Calvino par furlan, intal Esam di Stât 2015

Al è saltât fûr Calvino, inte prove dal Esam di Stât 2015. Un toc cjolt dal bielissim libri che al trate di vuere e fantacins, Il sentiero dei nidi di ragno. 

E alore ve chi, o provi a viodi, cun sportivitât, cemût che al sune par furlan.

Par gno cont, une vore ben.

_________________

Cualchi volte a fâ un scherç di triscj al lasse un savôr mareôs, e Pin si cjate di bessôl a zirâ pai trois, cun ducj che lu cjapin a maleperaulis e lu parin vie. Si varès voie di lâ ator cuntune clape di amîs, alore, amîs di contâi dulà che a fasin in nît i rais, o par bataiâ, cu lis cjanis, tal fossâl. Ma i fruts no vuelin ben a Pin: al è amì dai grancj, Pin, al sa disi ai grancj robis che ju fasin ridi e inrabiâ, no come lôr che no capissin nuie cuant che i grancj a cjacarin. Pin cualchi volte al varès voie di metisi cui fruts de sô etât, domandâi che lu lassin zuiâ a cjâf e pile, e che i spieghin cemût rivâ a cjatâ une galarie che e puarte fin te place Marcjât. Ma i fruts lu lassin simpri in bande, e dopo un pôc a tachin a pestâlu; parcè che Pin al à doi braçuts magris magris e al è il plui debil di ducj. Là di Pin a van cualchi volte a domandâi spiegazions su ce che al sucêt fra oms e feminis; ma Pin al scomence a coionâiu berlant par il carrugjo e lis maris a clamin dongje i fîs: - Jacum! Gjovanin! Tropis voltis aio di dîti di no lâ cun chel canai tant maleducât! 

Lis maris a àn reson: Pin nol sa che contâ storiis di oms e feminis tai jets e di oms copâts o metûts in pereson, storiis che i àn insegnât i grancj, une sorte di flabis che i grancj si contin tra di lôr e che pûr al sarès biel stâ a sintî se Pin no lis messedàs cun mincjonadis e robis che no si capissin, di induvinâ. 

E a Pin no i reste che lâ a platâsi tal mont dai grancj, dai grancj che ancje lôr i voltin la schene, dai grancj che pûr no si rive adore a capîiu e a son lontans par lui come par chei altris fruts, ma che a son plui facii di cjoli in zîr, cun chê voie di feminis e chê pôre dai carabinîrs, fintremai che no si stufin e a tachin a cjapâlu a scufiots. 

Cumò Pin al jentre inte ostarie fumose e viole, e al disarà porcariis, peraulatis mai sintudis a chei oms fin a mandâju in bestie e a fâsi pestâ, e al cjantarà cjançons comoventis, scunintsi fin a vaî e a fâiu vaî, e al inventarà mateçs e bocjatis cussì gnovis di incjocâsi dal ridi, e dut par sfantâ la fumate di soledât che i si cjapê sù tal pet intes seris come chê li.

Quasimodo par furlan

Vuê e jere la zornade de prime prove di talian, pai Esams di Stât. Ben po, inte analisi dal test e je saltade fûr une poesie di Quasimodo, e se l'an passât mi soi gjoldût a voltâ Magris, chest an o ai pensât di voltâ il poete ermetic che tant al à dât a lis poesiis lungjis il just par facebook. 

Bon, dai, a part lis menadis, disìn pûr che la poesie e jere biele e une vore dificile, di voltâ,  e cjapait il risultât come che al ven. A mi, mi plâs ancje par furlan, ancje se e je ostiche (ma lu ere ancje par talian :)

E rît la cheche, nere sui narançs 

Forsit al è un segn vêr de vite:

ator di me fantacins cun moviments

lizêrs dal cjâf a balin intun zûc

di cadencis e di vôs dilunc dal prât

de glesie. Dûl da la sere, ombris

tornadis a impiâ parsore la jerbe cussì verde,

bielissime in tal fûc de lune!

Memorie us lasse durmî pôc;

cumò, sveaitsi. Ve, al scravace il poç

pe prime maree. Cheste la ore:

no plui la mê, brusâts, simulacris antîcs.

E tu vint dal Sud fuart di rosis di naranç,

sburte la lune dulà che crots a duarmin

fantacins, sfuarce il puieri pai cjamps

umits di olmis di cjavalis, vierç

il mâr, alce sù lis nulis dai arbui:

za l’airon si slungje viers la aghe

e al nulìs a planc il pantan jenfri lis spinis,

e rît la cheche, nere sui narançs.

La storie de Siore Cjapedut di Beatrix Potter

E jere une volte une frutine che si clamave Lussie, che e viveve intune massarie clamede Little Town. E jere une brave frute, ma e pierdeve simpri i siei façolets! 

Une dì Lussie e rive inte arie vaint, oh, cemût che e vaive! 

“O ai pierdût il gno façoletut! Trê façolets e un grumâl! Tu ju âstu viodûts, Micio Soriano?”, e domande al gjat. Ma il gjat a va indevant a lecâsi lis çatis blancjis. 

Alore Lussie lu domande a une gjaline puntinade: “Sally Gjaline, âstu mica cjatât i miei façolets?” Ma la gjaline puntinade e cor ator par il granâr clocjant: “Jo cocococor, jo cocococor, jo cocococor!” 

Alore Lussie lu domande a Robin Gjal che al polsave suntune ramascje. Ma chel la cjale cuntun voli sôl, un voli neri e slusint, e al svuale vie di là de cjarande. Lussie si rimpine su la cjarande e e cjale viers la culine daûr di Little Town, une culine che e va sù, sù fin dentri des nulis, cussì che al somee che no vedi la ponte! 

E une vore adalt, parsore la culine, i pâr di viodi da lis maglis blancjis sparniçadis pe jerbe. Lussie si rimpine sù par la culine plui svelte che e pues, cu lis sôs gjambis fuartis; e cor par un troi di rive sù simpri plui adalt, fintremai che Little Town no je propit sot di jê: se a ves tirât un clap, al sarès colât juste dentri di un cjamin! 

A un ciert pont e rive a une font, che e salte fûr e e bronde di un flanc de culine. 

Cualchidun al à poiât suntun clap un piçul recipient, ma za la aghe e colave fûr parcè che il recipient nol jere plui grant di un puarteûs! E dulà che il savalon sul troi al jere bagnât si olmavin lis improntis di cualchidun che al veve di sei une vore picinin. 

 Lussie e cor e e cor. Il troi al leve a finîle da pît di une piere grandonone. Achì la jerbe e jere basse e verde e da lis gjambis di felce a jerin i paluts par un stendidôr, che al veve come cuardis lescule intorteade; al jere un grumut di picjots... ma picjât neancje un façolet! 

Al jere però alc altri: une puarte, propit inte piere, e dentri cualchidun al cjantave: 

“blanc come un zi, oh! Picet e picetuts, oh! Lissie un pôc, scjalde un pôc! E nancje une maglute oh!” 

Lussie e tuche une, dôs voltis, la cjançon si ferme e une vôs spauride e domande: “Cui è?”

