La bionde

(E. Manet - la bionde cul pet scuviert, 1878)

La bionde

Edward al mateà cul telefonin e al sossolà... la imagjine e veve za passât lis dismil condivisions. Cuant che al alçà i voi la bionde lu cjalave, spreçante, mostrant un agar che al rindeve il scûr une strade viers il paradîs. Par lui, che al leve indevant a visasale in chê fotografie, in chês tetis maraveosis che al veve daurman fat viodi ai amîs, e condividût cence padin, dopo, cuant che jê lu veve refudât; par lui a jerin lis culinis devant de jentrade dal Unfier. Si alçà strassomeât, poiant lis mans su la stangje di len… a disevin che i fos capitât il plui sevêr. Cient euros par ogni condivision sui social media, in tal ultin câs come il so. 

E je parfin bionde, al pensà Edward, tamesant cence inacuarzisi, sot de largje toghe nere, lis tetis dal magjistrât.

Il torment di Tonin

Il torment di Sant'Antoni, di Martin Schongauer (1448-1491), incision, 

Il torment di Tonin

A jerin mostris, demonis, besteatis, creaturis stomeosis e cence dignitât.

Tony aromai al jere sigûr: chel martueri al deve vite e dutis lis sôs pôris.

Severin i poiave une man su la spale, lenzintlu cu la sô nape snacaiose; Amilcare i tirave la siarpe, ridint e sbladacjant, intant che Tite lu judave, fasint sbati la piel flape e grispose dal cuel e dai smursiei. Gjise, cul so viziat di meti lis mans in muse, e Gjelindo, cun batudis di sarcasmi che a parevin bastonadis, a metevin adun chel assedi. Cuant che ancje la gnagne Armide si jere metude dongje, picjantsi intun braç cu la sô puce di frait, al crodè di jessi tornât indaûr di desenis di agns, cuant che lu clamavin Tonin e lui, muson e sgardufît, al passave lis zornadis a torzeon pal paîs.

Inmaneâ chel ridicul davoi, chel gustâ jenfri parincj, par festegjâ che al jere tornât dal Texas, no jere stade par nie, ma propit par nie, une buine idee.

Vueits

Simona e sintì lis aìnis di Yuri sot ai siei pîts discolçs.
E cirì a palpe lis scarpis, poiadis dongje dal jet, e doprant il telefonin e fasè lûs su la vierzidure taronde de jessude. In pîts intal scûr e spietà che l'implant centrâl di ossigjenazion al tacàs a rontâ come che al faseve ogni cuart di ore, e cuant che e sintì il sgrasaiâ dal motôr jemplâ lis orelis ancje je e impiâ l'argagn che al vierzeve la buse par lâ fûr. Sô mari e so pari e jere sigure che no si saressin inacuarts di nuie, ma chê gnot a nol jere il câs di riscjâ.

E dismontà la scjalute che e puartave al puiûl, picjade intal vueit sot di cjase sô, intant che Yuri la compagnave cuntune man ta la schene.

– Grazie – e cisicà je, poiantsi intal parepet e començant a metisi lis scarpis – E Alan?
– Nus spiete sul Puint Grant – i veve rispuindût il frutat, tirant fûr dal gjubot un argagn che al someave un telecomant.
– Ce isal?
– Un passepartout magnetic – i disè riduçant sot dal çuf – A son dôs setemanis che i lavori parsore. Al vierç di dut!
– E il regjistradôr di ricuarts?

– Lu à Alan.
– O seis grancj! – e disè Simona, cuntune ridade misturade inte vôs.
Si inviarin viers il Puint, compagnant cuntune man il parepet. I cjavei, blancs come il lat, a sfilavin lis scjalutis che, ogni pôc, a si rimpinavin su intes cjasis. Simona, tirade come une cuarde di violin, a tigneve dûr il flât, pensant che e steve cjaminant sot i siums di dute la sô int, mentri che e durmive intai jets. Lis cjasis, retangui cence barcons grampâts intal sofit de grande grote, a someavin gnotui cui voi sierâts, pront jevâ su e svualâ vie. Cuant che il rontâ artificiâl al tacà, come al solit, je e scaturì, e cirint par nature di tignîsi cun dutis dôs lis mans, e pocà di brut cuintri il parepet, cul telefonin che i sbrissà vie, colant intal vueit.
– Mierde! – e bruntulà a alte vôs.
– Dai, su piçule, nuie di grâf, – la cuietâ Yuri, che al veve viodût dut – tu larâs a cjolilu doman matine inte Rêts di Recupar. Movìnsi pluitost, che il vecjo Livio al è un che al stâ pôc a cambiâ idee.
E jere vere. Chel dopomisdì il nono di Alan, che piês che la vecjaie al veve dome la salût, al veve a la fin dite di sì, e a varessin podût regjistrâ sul ordenadôr lis imagjinis mentâi dai siei ricuarts. Al jere un dai pocjissims vecjos che al veve vivût tal mont di fûr, e Simona, Alan e Yuri, a varessin scuviert a la fin se chest mont antigon al jere verementri esistût o se al jere dome une liende di piturâ tai cjâfs da fruts.
Dopo vê saludât cuntune alçade di mustic Alan, a cjaminarin cence intops viers la cjase di Livio, traviersant il Puint Grant e une vore di altris puiûi, strents e dispès scûr, che a voltavin di ca e di là a ogni pissade di cjan.
A savevin di scugnî sghindâ la polizie, parcè che scjamâ ricuarts di un over-eighty al jere un reât, ancje se aromai nissun al veve un grant interès a fâlu, e ancje lôr a jerin une vore malfidant su chei mitics timps dal passât.
Dome cuant che a voltarin l'ultin cjanton si inacuarzerin da lis lûs celestinis che slusignavin propit li che a vevin di lâ lôr. Alc di lunc, involuçat intun linçûl blanc, al vignive calât de vierzidure, e lôr a capirin subit che la aventure e jere finide ancjemò prin di tacâ.
Alan, che so nono lu veve viodût a pene dôs o trê voltis, al restà impassibil, mentri che Simona, poiant i comedons al parepet, e tacà a vaî, e i lagrimons che a colarin intal vueit a traviersarin ancje lis maiis di fier finissimis des Rêts di Racuelte.
– Coragjo. – i disè Yuri, cjareçantle cui dêt blancjissims – Nol jere ancjemò l'ultin. Tu viodarâs che prin o dopo o discuvierzarin cemût che al jere fat chest famôs soreli.

_________________
Version par talian

Il cjant

– Moveisiii! – e vuicave il cjâf di Fiona, poiât sul comodin.

Chel altri toc di jê, cence vistîts e vergogne, al pocave ta la mobilie e su pai mûrs da la cjamare, spandint cun dispiet pissin e mierde tor pal paviment.

I vevin taiât il cjâf intant che a durmive, cjoche in bale di Guinness e sglonfe di salmon fumât. Al jere stât Liam a vê voie di provâ, istintîf come simpri. La none Abigail i al veve dit, che non sarès coventât a nuie, ma lui, cjastron come so pari, nol veve volût sinti nissune altre cjampane. Cuant che al veve plantât la manarie inta chel cuel tombadiç, Fiona e veve rutât cussì fuart di fâ tramâ lis tendis. Po dopo, intant che il cjâf al rodolave par tiere e i cjavei, luncs e ros, a si ingropavin tor il nâs e lis orelis, jê e veve tacât a ridi. E jere une ridade sgrasaiote, scuasit un vuicâ. Al pareve il ciulâ di un cjan striçât di une machine. A vevin ducj metût lis mans su lis orelis, gjavantlis cun solêf cuant che chel cuel taiât al someave vê finît di patî. Invezit, dopo un cidinôr durât un lamp, Fiona e veve començât, se pûr trabascjant e pastroçant lis peraulis, a cjantâ

E leve indevant a dî e tornâ a dî che litanie fastidiose, ancje se no come il ridi di prin. Lôr a capivin dome cualchi peraule: machine, triangul, budiei, rôl, gjugjule… ma nissun, in chês vocâls slungjadis fin spacâsi, al rivave adore a cjatâ une logjiche. A vevin crodût ducj che al fos un ultin deliri prin di tirâ su i scarpets. Dome la none e jere vignude blancje e ju veve obleâts a lâ subit fûr di che cjamare, sierant a clâf la puarte.

Lôr, cence bati voli, a vevin subit ubidît, plens di pôre par dut chel cjantâ sfuarçât e par chel cuarp che al cirive di dismontâ dal jet. Cuant che forin fûr de cjamare però, a vevin començât a riduçâ e a fâ i compliments a Liam. Prin o dopo Fiona e varès fermât di scjassâsi e lôr a varessin podût sintisi liberâts di chê malsane presince. Dome none Abigail, no si sintive plui cjantâ, no si jere dismolade. E stave cidine, cuntune muse a mieç fra il malcuiet e il rassegnât.

Tal imprin a vevin tacât ducj a ridile, disint che e jere la solite pessimiste, ma a vevin scugnût tornâ a mangjâsi lis peraulis dome un pâr di oris dopo, cuant che un poliziot da la Garde al veve sunât il campanel par dîsi che barbe Seamus al jere lât a sbati.

