Il cartel pa l'Udinese cu la Fiorentine

Lu sai, lu sai... o spetais il cartel par doman!
Doman a vierç la pescje, martars al è il prin di avrîl...
e jo ai fat un cartel a tema.
Mandi!

La fumate clare dai ricuarts

Timp fa me mari mi à dât di tirâ ju cul compiuter, come ch'a dîs je, la fotografie ch'a viodês chi in bande. Sot me nono e me none, partint di çampe, podês viodi doi mei barbis e me agne. l'ultime da la rie, che cu la pipine in braç, a je propit me mari.
Lassant stâ i ricuarts che une foto di cheste fate a po vê, par me, ch'a soi nevôt, soredut cumò che i nonos no son plui, a stavi cjalant tropis robis che si rivin adore a viodi dentri une imagjine cussì.
Me none a è discolce, par ce che si sa che ta che volte nol pareve bon un om plui bas di une femine. Me mari cui lagrimons tai voi, par ce che a vuleve a ducj i coscj tignî su la pipine, ch'a no jere so, ma a jere lì dal fotografo. Me barbe, che a sintî me mari, ta che volte nol jere dome il plui picinin dai fradis, ma ancje il plui biel. Sa fossin cumò, cun che muse ch'a somee ch'a i vedin scliçât voi, nâs e bocje tal mieç, a saressin pronts a dî ch'al è un pôc malfat.
Me nono, a cjalâlu ben, si rive a viodi ch'a i mancje un toc di orele, ch'a jal'à taiade so none, intant ch'a i taiave i cjavei di piçul (cu la scudiele, of course)
Par no cjacarâ dai vistîts, bogns par une gnoce, e da la maniere che ducj, puarets, a cjalavin ta l'obietîf. Si sa, ta che volte fâ une foto al devi sedi stât come la in vuere: satu tu ce che ti podeve capitâ?!
Ad ogni mût, ancje se cumò, ancje jo ch'a no ai mai vût passion pa lis fotos, an fâ a centenârs, no rivi a cjatà nissune ch'a rivi adore a contâ tantis robis come ches ch'a contavin li imagjinis di une volte.
E no stêit dimi ch'a è dome cuestion di ricuarts. Jo pensi ch'a sedi ancje une cuestion di imagjinis ch'a àn alc ce dî. Une volte, lis musis e i cuarps e jerin ce ch'al restave da la fan e da la fature, a jere une dignitât e un plasè di vivi che cumò neancje tal sium a rivin adore a cjatâju. Chel ridi pene pandût, sui lavris di me none, al è il stes ch'a i ai vedût intor simpri, fin che a vût flât, cualsiasi disgracie o fastidi ch'a i fos capitât.
A je propit vere. No son dome lis peraulis, ch'a insegnin.

Il cartel pa l'Udinese cul Livorno

Ca sa no mi môf a scrivi cualchi artucûl serio al devente il blog dai cartêi pa l'Udinese. Ad ogni mût no pues fâ di mancul di puestâ il cartel pa la partide di vuè.
Profiti par fâ i augurios di buine Pasche a ducj!
E visaisi che l'eeeeeeef si mangje a Pisssssssssssche! :D :D :D

Il cartel pa l'Udinese cu la Lazio

Eco chi il cartel par usgnot!
Non si capis ben ce che si ul dî, ma miôr cussì. Un po' di misteri al va simpri ben.
A dî il vêr a varés vulût scrivi alc cun "Fel-Lazio" ma non podevi sigûr mandâ ator me pari a cjapâ pachis dai tifôs blanc e celests.
Mandi!

Il cartel pa l'Udinese cu l'Atalante

Vuè propit non savevi ce scrivi, tal cartel, ma dopo ài vût un colp di volp e si che capitan D'Agostino al à clamât adun i tifôs o ài pensât di rispuindi!
E chest cartel mi plâs un casin!
Mandi a ducj!