Lussie e vierç la puarte e savêso ce che e cjate dentri de culine? Une cusine dute lustre, cul pedrât sul paviment e i trâfs di len – propite come une cusine normâl di campagne. 

Dome che chi il sofit al jere cussì bas che il cjâf di Lussie cuasi lu tocjave; cun di plui pignatis e padielis a jerin propite picininis, come dut il rest. 

 Al jere un bon odôr di blancjarie sopressade, e in pîts daûr de taule, cun in man un fier di stirâ, une siorute cracagnote e robuste e fissave Lussie cun curiositât. La cotule, di tele stampade, e jere ravaiade, e parsore de sotvieste a riis e jere ingropât un larc grumâl. Il nâs neri di chel strani personaç al nasave, sniff, sniff, e i voi a cimiavin, blinc, blinc, e di sot la cufiute, tal puest dai riçots a vignivin fûr... SPIÇOTS! 

“Cui sêstu?” e domande Lussie, “âstu viodût i miei façolets?” 

La besteute e fâs une riverince: “Oh, sì, se tu permetis! Il gno non al è Siore Cjatedut e, se tu permetis, o soi bune di lavâ e inamidâ ae perfezion!” E par fâ viodi e cjape alc dal cestin de blancjarie e lu met su la tele par sopressâ. 

“Ce robe ise? Isal mica il gno façolet ?” 

“Oh, no, se tu permetis al è il gjilè ros di Robin Gjal!” E dopo vêlu sopressât e pleât lu met in bande. Dopo e cjôl da stendidôr alc altri. 

“Ma no isal il gno grumâl, chel?” e domande Lussie. 

"O no, se tu permetis, e je la tavaie a cuadris di Jenny Favite, cjale cemût che e je maglate di vin di ribes! Dificil di parâ vie!” e dîs la Siore Cjatedut. 

Il nâs de Siore Cjatedut al va indevant a nasâ, sniff, sniff, e i voi a cimiâ, blinc, blinc. 

E cjape un altri fier cjalt dal fûc. “Ve lu chi un dai miei façolet!” e esclame Lussie “e chi al è il gno grumalut!” 

La Siore Cjatedut lu sopresse, e passe parsore des pleis e e met adun il picet. 

“Oh, ma al è pardabon ninin!” e esclame Lussie. 

“E ce sono chês lungjis robis zalis cui dêts, come i guants?” 

“Oh, al è un pâr di cjalcis di Sally Gjaline, cjale cemût che e à ridot i talons a fuarca di raspâ pa la arie! Ca di pôc e larà ator discolce!” e dîs la Siore Cjatedut. 

“Cjale chi, al è un altri dai miei façolets... ma nol è gno! Al è ros!”

“Sigûr che a nol è to! Al è di di Mari Cunine e al puçave di cevole in maniere teribile! O ai scugnût lavâlu in bande, ma la puce no va vie!” 

“Chi però al è un altri dai miei, ma ce sono chestis robutis blancjis?” 

“A son lis manecis di Micio Soriano, ma o ai dome di sopressâlis: lui lis lave di bessôl” 

“Ve chi che al è chel altri dai miei façolets!” e esclame Lussie. “e ce stâstu metint a bagn inte terine dal amit?” 

“A son lis petorinis di Tom Surisin: se tu savessis trop che al tichignôs!” e rispuint la Siore Cjatedut. 

“Ma cumò o ai finît di sopressâ. Voi a meti a cjapâ aiar i vistîts. [...] E a picje vistîts di ducj i tipos e dutis lis misuris: lis gjachetis scuris dai surisins, il gjilè neri di velût, une gjache cu la code rosse cence plui la code che e jere di Nutkin Sghirat, un gjachete blu di Pieri Cunin che e jere vignude piçule, une cotule che e jere lade pierdude dentri dute chê blancjarie e... a la fin il cestin al è vueit! 

Podopo la Siore Cjatedut e fâs il tè – une tace par jê e une par Lussie. Si sentin dongje dal fûc suntune bancjute e si cjalin. La man che la Siore Cjatedut e e dopre par tignî sù la cjicare e je une vore scure e scridelide a fuarce di lavâ, e straviers la cotule e la cufiute a vegnin fûr des spinis, tant che Lussie e si tire in bande. 

Cuant che a àn bevût a impachetin i vistîts e i façolets di Lussie a vegnin pleâts e metûts dentri tal grumâl e pontâts cuntune spile d’arint. A cuvierzin il fûc cu la torbe, a jessin, a sierin la puarte e a platin la clâf sot dal soiâr. 

E Lussie e la Siore Cjatedut a talpinin jà pe culine cun i lôr vistîts involuçâts. Dilunc la strade lis bestiis a vegnin fûr des plantis di pueste par cjatâsi cun lôr; il prins a son Pieri Cunin e Beniamin Cunin, e jê i da i lôr vistîts nets. Ce contents che a jerin ducj. 

Cussì cuant che a rivin a la fin da la culine, a restin dome i vistîts di Lussie. Lussie si rimpine su la cjarande cul voluç in man e dopo si zire par dî buinegnot ae Siore che e lave, ma... la Siore no je restade li a spietà ringraciaments o che e paiàs il cont! 

E coreve, coreve, coreve sù pe culine, ma dulà jerino lâts la cufiute e la cotule e il sialet e la sotviest... e cemût che e jere deventade piçule e scure e plene di spinis! 

LA SIORE CJATEDUT E JERE... UN RIÇ!

