"Cuatri stagjons dal an" di Gianfranco Pellegrini

Lu spietavi, chest libri di contis di Gianfranco Pellegrini.

Lu spietâvi di cuant che mi veve dit, slungjantmi la conte che mi veve mandade l'an passât par la Vilie dai Sants, su Contecurte, che chê conte e sarès forsit lade a finîle intun librut.

Ben po, chest al è chel librut, e se disarès che, par chei che ancjemò no le àn lete, la conte de Ostarie e je une buine cerce par savê ce che a podês cjatâ chi dentri.

Ma a nin indevant par ordin.

Come che o vês za let dal titul, o vin di front lis cuatri stagjons, frontadis dal autôr in altretantis contis, e intal mieç, come une cjamare di decompression, dôs contis curtis, sedi une che chê altre publicadis su la Ostarie e peadis a dôs ocasions come il 31 di Otubar e il Nadâl. Ancje chê altre conte curte, il Drâc, la podês lei su la ostarie, e ancje in chest câs e je une buine cerce. Però atenzion. No steit fâsi bigulâ.

La scriture di Pellegrini e je aromai dificile di peâ intune conte curte, e je une scriture che e à bisugne di un pôc plui di spazi, che e à dôs direzions di cjapâ e che se a no lis cjape, a rint di mancul.

La prime direzion e je chê de emotivitât dai personaçs.

I vielis, i fruts, lis feminis, lis canais... ducj chei che a vegnin metûts dentri achì a son personaçs rotonts, pinelâts cun misure e cun colôrs vîfs, che ti pâr di cognossiu, di vêju za cjatâts, ator pe tô vite. E par dâi emozions, Pellegrini al à bisugne di cualchi rie e di peâsi ae tradizion, a lis lidrîs furlanis, sedi doprantlis come fonde dal personaç, sedi par contrast.

La seconde direzion e rivuarde la ambientazion e, ancje chi, i colôrs. 

Lis sieltis lessicâls a son fatis cuntune vore di cure, che si viôt inte pulizie dal furlan dal autôr che al je net, scorevul, e pûr insiorât di tiermins che tu riscjis di no cognossi, magari parcè che aromai cuasi nissun ju dopre plui. Us fâs un esempli, par ce che al è facil fâus capî parcè che al vâl la pene di lei chest libri, mostrantus ce che o intint.

Us gjavi, par esempli, chest tocut de conte "Il pichepôl", dulà che intune lungje analessi si conte la aventure di Vigji e Pieri, daûr a robâ ue di taule, come che i fruts di une volte a jerin usâts a fâ:

Finide la balfurie, par cuietâ l'amì, Pieri al tirà fûr il rap che al veve metût inte cjamese. Picotant un asin par om, a vevin cjapade une stroncje che ju puartave bande cjase. Inte boschete, une moretule e veve tornât a tacâ il so tarlec, e un pichepôl, regolâr, al curave mo ca mo là, adalt, lis scussis caruladis dai lens plui vieris.

Ce disêso? Biel, nomo? Sigûr... 'nd è tiermins che ancje jo, sintintju, mi soi inacuart di capî il sens, ma di no cognossiju ben, ma propit chest mi à stiçât sedi il plasê de leture, sedi il plasê di lâ a recuperâ la peraule, di salvâle e di fâle mê, par magari, cuissâ, plui indevant, podê dominâle e doprâle.

Se magari o vês vût i miei stes dubis, us sparagni di lâ sul DOF e us dîs che "balfuerie" al sta par casin, davoi; che la moretule al sarès il beccafico, e il pichepôl, insome, si capìs che no magari lu clamin dome pic.

In ogni câs, o pensi che o vedis capît di ce bande che al çuete il furlan di Pellegrini: da la bande juste!

Par il rest, o pues dîus che la prime conte, "La volp", chê de Vierte, e cjape la volte di un nono che al ven puartât a cjase dal nevôt e intant che al viôt il scûr de strade si vise di cuant che, insieme a so pari, al veve brusade... une strie!

Inte seconde, "La britule", e je la aventure misteriose che, in plene Istât, a vivin doi fantacins, che forsit, cuissâ, a cognossin nuie di mancul che lis aganis dal Natison.

