Bambin

Il gno Gjesù bambin

Al è un frico

Confezionât

Al speck di Sauris

Cjolt, scjaldât

Pôc mastiât a sere tarde

Mangjant cence vê cenât.

Il gno Gjesù bambin

E je une canevace

Rosse ricamade

Za maglade

Cun alc che no si capìs

Ma al à dal biel 

La sgrimie 

E il sbelet

Da no covente.

Il gno Gjesù bambin

Al rive simpri

Di an in an, al à

La mê stesse etât

La barbe grise

L'artrite, i voi patocs

Pocje voie di pierdi 

Fuarce ancje se i plâs

Cuietâsi e invecjâ

Il gno Gjesù bambin

Nol sa, nol ûl pensâ

A cuant che prest plui

Nol rivarà, 

Nol varà fuarce

O flât

Par cjaminâ.

E jo cence Gjesù

Bambin

No sarai plui.

***

Il mio Gesù bambin/ è un frico/ confezionato/ allo speck di Sauris/ comprato, riscaldato/ mal masticato a tarda sera/ mangiando senza aver cenato.
Il mio Gesù bambino/ è uno straccio/ rosso, ricamato/ già macchiato/ cun qualcosa che non si riconosce/ ma ha della beltà/ il piglio/ e il belletto/ di ciò che non serve.
Il mio Gesù bambino/ giunge sempre/ di anno in anno, ha/ la mia stessa età/ la barba grigia/ l'artrite, gli occhi marci/ poca voglia di perdere/ forza anche se adora/ acquietarsi e invecchiare
Il mio Gesù bambino/ non sa, non vuol pensare/ a quando subito più/ non arriverà/ non avrà forze/ o respiro/ per camminare./ E io senza Gesù/ bambino/ non sarò più

Inneade ploie

Tu sês come cheste ploe

Che scomence planc

Une gote a la volte

E la robe metude a suiâ

Aromai

Tu puedis lassâle là che je, tu sês

Bune di piarditi

Tal bosc

Piturât intun vistît gnûf e inneâ

Un orcul intune lagrime, tu

Sês lade lontan

Tal stâ dongje e dongje

Stant lontan.

Sisile,

Strie, 

Fantate

Sês tu e no une altre

Che si cîr di gnot

Cuant che si à di stâ atents

A no incopedâsi

Su lis stelis

Coladis.

***

Annegata pioggia

Sei come questa pioggia / Che incomincia piano / Una goccia alla volta / E i panni stesi / ormai / puoi lasciarli dove stanno, sei / capace nel perderti / nel bosco / dipinto sopra un vestito e annegare / un orco in una lacrima, tu / sei andata lontano / nello starmi vicino e vicina / restando lontana / rondine / strega / ragazza / sei tu e non un'altra / che si cerca la notte / quando si presta attenzione / per non inciampare / sulle stelle / cadute.

Mi plôf sui pîts

Mi plôf sui pîts

Cul cuiet dal lari e la tenarece

Di une cualsisei cjançon

Di Buckley.

In mudantis

Su la puarte viarte

Di cjase

Cuissà se mai o cuant

O finassarai di bevi.

Si spietin lis fantasimis

A chê ore chi:

A rivin di scuindon

Ti vierzin il frigo

Par cirî i tiei libris, i bêçs,

La creance dal vivi.

A van vie a buinore

Cuntune scudiele di lat, 

Une vaiude in sachete.

Une plete in plui

Tal clip dal bleon.

Mi piove sui piedi/con la calma del ladro e la tenerezza/di una qualunque canzone di Buckley/ In mutande/sulla porta aperta/di casa/chissà se mai o quando/finirò di bere./Si aspettano i fantasmi/a quest'ora:/vengono di nascosto/ti aprono il frigo/per cercare i tuoi libri, i soldi/l'educazione nel vivere./ Se ne vanno al mattino presto/con una scodella di latte/ un pianto nelle tasche./Una piega in più/nel tepore delle lenzuola.

Tu pararessis bon (Faresti bene)

Tu pararessis bon

A jessi chi e no

A durmî, no

A poiâ vuès e scarpis e cimiadis

Sui scjalins dal imbrunî

Tu

Tu pararessis frescje, ridint

Di ridadis mâl tignudis

Fufignis fofis

Cjalcis rotis prin di sei

                         dopradis,

Tu

Pararessis bon a sei

Chi fantate, spudade

Tal tremôr di gjambis viartis

Tirade dentri

Di une bussade-cjastiel

Platade

Dentri une muardude-riviel

E cence

Clostris cence

Tramais di onôr o gale.