Conte cjolte di Beatrix Potter, 1905

Il mostro che i plasevin lis storiis - conte par fruts voltade par furlan

Chiste e je la storie di un ream, di un re e da la sô fie adorade.
E e je ancje la storie di Osvalt, il mostro spaventôs.
Un mostro furbo e feroç, bulo e fuart, propit di chei mostros che al è une vore dificil cjapâ.
“Il prin che lu cjaparà, la principesse al sposarà!” al veve dit il re.
E cuant che Valentin si jere fat indenant, ducj cuancj a vevin tacât a ridi.
“Ah, ah, ah... vêso viodût chê mieze cartucje? Ah, ah, ah”
“Lassaimi provâ” al veve protestât Valentin, “Lassaitmi provâ e viodarês.”
E cussì... lu vevin lassât provâ.
“Bon, bon, Picinin, ce varêstu voie di fâ” al veve dit il mostro.
“No mi clami Picinin, mi clami Valentin e ti distruzarai!”
“Ah, ah, ah, distruzimi? E cemût pensistu di fâ?”
“Ahhh, vûstu che tal conti? Alore scolte...” E cussì Valentin al veve scomençât a contâ...
“Di mostros jo, ‘nd ai za viodûts une vore, a centenârs, ma ce disio, a miârs. Grancj, grues, Furbos, Stupiduts. E ju ai copâts ducju! Ma atenzion, no ducju inte stesse maniere. Ogni mostro al à la sô storie...
Par il mostro stupidut o dopri la spade. Cuant che un di chescj mostros, che a son propit çus, al partìs al atac cence cjalâ nancje dulà che al va, jo o tiri fûr la spade e... ZAC! Inpirât come un spiedin.
Podopo a son ancje i mostros paurôs, ma mica ducj lu san. Chei al baste spietâju e platâsi, e cuant che a rivin dongje, propite tacâts tacâts... BUH!!! E vie lôr che scjampin plen di pôre e no tornin mai plui!
O ben, podopo, cul mostro golôs bisugne invezit cambiâ strategjie. Io o fâs cussì. O scomenzi a dâi di mangjâ, e lui al mangje, e i doi e i doi... e cuant che al è sglonf par ben, cu la panze biele plene, fasint fente di nuie i doi une cuesse di dindi e un clap, un bisteche e un clap, e un altri clap, e... PATATRAAAC!!! Il mostro al sclope!
Ah, ma le mê storie plui biele e je che dal mostro brut, che al è tant brut, ma tant brut, che dome a cjalâlu in muse tu restis sec. E jo? Ce fasio? Pene che lui mi rive intor, TAC! O tiri fûr un spieli de sachete! E induvinait cemût che va a finîle?
Ma la robe plui divertente, ma propite che tu moris di ridi, al è copâ il mostro guziôs. Bisugne cjatâ la scuse par fâi alçâ sù i braçs e podopo, cuntune plume, e ghiti ghiti ghiti di une bande, ghiti ghiti di chê altre e ve li, il mostro al môr di ridi.
Osvalt, a chel pont, al veve tacât a bati lis mans. “Ancjemò, ancjemò! O ai voie di sintiti contâ ancjemo storiis.” A Osvalt, insome, i jere passade la voie di fâ pôre a la int. “Mi baste une storie par sere” al veve dite “e o promet che non darai plui fastidi a di nissun!”
E cussì, no dove Valentin e la principesse si jerin maridâts, ma o vevin tignût parfin Osvalt intal cjastiel, par parâ vie i triscj se par câs a rivavin. “Bisugne pensâ a dut” al veve dite il re.
Cun di plui, Osvalt al jere parfin content!

"Intune gnot nere" - Conte voltade par fruts

Gnot… Pieri al cjamine dentri dal bosc.

Al è piçul e al à pôre. Dut tun colp…

HUUHUUUHUUU!!!

Ce isal? Pieri si ferme. Al cjate subit un morâl che al à une buse e si plate dentri.

Un… lôf!

Pieri al treme. Il lôf al pie un grant falò. "no ai di movimi" si dîs Pieri.

E dopo. Dut tun colp…

GRRRRRRR!

Il lôf al scaturìs. Pieri si cuvierç i voi.

Cuant che ju torne a vierzi, un tigre e je poiade sul tronc.

Pieri al à i sgrisui."Ce pôre che e fâs cheste tigre!". Ma di bot…

RRRRROOOOOAAAAARRRR!

La tigre e scjampe vie. Une tierce bestie e ven dongje.

Un cocodrîl! A Pieri i tremìn parfin i zenoi. Si met in cugulute dentri dal bûs. Podopo al sint alc daûr la schene. Al cîr a palpe… e je la mantie di una puarte. Pieri la vierç e al jentre.

"Une scjale? Dulà soio capitât?"

La scjale e puarte a une piçule cusine. Pieri si sente e al bêf la cjocolate che e jere za pronte su la taule. E je bunissime. Podopo dut tun colp, si savolte. Di front di lui si vierç une puarte…

«Ciopo, un cuninut!» al dîs Pieri.

«Ciopo, un frut!» al dîs il cunin. «Ce fâstu chi?»

«Eh, tal bosc al è plen di besteatis…» al spieghe Pieri «E cussì mi soi platât e o ai cjatât cjase tô.»

«E cumò ce âstu voie di fâ?»

«E… o varès voie di tornâ a cjase, ma o ai pôre»

«Ti compagni jo!» al dôs il cuninut.

Al met sù une manteline nere, al cjape sù une valîs e al tache a lâ sù pa lis scjalis.Rivât adalt, il cunin al tire fûr de valîs une mascare e s'al à met sù. Dopo al monte su su lis spalis di Pieri. Sot la manteline, Pieri al treme. «Vierç chê puarte, sbasse il cjâf e va fûr» i dîs il cunin.

Pieri al vierç planc planc la mantie.

«Podìn lâ» al cisiche il cuninut «Va simpri dret e rugne come un leon»

GRRRROOOAARRRR!!

«Ve chi che e je cjase mê!» al busine content Pieri, e al scomence a cori e cori e cori al vierç la puerte e la siere subite.

«Finalmentri» al dîs Pieri. «Sans e salfs» al dîs il cunin.

«Ai fan» al dîs Pieri «Ancje jo» al dîs il cunin.

TOC TOC! «Cui è?» al domande Pieri. «Vierzeit, par plasê! Al è un mostro intal bosc!»

«Un moment» al dîs il cunin. E si tornin a meti su la mascare e la manteline. «Bundì!» al dîs Pieri-mostro vierzint la puarte. «Aiuuuut» a businin il lôf, la tigre e il cocodrîl. E vie a scjampin a dute corse.. e a sparissin tal bosc.

«Cumò o ai propite une vore di fan» al dîs Pieri

«Ancje jo» al dîs il cunin.

E il cunin al jemple subit dôs tacis di cjocolate e a bevin ducj i doi… a la salût dal mostro!

Conte voltade di "In una notte nera"

Mostro, no stâ mangjâmi! - Conte voltade par fruts

Alex al è un purcitut une vore golôs.

O sin a matine, e Alex al va cucjo cucjo in zardin, a cirî papatis e ‘nt mangje plui di dîs!

Ma dut tun colp e salte fûr sô mari.

“Ve chi che tu eris finît. Ti ài cirût pardut!” i busine. “Ma no sâstu che no tu âs di mangjâ fûr dal past. Finisile cumò! E tu ti sês ancje sporcjât dut. Cjale chi! Tu sês plen di tiere. Vie di corse cjase a lavâti!”

Alex si invie viers il flum, par fâ il bagno. Secont lui sô mari e je masse severe. Cetantis storiis par dôs o trê patatis!

Dilunc la strade al viôt un morâl cjamât di biei miluçs.

Cuntun grant salt al cîr di cjoli un, ma a son masse adalt.

“Tant no varès di mangjâ fûr past” al pense.

Ma un pôc plui innà al viôt des piçulis pomis rossis.

“E cui al resistial a lis trisculis! Jo, no di sigûr!” si dîs Alex.

Si sbasse par cjapâju sù, ma di bot, daûr da la sô schene si jeve sù une ombre grandonone.

Cuntune ridade spaventose, un mostri bocognon lu grampe e si prepare a glotilu.

“Mostro, no stâ mangjâmi” al berle Alex, tremant.

Il mostro no lu calcole. Al stâ atent dome da lis pomis rossis.

“Trisculis!” al esclame il mostro. “O ai propite voie di mangjâmalis dutis! E dopo di lôr a tocje a ti, purcitut!”