Inte tierce conte, "Il pichepôl", chê che mi plâs di plui, Pieri al cjale il so vignâl e il sun de nature lu puarte indâur tai agns. E inte ultime, che d'Unvier, "La Nape", une canae, intal frêt di altris timps, e cjate une robe preziose come... un çoc par fâ fûc... e se volês savê alc di cheste conte, baste che o frachedis achì.

Bon. Mi pâr vonde.

O podarês finî spacantus i tabars e spiegant come che la cuarde che e pee insieme dutis chestis contis e je la idee di "de-fantastic sociâl", ven a stâi un fantastic che ae fin al è dome une mascare par descrivi i mudaments sociâi e lis lôr debolecis. Ma mi pâr di vê scrit ancje masse. 

Al sarès une vore miôr se o leiessis il libri, dîs euro, edizions kappa vu e po dopo... gjoldi!

"La nape" di Gianfranco Pellegrini

Si rindêso cont che o ten chest librut sul soiâr dongje dal ordenadôr di passe sîs mês?

"La nape" lu ai let a Setembar, la domenie dopo che Gianfranco Pellegrini, l'autôr, mal à regalât. Mi visi che in chê volte mi jere plasût, ma cumò che la storie e jere restade lontane a mal soi tornât a lei, ca e là, e mi è tornât subit in inment dut. 

Lu ten achì par che no cjatâvi mai la ispirazion par butâ jù dôs peraulis su chest puar blog, ma no vevi nancje voie di metilu in bande.

In fin dai conts, o pensi, ancje un piçul post al covente.

Par dî une, se cumò o meteis su google il titul par cirî imagjinis a cjatais la cuviertine. Prime no.

Duncje, ce libri isal e di ce al cjacarie?

Al è un libri par fruts, al nas dal premi Vilagnovele dal Judri 2007 e e je la publicazion di une conte premiade in chê edizion. Sore la conte, come che a podês viodi de imagjine, a son i dissens di Marisa Moretti e une jentrade e une poesie finâl di Bepi Mariuz. 

La conte no je lungje e lu si lei in mancul di une ore, ancje se un frut, di sigure, i met un momenti di plui.

Ce contie la conte?

Une aventure tirade dongje cuntune analessi che e cjape dute la part centrâl dal libri. 

Incipit e sierade a son invezit cjapadis al presint, ancje se rivuardin simpri Gjovanin, aromai vieli, che denant da la nape, apont, si vise de sô zoventût e di cuant che al jere rivât a tirâ dongje une gruesse cjoce, dal bosc plen di nêf, che daspò al à scugnût lassâ al paron e al so fatôr. 

Nuie di cè, vere?

Invezit no. 

No parcè che la conte e je soredut simboliche e i vûl cirût la seconde leture e i significâts che l'autôr al à volût dâ a dute la storie. O vin un presint fat di nevôts che a zuin cu la play station, di cjasis comandadis di monitors al plasma, di modernitâts che aromai a àn sdrumât lis tradizions. E reste la nape, o almancul il fîl che Gjovanin al pee a cheste par tornâ piçul e tornâ, cu la memorie, tal bosc, in timps dulâ che una cjoce, puartade cjase, e podeve fâ la diference. Dopo la conte si torne a sierâ tal presint, cul cercli de vite che al è toront e al puarte e domandâsi se lis direzions che a cjapìn a sedin chês justis.

Insome, al va let cun atenzion, se no si è plui fruts, chest librut.

Al è un at che al ponte il dêt sul avent de tecnologje, ma no un dêt acusatori. 

La indicazion che l'autôr al à voie di dânus e je di une altre fate. 

Nus vûl insegnâ di no butâ vie nuie, di filtrâ ce che al rive cun ce che di miôr si à. 

Nuie di gnûf, forsit, ma intune epoche dulâ che la educazion a la modernitât e ven ignorade (pensait dome a trop che e mancje ai nestris fruts une educazion morâl informatiche o la netiquette) contis di cheste fate a coventin!

"La Comugne n. 17" di AA VV

Nol è propit un libri, La Comugne edite de Kappa vu, ma pôc i mancje, jessint une riviste leterarie che e mostre une personalitât une vore dongje a chê di un libri.

O confessi che, a part il numar prin di chel chi e un altri milante agns indaûr, non ai mai vût ben presint cheste riviste. Cumò che o scrîf par furlan e che, soredut, o lei une vore di plui in marilenghe, o soi rivât adore a cognossile miôr e a vê presint il lavôr che al stâ daûr.

