I cuestionarîs su la lenghe furlane 2/?

Ben po... vuê zornade memorabile: e je saltade fûr la prime interviste!

Incredibil.. crodeimi, o stavi par paiâlu, il siôr che me à fate.

Un pensionât che al steve fasint un lavôr suntun barcon intal garage di cjase, cuiet e beât. Furlan su dute la linie, ancje parcè che inte letare che i è rivade no vevin neancje metût il gno non e jo podevi jessi cualsisei matuç. Di bon che si sin dits in doi: cirìn di fâle curte (ancje se mancul di mieze ore no si stâ) e si sin disbrigâts. I varès dât une man volintîr a comedâ chel barcon, ma mi pareve che al fôs plui brâf lui. Ma a nin par ordin.

Prime tornade, a matine.

Des 10.00 fintremai a midsì e mieç. O ai fat 50 km, ducj tal comun di Puçui. Parcè? Ma parce che clarementri, di chei 11 che o ai di lâ a cjatâ, 'nd è a Puçui, a çuian, a samardencje, a terençan e Cjargnà... doi par bande, in pratiche. E cuant che tu vâs aes 10 intal puest A par viodi de persone 1 e 2, ma 1 no ti rispuint, ma 2 al torne cjase ca di un pâr di oris ce fâstu? Tu vâs di une altre bande, par tornâ a lì plui tart, dome che intune altre bande al vûl dî intun altri paîs, dulà che dut câs ti capitee compagn... insome. soi lât dôs voltis par paîs, rivant a cjatâ un sôl e a cjapâ un apontament par doi altris intal daspò misdì.

Seconde tornade, pene dopo gustât... par fortune int simpatiche, e je scjampade ancje une gote par digjestîf, che mi coventave, jessint che in vincj minûts o vevi mangjât come par cuarante :)

Bon, trê intervistis, finalmentri... ciert... 80 chilometris fats e plui di cuatri oris di lavôr, ma magari o sarai plui fortunât la sere... 

Ma ce! Une no veve nancje ricevût la letare e mi à cjalât come il piês dai delincuents (che po, e à reson, ma insome), un altre mi veve dât apontament, ma e à scuegnût lâ vie, e il tierç tentâtîf, a siet sot sere, al veve dut il dirit di jessi ator a bevi, jessint che al jere vinars.

Nuie di fâ invezit cu la cjase in vie Basandiele al numar 80 e passe, che jessint che la vie e finìs al nr 72, e devi jessi sprofondâde dentri di un cjamp di menighe insieme cu la int... cuissà se là sot e cjacarin par furlan...

Pobon, cu la seconde zornade, mancul 27 al cricâ dal dì, ancje se la domande che va fasintsi strade e je... - se e va indenant cussì - parcè varessio di pierdi bêçs jo, par fâ chest lavôr?

I cuistionaris su la lenghe furlane 1/?

Si visaiso di chê letare vierte sui criteris di sielte e bla bla bla...

Al jere un erôr materiâl (cioè, falât a scrivi e a fâ i conts) e lis ai ancje sintudis di Cisilin che mi à dât dal solit furlan contestadôr e che al à di fâ maravees, ancje se invezit jo o vevi bielzâ acietât, di bon furlan sotan, la sielte de comission. Cun di plui a àn di spiegâmi cemût che un al varès di vê savût subit che "al jere un erôr materiâl".

Poben, ma dopo la reintegrazion, cumò mi tocje fâ i cuistionaris...

E sicome îr o ai scomençat e mi soi cjatât intune situazion  a dî pôc kafkiane, o ai decidût di tignî un diari cun voaltris, su chestin intervistis.

Pronti? Via!

Sabide. ore 17.30.

O ai trê comuns e trente intervistis di fâ. Il prin comun al è dongje, Puçui.

O partìs cul prin non e scuvierç cun mê grande simpatie che Cargnà al è dal comun di Puçui.

O rivi intune vie e o cîr o cîr o cîr il numar 14. Nuie di fa. Anzit, al è il 14/1, ma la vie che il navigadôr mi à puartât e à dome 10 numars... bon, mierde. Al è scûr, tornarai cul lusôr, che a son passâts i vizii e mi àn cjalât stuart (un cuntune carteline in man che al cuche sui campanei fasintsi lûs cul telefonin nol devi fâ une biele figure.)

Il secont mi va miôr... mi pâr. La vie e je, e à il numar.