Il mostro si met in sachete il purcitut, che al sbrisse jù, jù, jù fin insomp. E dentri li al è dut un scûr, une grande confusion: cjartis di caramele, un vecjo penarel roseât, doi bezins, un boton e parfin un ciungam dut tacadiç.

Dut ta un colp, Alex al sint dai rumôrs stranis che a vegnin di adalt.

“E je la panze dal mostro, che e bruntule par la fan” al pense Alex. “O ai di movimi! Rimpinâmi, saltâ fûr de sachete e metimi in salf!”

Masse tart! Cinc dêts grandonons a son za che a cirin framieç lis cjartis di caramele e lu grampin.

“Mostro, no stâ mangjâmi” al busine Alex. “E parcè mai no varessio di mangjâti?” al riduce il mostro. “Cjale là, la insomp, al è pene passât un elefantut colôr di rose. Al someave une vore bon e al jere frant il dopli di me”

“Gnam!” al fâs il mostro. Si torne a meti il purtitut in sachete e al cor viers il bosc!

Alex al è preocupât... par cumò le à fate francje, ma al sa ben di vê dite une bausie e che nol esist nissun elefantut.

A un ciert pont il mostro, che al strac, al ferme di cori.

“No soi rivât a cjapâ l'elefantut! E alore cumò tocje a ti” al rugne.

“Mostro, mostro, no stâ mangjâmi... no âstu viodût chê nule là su?”

“Si, parcè, ce vulie dî?”

Daûr da la nule si è pene platât il plui gustôs uciel dal mont! Si clame Uciel-Luianie e se no tu ti movis ti svole vie!”

Il mostro za al tacave a insumiâsi di mangjâ l'uciel luianie e alore si torne a meti Alex in sachete e vie, al tache a rimpinâsi su la coline. Ma propit cuant che al rive adalt la nule e passe par li, lui si bute par cjapâle, e oooooo al cole jù a rodolons, fasint un grant polveron!

“Uff, no soi rivât a cjapâ l’uciel-luianie. A volarà dî che mi contentarai di un purcitut!”

“No, mostro, no stâ mangjâmi!” lu pree Alex “Ti contarai un segret”

“Ce segret? Dai, svelt, dimâl” al domande il mostro.

“Propite chi sot, sot tiere, e je la citât dai cunins. Dentri ta lis galariis a saran plui di mil!”

“Viôt che se e je une bausie, chist colp tu ma la pais! ”

Il mostro al torne a meti Alex in sachete a al tache a sgarfâ une buse grandissime che al stave dut dentri. Ma... nuie, nancje un cunin. Sot tiere a son dome viers.

Rabiôs al cjape Alex e al vierç la bocje. “No, mostro, no stâ mangjâmi” al vai.

Ma il mostro aromai al à pierdût la pazience e al stâ par metilu in bocje.

In chel, però, une ombre grandonone e rive daûr de schene dal mostro. “E alore? Dulà jeristu lât a finîle. Ti ai cirût dapardut!” E busine la mari dal mostro. “Tu sâs che no tu âs di mangjâ fûr past! Smetile subite!

E tu ti sês ancje sporcjât dut, cjale li ce pastros, tu sês plen di tiere! File cjase di corse a lavâti!”

Subite il mostro al ubidìs e al mole Alex, che al scjampe vie come une frece. E dopo al va di corse dongje il flum, a lavâsi.

Il purcitut al torne cjase come un sfolmenât. Dilunc la strade al pense che ogni tant, lis maris, a fasin propit ben a jessi un pôc severis, ancje par da lis stupidagjinis come dôs o trê patatis. 

Al cor la di sô mari e, prime ancjemò di contâi la sô teribile aventure, i salte in braç e la strenç!

Luca, la Lune e il lat, di Maurice Sendak - Conte voltade par furlan

LUCA, LA LUNE E IL LAT

Sveât in un rumôr tal mieç de gnot,  Luca al salte fûr da lis cuviertis e al busine:

E ALORE! CE AL SUCEDIAL LÀ JÙ IN CUSINE!

Ma dut tun colp al sbrisse fûr  dal so pigjame fin dentri tal scûr, e blanc come il lat, al jentre tal lusôr da la Lune!

Al va a finîle in cusine dentri di une grande scudiele di paste frescje

I cogos, viodint chê robe dute blancje che e cole dentri ta la paste, a scomencin subit a messedâ e cjantâ: TORTE CUL LAT, TORTE CUL LAT; IMPASTE, IMPASTE ZIRE E E SBAT.

E pene pronte a metin tal for la lôr biele torte al lat.

Ma propite a mieze coture, cuant che un odorin di torte al comence a jemplâ la cusine, Luca al salte fûr e al busine:

O SOI BLANC COME IL LAT, MA MI CLAMI LUCA, NO MI CLAMI LAT!

Però, al pense Luca, nol capite migo a ducju i fruts, di lâ a finîle dentri di une torte tal puest dal lat.

E Luca al tache a pestâ, tirâ, sbregâ dute la paste de torte mieze cuete…

…fin a dâi la forme… di un bielissim AVION!

I cogos scaturîts a cirin di fermâlu businant: IL LAT! IL LAT!N IL LATA DA LA NESTRE TORTE!

Ma Luca a cjape sù une tace al volo e al scjampe vie disint: NUIE PÔRE AMÎS! US PUARTI JO IL LAT A LA MÊ MANIERE!

E su… su… su…. Inte gnot di Lune, su fin che al rive a la VIA LATTEA

E dopo jù… jù… jù…. A svuacarâ intun mâr di lat cjantant:

LAT DI LUCA LUNE DI LAT

LUCA DI LAT LAT DI LUNE

E cussì al bute jù dal cîl une cascade blancjissime di lat e i cogos ducj contents a tornin messedâ, e sbati e impastâ la torte cjantant:

TORTE DI LAT

TORTE DI LUCA

METIN DENTRI INTAL FOR

UNE TORTE CHE PLUI BUINE SI MÔR

Ma la Lune aromai e stave lant vie e Luca la salude businant: CHICCHIRICCHIIIIII!

E dopo al sbrisse plen di sun fin tal so jet e dopo vê sosedât inmò une volte al tache za a insumiâsi di lat, di lune e di torte… 

La bocje dal mostro

Intune foreste scure al vive un mostri oribil!

Al jere bocon come une cjase, al veve doi voi boconooooons, e orelis grandis come lis aruedis di un camion, e un nâs grues, ma grues, come trê sacs di patatis

Al jere une vore trist, ma nissun al veve pôre di lui Parcè che al veve une bocje piçule, piçule, piçule...

Tant piçule che nol podeve mangjâ altri che furmiis, moscjis e...Cualchi volte ancje svuarbecjavai, ma nuie di plui.

Il mostri al jere strac di vê une bocje cussì piçule e si insumiave di vent une bocognone par podê mangjâ dutis lis bestiis da la foreste.

Une dì, leint il gjornâl, al scuvierç che il Dotôr Comededut al jere vignût a stâ tal paîs dongje.

Il dotôr Comededut al jere un bravissim miedi chirurc, che al veve za operât di dut : gjambis rotis, nâs stuarts, voi clops, lenghis di lipare, orelis molis e cuei dûrs.