La ploie… l’asfalt slichignot… une distrazion… In chel cidinôr fûr di scuare chês peraulis a rodolavin come glaç intune tace vueide, ma lôr no lis sintivin plui.

Dut chest al capitave pôc mancul di un mês indaûr.

Di chê volte, dopo jessi stât tirât fûr dal acuari, dulà che Liam lu veve butât par scjafoiâlu, o almancul par fâlu tasê, chel cjâf al jere deventât simpri plui esigjent. Dal comodin dulà che lu vevin poiât, al veve cjantât une altre volte, par cunvinci ducj che la muart di barbe Seamus no jere un câs. Cussì e jere muarte la puare Eileen, sô cusine, ancje se i soi novante e passe agns, e il sô mastià e spudâ tabac di continuo, a vevin fât deventâ che tombule mortâl scuasit benvignude

A nissun però al jere scjampât il sô cjant, che pôcs minûts prin, stiçade par il blood pudding che no i vevin puartât, e veve intonât la litanie, contant cun particolâr gjonde il corot che ancjemò al veve di rivâ. Il telefon da la nonute al sunave za dibant, cuant che rivarin adore a intindi ce che al jere sucedût. Daspò di chel moment, par ducj, al jere stât un deliri.

– Eehh! Eeeh! Eeeehh! – a businave ancjemò Fiona, une altre volte cjoche – Cuant al rivie il mê Powers!

Abigail, che di whiskey no si intindeve, a mateave cul telefonin, cirint di clamâ a un dai fîs, o a sô brût, o a un cualsisei dai nevôts.

A saveve che Doreen e jere dal rivendicul a cirî lis patatinis cul pevar, Sinead a cjoli il gjelat aromatizât cun la Guinness, Roan pai boscs cun Neil, a sgarfâ fûr tartufulis. Brenda e Cormac no si visave nancje dulà che a jerin lâts a pierdisi, par contentâ l’enesim estri. Il rest de famee al jere a durmî, scanât di chê continue tension che no vevin rivât a cjatâ altre soluzion, se no chê di ubidî.

Çuetant su la sô mace e jere lade dongje al cjadin li che e jere dentri il cjâf di chel spirt, cun l’idee di spiegâi che e veve di vê un pocje di pazience, e magari butantji tal glutâr altre bire, sperant che la volès. Masse tart. Fiona, cun mieze muse in muel inta ce che a veve za bevût e veve i smursiei ruans. E veve cjalât fis la puare Abigail cui soi voi verts, li che no jere nuie che al ricuardàs il judizi cjapât su i tancj secui di vite, ma e si viodeve dome morbin e matetât. Daspò si jere sclaride il cuel cuntun colp di tos, e veve començât a cjantâ.

Abigail, distrute, si jere sintade sul jet, cence fâ plui câs al cuarp cence cjâf che ogni tant i leve a sbati intor. La disperazion a le veve ingropade intune maniere che scuasit e sperave di jessi jê la protagoniste da la cjançon di chest colp. Jessi une famee numerose al jere il piês ingòs che ti podeve capitâ, se la tô banshee e dave di mat.

Si jere fate anim e jere jessude de cjamare, sierantsi le puarte su la schene, e jere lade a sintâsi dongje la puarte, cul telefon sui zenoi. Dome a chel pont e veve començât a vaî, cence savê par cui.

VERSION IN LENGHE TALIANE

Confins

Chest colp o sin tor Bertiûl, intune Glesie, che Screncis, che cuant che mê none mi contave la storie o jeri simpri saneôs ti tornâ a sintile. Par chei che a no san la storie, la cjatais a chi. Par chei che àn fastidis cul furlan, a le cjatais ancje par talian.
Mandi e steit pronts che subit o varês buinis gnovis di bande di... Contis Curtis!

CONFINS

I colps i rivarin tal cjâf tant che sclopetadis.

Thump thump thump thump…

Gusto si tirà su da la sente come une suste, scaturît, spalancant i voi e lis orelis.

Thump thump thump thump thump thump thump…

I volè ancjemò un moment par capì che e jere la radio de machine a fâ dut chel casin. Al pontà subit il dêt sul boton par studâle e al si inacuarzè che no si studave.

Thump thump thump thump thump…

Par istint ci cjalâ ator. Scûr. E frêt, parcè che al tramave dut. Al cjalà di gnûf la radio e i parè che al fos scrit alc, invezit dal numar de frecuence. Il siùm ai stave ancjemò invuluçant i pensîrs e nol rivave adore a difindisi di chel casin, ancje se al veve provât a fracâ ducj i botons.

Thump thump thump thump thump thump thump…

Come un frut che nol volè sintî Gusto si metè lis mans su lis orelis, cjalcjant fin a slontanâ chel sunôr, ma cun maravee che si voltà subit in pôre, al si inacuarzè che il rumôr a lu veve dentri dal cjâf. In chel, prime di rindisi cont se si stave insumiant o no, un cidinôr i colà intor come une cuvierte pesante, e al restà culì, cu lis orelis che a cisavin sot lis mans glaçadis.

Al fo dome dopo di chel moment, cuntun scûr che al mastiave la machine, che al començà a capî dulà che al si cjatave e al tacâ a visâsi che al veve cumbinât.

Si jere insumiât, chel al jere pôc ma sigûr, parcè che la radio e jere distudade. Al zirà le clâf de machine e cuntun colp di neteveris al gjavà la zulugne che no i faseve cjalâ fûr. Nuie di fâ. Il veri al restà blanc. Gusto al provà a netâlu par dentri, cu la manie de gjachete, e al scuvierzè che il veli di glaç al jere propit devant dal sô nâs. Pussibil?

Pussibil sì, si rispuindè di bessôl cuant che al vierzè le puarte al talpinâ li ator. Jessint de machine si sintive subit che al jere plui frêt dentri, che là di fûr.

Gusto al poià lis mans sul tapon dal motôr e al cjalà il mustic de machine, che i pareve no vê vût nissun dan. De bande li che al nol jere il volant al mancjave un spielut, ma al jere cussì sturnît che nol si visà nancje se al fos mai stât. Daspò di chel a si cjalà ator, par viodi dulà che al jere capitât. Une glesie possente e menaçose i stave denant come se lu judicàs. “Santuario B.V. di Screncis”, al jere scrit in grant. Al pensà che se al fos stât un tichinin plui religjôs al varès vût la cussience plene fin a sclopâ. Ma par lui, predis e sants a jerin come vistîts malbastîts par un cjan fof: no coventavin.

Al tornà a sintâsi in machine e al sierà lis puartieris. Daspò al zirà la clâf, par inviâ il motôr e meti in vore il riscjaldament. Al butà un voli al orloi digjitâl e al cruscot, al poià la schene e al sierà i voi. I pensîrs a tacarin a cori daûr da lis palpieris.

Duncje… e jerin trê di matine, al veve vuidât par dusinte e cincuante chilometris cence fermâsi, corint come un sfolmenât, parcè che l’ordenadôr de machine al segnave “average speed 90km/h”. Lis lûs e jerin a puest e nissun, al jere sigûr, al podeve vêlu viodût.

Intant che al jere pierdût in chei pensîrs un cricâ da la sinte in bande i fasè vierzi i voi. Si zirà al vuicâ come un mat cuant che al viodè, sintade in bande di lui, une zovine che a lu fissave cui voi spalancâts.

– Cui sêstu! – i businà plui che domandâ – E cemût âstu fat a jentrâ – al continuà, viodint che i crics de puartiere a jerin inmò sbassâts.

– Cuietiti cuietiti – i disè chê zovine.

E varà vût vincjecinc, forsit ancje vincj agns. E jere blancje come un linçûl e cun doi voi celescj e lusints. I cjavei i colavin di ca e di là de muse, clârs e lis, e intor e puartave un vistît blanc tant che la piel, lunc e stralusint, che al rivave fin tai pîts, ancje se chei, a parevin voltâts par contrari. Gusto, plui le cjalave e plui al sintive il sanc inglaçâsi tes venis.

– Jo o sai ben ce che ti è capitât, o disarès propit che tu varessis di tornâ indaûr,– i disè cheste, voi tai voi.

Gusto nol rivà adore a rispuindi. Nol rivave nancje a movisi, soredut parcè che chê fantate e veve fevelât cence vierzi nancje la bocje. I jere parût che la vôs, come la musiche di prin, e fos dome tal sô cjâf.

A ogni mût nol fasè in timp a pensâ nuie altri, parcè che in chel la fantate e tacà a deventâ fumate. Prin che al tiràs un grop di flât e jere za discomparide.

Gusto al restà imbambinît, intant che il veri de machine si disglaçave e il sanc al tornave a cjapâ il sô zîr. Daspò al tornà a impià la radio, al alçà il volum e al tornà a fâ dusinte e cincuante chilometris di buride, fin ta che strade plene di curvis e busis.

Si fermà e al cjalà par jù, pene di là dal guard-rail. Il cuarp al jere ancjemò culì, fer come un côl di tiere. A tor no jere anime vive, e a dî il vêr nol saveve nancje dulà che si cjatave, di precîs.

Al cjapà il man il telefonin, e al fracà dôs voltis l’1 e une volte il 2.