O voi devant de cjase e... insome, fatiscente? Disin che se cualchidun al vîf li dentri, no je persone vive. Baraçs devant de puarte, scûrs fraidîts... tal ort mi pâr di viodi i vuès di un dodo. O decît di tornâ une altre volte insieme a un medium e a un esorcist.

Cambin paîs.

O scuvierç cun sorprese che ancje Zugliano, çuian, al è un paîs di Puçui. Poben... nin al numar 80. Il navigator mi puarte in mieç de campagne.

E pûr la vie e cheste. torni indaûr. Numar 30... 50... 60... 70... 72... vonde. fine. Si zire di une bande e je une altre vie. Simpri dret dome campagne. Insome... cheste cjase no esist. O decît di tornâ ancje li cuntun medium e o voi intune cjase dongje, simpri a çuian. La mê liste di nons a scomence a procupâmi, ma chest colp o cjati la cjase. Nol è nissun interni, nissun A e B o 1 o 2... dome il numar. 17. Nol puarte ben, e difat al è dut scûr. Provi a sunâ il campanel e un vecjut, de cjase di front, al tire la tende e al cuche. Mi spieti di un moment a chel altri che mi dîsi che no je domenie matine, i testemonis di geova ju spiete par l'indoman. Nuie. Nin vie. Nin a Terençan.

Li e je facile... o speri. numero 19/1 (e dai cun chei /alc)

o parchi la machine denant dal numar 18. Cualchi metro a pît, tal scûr e tal frêt, no mi dâ fastidi. 

18a... 18b... 18c... 18d... o comenci a pensâ che e sedi une candid camera dopo che il 18e al rive e di gnûf a rivin cjamps. cjamini... cjamps. Cjamini tal scûr, strade blancje, e cjaf dentri intune poce!

porcodemoni! nie. E pûr... torni indaûr. voi indevant un centenâr di metris e ve li, il 19!

O cîr il 19/alc e induvinait? Al è un dentist! 

O cjaparai un apontament.

vie, intune altre cjase, altri no. Chest al è dongje, voi, parchegji denant. 

Finalmentri une cjase normâl. Pecjât che no cjati nissun. O lassarès il bilietut par jessi tornât a clamâ, ma a) vuê matine mi si è rot il telefonin b) mi secje che a vedin di spindi lôr par une robe che o ai di fâ jo.

Poben, torni cjase. O passi in vie cavalleria, a Puçui. Al è un non ancje li, ma sinceramentri a son 7 di sere. La int e à dirit di cenâ e jo ancje. O lassi pierdi e voi cjase.

sei tentativi. 0 interviste.

Ancjemò 30 al cricâ dal dî!

Za cricât il dì

Za cricât il dì

Une striche di lusôr

E figote i cjamps

Pignatutis par Udinese Inter

îr, cence dubis, tra lis plui brutis partidis che jo vedi viodût a Udin, tal sens che l'Udinese e à zuiât malissim, l'Inter, al à fat il so, ma jessint che no coventave fâ di plui si è limitàt al minim... Cun di plui... al ploveve!

Pignatutis curtissimis alore.

Brkic 2 pignatis su 5. Al è ancjemò là, che al cjale chê bielissime pavee che al à cjapade tal prin timp. Brâf e vonde, al è rivât a gafâle prin che i rivi il balon intor! No sedi mai che Ranocchia, che al jere li dongje, al tiri fûr la lenghe e la mangji!

Danilo 2 pignatutis su 5. Pobon, chei dal inter no son brocs, e nol è facil marcjâju, però, nancje lui nol è un broc. Podopo o ai di capî cemût che un brasilian al pues vê chei pîts di ghise li.... misteri...

Gabriel Silva 2 pignatutis su 5. E pûr al someave di viodi che al cirive di cori, ma mai un dribbling, mai alc di pericolôs... mi sarès contentât di une pidade tai sghirets di un cualchidun, juste par dî di jessi in campo.

Naldo 2 pignatutis su 5. Anche chest, brasilian dome di passepuart, il pît al è cjargnel... Heartaux ce lu tignino a fa?

Domizzi 2 pignatutis e mieze su 5 tal prin timp al ten bot, podopo su bute jù. Ae fin ancje lui al cumbine di ancje, ma almancul tu lu as viodût provâ a inventâsi alc.