Il mostri alore al cor di corse in ospedâl e i dîs al miedi : «Mi covente un aiût! O ai voie di vê une bocje grande cussì!

Il dotôr lu visite di cjâf a pîts e i dîs: “Ti fasarai une bocje grandonone, ma tu âs di prometimi che di cumò in poi tu deventarâs bon e no tu mangjarâs plui nissun.

“Ma ce discors!” i rispuint il mostri cuntune vôs dute dolce, “O sarai bon e zentîl cun ducj. Jo o vuei vê la bocje grande dome par bielece.”“Va ben!” i dîs il miedi. “Se al è cussì alore ti operi daurman.”

La operazion e salte fûr une maravee e il mostri al torne cjase cuntune bocje grande tant che il baûl di une machine!

Lis bestiis dal bosc no san de operazion, ma cuant che la prime i va dongje, come che e faseve simpri, il mostri la mangje interie, cence pietât.Chê sere, cence nancje un fastidi, al mangje di cene: dîs cunins, un cjavrûl,  trê gneurs e doi cenglârs... cence nancje cueiju!

Cuant che si met tal jet al veve un pocut di mal di panze, ma al pense: “Doman o voi in paîs e mi mangji un frut! Ma no, no dome un, Doi! Ma ce doi, una classe interie, comprendude la mestre!”

Jù pa la gnot il mâl di panze al aumente e lui al va in gabinet, ma no i covente a nuie e cussì al môr per il tant mâl che al veve.

E savêso parcè? Content di vê la bocje grande, si jere dismenteât che sot la code al veve un busut piçul, piçûl, piçul...

Cuant che lu viodin muart, li bestiis dal bosc a tachin a cjantâ:“Ah, ah, ah, l’ingort mangjât masse al à!   -  Dut al è parât jù e nuie fûr l’è lâtCu la panze par aiar velu là  -  Al è stât trist e ben i sta!

Doi mostros! - voltade par furlan

E jere une volte un mostri che al viveve cuiet sot di une grande montagne… Di chê altre bande de montagne al viveve un altri mostri

___ *** ___

I doi mostros, ogni tant, si cjacaravin fra di lôr traviers di une buse…
Ma no si jerin mai cjatâts.

___ *** ___

Une sere, il prin mostro al dîs: “Cjale ce biel! La zornade e va vie!”
“La zornade e va vie?” al ripet il secont mostri. “Ma nooo! E je la gnot che rive, cjastron!

___ *** ___

“E jo o sarès un cjastron? E tu sês un stupidat!” al busine il prin mostro. E par il gnervôs cuasi nol rive a durmî! Ma ancje che altri mostro al jere dut rabiôs e al duâr malissim!

___ *** ___

La dì dopo il prin mostri si svee cu la lune di traviers, al va denant de buse e al busine: “Sveiti, brut cjâf di patate! No viodistu che la gnot a va vie!”
“Nooooo al è il dî che al rive, brut çurviel di gjaline che no tu sês altri!” i rispuint il secont mostri. E dopo al cjape sù une piere e la tire di chê altre bande de montagne.

___ *** ___

“No tu mi âs cjapât brut panzon ignorant!” i busine il prin mostro e dopo al cjape sù ancjemò plui grande e la tire di chê altre bande!” “Ah ah! No tu mi âs cjapât! Pelôs, Nason e bon di nuie!” al vose il secont mostro. E dopo al tire une piere che a fâs salta vie la ponte da la montagne!

___ *** ___

“Ah, sturnel e balon sglonfât, cjape chi!” al vuiche il prin mostro tirant un clap che al fâs saltâ vie un altri toc di montagne! “Tu sês un bon di nuie, sflacjon, imbranât!” al ribat il secont mostri e tant par cambiâ al dà un rip a une piere grandonone

___ *** ___

E par dute la zornade a van indevant a tirâsi pieris simpri plui boconis e a dîsi ofesis simpri plui lungjis! I doi mostris no si fasin mâl, ma intant la montagne e colave a tocs!

___ *** ___

“Tu sês un schifôs, pelôs, ciçon, cjâf vueit, cocâl e voli clop!” al dîs il prin mostri prin di tirâ une altre piere. “E tu tu sês frait patoc, frignot, fanfaron e puçolent!” al vose il secont mostro, e dopo ancje lui al tire un piere inmò plui grande!

___ *** ___

E chê piere enorme e fruçone che pôc che al restave de montagne e dome in chel moment, i doi mostris si cjalin in muse. Propit in tal moment che il soreli al lave jù.

___ *** ___

“Incredibil” al dîs il prin mostro, poiant la piere che al stave par tirâ. “Ve li che e je la gnot che sta rivant, tu âs reson!” “Ce maravee” al dîs il secont mostro, “al è il dì che al va vie, tu âs reson!”

___ *** ___

E alore a van un dongje di chel altri, propite tal mieç dal disastri che a àn cumbinât, e a cjalin insieme il rivâ de gnot e la fin dal dì. “Poben” al dîs il prin mostro, “almancul si sin divertûts!” “Eh, eh, e je vere, pecjât pe montagne.

Conte voltade di Due Mostri
di David McKee

Il grant Carnevâl - conte par fruts voltade par furlan

 Voltade di IL GRAN CARNEVALE di Piumini/Garnich

La jù, a Rio, il Carnevâl    

E è une fieste ecezionâl

Ducj in mascare a balâ    

Su la spiaze in rive al mâr

E da lis ondis ducj curiôs    

i pes a son vignûts fûr

Si riunissin e une triglie

E môf la code e ju consiglie    

«Ce disêso, us parie mâl

Se o fasin il Carnevâl?»

«Nooo» a rispuindin, e ator pal mont   

 I pes van ducj intun toront

Sù mo sù, e je ore di scomençâ

Sul font dal mâr a lavorâ    

Taie, incole e podopo disegne

Cui al insegne e cui s'impegne

E dopo il lavorâ di ogni animâl

    Tal mâr al tache il… CARNEVÂL!!!

Masanetis, scuâi, tons e ceurs    

Orchis, balenis, a mancjin dome i gneurs

Dentri dal mâr al è dut pront    

Ogni pes a si confont

Fra lis ondis une grande fieste    

Ducj travistûs, compagn di prin nissun al reste

Di cualchi travistiment 

No ducj a son contents    

Par chel lôr Carnevâl

Cualchidun al reste mâl

In tal cîl a svole une ocje

Qua qua qua, là di baldorie no 'nd è pocje    

La notizie e cor e a rive

Su la spiaze e su la rive

E alore une riunion cun ogni animâl

A àn voie ancje lôr il Carnevâl!   
E cussì see, incole, e dopo disegne   

 Cui che al insegne e cui s'impegne
E a la fin dal lavôr

A son in mascare ancje lôr

La vacje, il purcit, la pantiane, il mus

E il gneur, la budiese, il cierf, il çus    

Parfin il passarin e ancje il leon

E jere dute une confusion

Nissun platât intune buse

Ogni bestie e cambie muse

E intant che il mâr al è dut in fieste

A rît dute la foreste    

Par lis montagnis e pianuris

O ce ridi, ce figuris!