Dome dopo mês al vê il coraç di tornâ a Bertiûl e jentrâ in che glesie. Cuant che al cjalà il cuadri di che fantate no si maraveà che e ves une muse za viodude.

Il pensîr al tornâ a che sere, a chel moment li che al veve studât il telefonin cence fracâ il boton vert.

Al veve ancjemò tai voi il lusôr dal spielut, framieç lis fueis. Lu veve cjapât su, lu veve butât tal puartevalisis, e al jere tornât vie corint, par altris dusinte e cincuante chilometris. Al è propit vêr, al pensà cjalant chel cuadri, che il confin tra il ben e il mâl al è tenar.

E intant che la fantate dal cuadri i cimiave, al començà a cjantâ insiemit a chei altris fedêi, ancjemò convints che chê e fos une imagjine da la Madone[1].

---

[1] La tradizion e vûl che dulà che si cjate cumò il Santuari di Screncis, tal comun di Bertiûl, e fos une fuesse dulà che un pastôr al cjatà, intant che al tignive di voli lis pioris, un cuadri cu la imagjine da la Madone cul frut. A chel pont lu puartà inta la glesie dal paîs, ma tal doman il cuadri al fo cjatât intal stes puest. Lu puartarin alore inta la glesie de Santissime Trinitât, ma la robe si ripetè. Cussì, a fo fate su une glesie propit inta chel puest dal cuadri.

Lis aganis a son creaturis che a vivin dongje lis aghis e dispès a vegnin viodudis vistudis di blanc, sedi sot forme di bielis zovinis, sedi sot l’aspiet di vecjatis. A podin jessi buinis o tristis.

Un tocut a la volte

Alore. Ma ce blog di scritôr isal chest se no us fâs lei mai ce che scrîf?

Vês reson.
Ve chi alore la buine gnove che ai vinciût ancje chest concors di contis da l'orôr, cun mê grande sodisfazion. La conte, inte sô version origjinâl, la podês cjatâ a chi.
Ma par voaltris amîs di web, us lassi la version voltade par furlan, che come simpri e rive a dî alc di biel.
Si che no 'nd ai masse gjonde a scrivi par passât remot, us domandi scuse se o ai fat cualchi falope cui verps. ;)

UN TOCUT A LA VOLTE

A sedis agns si inamorisi ogni doi, e cuant che dut al finìs, ti somee che il cûr ti scjampi vie sdrumant lis cuestis.
Dopo i vincj dut ti pâr un zûc, e tu ti sintis plen di cûrs, tant di tirâju di ca e di là.
Passâts i trente la vuere e je finide, e la pâs al è polvar su lis robis di ogni dì.
Ce che propit non tu pensaressis mai al è che ti sucedi il contrari: vê cuarante agns e inamorâsi tant di crodi di podê sopuartâ dut.


– Pierdarès ogni sens par stati dongje – i veve dit Luciano, gjavant i voi de strade e pontantju in chei di Claudie.
Jê i veve ridût, tenare. Cuete ancje plui di lui. Tresinte metris plui indevant, framieç lamarin e ramaçs, lu veve lassât di bessol.


Il prin al fo il gust.
Ogni mangjâ ai si ingropave intal cuel come coton strafont e al scugnive gloti par campâ. Pocjis setemanis daûr al pierdè l’odorât, ma al fo cussì facil usâsi che par dîs no si inacuarzè di nuie.
Al è il colp, i disè l’otorinolaringoiatri, ma nol veve nissune cure di dâi.
Cuant che e tocjà a la uldide, Luciano al veve pene tornât a començâ a vivi. Al jere tornât a vore, in ostarie, al cine. Cussì al scugnì pierdi mês par imparâ a lei i lavris, e al vaì di rabie parsore i soi discs, aromai cence nissune vôs.
Une matine, fasintsi la barbe, al veve viodût un vier ros che i vignive jù dal cuel fin al pet. Al capì subit ce che al jere sucedût e i vignî voie di copâsi.
Cuant che al deventâ vuarp, al provà pardabon. Nol jere passât nancje un an.
E je une infezion, i disevin, neurons che morin.
Lui nol veve nancje rispuindût.
Al veve capît, e i scjampâ di ridi.
Al imparà a movisi framieç il so jessi vuarp, viodint lis robis cu la lint dai ricuarts. No si maraveà il dì cuant che si sveà cence un braç.
– Vularà dî che ti puartarai simpri cun mê – i veve dit Claudie in chel dì – vessio di vignî a cjolti un tocut a la volte.

6

Ve chi, si che sin dongje Samhain, us lassi une conte un tichinin "nere". :)

6

Pieri si svee intune cjamare di ospedâl. Al cîr il telefonin tal sachetin da la gjachete che al viôt poiade su la cjadree, ma no lu cjate. Al cuche viers il curidôr e al viôt un orloi picjât tal mûr. Al segne vincj e cuarantecuatri.

Si inacuarç che ai scjampe une vore di pissâ e che a nol rive adore a visâsi cemût che al è che lu àn ricoverât, ancje parcè che si sint benissim. Si cjale ator, e al viôt che chei altris jets a son vueits. Il cidinôr al è rot dome dai sunsûrs di ogni ospedâl: lis ruedis di un jet, il carel cu la massarie… Di lontan al sint il barbotâ di une television.

Si alce par lâ in bagn, che al crôt al vedi di sei tal curidorut prin di jessi de cjamare. Provant a cjaminâ si sint ancjemò plui in salût, anzit, content come une pasche. Ce mai al puedie sedi sucedût, al pense, sintint la vissie che sclope. Forsit al è miôr che al clami une infermiere. Intant che al pisse al smicje dongje il pêl da la aghe, par fâ mancul rumôr pussibil, e al fâs une liste par savê cui che al è. Non, cognon, sorenon, etât, direzion di pueste. Si vise dut.

Dut fûr che il motîf parcè che a lu àn metût in ospedâl.

Intant che al torne in cjamare al viôt un infermîr cogolât dongje la so gjachete. Al stâ par domandâi alc, ma chest al scaturìs, i dà une sburtade e al cor di corse fûr de stanzie, cul camesot che al svole come un mantel.

Pieri si ferme di bot, dûr come un cuargnul, e intun moment a si vise il parcè che a si sint cussì content. Al cor di corse viers la gjachete e al tache a svuedâ dutis lis sachetis.

– Mierde! – al dîs a dute vôs e al va subit fûr de stanzie, businant.

Al rive adore a olmâ il camesot blanc che si slontane, imburît. Chel altri si volte ancje, ma al somee che no si acuarzi di jessi stât viodût. Dut câs al tache a cjaminâ plui svelt, intant che Pieri a comence a cori. No i interesse di jessi discolç cun intor un pigjame celest a riutis. Al à intor un futar e al tire flât a grops dal gnervôs.

– Bastart! – al rive dome a rugnâ framieç i dincj, ma chel altri al è bielzà dentri l’assensôr e lis puartis si stan sierant.

Pieri si bute jù par lis scjalis come une lavine. Al cole dôs voltis. La seconde al viôt la ongule dal poleâr che a sbrisse vie, sdrumade di un scjalin di marmul. Cuant che al rive al plan tiere a si prepare. Al è stât svelt: al è rivât prin da l’assensôr e cumò al à dome di spietâ che lis puartis si vierzin par spacâi la muse a chel maladet lari e fâsi tornâ il tacuin.

Ma l’assensôr no si ferme, e la ghigne di svindic i cole jù pal barbuç insiemit a la bave che al à in bande dai lavris. Plui abàs!

Si bute jù par lis scjalis une altre volte, come un sfolmenât, tant che a nol viôt la puarte di veri che bute vier la jessude. Si sdrume di muse, cu la puarte che si creve juste un ninin. Si jeve sù e si inacuarç che al rive a tirâ fûr la lenghe de bocje cence vierzile. Pôc mâl, al pense, al larà dal dentist. Al dopre il sanc par gloti i dincj al vierç la puarte e si scaravente tal aiar frêt e scûr da la gnot. Doi infermîrs a stan jentrant e lu incrosin, ma no lu cjalin nancje.

Miôr, al pense intant che al torne a cori, par cirì di cjapâ che disgraciât.

Chel al cjamine cuntun pocje di premure, ma nol cor. A viodiju a somein la rapresentazion di une barzelete: un om in pigjame celest che al cor daûr di un altri cul camesot blanc.

Pieri a i met un moment a cjapâlu. Chel altri al rît di une orele a che altre e al somee scjassât. Al sta par fermâlu, ma lu viôt jentrâ intune ostarie e al capìs subit ce che al à di fâ. Al sa che une denuncie a no coventarès a nuie. Miôr rangjâsi.

Lu spiete fûr, tignint in man un cubet di piere cjapât su di par tiere. Intant lu cjale, stant poiât su un arbul in tal scûr, pene di là dal veri. Lu viôt che al cjol un cafè, che al tire fûr di sachete il so tacuin e che al cjale dentri. Ve li che al rît di gnûf come une jene!

La bocje spacade di Pieri e il so poleâr a tuchin come un cûr patoc e sul marcjepît si sta bielzà ingrumant une poce di sanc. E pûr, pene che l’infermîr al ven fûr dal locâl, al rive compagn a discjamâ dute la rabie intal prin colp.