Cussì o mi cjapi il timp che al covente e, man man che ju lei, us disarai alc dai ultin trê numar jessûts, 17, 18 e 19.

Comencìn cun chest numar 17.

Alore. Us dîs subit che mi è plasût une vore ancje dal pont di viste estetic. Lis imagjinis, di fat, a son cjoltis dal archivi de associazion "Trois" di Rivignan e a rapresentin vecjis fotografiis che son stadis cjapadis sù tor pes cjasis e digjitalizadis. Dentri 'nd è di maraveosis e crodeimi che za chês a valin mieze riviste. Dopo, tant par fâus capî, us met une di chês che mi plasin di plui.

De bande de sagjistiche, daspò, si vierç la riviste cuntun bielissim articul su lis traduzions, di Stefano Montello, che al rispuint a une domande che no crôt di jessi l'unic a jessimi fat: ce sens aial voltâ i scrits intune altre lenghe e, in tal nestri câs, intune lenghe piçule, come il Furlan?

Une rispueste, chi dentri, la cjatais, e a merete jessi lete.

Daspò di chest articul e ven une des robis che mi son plasudis di plui, metude lì propit par fâ capî miôr il discors sul traduzi. Vêso presint Borges? No, no il tenist, chel al è Borg. O stoi cjacarant dal grant scritôr argjentin. Ben, vêso presint la sô conte "I teologi" publicade in te racuele "L'Aleph". Ben po, Alessandra Kersevan e à vût il coraç di voltâle par furlan e e je vignude fûr une conte che e à la stesse carateristiche di che che o vevi let par talian: no tu capissis nuie, ma ti plâs di murì!

Provâ par crodi.

Daspò di chest e ven la narative furlane. Une conte autobiografiche di Stefano Gasti che nus conte, cun realism e ironie, di cuant che al stave par voltâ i scarpets, cualchi timp indaûr.

Dopo e ven la mê conte che cjacare di doi araps che a cirin di imparâ il furlan.

Il vêr toc di narative però al è chel che al ven dopo. Gianfranco Pellegrini al misture dôs ambientazions, une cuasit fantasy/preistoriche, che e viôt l'om ancjemò vistût di piels di lôf, e une fantasientifiche , che lu viôt invezit in grât di cambiâ cuarp cence cambiâ cjâf. Un bielissin lavôr. Cence dubit chel che ti reste di plui e chel che al à plui cualitât leterarie, dentri di chest numar.

A sierin la rivist doi tocs di Laurin Zuan Nardin che a pontin viers un public plui bas di etât, platant alegoriis e zûcs di peraulis daûr di dôs storiis une vore zuarinis.

Benon.
No sai dîs di chei altris doi numars, che o ai ancjemò di leiiu (cemût si scrivial "leiiu" a proposit?)
Ma chest al è une vore bon. Vait a cirîlu.
E cumò ve chi la imagjine:

"Scûr di lune" di Checo Tam

Duncje.

Viodin se o rivi adore a meti man in maniere serie a chest blog.

E maniere serie, par me, al vûl dî cjacarâ di libris. In chest câs, un libri par furlan.

Tant par començâ, za inte dî de jessude, la Istât passade, chest libri mi veve un pôc stiçât.

Vûstu pal fat che o ai un debul par chest formât di libruts de kappa vu, vûstu parcè che lei par furlan e je ancjemò une ativitât che mi cjape plui timp che par talian e par chest mi plasin lis contis, o vevi voie di cjolilu.

Daspò al è capitât che il Checo lu ai cognossût e mi à fat di letôr intal vagon, e alore, no podevi plui fâ di mancul di cjoilu e lu ai ancje let subit.

Son contis, us ai dit.

E ancje disint cussì al devente istès un pôc dificil rivâ a metilis in rie, dividilis o messedâlis, chestis contis. 

Eterogjeneitât, e je la prime peraule che mi ven tal cjâf, se ho pensi a "Scûr di lune".

E in chest câs al è sedi il plui grant vant e ancje il prin difiet de antologjie.

Ma a nin par ordin.

Lis contis a van di pocjis riis e cualchidune di 4-5 pagjinis e framieç di chestis misuris a podês cjatâ di dut. Di dut ce vuelial dî? Al vûl dî propit di dut.