Baraçs

Di cuant ch’al veve cjolt la radio gnove Fredo si sveave simpri content. Al veve scuviert une funzion da la svee maraveose: al podeve meti su un cd e fale sunâ di ce toc ch’al veve miôr.
I plaseve cussì tant sveâsi scoltant “Mueç” dai Pantan, ch’al pontave la svee ancje di sabide e domenie. Di cuant ch’al jere lât a stâ pôc fûr pais, al podeve ancje alçâ il volum a manete, che tant la cjase plui dongje a lu cjalave di cincuante metris dal barcon da la so cjamare.
E propit chel barcon, une matine di fieste, sveantsi cu la cjançon di simpri, lu à cjatât dut plen di baraçs. Une robe di no crodi. Il veri l’ere sparît e un mûr di sterps a j gjavave vie dute la lûs. Si stavie forsit ancjemò sumiant? Vere ch’al veve bevût une bire di masse, la sere prin, ma chest nol displeave che cise spinose ch’a jentrave pal barcon!
Fredo si è russât i voi, gjavantsi i sgarbei cu l’ongule. Al à cjapât su il telefonin e al à cjalât l’ore. Undis e mieze. Putanace che miserie, al à dit ad alte vôs, nol pò sedi cussì scûr!
Al jere alc ch’a nol lave.
Al cjape e si bute fûr dal clip par lâ a viodi di dongje chei baraçs. Cualchidun al jere grues come une magne, cualchidun come une code di pantiane, ma a part lis spinis, spiçotis e di un colôr ch’al partave al ros, a jerin baraçs normalissims. Ma ce fasevino lì, a jemplai il zardin e la cjamare?!
Fredo di solit no si faseve tropis cuestions, ma a chel pont j è vignût un dubi: si viest di corse e al va a viergi la puarte denant, che ch’a dave su la strade.
Dut come simpri: asfalt, soreli ch’al poche, machinis ch’a passin e sioris ch’a van a Messe plui tart, par rivâ adore a sghindâ un pocje di predicje.
Bon, al à pensât, di sigûr no la doi vinte a chei baraçs. E cu l’intenzion di vierzisi un passaç fin ta la cjase dongje al à cjapât su lis fuarpis di vît e al à tacât a taiâ e cerpî dute che sassare di spinis, fin a rivâ adore a saltâ fûr di cjase pal barcon. Cussì al à tacât a mateâ, sbridinant e sbregant, fintremai ca nol jere stuf. Al veve fat su une sorte di galarie lungje un centenâr di metris cence rivâ a cjatâ la cjase di front. Ce mût podevie sedi?
Bon, miôr lassâ pierdi e lâ a cirì cualchidun ch’a i dedi une man!
Cussì al è tornât indaûr, distrigantsi gnûfs baraçs che za a tornavin a cressi.
Al à poiât lis fuarpis di vît ta la cassele da j imprescj, al à studât la radio e al à cjolt su il gjubot.
Cuant che al à viert la puarte, ch’a dave su la strade, al à scugnût fermâsi.
Si è cjatât denant un altri mûr di baraçs.


BARAÇS: VERSION PAR TALIAN

Triangui

– Dispò Flavio… – j veve domandât Checo, intant ch’al pedalave – ce isal… un Biotòpo?
– Il nemì di un Biogatto ve! – j veve rispundût chel altri, ridint come un mat.
– Coion! – al veve tirât su il nâs Checo, permalôs tant che un cai – Dai, fermìnsi a viodi!
E cussì disint al veve voltât la bici e al jere tornât indaûr, cjapant la strade di cjamp li ch’a jere l’indicazion.
Flavio nol veve podût fa altri che spiegâi ce ch’al ere chel puest pene fûr Flambri, là che tal mieç da la tiere mole di palût a vevin fat su un cjaminament di breis rialçât. Il puest, a di il vêr, al jere une vore bielin, cuiet e pôc salvadi.
– Bon, cumò però a nin indenant, che vin di lâ ju fin a Teôr e tornâ su par Palaçûl.
Checo nol rispundeve. Al jere restât imbambinît a cjalâ trê arbui, metûts a triangul, come sa fossin cuissà ce maraveôs. Invezit di montâ su la bici, Checo al veve scugnût lâ a viodi chei trê pôi fin dongje, cjareçantju cu la man come sa fossin gjatuts.
A le fin, a jerin rivâts cjase a scûr, cu lis machinis gnervosis dal sabide di sere ch’a j pivetavin.


Ta la sere stesse, tor miezegnot, Checo al veve cjolt la machine e l’ere tornât ta chel puest. Si sintivin crots cjantâ di scjafoiâ lis orelis. Cence savè ben parcè che lu faseve, si ere cugulât tal mieç di chel triangul, cul cûl ch’al cjapave su dute l’umiditât. Nancje il timp di disgropâ il flât che subit al veve sintût chês vôs.
– Ven cun noooo… Ven cun nooo… – a cjantavin framieç il cracra dai crots E in chel, dal scûr, issio fasi viodi une zovine. Sameave vignude fûr dal len di un di chei trê arbui. Crote, ma cui cjavei cussì luncs di platâ lis tetis e la nature, e soredut, biele di fa pôre. Checo no l’ere sigûr, ma j pareve che ridés, intant ch’a si faseve dongje.
– Mandi, biel fantat! – al veve sintût un’altre vôs daûr di lui. E zirantsi robis ch’a no j vegni un colp a viodi altris dôs fantatis, compagnis di che ch’al veve denant, o forsit ancjemò plui bielis.
Di chel moment in poi Checo no si visave scuasit nuie. Al saveve dome di sedi stât doprât come un imprest, pi che come omp: dopo velu scrotât, chês trê lu vevin supât e messedât come sal fos une caramele.
Lu veve sveât un cjaçadôr, la matine dopo, berghelant come un mat.
– Sporcacjon! Sporcacjon! – j diseve corintji daûr cu la sclope.
Al veve scugnût platâsi in t’un fossâl, a fasi becâ dai moscjins fintremai ch’a no jere tornade sere.