Fevelin i dêts, bruntulin

Lis ongulis, patafin

I ombui

E la plete te cjar

Rivoche di inzirlis

E sgrisui salvadis.

***

Faresti bene

A essere qui e non

A dormire, non

Ad appoggiare ossa e scarpe e occhiolini

Sulle scale dell'imbrunire

Tu

Saresti fresca, ridente

Di risate mal trattenute

Soffici sciocchezze

Calze rotte prima d'essere

                                       usate,

Tu

Faresti bene a essere

Qui ragazza, sputata

Dentro il tremore di gambe aperte

Catturata

Da un bacio-castello

Nascosta

Dentro un morso-ribelle

E senza

Catenacci senza

Trappole d'onore o galanterie.

Parlano le dita, brontolano

Le unghie, schiaffeggiano

I lombi

E la piega nella carne

Echeggia di capogiri

E brividi selvatici.

Tal lavandin

Il to cûr

Al è un grop di glace

Lu ai tirât tal lavandin

E un seglâr tant 

Che destin

Nol è mai di svant motîf,

Neancje asse o uce; cjale

I plats sveâts de cene: piron, sedon

La tace, 

Brindade ridint di vîfs.

Cun lôr il timp par disfâsi, cun lôr

Disfat il timp.

Ce che al vanze, odôr o cragne

Al à storiis di contâ, al à

Piel, bussade, aghe

Cjalde, strace

E une sbrissade fin sul ôr.

Tu fumate, tu messede

Il pantan

Sui cjans e sui tratôrs

Si suie adore e adore

Si jeve il dêt

Par impiâ il lum.

Cuatri e cuatri a fasin vot

Al conte il canai e cuatri

A son i voi che lu cressin. 

E doi sôi, son soi.

E doi, cuissà?

No mei, 

No di diu.

Forsit

A son dome doi.

Fûr

Al plôf cence

Plovi e no tornaràn i piarçolârs

Glaçâts par no cjapâ

La glace.

Il cjalt al cjape man, s'inzegne 

Si petenin lis striis, ma cence grops

Di distrigâ. Tu fumate, tu messede

Rivâi e sterps.

Lasse che si platin

Daûr dai orts lis chechis, daûr

Dal sen i vuarps.

Crituris (crepe)

Poi la bire dentri te scarpe

Fûr de puarte

I mûrs a mostrin ancjemò i claps

I flums di soreli

Corûts sui scûrs di bree.

Trops rivino a contâ, di lontan?

Tropis stradis

Di cjalcine sclapade?

E cuale sino nô?

Nus pâr di cognossi

Sul mûr masse passût dai ricuarts

Il barcon rot di chel

La puarte sierade

Di chel altri;

Tal cjanton, sot de linde

Une cjançon che a savevin

A memorie e tal çuf di talate

Tabiade dai passarins

Grignei di savalon

Di un mâr suiât e supât

Dal aiar e dal pedrât.

Cjale miôr, disnice une çate

In bande dai voi:

No isal ancjemò cualchidun là dentri?

La tende si môf, alc

Al à cricât. Da la nape

Une schie di fum, 

E à scuindût une stele.

***

Appoggio la birra nella scarpa

Fuori dalla porta

I muri ancora mostrano i sassi

I fiumi di sole

Passati sulle imposte di legno.

Quanti ne riusciamo a contare, da lontano?

Quante strade

Di calce screpolata?

E quale siamo noi?

Ci sembra di conoscere

Sul muro ingordo dei ricordi

La finestra rotta di quello

La porta chiusa

dell'altra;

Nell'angolo, sotto la grondaia

Una canzone che sapevamo

A memoria e nel ciuffo del tarassaco

Calpestato dai passeri

Granelli di sabbia

Di un mare prosciugato e succhiato

Dal vento e dal selciato.

Guarda meglio

Inaugura una zampa

A fianco degli occhi:

Non è rimasto ancora qualcuno, là?

La tenda si scosta, qualcosa

Ha scricchiolato. Dal comignolo

Una scaglia di fumo, 

Ha nascosto una stella.

Usgnot / Stasera

Si môf di stravint

La sêt de plane

Tai rivocs de criùre.

Devant

Sforadi

Il sunsûr dai fros.

Al cjarine il cîl

                         [dal mont.

La pipine di une poce

A smire la lune

Improibide

Fintremai a glotile

E secjale di pantan.

Tignìnsi

Par man cence fevelâsi

Ni movi i pîts.

Usgnot

La pivide dal crichedì

E je za in muel

Su la ponte de lenghe.

***

Si muove a raffiche

La sete della pianura

Nei gorghi del gelo.

Davanti

Forastico

Il sussurro dei fili d'erba

Accarezza l'orizzonte.