Flabis, contis fantastichis, siums, ricuarts, alegoriis, poesiis in prose... Insome, o veis bielzâ intindût che dificilmentri un letôr i plasaràn dutis. Al fâs part de nature stesse di chest libri, chê di contentâ une part dai letôrs. Cun di plui, si percepìs ancje une diference di scriture e di regjistri jenfri cualchi conte, il che nol è un mâl, ma al puès fermâ la leture, jessint il ritmo diferent dai tocs.

A part chest al è di dî che un dai aspiets plui preseabii al è chel di vê metût in ogni conte une idee, un parcè, une clâf di leture che pues jessi cjolte o mancul, ma che e je simpri, ancje ta lis contis plui curtis.

Parcè che mi rivuarde chês che mi son plasudis di plui a son stadi chês di ambit fantastic (come il disco volant a Selvuzzis, tant par dî une) e chês dulà che il Checo, platât intun ricuart dai sie, al rive a movi un sintiment dal letôr. Disìn che al à un so stîl tal butâ jù une pagjine di diari, che al rive a messedâ ironie e vision romantiche, contant robis semplicis cence savê di za sintût o di fals.

Cualchi fature in plui le ai vude tai lei i siums, che a mi parevìn une robute fûr puest, ma no si pues vê dut, e in tal complès chest al è un libri che al lasse un bon savôr e si lei cun facilitât e sveltece.

Donald dal Tiliment di Stiefin Morat

Ve chi, che o soi rivât ancje jo, che o rivi simpri tart.
Di chest libri si è cjacarât tant, e mi pâr di vê capît ancje masse, un pâr di agns fa. O ai let un pôc tor pai blogs di articui critics e di articui che invezit lu esaltin.

Fat a stâ che dopo cualchi rie mi soi stufât di scuasit dutis lis cuistions e lis argomentazions, parcè dispès si lave a cirî motivazions che cul libri no centravin nuie.

Cussì o ai decidût che us dîs la mê e mi sbat i cits di chê di chei altris :)

Alore.
Donald dal Tiliment al è un romanç stran, trasversâl, sedi tal lengaç doprât, sedi inte misture di elements fantastics, dai fumuts e de leteradure plui classiche. Al è un piçul melting pot leterari, se cussì o volìn dî, che però al è fat cuntun ciert criteri, in maniere che a la fin dai zûcs ti resti une storie, dai personaçs e un sens di completece che, par solit, dome i romançs ben fats a lassin.

Us dîs subit che a mi mi è plasût. A part cualchi piçule falope di batidure al è pôc altri che no cjati ben rivât. Forsit la gjestion de trame e tache a cori un tic masse indenant, e chest al pues penalizâ il letôr parcè che il lengaç doprât al è une "lenghe cjacarade" lontane sedi dal furlan standard, sedi dal sens des peraulis e des regulis gramaticâls e sintatichis, si che la trame e jude un grun a tirâ sburtâ il voli.
Al va dit, e chest al è un fat, che nol è facil di lei, par un che al lei pôc furlan. Anzit, al è dificilut, almancul intal imprin, ancje par un che al è usât a leilu, il furlan.
Morat chi al à fat une sielte ben clare. Al à metût la plui part dal romanç in prime persone e chest al justifiche il fat che Pidins, il personaç naradôr, al podi cjacarâ e contâ lis aventuris sôs e dal so amì Saco, intal lengaç che al dopre simpri. E cui isal Pidins? E cui Saco?
Son doi zovenots. Un bravonon a zuiâ a balon e un simpri fumât (di budiesis, of course). Un che però al masse pôc trist par deventâ un balonaro e chel altri che al à cjâf ma al preferìs no pensâ, butâ dut a rodolons e vivi a la zornade. E dopo al è Donald (Duck) che al zire di ca e di lâ par lis pagjinis dal libri e al je propit lui, chel di Disney, chel di Barbe Paperon e di Qui, Quo e Qua.
E intal mieç si cjate un Friûl che al è deventât sedi fantastic, sedi fumut. Trens pierdûts intal mieç de nature e che nissun al sa nuie di lôr, bandis di int fûr cu la cassele che a sunin jazz. Mafiôs, putanis (no chês forsit no son, ma i stavin ben), magagnis, neris, hacker, bogns, triscj, pachis, intrîcs, sgnape, cjochis, e un grun, ma un grun di "sango y zarde"

Insome, si sin capîts, un davoi che metât al baste.
Metêt in cont ancje che Morat al tire fûr inglês e spagnûl e sclâf e todesc e lu misture cun citazions sparniçadis ca e là di ogni gjenar e us ven fûr chest librut (140 pagjinis), sostignût e pandût di Cormôr Salvadi e a cure di Pauli Kantarut che o ringrazi une vore par vêmal regalât.
Zontait ancje che secont mê la idee di vê metût dentri i fumuts di Christian Inzerillo, che ti puartin subit inte nature "fantastiche" de narazion, e je une idee une vore induvinade.