Daspò al peste, e al peste, e al peste, fin che la piere che al à in man ai sbrisse vie a ogni colp e che al è dut sclipignât, tant di scugnî netâsi i voi.

Al è fortunât, parcè che a nol passe nissun. Da la ostarie nissun al pâr seisi inacuart di nuie. Lis machinis a corin cence frenâ. Però al à di movisi.

Si nete lis mans sui bregons dal pigjame e al tire fûr il so tacuin dal camesot di chel altri. Sigûr come un bisat tal pantan al met i dêts jenfri lis pletis e al tire fûr la ricevude. Sîs! Sîs, putanace che miserie! Al à fat sîs! Nol viôt l’ore di cori cjase par impiâ la television e cjalâ lis cuotis. Milion di euro, milion di euro, milions di euro, al va indevant a pensâ, intnat che si jeve su e al fâs par cori vie. Purtrop al sbrisse su la poce dal so stes sanc e al finìs tal mieç de strade.

Si svee intune cjamare di ospedâl. Al cîr il telefonin tal sachetin da la gjachete che al viôt poiade su la cjadree, ma no lu cjate. Al cuche viers il curidôr e al viôt un orloi picjât tal mûr. Al segne vincj e cuarantecuatri.

OOO (seconde part)

Ve chi, ancje se nissun al à domandade, la seconde part de conte. Mi racomandi, tacait a lei da la prime eh. :)

[...]

No. No soi un drogât, no soi un induvin e no soi fûr cu la cassele. Sigûr, a son pussibilitâts che o ai tignût di cont, jo prin di ducj. Ma lis ai za refudadis. Soi un viazant, ve ca ce che a soi! Cheste e je la peraule che miôr mi descrîf.

Ma no steit a crodi che jo intindi dome viaçs fats cul cjâf o di fantasie. Cuant che jo us dîs viaç o intint la peraule tal sô sens plui rût: ven a stâi viazâ come vivi.

Parcè che dut ce che al ven daspò di cualsisei “OOO” jo no dome lu viôt, ma lu vîf.

E je in cheste maniere che a mi soi cjatât a tignî in man il fîl par par pescjâ i gjats grandonons dal Mekong o a respirâ il cjarbon che al bruse a Centralia. O ai tabiât cun çatis di furmie i plets dal parc di Mill End. O ai preât i miei vues inte glesie di Sedlec. O ai cjalât fis la Pistol Star cul voli di Oudane. O ai clamât la me cussience di une cabine cjatade in tal mieç dal Mojave. Mi soi cjatât a jessi un tatzelwurm, une banshee, un sayan, un hsingnu. Soi stât dut e dapardut. E dut e dapardut a pues ancjemò di sigûr sarai. O soi cussì convint di podê dî che se alc, intal mont cognossût, al esist, al è dome cuant che jo, in cualchi maniere, o rivi adore a cjatâlu.

Cun dut chest però, o mi reste instès une crôs. Un carûl che no mi lasse gjoldi a plen di cheste me maniere di viazâ.

O ai la impression di jessi dome un imprest.

O ai la idee di jessi une arme che no fale mai, pluitost che il cjaçadôr che la dopre. Plui a son i viaçs, plui a viôt robis, e plui o ai voie di metilis a sotan e di sielzilis. Un OOO daûr di chel altri, ogni volte che il dêt pontât mi sburte viers une bande di mont che no ai domandât di viodi, e cres la voie di rivoltâmi, di scjampâ vie, di cambiâ. E je une condizion che e je començade cuntun fastidi indefinît, po dopo e si è fate brame e cumò e je dibisugn.

O ai di scugnî sielzi, podê dismenteâmi dai ordins e si chel dêt pontât che a nol è il gno. O ai voie di zigâ OOO savint di jessi jo che lu decît e lu indreci la che vuei.

E volêso savê une robe? Cumò denant a soi rivât adore a fâlu.

No savarès dîus di trop che o stoi provant.

Al è stât un moment, un pensîr nassût par câs. E je stade la scuvierte di un imbroi metût insiemit a la cussience di doprâlu. La man, come simpri, mi steve mostrant un lûc, o une persone… no mi visi ben ce robe. Mi visi dome che o ai decidût di pensâ altri e di sedi rivât. In chel moment particolâr, a dî il vêr, o ai pensât dome une schirie di letaris involuçadis. “Pzpiodfugyajs”, “xzdgbcerhy” o alc di dongje a chest. E come che o ai pensât cussì mi soi cjatât cjase!

Voaltris no podês rindisi cont trop content che o jeri dopo sedi stât bon di sielzi il me viaç. O mi par di sintî za ce che a steis pensant: ma se prin o dopo tu larâs dapardut, ce ti coventie sielzi dulà lâ?

Ma la libertât, us disarai, e je alc di unic. E je il mangjâ che al ven devant di ogni altri. E pôc a mi interesse se a la fin, un moment fa, no ai fat altri che tornâ cjase. Ce che mi interesse al è che o soi stât jo a decidilu! E je stade la prime volte, ma us dîs che, come che al è vêr che mi clami Google, no sarà di sigûr la ultime!

_________________

e chi la seconde part par talian

OOO (prime part)

Ve chi une gnove conte par furlan! Une conte che stoi voltant dal talian che a 'nd à vincjut il tierç premi a no mi visi ce concors dongje Rome. Il teme al jere "Il viaç".
Si che la conte e je un tichinin lunghje la spachi in doi tocs.
E fintremai che un no la lei no mi nici a voltà la seconde part, cu la finâl a sorprese. :)

OOO

Vêso presint il ciulâ di une ongule che a grate sul tapedut li ca si dopre la surîs? Ben po, ven a stâi che al è plui o mancul cussì che jo mi sint cuant che mi svei: cun lis orelis plenis di chest sunôr. Simpri.

Forsit no rivi a spiegâusal ben, parcè che no soi mai stât masse brâf cu lis peraulis, ancje se in fin dai conts a lis dopri ogni moment. Ven a stâi, disìn cussì, che no rivi adore a cjatà alc di miôr che l’idee di sveâsi, par contâus ce che a mi sucêt cuant che jentri intal mont cussient. Prime nol è nuie, ni sium ni siums, daspò a sint un clic, ur russâ, e dopo un momentin di scût, un lizêr gratâ. Chest, intindìnsi, nol cambie mai.

Al è ce che al ven dopo che al cambie ogni volte.

No sai il parcè, no ma lu soi mai domandât, ni ai mai vût timp di fâlu. A sai dome che cuant che a mi svei a soi a cjase me, e dopo a partìs.

Lu sai, che a soi cjase, parcè che a cognòs il barcon dulà che poi il voli, cuntune cjalade scaturide, tant che une ombrene smenteade. Il barcon al è simpri chel: no si scjampe! No che al sedi dome un, cirìn di capîsi, ma chel barcon al è par me une fonde. Un di chei arbui colâts intal flum e incjastrâts tai claps, che ancje la corint plui fuarte è scugne zirâi ator. A son robis che cuietin, a soi sigûr, sie il pes che il pescjadôr. Cjacari dal arbul eh, no dal barcon. Ancjemò plui d’aiût, par dî un altre, a è la sigurece di il prin pît che a si slungje par cjaminà, lu fâs simpri in chel puest che jo clami cjase. O crôt che al sedi cussì par ducj, o almancul mi soi fat cheste idee. E crodîmi; par me, par come che a vîf jo il dopo, al è fondamentâl vê cheste sigurece. Se no al è ce deventâ mats.

Pal rest, no cognòs altri. Come che a mi cjali ator a cjati simpri alc di diferent.

Il cuadri colôr naranç che îr al jere adalt, dongje la puarte, vuê al è vert, e al è picjât denantdaûr, tal cjanton di che altre bande de stanzie. Doman ce vustu savê, al sarà blu e butât sul paviment! Altris cuadris, invezit, a nassin come moscjats sul mûr, fruçons neris che a no si rive adore a dicerni e si fasin vie vie plui grancj, come se a stessin vignint incà.

No fâs in timp a viodiju che a mi son bielzà passâts denant, cualchi volte fûr par fûr, o pûr sfantantsi cuntun plop, nancje che a fossin bufulis di savon. Che a dile dute, chestis puartis e barcons, a son plui presincis di intuî, che puescj par poiâ il voli.

A ogni mût, no cjatâju mai dulà che ju ai lassâts a ti mande fûr di scuare.

Tal imprin a crodevi di jessi jo. Crodevi che al fos in vore un argagn mentâl peât al cori dal timp. Vêso presint cuant che a cerçais la cedrade dopo agns o cuant che a cjalais i cartons animâts di Ciobin, il princip des stelis, o pûr di Bem, chel mostri cun trê dêts? Par tant che volaressis sintî il stes savôr e gjoldi a le stesse maniere, a va a finîle che, plui o mancul cun cussience, a sa ju visavis diferents. Nuie di mâl, intindìnsi. Il timp al è l’ingredient primari di ogni robe, il viaç che ducj fasìn, pôc a pôc.

Il biel al è che jo, chestis impressions a lis provi ogni volte che a mi svei!