La pupilla di una pozzanghera

Fissa la luna

Proibita

Fino a inghiottirla 

E seccarla di fango.

Teniamoci 

Per mano senza parlarci

Né muovere i piedi.

Stasera

Il germoglio dell'aurora

E' già madido

Sulla punta della lingua.

Compagn

A mi sarès plasût

Restâ sot la linde

Une tace poiade sul marcjepît

Cuntun vin bon dismenteât

Des mans lassadis a cirî

Framieç des tôs

Cuessis, mi sarès plasût

Sbatisi i coions de machine

Che e passe e pivet e rît e cjale e

Nus tire forsit daûr 

Cumieris di cjacaris

E mi saressin plasudis

Anche chês, forsit, ma di sigûr

La lenghe poiade dulà

Che prin al jere il dêt e prin

Il zemit e prin

Il tremôr.

E crote, sot di un puarton,

Mi sarès plasût lassâti

La schene sgriade dal mûr

Grês, fruçon di piere

Tant che il grês

Cjalcjâ e sburtâ e jentrâ cence

Domandâ reson. 

Ma no si puès, no si varès, no va ben

E o sai parcè.

Ti sarès plasût, a ti compagn

A ti

Sarès plasût

Compagn che a mi.

O pûr Avrîl

Lunis

La place vueide

Il bar sierât

I colomps che puartin ator

Il frêt

                                                        [jenfri i veris 

Di un barcon crevât.

La criùre no rive plui

                                               [a tignî dûr

e il fûc al criche

Tuche e stache

i ricuarts dal mûr

dulà che ju tignivin 

                                            [inclaudâts:

La none e il fazolet di cjâf  

                                                      [simpri neri, clâr

Il nono e la côt

                                 [cetant lizere

I morârs e lis ramascjis

Che a sburtin al larc

Dut il curtîl

I tais sot da lis frascjis

Plens di porcos e puartons.

Cussì mandi, 

E mandimi vie

A spietâ Pasche, o pûr Avrîl

Scjapinele

Dulà setu?

Dulà atu poiât lis mês scarpis?

La plete stuarte dal jet jevât

Mi inçopede lis zornadis

Discolç

L.ôr de scudiele

Sbecât scunît scjassât dal lat

                                     [cjalt

Al sbrove i lavris

Cu la lôr premure.

Cjase mê si svuede.

Sanc che al cor sburtât

Dal consumâ dal timp

E dal brantiel di scusis

Vendemât adore.

Garp il glotâr vanzât

Al om cence brame,

Mareôs il voli

               [cence code

De codebuie:

No si è plui là dentri,

No si è plui te pôre dal doman.

Magaricussìno.

 La plane zimie

Lis scjalis si jemplin di çocui e çavatis

Lis spalis di vistîts

La place

           [cence vôs

Mi clame par no lassami lâ vie

Cjapâ une androne, ficjâsi dentri

Sledrosâ il borc

Fin tal ultin curtîl.

No jerino cussì, forsit, nô salvadis?

No jerino cussì i nestris nemîs

                                            [e amîs.

E cumò

Do sono lis mês scarpis

No varai mica di vivi

In scjapinele?

Ancje tu ninine

Scolti dome i muarts

Muarts e int che a veve

Alc di dî.

Di gnot, dutis li rosis

Che ai robadis tai agns

                           [e son tantis

Si metin in rie

Pal funerâl di mê mari

Me pari

Il me

Denant de puarte

Dilunc la strade

Daûr dai orts

E in bande dal timp

Che si rive adore a robâ

Al chel straçât.

Ancje tu, ninine

Là tu che tu jeris

Insieme cun chê che no jere

Cu me, 

Tu, pituriti

In muse

                   [une muse

E va indenant

Cence scoltami me

Che come plete tal vueli

Soi deventât forest.

No soi

Jo no soi chest

Che nol sa jessi

                    [adore

Dopo jessi stât

                    [tart

No soi chest

Ma no soi neancje 

Chest altri,

Mi cambiais ogni volte

In miôr o in piês

In plui o in mancul

Cuntune idee di me

Che no je la mê.

Bessôl

In bande

Indaûr.

Chest al è il gno inniò, 

Chi o torni

               [simpri

Cjasâl bandonât

Cjacaronât di favitis

E madracs,

Sglonf di pomis 

E di baraçs

Cori a matine

Cori a matine

Un paîs che tu cjatis

    Sveât

Che ti permet di robâ

                          [une rose

Che ti compagne

Un cjan

Un mierli

Un bandarot che al disnice

Melodie.