Oh che al sedi ben clâr. Donald al pues ancje no plasê. Al reste difat un viaç intun teritori che al va oltre la "buine lenghe scrite" e crodeimi, chest al un fat impuartant une vore, par la lenghe furlane, parcè che dome ce che al je ricognossût intune sô forme classiche al pues jessi superât di une forme inovative. Us al à dîs cuntune metafore: Picasso, prime di tacâ a piturâ cuadris fats di cubets e liniutis, al savevê fâ pituris tratis de realtât praticamentri perfetis; ven a stâi che prin lui al à imparât la regule, e daspò le à superade.
Donald dal Tiliment al romp lis regulis de coretece de lenghe, ma no lis ignore. Cheste e je la robe che mi è plasude di plui. Come a dî: fur cu la cassele sì, ma cun criteri.

E cumò, caz, sango y zarde!

Niari - two pulp tales - coment

Jeri indizis se comentâ chest libri sul blog par furlan o su chel par talian. Tal dubit cirarai di cjacarâ di lui sie di ca che di là. :)
Us ài za dite alc su chest libri un par di post indaûr, cumò lu ài let e pos comfermâus che il libri le bon e al è un plasè leilu.
Nin par ordin.
La prime da lis dos contis a è scrite in cjargnel, tal dialet di For di Voltri, e ài di dì che nol è propit tant sempliç di lei, soredut tal imprin, cuant che dutis ches "o" che sierin ogni peraule, par un come me, ch'al cjacare furlan de base, a son duris di digjerî. Il biel al è che dopo un dîs o vincj pagjinis tu tachis a la indenant spedît e, a la fin da la conte, pôc i mancje ch'a tu cjapis l'acent cjargnel ancje tu.
Cheste da lis dos, vutu pal pathos ch'a si rive adore a fâ su, vutu pa la scriture une vore sclete e pa l'idee di font une vore ninine, a è cence dubis che ch'a ti lasse di plui. Ti samee scuasit di viodilu, Valstorta, il paîs che Fulvio al à inventât tra Rigulât e Gjiviane, su che strade che chei ch'a la cognossin a san ben ce mût ch'a è. E il biel da la conte al è propit chel che tal mieç dai cadavars e dal "thrilling" Fulvio j à metût ancje la so critiche sociâl e i valôr furlans.
La seconde conte, che par talian, a je ben scrite ancje che, ma forsit a piert alc, sia tal fa cjacarà par talian doi personaçs ch'a tu viodis pensâ par furlan, sie tal finâl, un pocut teletonât. Chest però, a nol gjave il biel di viodi une storie cun elements fantastics svulucjâsi tal casel da l'autostrade, pene fûr di Udin. Une conte moderne, ch'a soredut a le fin ti cjape un casin.
Pôc altri ce dì. Sa us capite cjoleilu!
(I link ju cjatai tal post plui indenant)