Par fâus miôr capî, al è come se cualchidun a us spostàs ogni gnot i soremobii. E no dome chei, ma ancje i mobii, lis puartis e i barcons, cun di plui zontant o gjavant robe a seconde dal so gust.

Sigûr, o disarês voaltris, si usisi a dut. Ma almancul a podês ben imagjinâ cemût che la idee di cjase a sedi pluitost stranie se si vîf in cheste maniere.

Tornant al discors che us stevi fasint, nol è propit dal moment di sveâsi che o vevi voie di fevelâ, si ben di dut ce che al mi sucêt dopo. Parcè che dopo jo… o viazi!

No ‘nd ai altris peraulis par spiegâlu il mê traviersâ il mont, simpri che di mont o stedin cjacarant. O scomenci simpri di un barcon, o di un cuadri. Sul imprin o sint come une vôs, che no je nancje une vôs, ma somee une sburtade, une frece che mi mostre une direzion, e culì, la che prin e jere une parêt, issio saltâ fûr un panorame, une imagjine, une scrite, un ogjet. E cualsisei robe e comparissi, sedi ledrose o stuarte di nancje intindile, ve che o ven supât vie.

Al è come se un dêt mi segnàs une strade e jo no fos bon di disubidî. Jai pensât mil voltis a cemût fâ a crevâ chescj comants, ma no soi mai rivât. Soi bon dome di fâ une robe: di vierzi la bocje intune O che e je insiemit di maravee e curiositât, pôre e traspuart. E chel businâ, che al compagne il mê viaç, al è segn e foneme, un “OOO” slungjât che al travierse timp e spazi.

Jo o viazi doprant chest OOO.

.... .... ..... ......... e larà indenant

e a chi come simpri ancje la version par talian.

La palût dai gjambars

– Vêso aghe di denunciâ? – al veve domandât Ennio, mieç taponât sot il frontin da la barete di carabinîr.– Nuie, no nus è vanzât nancje un poç. Magari cussì no!

Il piçul Fredo, sintât daûr di une cise, al sintive la vôs di so mari, ancje sa nol rivave a viodile. Al saveve che e stave contant une bale, parcè che inta la braide di sot e vevin ancjemò un poç artesian cu l'aghe sane, fra mieç i baraçs, ma al saveve ancje che l'aghe e vignive razionade e che i poçs confiscâts dal Guvier.

Di cuant ch'al jere sucedût l'incident sul Tiliment chei pôcs ca vevin decidût di restâ a vivi in Friûl e vevin di fâ i conts cu la miserie fieste e dîs di vore. – Bon! – al veve rispuindût Ennio, cuasi cun premure – Alore sin a puest cussì. Ca mi saludi il piçul, mi racomandi. E ca lu tegni di voli. A son timps ch'al è miôr no lassâ i fruts lâ ator pai palûts di bessôi.

– Ma dîstu ch'al sedi ancjemò pericul? – Ma, Virgjinie... ce vûstu ca ti disi. I merecans a disin di no, ma a disevin cussì ancje prin dal incident. Al è miôr no fidâsi e tignî dûr, par cumò. – Eh… Sante Scugne… Ad ogni mût gracie. E salude ancje tu cjase. E se us covente alc, domandait. Fredo al saveve che Ennio al saveve dal poç. Ma prin che un carabinîr al jere un dal paîs, e nol jere le prime volte ch’al capitave a cjase di gnot, par cjoli une damigjane di aghe o une sporte di blede o di lidric. Pene ch’al veve sintût so mari sierâ le puarte di cjase al jere saltât fûr de cise e montât su la mountain bike, pedalant come un mat par rivâ a Palaçûl il prin pussibil.Al veve di fâ dut discuindon, parcè che la palût dai gjambars, cussì come ca la clamave lui, e jere ancjemò un sît improibît, ancje se i militârs aromai si jerin stufât di tignîlu di voli.Rivât la che une volte al passave l'arzin dal flum Stele, pôc plui in su dal paîs, Fredo si jere fermât, cjalantsi ator par sedi sigûr di ca nol fos nissun. Dopo al jere sbrissât sot il fîl spinât. Il spetacul ch’al veve di front al gjavave il flât! Ducj i cjamps e jerin soteràs di une aghe grise, lusinte e cui rifles verts. Une puce di ûf clop a coreve intal aiar, tant di stomeâsi. Ma il piçul nol jere a le sô prime gjite inta che gnove palût e al saveve difindisi: a si jere puartât daûr un picjot robât a sô mari, par sierâsi il nâs. Une volte dongje l'aghe si ere gjavât i vistîts e al veve tacât a spiçâ i voi, par cjatâ la gobe blancje plui dongje de rive. Di cuant ca jere sucedude la disgracie, e cuasi dute le basse e jere lade sot, di Lignan a Grau, no si podeve plui tocjâ che aghe puçolente, e a dî il vêr, dopo che e jerin saltât fûr i cadavar dai gjambars e da lis magnis, no coventavin tantis par fâ stâ lontan le int.

Cun di fati, nissun al jere rivât a capî adore parcè, ma chês puaris bestiis no dome i vevin lassât le scusse, ma e jerin vignudis a gale ma e vevin tacât a cressi, deventant dai mostros tant che chei ch'a si viodevin tai films. E dut chest dopo muartis!
Fredo, lis magnis no lis veve mai viodudis, ma i vevin dit che jerin grandis come un vagon di un Eurostar. Lui nol veve capît ben ce ch’al jere chest Eurostar, ma i jere bastât scuvierzi i gjambars, li a Palaçûl, par fâ cori i pensîrs.
E nol veve scuviert nome chel.
Une volte sielte une gobe al jere lât ju e al veve tacât a vogâ, stant atent a no gloti che aghe penze e colôr ûf di raze. Rivât dongje il gjambar, o miôr, chel toc di gjambar ch’al vignive fûr de aghe, i jere montât parsore i jere montât parsore, cjalcjant cui pîts che cjâr slichignote.
Si sintive come un Re su le sô isule, ancje sal scugnive spesseâ.
Cussì si ere subit distirât e al veve tacât a dispeâ il curtissut ca si ere partat daûr, tacât tal braç. Lu veve plantât ta la cjâr dal gjambar e al veve gjavât vie un biel toc, grant tant che un miluç. Daspò, poiant il curtis e cjapantlu cun dôs mans, al veve començât a mangjâ, prin che cualchidun lu viodès.

VERSION PAR TALIAN

La niçule

O ai il terôr da lis niçulis.
No stoi cjacarant di niçulâsi, intindìnsi. Chel no mi passe nancje pal cjâf. E je propit la niçule ca mi spaurìs. Cun lis sôs cuardis picjadis, ca si movin insiemit come un binari dismenteât, copât da l’aiar, mi puarte simpri a pensâ al timp cal passe e a la muart. O ai cussì pôre ca no rivi nancje a movimi, cuant che viôt une.
A disin ca sedi une metafore de vite, la niçule. Si va su… si va ju… Sigûr, o pensi. Àn reson. Ma intant ch’a pensi cussì za mi ven tal cjâf che la metafore sedi un’altre.
La niçule si ferme. Simpri.
Par chel no voi mai tai zardins publics o ta chês fameis la che àn fruts. Plui di cualchi volte a mi è sucedût ti tacâ a cori di bot e sclop, nancje ca mi stes colant un arbul sul ju pe schene.
Jo lu sai, soi sigûr, ch’al è un moment, cjacari di un secont o doi, la che je si ferme. E soi sigûr, no sai parcè, che pal voli ch’al viôt che fermâsi, la vite e je finide.
Fin cumò o ai vût cûl, e no mi è mai capitât. Ma ancje sa stoi simpri atent, no rivi a fâ di mancul di pensâ, che chel fermâsi al podarès jessi platât dapardut.
Parcè? Voaltris no pensaressiso compagn?

Secont plan

Si che al è di un pôc masse timp ch'a trascuri chest blog o lu met in vore cun tune conte curte curte, voltade dal talian, chê cjacare di muart che cjaminin :)

SECONT PLAN

A tai vie une striche fine fine, cul taeongulis. La mangjarai plui tart, cuete sot l’aghe bulint dal rubinet.
Cumò mi distiri, poiant il cjâf sul tapetut rodolât. Ogni tant, ingobît par no tocjâ i sanitaris, o rivi ancje a durmî, ancje se la femine a son setemanis ch’a rugne e grate la puarte. Podopo mi alci e voi a bevi.
Vierzint l’armarut daûr dal spieli e viôt simpri chês scritis: Silhouette, GomGel, Infasil. Purtrop dome la tele che cuvierzeve il water e si podeve mangjâ, e lu ai za fat.
Provi a vierzi il barcon, ma in strade a viôt dome muarts, ch’a cjalin par su.
Ce pussibilitât varessio, a butâmi? Miôr lassâ stâ. Mi senti sul tapon sierât e mi cjali il braç, cirint framieç i pei un tocut bon, par taiâ un’altre striche.