E no je finide, di une distanze astrâl 

I marzians a viodin il Carnevâl    

E si sint che disin "vzzz z z, oi o o

Che al vûl dî "ancje nô! ancje nô!""

E ancje su Marte a va a finî

Che la fieste e à di partî    

E parfin in paradîs

Si traviestin di cjâf a pîts

Al jere une volte il Carnevâl    

E cumò al è Universâl!!!

"Il balarin cidin" une libri par fruts voltât par furlan

IL BALARIN CIDIN

da Il ballerino del silenzio

un racconto di Ivo Rosati; illustrato da Irma Gruenholz

______________________

No je mai une gnot compagne di chê altre

E ogni gnot di rispetâ e à di jessi pleni di maraveis. A son lis nulis e la lune Lis stradis vueidis e i lampions piâts.

Podopo al è il cidinôr, tancj cidinôrs, nissun compagn. Al è chel plen di rumôrs lontans e chel cun dentri piçui sunôrs, al è chel che al reste e dure cence jessi disturbât. E di gnot, al è cualchidun che nol duâr, parcè che al à di scugnî... balâ.

Al va fûr di cjase simpri a di chê ore, d’Unvier involuçât dentri di un capot, d’Istât cun dome une cjamesute lizere.

Al va fûr di cjase e al zire, al va ator pe citât, si slontane, al talpine e al stâ a sintî cu lis orelis spiçadis. Cualchi volte al torne che e je za matine.

No je une fantasime, no je une invenzion, al è il balarin cidin! Al à balât in dut il mont, in tournèe in ducj i cinc continents. Ducj i àn batût lis mans e i àn mandât maçs di rosis. Di lui a àn cjacarât gjornâi e televisions, fintremai che un dì al à decidût di smeti: cumò al bale dome par amôr, di gnot, dulà che nissun lu viôt.

Lu clamin il balarin cidin parcè che nol bale lant daûr de musiche, e nol à daûr une orchestre, o une radio, o un regjistradôr. Nol bale tai teatris, tai locâi o tes fiestis, tal mieç de int. Lui al bale tai cjamps, tai parchegjos, ta lis zonis plui dismenteadis da lis citâts indurmididis.

Chest balarin al bale par doi minûts, intune place, dongje di un negozi, o pûr intune vie platade, sot di un barcon. Al bale cidin, par gustâ il savôr, prin che une ridade lu fermi o che cualchidun i dîsi “Che al ledi vie”.

A lui i covente un cidinôr profont, di chel che al è dificil di cjatâ, un cidinôr che bisugne cirî cun cure. Se e je masse confusion, se al è un piçul rumôr, se al sint un cisicâ, o ancje un sospîr, lui nol bale plui, no si môf. Parcè dome tal cidinôr al sint la musiche, chê vere.

Ogni tant, par no si sa cuâl motîf, forsit un colp di aiar, al salte fûr une sorte di vueit, no si sint svualâ une moscje, Velu! Il cidinôr! Une magjie... E tal ombre, insomp dal vicul, sul ôr di un tet bas, dongje di un lampion, il balarin cidin di jeve sù e al comence a pindulâsi sui siei pîts.

Cuntune vecje gjachete cu la code e lis scarpis vecje e plenis di polvar lui al bale, maestôs, elastic, elegant, content e rapît a voi sierâts. Al salte di contentece e al svole veloç come se al ves lis alis. Cuissà ce che al pense? Cuissà ce che al viôt?

Un moment e dopo dut al finìs. Un cjan che al baie, un om che al clame, une sirene di lontan.Il balarin cidin si ferme e al scolte. E subit dopo al scjampe vie inte gnot, intant che i rumôrs a tornin come simpri. Si varès voie di cori daûr, di bati lis mans, di dîsi “Bravo!” ma lui al è za scjampât a cirî un cjanton di cidinôr.

E al è une vore dificil cjatâlu. Di dì lui no si fâs viodi, di gnot al scjampe vie paurôs. Nol cjacare mai cun nissun e se tu li incrosis al tire dret, cence badâti. Cualchidun al à provât a compagnâlu cuntun violin, ma lui nol vûl stâ a sintî: intun marilamp al è sparît, e ti à lassât dome il cisâ de code.

Ma e je une robe che il balarin cidin nol rive a fâ di mancul: une gnot dal an, il custode dal teatri i vierç la puarte daûr cence fâsi viodi. Nissun al à di savê cheste robe. Il balarin cidin, cul sô strani vistît cu la code, al bale ancjemò une volte cu la passion di un timp.

E zire... e volte.... là parsore, come i pas di un bal vignût dal cûr. E cumò, cidins, sentaisi e stait ducj platâts e cidins. Cussì usgnot, a lu cjalin insieme.

Il frut plui trist dal mont

Pierut al jere un frut trist
Un vore trist!
Forsit il plui trist di ducj!
Al tacave i baratui inte code dal gjat...
... al coreve cui patins tor pe cjase
E di gnot al sunave la trombe!
Perepeeeee perepeeeee
La mame di Pierut e jere fûr di sè:
- Tu sês il frut plui trist dal mont –
i cridave simpri
- O soi il plui trist di ducj!
Al pensave Pierut dut sodisfat
- O Pierut – e pensave sô mari – ma no ti strachistu mai di jessi tant trist!?
No ve po! Ma ce discors!
Parcè che Pierut al à un segret sierât intal armaron.
Une interie colezion di Pieruts!!!
Un Pierut che al sdrume dut...
Un Pierut balerin...
Un Pierut che al cjape il gjat...
Parfin un che al sune la trombe
Intant che lui al è beât a durmî.
Perepeeeee perepeeeee
Tu viodarâs che prin o dopo al rive l’Orcul e ti mangje!!!
Ma pos crodi se Pierut al à pôre dal l’Orcul!
Ma l’Orcul, a fuarce di clamâlu, al jere rivât.
E la mame si jere spauride une vore a viodilu
Ma l’Orcul nol ven mai dibant e une volte che tu lu clamis non torne vie a panze vueide.
Al va sù in cjamare e si mangje un daûr chel altri
... Il Pierut che al sdrume dut...
Il Pierut balerin, il Pierut che al cjape il gjat
E anche il Pierut che al sune la trombe!
E par finî si mangje il Pierut intune sole bocjade!
E cussì dopo vê mangjât ducj i Pieruts, al va vie content
- Poben, - si console sô mari. No impuarte, tant al jere un frut cussì trist...