Incrosâ un bundì

Une cjalade di brut

Un rivâl sglonf di zulugne.

Ce isal il dì

Che si romp denant dal pas?

Une sabide?

Un doman?

Un aromai?

I grignei di sudôr

A slusin i voi

Dut li cumò

Il to jessi siôr.

Varestu gust?

Ti scoltavi, discolç,

Suntune bancje di len secjât,

Lontan dal rivoc de int.

No ti cognossevi

No sintivi la tô vôs

La peraule sporcjade dal fum

Che ti à copât,

Mai çondare, mai

Slichignote.

Cirivi di scoltâ, cjalant

Lis stelis cui voi sierâts

E la stricute di lune,

Soi sigûr che sbeleave

Sapulide dal cjasâl.

Soi destinât a cognossi

Lis mês divinitâts

Di muartis

Dispès judât di altris dispès

Comedant cun blecs e zontis

Lis piçâdis dal timp.

E un blec, une zonte

Al jere il gno jessi chi,

Discolç, sul len secjât

Cuntune matite in man

E cence scrivi nuie.

Masse lontane le int,

Masse fuart il batimans

Masse frêt il cjalt des vôs.

Tu?

Tu varessistu vût gust?

No dîs par l'ego, no

Che chel lu sai di sì.

O dîs di me, che soi jevât a sîs

E soi vignût al mâr.

O dîs di me, che ti ai scoltât

Da la mê vôs

Svuacarant dentri da lis parentesis 

Tarondis

Intiessudis dal savalon.

O dîs di me che ti metevi parsore

Dal riflès dal crichedì, spetenât,

Inzulît, cui sgarbei che ogni tant

cricavin vie cualchi rime.

Di chest, tu, varestu gust?

O sai dome che jo sì, jo

Di gust 'nd ai.

Chel dal celest tal montafin,

Chel de pâs de perfezion

Tant che un dêt

Tal cul dal mont.

Cisarons

Fûr di chi

Lis blavis, i pluvios che jemplin

                                                 [bisbetics

Lis stradis di cjamp.

Griis e cianis

Griis e cianis e gneurs.

E une gnot che no rive mai

Slungjade de plane.

Di chialchi bande

La rive il nulî

                                             [birichin

Che mi fâs sintî

L'odôr dai cisarons

Pene sgrignelâts

Su la taule di mê none.

Cence che ancjemò la vite

Mi spiàs che non son bogns

Come che crodevi.

Mans di fumate

Mans di fumate

Grispis di madrac.

Un altri me al è in vuaite

Sentât daûr de muse:

Atôr cence une part

Fantat cence zoventût

Ator di çampe a drete

Zenoli pront pe gruse

E timp bevût arût.

L'odôr di stale

Cul cjalt cjaminant

Di sere pal paîs

'nd è barcons che inmò

A butin fûr l'odôr di stale

Tignût pe code 

                                 [di agnorums

No si sa cemût.

Compagn ti cuchin

Dentri

L'odôr dai pomodoros 

                                [su la plante

Dai capsui

Dal smîr

                               [de cjadene

Dai scjatons rassegnâts

Parsore de flame.

Frusign de vite lade

Che ti sporcje i dêts de memorie

La fortune di vivi 

Dulâ che par oris no passin

Machinis

E maluseriis

No si varès di straçâ

E invezit.

La bree de capasse

Il lat a chês oris chi

Al varès di jessi mancul cjalt

Di no sbrovâsi la lenghe

Di no mangjâ la piel

Ae zornade.

I uciei

A cjantin cence polse

Par rompi i coions

cence rompi i coions.

Il sens di un cjamp 

Di forment

Al è un papavar

Plui alt di chei altris

Di bessôl

Dentri l'inzirli dal vint.

La bree 

Che mugnestrave la capasse

Je colade:

Ogni fuee dal mont

A podarès jessi cagade.

Une rose no je

Une rose no je dome une rose

Ma une feride

Netade

Inglaçade

Tal plat 

Dal gustâ di une frice.

E jes par comprâ la verdure

Lis pomis

Cucinsalatetrisculis

Che costin plui di un purcit

Intîr.

Il vâs di rosis

Al cunsume l'aghe

E ce che al reste

Al puce.

Ma l'aghe si cambie

No coste nuie

Cjoli ancje il lat

Che nol sa di nuie

Cence dentri une vacje

Nol coste

Meti la rose tal mieç 

De taule pronte

Di poesiis

Che no disin nuie,

A stan cidinis

Come cheste musiche merecane

Inglese

Foreste

Fate plui di peraulis

Che di sintiment.

La rose e torne 

Une rose

Cjase di bessole

E no je une rose

A son

Un maç