Niari - two pulp tales

Jer sere a soi lât là che mi veve conseât di lâ il Dree, a viodi la presentazion dal libri di Fulvio Reddkaa Romanin (za cognossût tor pa la regjon pa lis sôs performans musicâi peadis a l'ambient da l'hip hop furlan).
A dì il vêr soi lât plui parcè che vevi voe di comprâ il libri, che difati al è propit chi denant di me e che pensi learai pene ch'o finis chel di cumò.
La presentazion è stade une robe semplice e cuiete, cence tantis menadis, cun cualchi peraule di Pauli Cantarut da La Comugne, cualchi peraule di Fulvio su ce ch'a la scrit e parcè, e la leture di doi tocs di libri, un par ognune da lis dôs storiis dal libri.
Us disarai subit che il libri a mi pâr un biel lavôr. Sie scoltant i tocs, sie leint un pôc intant che spetavi, si po sigurementri dì che Romanin al à une buine padronance de lenghe e de maniere di contâ. Li storiis, come ch'al dîs il titul, a son "neris", ancje sa no rientrin dal dut tal filon di cheste narative, parcè che mi par di ve capît che Fulvio al à plasè di fa cualchi pontadute tal fantastic e tal grotesc (pensait che ta la prime al à inventât un paisut in Cjargne fra Gjiviane e Rigulât, la che savìn ben che nancje i Rocs a gjoldin!^^). I metarès la man sul fûc (cui guants, eh, s'intint) ch'al lei spes e vulintîr Lansdale e che tal so indaûr al è sigurementri ancje King.
Ad ogni mût, cjacarant dal libri, non si pò no dì che la prime storie a è par furlan, anzit, par cjargnel, di chel arcaic, dut cu le "O" a le fin.
La seconde invezit a è par talian, ma ambientade a Udin.
Zontait ancje ritmo, cadavars, peraulatis e une vore di casin e mi par che i doi lavôrs a devi sedi vignûts fûr une vore ben.
Us savarai a dì cuant che ju âi lets par inter.

Us lassi ancje lis info sul libri
Titolo: Niari - two pulp tales
Autore: Fulvio Reddkaa Romanin
Edizioni: La Comugne Kappa Vu
pagg. 158 - € 10.00
ISBN: 888980828-4

Mîts, flabes, faules e liendes dal Friûl di mieç

Sabide di sere o soi capitât a Codroip, in te sale da la biblioteche, a sintî la presentazion di un libri fresc di stampe, che al fas part di une golaine edite da la Chiandetti editrice, par merit da l’Istitût Achille Tellini di Manzan.
No us a la fâs lungje par un motîf sempliç: jo, di cheste associazion a sai une vore pôc, ma di ce che ai podût viodi su la lôr cjase in rêt e cognossint un ninin dai libris ca àn bielzà scrit, o ai capît che a fasin un lavôr cognossût e stimât di agns e che di sigûr in tancj a san plui di me.
O segnali alore, dome un pâr di considerazions ca mi sameavin di interès e un dôs peraulis di numar su la serade e sul libri.
Une considerazion le à fate il curadôr dal libri prin di tacâ la presentazion. A jere une robe che no vevi pensât prin di cumò. Il Friûl di mieç, val a dì, pais come Cjampfuartmit, Puçui, Pasian e, parcè no, il me stes Comun, àn une proprietât che non podin dineâ: a saran l’ultin puest dulà che la lenghe vignarà tocjade di chei altris. Spiete, par chest motîf, al Friûl di mieç une responsabilitât plui grande di che altris bandis. Cheste a jê une considerazion purementri gjeografiche, cence tirâ dongje cuestions peadis a la koinè.
Seconde considerazion ca mi va di vê iniment a compet il lavôr di intervistis che àn fat chei che àn contribuît a scrivi chest libri. Nol è dome un lavôr fondamentâl e impuartantissim pa l’identitât da la lenghe e da lis tradizions dal Friûl, ma al è ancje une corse cuintri il timp. Ducj chei che son i depositaris da lis contis o son vecjuts, e intant che il libri al lave in stampe o son bielzà che muarts.
A jê une robe ca fâs pensâ, soredut chei che come me a scrivin ambientant li storiis dongje cjase: trop timp in plui vevio di passâ cun me none, prin ca nus lassàs? Miôr no pensâ!

E cumò dôs peraulis sul libri.
Al pâr un biel lavôr. Penç, cuvierte rigjide, biel di viodi e plen di contis, tradusudis ancje par talian.
No lu âi comprât, pal sempliç motîf che al costave 25neuros e tal tacuin o vevi dome vincj, ma al di lâ di chest mi pareve un biel libri, plen di contis di striis, di orcui, di aganis, di benandants e vie discorint. Insome, nol è dite ca no lu compri plui indenant.
A lei a jerin chei dal grop de fondazion Tellini e a compagnâju cun vôs e ghitare, une vecje cognossince dal rock furlan, l’ex blackguards Giulio Gallo, di cui o devi ve inmò un cd tor pe cjase.

Ad ogni mût, par concludi, biel progjet e di grande impuartance, ancje se li contis, ben o mal, li cognossevi za, ma si sa, lis peraulis a vôs a svualin, chês scritis no.