"Alc altri" - Une conte par fruts

 

 Suntune coline batude dal aiar, Di bessôl, cence nissun che al podi jessi so amì, al viveve Alc Altri.
Al saveve di jessi ce che al jere, parcè che jal disevin ducj.
Se al provave a stâ cun lôr, o a lâ a spas cun lôr,
o a zuiâ cun lôr, chei i disevin ogni volte:
“Nus displâs, ma tu no tu sês come nô, tu tu sês Alc Altri! No tu sês dai nestris.”
Alc Altri al provave in dutis lis manieris a jessi come chei altris.
Al rideve e al diseve “Mandi” come lôr
Al faseve disegns come lôr.
Al zuiave cun i lôr zûcs cuant che lôr lu lassavin zuiâ,
Al puartave il gustâ intun sacut di cjarte come lôr Nuie! Dut inutil!
Nol jere come lôr e nol fevelave come lôr.
Nol viodeve lis robis come che lis viodevin lôr.
Nol jere bon di zuiâ come lôr.
E il gustâ dentri dal so sacut... bleah!
“No tu sês dai nestris!” i disevin
“Tu sês diferent! Tu sês Alc Altri”
Alc Altri alore al jere lât cjase sô. E intant che si preparave par lâ a durmî i vevin tucât ta la puarte.
Su la puarte e jere... une robe che i veve dite:
“Mandi! O soi propit contentissim di cognossiti. Puedio jentrâ?” “Scuse?” i veve fat Alc Altri.
“Prego” i veve rispuindût chê creature, sluntgjant la çate, o forsit e jerie une pine?
Alc Altri al veve cjalât la çate.
“O ai pôre che tu sedis capitât tal puest sbaliât” i veve dite. Ma la creature e veve menât il cjâf.
“No, Chist puest al è perfet! Cjale!”
E prime che Alc Altri si rindès cont di ce che al steve sucedint, la creature e jere jentrade e...
...si jere sentade su la so cene.
“Ma si cognossino?” i veve domandât Alc Altri
“Cognossinus?” la creature e veve ridût, “Sigûr che si cognossin! Cjalimi ben... sù!”
Alc Altri le veve cjalade par devant, par daûr, par dret, par ledrôs.Non saveve ce dî, e alore nol veve dite nuie.
“Ma no viodistu?” e veve sberlât la creature
“Soi propit compagn di te! Tu tu sês Alc Altri, e ANCJE JO!”. I veve slungjât une altre volte la çate e i veve ridût.
Alc Altri al jere masse scaturît par ridi ancje lui. No i veve dade nancje la çate.
“Come me?” al veve dit, “No tu sês par nuie come me. Anzit, no tu someis a nuie che jo o vedi mai viodût. Mi displâs par te, ma tu no tu sês un Alc Altri come ME”. E Cussì i veve vierzude la puarte e i veve dite “Buinegnot”
La creature e veve sbassade la çate, planc planc.
“Oh...” e veve dit.
A someave ancjemò plui malinconiche e plui picinine.>E in chel, a Alc Altri i veve parût di visâsi alc, ma nol varès savût dî ce. r />E intant che al cirive di visâsi, la creature e jere lade vie. In chel moment Alc Altri si jere impensât. “Spiete! No stâ lâ vie!”
I veve corût daûr plui svelt pussibil, la veve cjapade e i veve strent la çate: “No tu sês come me, MA NO IMPUARTE. Tu podis restâ achì, se ti fâs plasê.” E la creature e jere restade
Di chê volte, Alc Altri al veve Alc come amì. Si ridevin e si disevin “mandi”. A disegnavin.
Ognun al zuiave come chel altri, o insome, al provave. E a gustavin insieme. A jerin diferents, ma levin dacuardi.
E cuant che al jere rivât alc che al jere PARDABON strani, no lu vevin parât vie.
Lu vevin lassât jentrâ e i vevin fat un pocut di puest ancje a lui!

 

L'Unvier de famee Surisins - conte par fruts

L'Unvier inte famee dai Surisins

L’aiar al sofle e e floche la nêf, al è un Unvier une vore frêt

Ce stano fasint i surisins inte grande stanze scjaldade cu la stue?

Doi a stan seant, chei altris, sentâts, a stan preparant un gnûf zûc.

Beniamino al va da la none che e  je in cusine e si tire daûr il so camioncin

“Ise pronte la mirinde?”
“No ancjemò”

“ Ve chi i dolçuts! Cjale cemût che si son sglonfâts”

Beniamino al à cjamât un dolçut su camioncin

e al è lât là di chei che son ancjemò che a lavorin.

Il nono al à pene finît di fâ sù une slite par Tobie e ancje il zûc al è scuasit pront.

"Fruts! Fasin di mirinde”

"Evviva Evviva Evviva a businin i surisins!"

Mmmm, pardabon bogns chescj dolçuts,

ma cjale trops che al cjolt Beniamino!

No erino doi par om”

E cumò e je ore di zuiâ, Dai tire il dado!

Urrà, a vin vint! A businin Carlut e Mariane,

intant la none si je inacuarte che dal barcon al è rivât il soreli!

Cetante nêf... l’aiar al è net e bon!

I surisins a van jù ducj cu lis lôr slitis e Uaaaaaaaaaa

Aiutoooo si sin rabaltâts! Par fortune che la nêf e je fofe!

E la sere al torne a neveâ e alore Buinegnot al pipinot di nêf!

Un ors masse bon - Conte par fruts voltade par furlan

Bruno, l’ors dal Polo Nort, si svee dilunc la gnot, al scuvierç che il toc di glace,
dulà che al steve durmint, si è stacât e al sta viazant sul mâr.
“Poben, o rivarai pûr di cualchi bande!” si dîs l’ors

La sô isule si slontane simpri di plui, ma Bruno nol à fastidis.
Cumò i baste lâ infûr dal glaç par cjapâ une vore di pes!
“Ah... mi coventave propite di stâ un pôc cuiet!” al pense Bruno content

Dut tun colp al viôt rivâ une grande butilie. “Forsit al è un messaç par me” al pense.
Al cjape sù la butilie, i gjave il tapon, la scjasse. E al salte fûr un imprest che nol à mai viodût.
“A ce coventaraial chê robe chi?”

Il tramai al sune, un boton al lampe e Bruno lo sclizze.
“Dispo! Cemût isal il timp alì?” e domande une vôs.
“Biel” al rispuint l’ors, maraveât. “No stâ moviti alore, o rivin cumò!

E pôc dopo tre trichecos a montin sù parsore la isule di glace
“Tu sês bon pardabon a tignînus achì”, i disin al ors intant che si distirin.

Il telefonin al sune une altre volte

« Isal tant pes li dulà che tu sês tu?” i domande une altre vôs.
« Ben... si...” al rispuint Bruno. “Bon, alore no stâ moviti, o rivin cumò!”

E ti rivin dongje cuatri eschimês cul kayak
E a montin sù sul glaç di Bruno
“Tu sês bon pardabon a tignînus chi parsore » i disin ancje lôr e si sentin a pescjâ.

Il telefonin al sune ancjemò!

“cucù cucù! O rivin cumò!”, a disin tantis vosutis
e subit daûr une colonie di fochis si rimpine sul glaç.

“O jerin besolis besolis... tu sês bon pardabon a tignînus achì!”

Il telefonin al sune ancjemò une volte ! Atenzion! Atenzion!

E di bot une BALENE si bute parsore de isule di glaç.
 “Ops, scusait! Stavi vogant masse svelte!”