L'orcul di Ariis

Ogni pais al à une cjase cui spirts.
Dispès al è un cjasâl bandonât di agns, cui veris sdrumâts ch’a si misturin ai rudinaçs, parsore di paviments ch’a viodin plui polvar che lûs. Cuasi simpri i mûrs son plens di scribiçots e sporcacjoneris e la cjarande ator a è une sorte di boscaie, la che i madracs a sghindin i baraçs.
Ariis, di cuatri animis ch’al veve, nol scjampave a chest garbeç, e propit su lis rivis pantanosis dal Stele al mostrave la so cjase misteriose.
Cun di plui, che i dîs sot Nadâl, il plevan al obleave i fantacins da la dutrine a lâ a fâ su il presepi, propit ta chest zardin, ch’al uçave pôris e fantasiis.
Cristian, chest an, al jere un di chei fantacins e nol viodeve l’ore di podê jentrâ ta chel lûc intrigôs e proibît. Cuant che, insiemit a chei altris fruts, al stave metint adun pioris e pastôrs di carton, al veve cjapât subit l’ocasion par ficjâsi dentri dal cjasâl, passant par un barcon, e al veve començât a curiosâ ator pe stanzis.
So nono, ta lis flabis ch’a i contave prin di durmî, a i diseve simpri che li dentri al viveve un Orcul, platât tal scûr, ch’al mangjave trutis e gjavedon cjapât tal flum, dai timps di so nono e dal nono di so nono.
Cristian, piçul ma plen di fantasie, al zirave di stanzie in stanzie, viodint in ogni zûc di ombrene e in ogni sunôr une presince da l’Orcul o di cuissà cuale creature maraveose che dome lui al jere in grât di viodi. Dome cuant che ch’al jere lât su pe scjalis, platât daûr di un mûr scûr e sporc a si ere fermât di bot, fer come un claut in t’une bree. Nol coventave ch’al les indenant parcè che al veve pene scuviert che l’Orcul nol jere une conte di vecjos, ma al jere trop che di plui vêr al podeve sedi. Nol varès savût spiegâlu, ma no i coventave jentrâ in ta l’ultime stanzie par savê che li al stave l’Orcul. Lui j cjacarave bielzà, ancje nome cul tramâ dal scûr e cul fruçonâ dai rudinaçs.
E lui, invezit di scjampâ, al jere restât lì a cjacarâ, cul cidinôr dai soi pinsîrs, fintremai ch’a no vevin començât a clamâlu, pâr lâ vie di li.
Cristian al jere displasût di scugnî lâ vie cussì, cence neancje ve l’ocasion di viodi chel famôs Orcul, ma chel i veve dit che i varès lassât il puartoncin di fier viert in sfrese, par ch’al podès vignî a fevelâ cun lui ogni volte ch’al veve voie.
E cussì Cristian al veve fat. Di che volte indenant, imbrucjant la sfrese dal puartoncin e rivant fin daûr il mûr di che ultime stanzie. Al veve scuviert che l’Orcul al jere un di chei di aghe, rarissim, e che aromai a jerin restâts une vore in pôcs, come lui, platâts framieç i boscs de basse, o tai cjasâi bandonâts.
E intant che l’Orcul al cjacarave di se, Cristian al faseve compagn, contantji ce che i sucedeve a scuele o cun chei altris fruts.
Aromai a cjantavin i griis che i doi a levin indenant a cjatâsi, un di ca e un di là dal mûr, e si podeve dî che plui che amîs e jerin un il spieli di chel altri.
– E tu ce va tu a fâ li dentri? – i veve dit un di chei frutaçats plui grancj, ch’a levin za a lis medis, viodintlu saltâ fûr dal zardin.
– O voi a cjacarâ cu l’Orcul – i veve rispiundût Cristian, ma nol veve fat in timp a fermâ le lenghe che za al veve capît di ve sbaliât dut. I fruts a son triscj, e a deventin plui triscj ancjemò cuant che a cjatin un plui debil.
Pachis, spudadis, piçadis, scufiots e soredut cjoltis pal cûl, ch’a fasevin ancje plui mâl, a vevin segnât il rapuart di Cristian cun chei plui grancj, che za prin a lu viodevin solitari e timit, ma dopo di chel insisti che lui al cjacarave cu l’Orcul, a lu vevin cjapât di smire par dutis lis lôr tristeris.
Un soredut, ch’a lu clamavin il Riç, pe vie dai cjavei ch’a si tirave su simpri cul gel, al ere un ripetent ch’al obleave i plui piçui a fâ sporcacjoneris di ogne sorte.
A cualchidun i veve fat mangjâ le mierde di cjan, a cualchidunaltri i viers ancjemò sporcs di ledan, e cuant che a Cristian, cun t’un grues baston in man, lu veve menaçât di gjavai lis mudantis e di falu deventâ predi, lui no i veve pensât dôs voltis e al veve tacât a cori come un sfolmenât dal cjamp di balon viers il paîs.
Chel altri al veve decidût di no molâ il vues e lu varès cjapât in curt se Cristian no si fos butât dentri tal zardin de vile bandonade. Pecjât che il Riç al veve decidût di coriji daûr ancje lì e Cristian nol veve podût fa altri che lâ su pa lis scjalis e jentrâ di corse, businant e vaint, ta la stanze dal Orcul.
Di chel moment Cristian cumò si vise pôc. Al sa di velu viodût, l’Orcul, o forsit di vê viodût dome l’ombre sul mûr. Nol veve vût timp di fermâsi, parcè che al veve scuviert che le stanzie a no jere l’ultime, ma a si lave indenant cun altris scjalis ch’a tornavi a partâ tal zardin e ator dal cjasâl.
Il Riç lu vevin cjatât le matine dopo, sintintlu ciulâ e clamâ aiût. Al veve spacât il fîl da la schene, colant da lis scjalis, o almancul cussì al pareve. No vevin podût domandajal, parcè che di che volte nol veve plui dit une peraule e ancje s’al pareve sintî ce che i si diseve, nol dave segno di intindilu.
Cristian nol veve dit nuie a nissun, e nissun i veve dite nuie. Tal Nadâl da l’an dopo al jere tornât a meti su il presepi, ma l’Orcul no l’ere plui.


VERSION PAR TALIAN

Sîs di sîs

Jere passade di pôc le miezegnot e un talpinâ ferbint e jemplave di sunôrs il scûr. Che sorte di besteute a coreve svelte e cence cjalâsi daûr, cu le panze che sfilave l’asfalt. A viodile straviersâ le strade, in machine, podeve sameâ une bilite.
Rivade par le jentrade denant dal Bosco Romagno, jenfri i comuns di Prepot, Cividât e Cuar di Rosaç, a veve cjapât subit le drete, saltant roiuç e bancjutis, fin a fermâsi tal mieç di un prât, la che sîs arbui centenaris a metevin dongje une sorte di cercli.
Che besteute, che altri no jere che un dai plui antîcs sbilfs furlans, e veve començât cussì a tucâ ta ogni tronc, trê voltis, come le lancete di un orloi ch’a côr par contrari.
Pene finît il tierç zîr issio che le gnot, bielzà clare pa le lune gnove e taronde picjade in cîl, a pareve sclarisi ancjemò di plui, par un lusôr che di ognidun dai troncs al pareve butâ fûr.
Tal plui fin dai arbui, framieç l’edare che cuvierzeve le scusse, a si è tacât a viodi une grumbule saltà fûr adalt adalt; une grumbule che cuasit subit a cjapât le fate di une muse di len, scure e plenis di grispis. Di lì a pôc, come se une vene dal arbul, lungje metris e metris, a ciris di saltâ fûr, al veve començât a cjapà forme il cuarp di une femine altissime, che subit a veve començât a spacolâsi il lunc vistît neri.
– Di Sîs jo soi Le Lungje! – a veve businât cun t’une vôs sgrasaote, che mostrave agns fats almancul di trê numars.
Neancje finide le frase, tal tronc di front a si jere ripetude le sene, c’un di diviers che invezit di saltâ fûr une vecje altissime a jere comparide une femenute picinine tant che un frut di un pâr di agns, ancje se l’etât a jere su par jù le stesse di che altre.
– Di Sîs jo soi Le Curte! – a veve vuicât cheste, movint tor ator i braçs.
– Di Sîs jo soi Le Gruesse!
– Di Sîs jo soi Le Stuarte!
Chês altris dôs vôs a jerin rivadis cuasit insiemit, di dôs altris feminis, ancje chestis vistudis di grumalats neris, vignudis fûr di altris doi arbui. Une a jere dute imberlade, cun t’un braç lunc e un curt, un voli su e un jù, une orele piçule e une grande e vie indenant. Che altre a pareve une femine insinte di une femine insinte, une grum di frapis e ravais di no rivâ adore a viodi la che al començave il cuel e là che finive la panze.
Il sbilf, che intant si ere tirât in bande, al restave a gjoldi il spetacul da la comparizion, che ancje sa lu viodeve ogni mês, nol finive mai di maraveâlu. Par altri, al spietave lis ultimis dôs striis, ch’a no dome a jerin lis plui vecjis, ma ancje lis plui estrosis.
Di fat, come a no volè deludi il lôr unic amiradôr, al jere passât cualchi secont prin che ancje lôr tornassin dal len a le cjâr. La prime a jere stade Le Gobe, che jere saltade fûr dal len rodolant come un balon, vosant il so non come une sfolmenade prin ancjemò di fermâsi. L’ultime, come ch’a jere aromai usade, a jere comparide di un fuee, che si ere intacade a un’altre, e vie indenant a veve cjapât su dutis chês ca jerin lì ator, fin a fâ su une femenute che a viodile no tu i varessis dât un franc, ma che cuant che veve berghelât – Di Sîs jo soi Le Ledrose! – cun t’une vôs ch’a pareve un temporâl, a veve parfin fat colâ par tiere un pâr di çuitis che svualavin li ator.
– Come simpri di sedi la plui braurine, eh! – a i veve dit Le Gobe, tirant il cuel par rivâ a cjalâ par su.
– Ce discors! Soio o no soio la plui vecje?
– E la plui cagone – veve zontât subit daûr Le Curte, cu la so vôs lizere.
– Vêso sintût alc? Isal cualchi gjatut ch’al vai?
Ches altres a vevin ridût dutis insiemit, sgatarant e sgrasaiant. A sameavin une schirie di fantacinis cuant che tornin di messe, e a dî il vêr, chel al jere un moment ch’a vevin vivût pardabon, tancj e tancj agns prin.
A jerin ladis indenant cussì, a tichignâsi, par un pôc, fasìnt murì di ridi il sbilf, che ogni clâr di lune gnove al vignive a sveâlis. Dopo vevin fermât subit, parcè che e jere ore fâ fieste par rinovâ l’incjantesim ch’a lis faseve vivi jenfri il len.
Cussì, di lì fin sul cricâ dal dì, lis sîs striis dal Colio a vevin tacât a balâ e cjantâ, mostrant dut il lor
podê. Le Curte, a si ere rimpinade sui ramaçs plui alts e a saltave di ca e là deventant di volte in volte un uciel diferent. Mo un barbezuan, mo un falcuç, mo une schirie di passarins, mo une di çoris! Le Lungje, invezit fasìnsi verde e zale e lusinte, a si ere strissinade ta la jarbe, fintremai ca jere deventade un madracat di une famee ch’a no esisteve plui di mil e mil agns.
Le Gruesse e Le Stuarte a vevin tacât a zuiâ di bale, tirantsi di ca insom a là insom prin un gneur, dopo un fasan, e zontant a ogni zuiade une bestie diferente, si che l’aiar parsore chel prât a jere dut un svualâ di sghirats e pantianis, di viparis e magnis, di farcs e risaltis. A un ciert pont, parfin di bolps e cenglârs!
Le Gobe e Le Ledrose, invezit, a jerin plui cuietis. Lôr a stavin a cjalâ, sentadis par aiar, trabascjant litaniis in t’un furlan di altris timps, sporc di slâf e di todesc, intant che une nule di ragns e furmiis a i zirave ator, lant fûr e dentri dai vistîts, come a tignîlis su.
E propit lôr dôs a jerin chês che, prin che il scûr al scjampi, a si ritiravin par primis dentri il lôr len, cun che altris che vignivin subit daûr e il bosc, come une poçe dopo il sunsûr di un clap, ch’al tornave prest a cuietâsi.

