se tal puest di un Isla o vin un Fernandez o un Pazienza, no lu disarès. E je une Udinese diferente, sigûr, ma che pues vinci dutis li partidis, come che si è viodût in dutis chês che e à pierdudis di resint.

Handanovic  al è in crisi.

Vere. Verissime. Jo lu ai cjalât dut il timp e savêso cuale che e je stade la sô problematiche? Il frêt. Al coreve di continuo, sì, ma in chel cross, par gno cont, nol jere cjalt, nol jere reatîf... e al à fate une capele, ma ancjemò piês al è stât viodi pierdi il cjâf inte azion dopo, dulà che par miracul no vin cjapât il doi a un in tre minûts. E alore? Nô no sin il Milan, che al cambie il portîr titolâr cuntun ancjemò plui fuart. No a vin Handanovic, e alore al sarès il câs di dâi sigurece, sedi la int, sedi i zuiadôrs. E soi convint che a tornìn a cjapâ zero goi..

E dopo, no mi son plasudis dôs robis, domenie.

Viodi i zuiadôr a barufâ, dopo vê cjapât il secont gôl e viodi che no son vignûts a saludâ la int ae fin de partide. 

Alore... viodìn di capîsi:

L'Udin al à dominât la partide, al à zuiât di balon, al à fat azions bielissimis.

Il prin timp Guidolin al veve metût in campo un scuadre perfete. Per-fe-te.

O vin pierdût, va ben, ma zuiant di balon, e par ingenuitâts, par la pôre di fâ un fal brut a metât campo, par che nô o crodin simpri di vinci cun onestât, che bisugne cjapâi la bale a chel altri corint plui di lui, ma no je cussì. Ambrosini al è veloç come un caterpillar, ma cuant che un dai nestris i leve vie lu tirave ju, e se al podeve colâ sul zenoli di cualchidun, lu à fat. Disonest? Bastart? Sumo sumo... al è balon.

E alore, joibe che al somee che a vedin di zuiâ cuintri un Stât intîr, plui che une scuadre, o ai propit voie di viodi se Guidolin, e la int cun lui, a rive a capî che il moment just par lâ indenant al è chest. Che no vin nissun fastidi par chei che mancjin e che, come che fin cumò al è stât, ancje se tancj a somein dismenteâsi, a podìn zuiâsale cun chiunque.

E alore, se chei dal Udin no àn il coragjo di meti sù il cartel, ve chi, che 'nt met doi jo!

Il cartel par Udinese - Milan

Lâ a viodi la partide, vuê, proviodûts di -2 a  -5 sot zero, cul aiar che al doplee il dut, al è propit di coions. Al somee che al varès parfin di flocâ...

Si starès tant ben cjase, o intun bar...

Eco parcè ca di un pôc... O voi al stadio!

E intant, ve chi il cartel par chel maladet dal Milan, che jo cun ducj i diaui a m'intivi ben, par solit, fûr che cun chel chi, che propit lu sopuarti mâl... e cuasit, us disarai, mi splâs che nol è Ibra, par che al sarà ancje un cingar e un cjâf di glerie, ma a zuiâ a balon, insome, al è simpri un biel viodi. 

E sperìn propit che usgnot, ancje se glaçât, i vedin muardude la code al diaul!

Il cartel par Udinese - Lecce

Al volo, dome par meti il cartel prin che a comenci la partide, che par solit al puarte ben :D

Ve chi che o soi

e cemût mai che o ai za la foto in tal Friuli? Ma al è clâr... o soi lât ancje jo a viodi la partide!

E propit dongje di chei doi chi... e nissun al pues dî che o ai sbaliât il cartel! :)

Il cartel par Udinese - Catania

O vevi pensât doi cartei pe partide di vuê. Ducj i doi a vevin a cefâ cun la cuistion dal Stadio e dai tifôs.

No soi sigûr che la cuistion dal jemplâ il Friuli e sedi dome di bêçs o di stadio plui o mancul biel. a dî il vêr. Il mini abonamet par il ritorno al è une robe che pardabon no coste nuie. A spindìn cincuante euros intune maie o intun pâr di bregons o podopo a disìn "O ai fat un afâr" e pûr o ai sintût int riçâ il nâs continuant a dîsi che no va ben e che no son presîts vonde bas. 

La veretât e je che chê li e je int che i plâs meti malepâs e che no à nissune intenzion di lâ al stadi, par il sempliç motîf che dal balon no i interesse nuie. Viodarìn cemût che e van, chescj mini abonaments.

Jo, par esempli, son un di chei che al varès voie di fâlu ma che ancje se lu fasarai no sai mica se o larai a viodi la partide... La veretât e je che dal balon a mi mi interesse fin a un ciert pont. La vite e je di altris bandis e se al è soreli, dopo vê lavorât une setemane, o ai gust lâ a tor, a cori, al mâr a viodi il Friûl o magari dome stâ cuiet a cjase, ogni tant, a meti a puest dut ce che o ai lassât indaûr dilunc la setemane.

E alore?

E alore nuie, Jo almancul no romp i coions a nissun e no sopuarti chei che si lamentins simpri (e i Furlans o son une vore brâfs a fâlu) dispes par dibant.

E alore ve che il cartel par l'Udin al veve di jessi: "Miôr l'Udin dai Metallica: mancul bêçs e plui spetacul!". Ma dopo gno pari al à siel chest che o viodês, forsit par damâle sul nâs a mi, che dispes o soi cjase a cjalâ la partide, mentri che lui al è a cjapâ frêt cul strisson.

Insome, vonde cjacaris, chi o là, viodin di tifâ, che la scuadre e je buine e cumò al è un moment dificil. 

Mandi a ducj!

Il cartel par Udinese e Ce... sene

E vie, che chi il prin post dal an e anche il prin cartel par l'udin.
Vuê lu ai scrit plui adore, mi soi scugnût puartâ indenant par che doman si zuie a misdî e insome... la robe podeve jessi complicade, se no jevavi adore.
Cussì si spere di no fâ la figure che à pene fat le Lazio, cumò denant, e di puartâ cjase i trê ponts, magari un biel trê a zero par fâ segnâ chei che i covente, tipo Benatia (pari di pôc), Totò (che no varin migo di fâ passâ denant chel cingar cul codin) e Floro (che almancul si cuiete un pôc).
Bon... dut chi, par cumò. Alè Udine, e viodìn di tacâ ben

Ah... par scaramanzie chest post lu publichei doman matine va, che no si sa mai che une dì prin al puarti peule. :)

Il cartel par Udinese - Jù ventu

Chiedere è lecito... :)

Il cartel par Udinese - Celtic

Lu sai, lu sai... il cartel nol è ispirât. Ma ogni tant a son altris prioritâts, e alore ancje tirâ fûr la nestre divignince celtiche magari nol fasarà ben al balon ma a lu fasarà a cualchi tifôs, che magari al scuvierç.
Ce che si à di vê dubits al è che o vin di lâ indenant! Nol esist che la Udinese di chest an si fâsi butâ fûr de Europe league... Sperìn di jessi brâfs e fortunâts. Jo di chescj scozzês o ai pôre... A son ducj grinte e pachis, e ancje un pôc di balon... Ma jo o ponti intun gol di Floro... :)