Bruno nol rive plui a movisi, il glaç al comence a disfâsi, e dopo, dute chê confusion!
Alore Bruno, l’ors timit, si rabie: “VONDE, soi stuf di jessi bon!”

Ducj a tasin!
Al è un cidinôr, nancje che a fossin al Polo Nort!

“Va ben, va ben, tu âs dite ce che tu pensis”, i disin i eschimês e lis bestiis,

“però... tu sês stât bon pardabon a tigninus achì.”
Bruno nol sa plui cefâ: al varès voie di businâ, di vaî,
ma ve che il telefonin al sune di gnûf! Ma nol è il so!

“cemût, la nêf? Dulà ? » Vie! A disin i trichecos
“cemût, un banc di pes? Dulà?” Vie i eschimês
“Ma si, ma si mama, rivi cumò” e vie la balene
“A ben, sicome son lâts vie ducj, o nin vie ancje nô,” a disin lis fochis

Bruno si cjate di bessôl, cun chel imprest poiât su la glace
Lu ficje di gnûf dentri inte butilie, al torne a meti il tapon e vie, la tire lontan

Il toc di glacé cumò si è un pôc disfat. Al pense, ma al è vonde grant par me.

Di lontan al sint che il telefonin al va indenant a sunâ. Bip bip bip...

voltât cun libertât di 

Un orso troppo gentile

Une bande di purcits - conte par fruts

E je ore di mirinde, Il papà al lei il gjornâl.

Rocco al cjape sù il yogurt e al met i pîts sul sgabel“

Sêstu pront! Cjapilu!”

“Vonde” e busine Carlotta! “Al è il me yogurt!”

Masse tart, il yogurt al è za che al svole e pof! 

I pari al alce i voi dal gjornâl

“Ma no Filippo! Nol è pussibil”

“Ma no è colpe me...” al dîs Filippo“e je colpe di Rocco, che nol à smicje!”

Il par al cjale la taule... un davoi! 

Alore si jeve sù e al busine: “Netait dut! Bande di purcits!” e pene dite cussì...

Trê purcituts a cjalin il pari, che al à i voi spalancâts!

“Ops” al esclame i papà

“sgrunt” i rispuindin i purcits

E vie a scjampin fûr de cusine. 

« Tornait subit achì ! » al clame il parima i purcits no lu scoltin, a corin via in zardin e a talpassin dute la insalate di siore Gjine 

“Ah, la mê insalate frescje! Cjale ce pestefruç!”

Si lamente la siore Gjine“Dopo, dopo” i rispuint il pari.

Ma jê lu cjape pal maion, par no fâlu scjampâ.

« Molimi ! Molimi ! brute cjavre bruntulone!”

E dut tun colp...

 “Meeeee, meeeeee” e proteste la siore Gjine

Ma il papà al è za lontan

A cori daûr ai trê purcituts che a corin vier il bosc!

I purcits a son contents, a àn cjatât une biele poce di pantan, e a son li che si rodolin e no si inacuarzin dal lôf che ju cjale. 

Eh... op! ve li che ju fâs prisonîrs!

Fer li!” i busine il papà, che al rive in che moment dut di corse.

Il lôf al à voie di scjampâ, ma il sac al è masse pesant... 

Il papà lu cjape e SDENG!

Sul cjâf cuntun baston!

Eco fat, cumò o podês vignî fûr.

Ma dentri dal sac no si môf nuie...  

“Rocco, Filippo, Carlotta..., o puâr i miei fruts, rispuindeimi, par plasê...” al dîs il pari, dut preocupât.

E pene che al dîs cussì, ve che i fruts a saltin fûr dal sac.

“Ma cjale” al dîs Filippo.  

“meeee” la cjavre i jere lade daûr.

“Oh, la puare siore Gjine, o puarete” e subite...

La cjavre e torne la siore Gjine, ma rabioseeee

“La mê salate no si dreçarà di bessole!” i cride.

“Ma no, su, sistemarin dut. Rocc e Filippo a son dai brâfs zardinîrs. 

“No invezit nin a netà la cusine, prin che a rivi la mama” i dîs Carlotta a so pari.

E cuant che la mame e torne cjase a spalanche i voi: la cusine no je mai stade cussì nete!

 Alore il papà i spieghe: “Cuant che tu jeris vie, mi soi compuartât mâl, propit come un mus e...”

“Noooo!” a busin ducj i fruts.

Ma al è masse tart!

“No stâ vê pôre mama, podìn fâlu tornâ come prin cuant che o vin voie.” A disin i fruts

ma la femine e dîs

“Ma no... al è cussì biel, cun chês orelis grandis! Tigninlu un pôc cussì!” 

Il purcit tal stagn - conte par fruts

Ve chi, us lassi la storie sul purcit che o let ai fruts chê altre setemane e che mi pâr che ur sedi plasude.

Al è clâr, cence lis imagjinis no sarà masse clare e i vorès cjolt il libri, par podê leile.

Ma insome, se us capite di passâ intune biblioteche, forsit lu àn.

Ducj i riferiments ju cjatais achì, li dal mostri sul comodin. :)

Mandi!

A çampe al è Nello, a drete il so purcit

Cumò Nello al va in citât

In purcit invezit a nol è lât

Al une vore, ma une vore, di cjalt

E al cjale il frescjissim stagn

Quack, a fasin lis ocjis

Honk, a fasin lis razis

Beadis dentri dal stagn

Che a fasin un biel bagn

Il purcit dut di bessôl

Al sude al sude e al sude

Honk a fasin lis ocjis, Quack a fasin lis razis

Il purcit al varès voie di lâ

Ma a nol è bon di nadâ!

E alore il purcit al sude,

e al sofle sot dal soreli

e li razis Quack, quack

e lis ocjis Honk Honk

e il purcit Oink oink però lui nol sa nadâ!

Il purcit a si distire,

al sude al sude e si dispere

Quack quack quack

Honk honk honk

Oink oink oink

SPLASH!

SPLASH e SPLASH e SPLASH

SPLASH e SPLASH e SPLASH

Il purcit al svuacare e al sclipigne

E lis razis? E lis ocjis?

Quack quack quack quack quack

Honk honk honk honk honk

Al è dut un businâ

Il purcit al sa nadâ!

Il purcit al è tal stagn!

Il purcit al è tal stagn!

Il purcit al è tal stagn!

La gnove e cor di corse: lu savêso, là di Nello, il purcit al è tal stagn!

E ducj a corin fin tal stagn

Par viodi il purcit e…

Al è tornât Nello!

Nello al cjale il so purcit

Oink i fâs chel

E Nello si gjave il cjapiel!

Nello al cjale il so maiâl

Oink oink e Nello al gjave il stivâl!

Nello al cjale il so purciel

Oink oink oink al fâs chel

La cjamese al gjave Nello

E dopo al cjale il so purcit

E si gjave lis mudantis e

SPLASH

Un biel tuf dentri dal stagn

E alore…

SPLAAAAAAASH!

Ducj dentri a bagn tal stagn!

E cumò a drete al è Nello,

a man çampe il so purciel.