VERSION PAR TALIAN

Stravistiment

– Là! Là! – al veve sintût businâ di lontan chei doi zovenots, plens di rincjins e svastichis.
I vevin corût daûr cence stufâsi, dopo velu fat jevâ di par tiere e çuetâ par mieç Triest. A i sameavin doi gjats ch’a zuin cun t’un surisin, cence premure di copâlu.
Par un moment al veve pensât di veju pierdûts, ma pene ch’al veve voltât par vie Valmaure ju veve sintûts subit tornâ a coriji daûr, vosant di dai pachis e netâ il mont di chei sporcacjons come lui, ch’a no jerin altri che pulçs di scliçâ.
Nol veve capît tant ben ce zîr ch’al veve fat par rivâ fin li, parcè che nol veve ancjemò masse pratiche di chês stradis. Pôc mâl, al veve pensât, nol gambie masse di ce bande ch’a tu vâs, cuant che tu scjampis.
Cussì a si jere cjatât de bandis de Risiere e, tirant flât a grops, a si jere ficjât in ta che androne di ciment, cun chei mûrs altissims ch’a lavin a finîle in t’un puarton sierât. Normâl, a cheste ore di gnot, al veve resonât.
Si ere cogolât viers le çampe, là che il mûr al lassave il puest a l’ingrès dai servizis, ancje chei cu le puarte sierade. A le fin la mierde a finis simpri in t’un gabinet, al veve pensât cun ironie, sintint il centenâ dai anfibios di chei doi delincuents fâsi simpri plui fuart.
Lu vevin cjatât cuasi subite, ancje tal scûr: Fonso no l’ere sigûr dificil di viodi, cul so metro e novante vistût di straçs e pedoi.
I doi a cjacaravin jenfri lôr in t’un lengaç che lui nol capive, ma il cjâf coçonât e i rips ch’a vevin començât a molai ta lis cuestis, ridint e spudantji intor, a cjacaravin miôr da lis peraulis. A un ciert pont, cuant che un dai doi, il plui grues, al veve cjapât le rincorse par dai un pidade in plene muse, Fonso al veve capît vonde di ce ch’a i coventave capî.
– E cussì – i veve dite jevant in pis e grampant la gjambe cun t’une man – vualtris a le vês su cuintri i puarets come me?
Il zovin al jere restât cu le gjambe par aiar, tacant a saltâ sul pît ch’al poiave par tiere, par no pierdi l’ecuilibri. Il so amì intant al rideve e sbeleave, maraveât da la reazion di chel vecjo peteon e di sigûr pensant a tropis pachis ch’a i varessin dât, di lì a pôc.
Ma chel, mostrant un snait fûr da l’ordenari, cun t’une comedonade secje sul zenoli, a i a l’â fat voltâ cuintri nature, come s’al ves pleât masse un compàs, fin a rompilu.
Il zovenot nol veve rivât adore a rindisi cont di ce ch’al sucedeve ch’al veve za començât a vuicâ, sintint la so articolazion sdrumade in che maniere. Dome in chel moment chel altri al veve alçât une man, come par fermâ ce ch’al stave sucedint, ma Fonso al veve za tirât fûr da la so lungje barbe, grise e cragnose, une sorte di piçul curtis, fin e lusint come une stiele d’arint, e cun chel al veve menât un colp fuartissim, cjapant in plen la bocje spalancade dal naziskin.
Il cuarp al jere colât par tiere, tant che une canevace bagnade, intant che chel altri i si butave intor, tirant fûr ancje lui un curtis a scroc e smicjant al cuel di chel vecjut cussì sburît.
Nuie di fâ. Fonso si ere gjavât dal colp cun t’un salt e cence dai il timp di movisi ai veve plantât il curtis tal timpli, fasintji saltâ fûr il voli.
Dome ta chel moment, intant che chel voli al pindulave fûr dal so bûs, come un oribil batecul, il nazi al veve capît cui ch’al jere chel peteon, ch’a ju veve pene copâts.
Dopo vê sdrumât ancje il secont nemì, Fonso, mieç platât tal scûr, si ere cjalât ator e al veve tirât flât. Cence pierdi timp al veve tirât fûr di une sachete un sacut plen di un polvarin ch’al veve l’odôr di jerbe pene taiade, lu veve butât sui doi cadavars, e al veve trabascjât da lis peraulis che aromai a jerin in pôcs a cognossi.
Nancje finît di recitâ che sorte di naine i doi cadavars a vevin tacât a ardi di un fûc vert e viole e in mancul di un minût al puest dai doi naziskin, vistûts di piel e fier, a jerin i cuarps piçui e ingrucjîs di dôs vecjutis. Lis striis dal est a brusavin cussì, a frêt e cence fum, come la tristerie ch’a usavin a partâ ator. Cun chês dôs a li a jerin za cinc, in pôcs mês, ch’al veve fatis fûr.
Al jere restât a cjalâlis ancjemò un moment, pûr savint che jenfri pôcs seconts nol sarès restât che un grumut di cinise.Dopo ve metût a puest il sacut cul polvar di civole si ere inviât lontan di che androne, tornant a çuetâ e a platâ il piçul curtis jenfri la so lungje barbe grispe, stant atent a no scliçâ i pedoi.
Par Fonso, un dai ultins benandants, un stravestimint perfet al jere une vore impuartant.


Version par talian

Glaçât

La prime volte ch’a ju veve viodûts, Silvie, a jere restade incjantade, tant che une moscje ch’a scuvierç il mâr. Il riflès dal soreli al pandeve di un butul a chel altri, zontant zûcs di lûs su la glace ch’a pindulave dai ramaçs.

Forsit za ta che volte a i pareve di vê sintude une vôs, miscliçade cul cic cic cic dal pluvio, ma no i veve dât pês e jere tornade cjase di corse, instupidide, a domandâi a so pari il parcè di che maravee.
– Pa la glace – i veve rispuindût chel, ridint sot lis mostacjis – se no fasin cussì la glace da la matine a cope ducj i butui e la prossime istât i pierçui tu vâs a cjoiu la da la strie Pampalune.
Al diseve simpri cussì, cuant ch’al veve di cjapale pal cûl.
Ad ogni mût Silvie a veve capît vonde par lâ su google e informâsi di bessole, ancje parcè che la strie Pampalune, a veve capît dopo grande, a no esisteve. Pampalune al jere dome un pais!
Cussì a veve scuviert che par no che i butui dai pomârs a morin di frêt, bisugne bagnâju a matine adore, cussì la glace ch’a ju invuluce a ju tegni di cont.