Flavio, cuant ch’al ere vignût a cjoilu e lu veve cjatât vistût dome dai coprisedii da la machine, no podeve parâsi di ridi. Checo al veve cirût di spiegai, ma al jere come tirâ un clap tal Tôr.
Di che volte però, ogni sabide, Checo a meteve un cambi di vistîs in machine e al stave fûr dute la gnot.


________________________________________
A stoi gjoldint a scrivi contis ch'a nassin di une imagjine, come in chest câs, e podopo a voltalis par talian. Pensi che chest blog al deventarâ di spès la cjase di chestis contis.
Sa vuleis lei la conte par talian, ch'a no simpri a je compagne, fracait a chi.

Mandi mandi

Il cartel pa l'Udinese cul Gjenue

O, soi un pôc indaûr cun chest blog, ma no stêt ve pore, o stoi scrivint un grun par furlan.
Us disarai di plui: ài cjapât un biel vizi.
O met une imagjine sul desktop di un cualchi puest ch'a m'ispiri, daspò a buti ju une storie curte su chel puest, e fintremai ch'a no scrîf la storie a no gambii il sfont...
E si che jo soi un ch'a si stufe subit di dut, (no, no stêt pensâ mâl, da la frice no mi soi ancjemò stufât), a soi sburtât a scrivi la storie...
Cun usgnot ài butât ju la seconde, e soi a la tierce imagjine... sperin di no finî li fotografîs!^^

Intant us lassi il cartel pa la partide di doman, sperant che chist colp a parti bon!
Buine domenie!

Niari - two pulp tales - coment

Jeri indizis se comentâ chest libri sul blog par furlan o su chel par talian. Tal dubit cirarai di cjacarâ di lui sie di ca che di là. :)
Us ài za dite alc su chest libri un par di post indaûr, cumò lu ài let e pos comfermâus che il libri le bon e al è un plasè leilu.
Nin par ordin.
La prime da lis dos contis a è scrite in cjargnel, tal dialet di For di Voltri, e ài di dì che nol è propit tant sempliç di lei, soredut tal imprin, cuant che dutis ches "o" che sierin ogni peraule, par un come me, ch'al cjacare furlan de base, a son duris di digjerî. Il biel al è che dopo un dîs o vincj pagjinis tu tachis a la indenant spedît e, a la fin da la conte, pôc i mancje ch'a tu cjapis l'acent cjargnel ancje tu.
Cheste da lis dos, vutu pal pathos ch'a si rive adore a fâ su, vutu pa la scriture une vore sclete e pa l'idee di font une vore ninine, a è cence dubis che ch'a ti lasse di plui. Ti samee scuasit di viodilu, Valstorta, il paîs che Fulvio al à inventât tra Rigulât e Gjiviane, su che strade che chei ch'a la cognossin a san ben ce mût ch'a è. E il biel da la conte al è propit chel che tal mieç dai cadavars e dal "thrilling" Fulvio j à metût ancje la so critiche sociâl e i valôr furlans.
La seconde conte, che par talian, a je ben scrite ancje che, ma forsit a piert alc, sia tal fa cjacarà par talian doi personaçs ch'a tu viodis pensâ par furlan, sie tal finâl, un pocut teletonât. Chest però, a nol gjave il biel di viodi une storie cun elements fantastics svulucjâsi tal casel da l'autostrade, pene fûr di Udin. Une conte moderne, ch'a soredut a le fin ti cjape un casin.
Pôc altri ce dì. Sa us capite cjoleilu!
(I link ju cjatai tal post plui indenant)

Si lu sai...o spetavis il moment dal cartel par la partide da l'Udinese... Ben pò, che setemane chi âi di dî che o vevi pocje ispirazion, ma almancul, invezit di butâ ju un sôl cartel, o âi butâts ju doi! Un âi ancjemò di finîlu, ma doman parcechè cumò o jevizc î coions di jevâmi par fai une foto e cussì o si tigneis la beta version... Vonde cussì par vuê ch'a soi cuet come un bilite tal microonde! :)
Us lassi i doi cartei in anteprime, per Udinese Giuventus :)