L’an dopo al jere tornât frêt ancje in avrîl, e je a jere lade di corse a viodi chel spetacul: veve pontât la svee, cjapât su la machine fotografiche, e vie pene fûr pais sul cricâ dal dì.
A jere cuasit imbambinide, denant dai fii di glace ch’a tiessevin une tele di une fuee a che altre, cuant che à sintût une vôs ch’a si lamicave, jenfri i filârs.
Si ere gjavade un çuf di cjavei scurs dal zarneli. Cel podevie sedi? E parcé al cainave in che maniere? O veve cirût di cucâ framieç la glace e il gotâ, ma no veve viodût nuie, parcé che chês riis di arbui in flôr, pene fûr Sclaunic, o jerin lungjis plui di doi cjamps e mieç!
Podarès sedi cualchidun ch’al si è fat mâl? E veve pensât, e cence spietâ un moment si ere inviade viers dulà che sintive chel ciulâ. Dopo sei rivade a straviersâ cuasit dut il cjamp, no podeve crodi a ce che veve cjatât! Sot l’aghe glaçade dai pluvios, ingrumade par tiere cuintri un len, a jere une frutine ch’a i dave la schene, crote e blancje come la cere, ch’a tramave di cjâf a piis.

Tal doman Silvie a jere di gnûf lì, denant dai filârs, e pene smontade da la biciclete a veve za sintût di gnûf chel ciulâ. Ce vevie di metisi a fâ? Il dì prin a jere tornade cjase in muel, impantanade fin tai zenoi e veve scugnût contâ ch’a ere colade.
Ce altri podevie dî?! Ch’e veve viodût une frute crote tal mieç di un cjamp ch’a jere sparide pene che je a jere lade dongje? Cui i varessie crodût? La varessin cjapade par mate! Miôr fâ come ch’a fasin ducj i furlans: tasê.
Però no podeve neancje fa fente di nuie. Cussì a è tornade tal mieç dai filârs, di gnûf sot la ploie, ancje se chest colp cun t’une ombrene e cui scarpons.
La frutine a jere simpri lì, par tiere, voltade di schene, ch’a piulave e tirave su cul nâs. Silvie e veve provât a tocjâle cu le ponte dal pît e la frutine no si jere mote.
– Ehi… bambina… stai bene? – i veve domandât, un pôc spauride e un pôc curiose.
Nie di fâ, che puarete a lave indenant a vaî, cu la muse platade ta lis mans.
A Silvie, vaî o no vaî, no i lave mai ju che cualchidun no i rispuindès, cussì a veve poiât l’ombrene in bande e si è cugulade, par voltâ che puarete e cjalâle in muse. Pene che però, cun lis mans, le veve tocjade, a jere sucedût come di cjapâ la scosse, e subit daûr i jerin vignudis lis tarlupulis, tant che a cjalà il soreli tai voi!

Si ere sveade distirade par tiere, crote e plene di frêt.
Vierzint i voi a veve subit viodût une fantate ch’a la cjalave, di daûr une preson di fueis e ramascjis inglaçadis. A ere vistude come cun t’un grumâl di scuele di chei ch’a usavin dîs agns fa. Dome spiçant i voi e cjalanle ben in muse a veve rivât adore a cognossile. A ere la fie di Fredo, chel a stâ li dongje. A jere sparide tancj agns prin e no le vevin mai cjatade. Jere stade par fin par “Chi l’ha visto”!
In chel la frutine, ch’a la cjalave cence vierzi bocje, a si è voltade e a corude vie.
Tal mieç dai filârs a jere restade dome un’ombrene, poiade par tiere.

Version par talian

Nûfcent euros

Cheste conte a nas di une version par talian, scrite pal concors Romanoir (contis curtis e neris). La conte no à vût risultâts, cussì l'ai voltade par furlan, parce che jere stade pensade par furlan e us disarai ch'a rint tant di plui. A fin de conte podês cjatâ il linc pa la "talian version"

NÛFCENT EUROS

– Voi fûr a bevi un cafè – al trabascje Bepo a la femine, çuetant su la mace e sierantsi la puarte daûr.
Bruna no i rispuint. A è juste l’ore da lis telenovelas, e je a è picjade ta la television cu la muse di corean e la bocje vierte. Di cuant che l’artrosi la lamiche ogni dopomisdì lu passe cussì.
Àn cuasi setant’agns, nûfcent euros di pension e un fi che di cuant che al à pierdût il lavôr al cûs lis zornadis a fuarce di bire e cjichis. Come doi çus, lu vevin clamât Agnul.
Pene fûr le puarte Bepo al cîr di comedâsi il cjapiel sul cjâf, ma al à lis mans ch’a tramin, e chest lu fâs tornâ al pensîr ch’a lu lamiche.
A ju varès copâts ducj i doi ta che sere, e subit daûr al varès cjatât il cûr di lai daûr.
Al straviarse place San Jacum, cun lis vôs ch’a i parin une tele di rai. Li bancjutis di len a vevin lassât puest cjadreis di plastiche tacadice; il spritz al jere passât da la so tace a che dai zovenots ch’a cjacaravin di esams e balon. Udin si meteve in cuince, butantji in muse la so vecjaie e la so miserie.
Ducj a cjaminavin ridint, cu la sporte in man e un telefonin in sachete. Lui invezit, nol varès mai viodût nancje un di chei gnûfs negozis ch’a jerin nassûts sul viâl Tresesin e ch’a fasevin lis ufiertis maraveosis ch’a jemplavin l’ultime pagjine dal Messaggero.
Al passe denant de ostarie cence fermâsi. E a fâ ce, ch’a nol veve nancje i bêçs par cjoltsi un cafè! Nol varès mai crodût di rivâ a ve la miserie fin su la crodie.
E pûr une volte al veve une biele cjase, la machine la voie di cjalâ lis vetrinis e un franc tal tacuin. Dopo al veve pierdût dut, planc planc. Il riscjaldament, l’aghe cjalde e parfin il savon, bagnantlu e metintlu a secjâ, par ch’al duràs di plui.
E pûr al veve simpri lavorât. Muradôr di chei bulos, ch’a tirin su un mûr cence bisugne da la scuare. E mai al veve vut bisugne di nissun. Nancje cuant che la Bruna i coventave la dentiere, o Agnul al veve disfat la machine.
Ma chel dî o jerin pene il vincj dal mês e tal scansel dai cjalçuts vanzavin dome dîs euros, ch’al veve cjapât su prin di lâ fûr, dopo ve fat la so sielte.
Si cjale lis mans in mò un volte: il tramâ a i samee cressi dì par dì, ancje se la fuarce i pâr restâ le stesse. Al pense a la scjatule di midisinis par durmî ch’al veve lassât ta la credince, i al à veve dade il miedi di provâ e nol à veve mai vierte. Ta che sere, di cene, al jere il mignestron; e al jere simpri lui ch’al partave il plats in taule. Bruna s’incjantave denant dai quiz e Agnul al tornave dome par cjalâ Striscia la notizia.
Ju varès scjafoiâts tal sium.
Tornant cjase al dopre i ultins dîs euros par cjoli doi Gratta e Vinci, cui voi di un ch’a si bute di un avion cun t’une ombrene vierte. Nol vinç nuie.
Cuant ch’al vierç la puarte al sint odôr di cene. I plats a fumavin, za in taule.
Ce mût l’erie pussibil?
– Mandi pai – i dîs Agnul saltant fûr de cusine.
– Ce sucedie? Ce mût mai a tu fat di cene? – i rispuint Bepino, instupidît.
– Cussì… ai pensât ch’a podevi dâ une man in cjase fintremai ch’a no cjati un lavôr.
– Ah… brao – al barbote cence rivâ a platâ il fastidi.
– Ce utu ch’a sedi, ai di dami da fâ – i dîs Agnul cun t’une vôs di cuaie – no podin migo lâ indenant in trê cun dôs pensions.
Bepino si sente, cun che frase ta li orelis. Al met in bocje la prime sedon, intant che Bruna, di schene, no si môf di denant la television. Il mignestron al veve un savôr strani, mareôs.
Al poie la sedon e si alce, disint ch’al va a lavâsi lis mans. Intant che l’aghe a côr tal seglâr al cjale ta la credince: lis midisinis no jerin plui.
Al torne in cusine, Agnul al tignive i voi par ju. Ju à alce dome cuant che lu a viôt cerçâ il plat di so mari. Al saveve za che il savôr al jere diferent.
I doi si cjalin tai voi, po dopo Bepino a scambie il so plat cun chel da la femine. Agnul nol dîs nuie.
– A nin mame, ch’a si disfrede.

Bruna si jeve e ven a sintâsi, e tal cidinôr rot dome da lis sedons, a tachin a mangjâ.


Version par talian