Widmer 3 pignatutis su 5. A saressin 2 e mieze, ma e je la prime partide, e al à zuiât miôr di altris. Al pues dome fâ miôr.

Pereyra 1 pignatute su 5. Al jere Halloween, e lui si è travistût di fantasime! Brâf... a travistisi!

Allan 1 pignatute su 5. Nuie di fa, al cor a vueit, al piert cuasi dutis li balis, e chest colp no 'nd à nancje cjapadis. Cuinti zuiadôrs di cualitât al varà simpri di pierdi, se nol cres. La voie, a dî il vêr, la met simpri.

Badu 3 pignatutis su 5. Miôr in campo. Tante, tante voie. Nol à mai molât. Par sigûr, nol è lui chel che al à di dribblâ e segnâ. Ma forsit, a lassâlu tirâ ogni tant, a varessin cualchi gôl in plui. Secont me, un cussì, nol è mai biel vêlu cuintri.

Di Natale 2 pignatutis su 5. Al zuiave di bessôl o dongje dai muarts. Par me cont al à fat ce che al à podût. Però ancje lui si è scoionât dopo i gôi e si viodeve.

Muriel 1 pignatute su 5. Muriel di luianie, o Muriel budiel- Ogni tant, nomen omen. Al jere miôr che al fase la fantasime ancje lui. Invezit al à sielt di fâ il zombi. Biel travestiment ancje il so... perfet!

Ranegie 2 pignatutis e mieze su 5. Bisugne jessi onescj. Nol è facil jentrâ intune partide cussì, ma lui al è rivât almancul a spiçâlis dutis, di testa, e lu si è viodût cori. Nol segnarà mai, ma bisugne dâi merit di jessi jentrât in campo.

Bruno Fernandes. 3 pignatutis su 5. Al à fat viodi di jessi.

Nico Lopez 2 pignatutis su  5, nol à fat viodi di jessi

Guidolin...cence tapon. tant buine e jere la scuadre cu la Rome, tant falade cheste. ma al va dit che se tu cjapis doi gôi su bale ferme par capelis dai zuiadôrs, l'alenadôr al centre une vore pôc.

.

Il strisson par Udinese - Inter

Ma bundì!

Al plovie? Mah... ancje se o speri che i metereolics a cjapin dal mone e che nol plovi, o ai pôre propit che la partide cul Inter, vuê, e sarà bagnade...

E sperìn che a sedi fortunade, alore, parcè che se ai di jessi sincêr, un Inter che al zuie ben, cui zuiadôr che al à, di Udin nol va vie cence ponts. Purtrop la partide di miercus, cul Sassuolo, mi à fat capî che il Sassuole e je pocje robe, come scuadre, e l'Udin al è pôc di plui.

E pûr i zuiadôrs ju vin!

Vuè cun Brkic in puarte, che al à mostrât di jessi un portîr cui coions (e si visaisu trop che lu criticavin, cuant che al à tacât) o vin, in ogni câs, za une possibilitât in plui di no cjapâ gôi, soredut se in difese Danilo, Domizzi e Heartaux (al zuiarà lui, soi convint) a zuìn al miôr.

Tal mieç soi una vore displasût che nol sedi Basta e nancje Maicosuel, ma o vin Badu, e dai, magari e je la volte buine che o vedin cualchi muse gnove... Merkel, Widmer... no vino di provâju, prin o dopo?

Devant nus tocje viodi Di Natale e Muriel... un siôr atac, al è clâr, ma che al stâ zuiant vonde malut.

E ma miercus a àn pûr segnât....

Sumò su, cjalintsi tai voi... Totò se a nol jere par il rigôr, no la butave dentri nancje se o levi jo, in puarte, e Muriel al jere completamentri inutil e anzit, dai soi pîts e je partide la azion dal paregjo dal Sassuolo. Se al stes sintât, o vin une vore di int che nd à voie di cori (zielinski e nico lopez su ducj).

Bon, ma no stin fâsi masse fastidis, Guidolin al savarà miôr di me lis robis, e se al met in campo une scuadre come cu la Rome, a mi mi va benissim!

Mandi a ducj e buine partide!

Lis pignatutis di Sassuolo - Udinese, un pôc tardis

Alore, miercus di sere, intant che o fasevi lis cocis pe vilie de fieste dai Sants, o cjalavi la partide. O pûr o cjalavi la partide e intant o fasevi lis cocis... insome, me soi cjalade dute.

E alore mi va di dâ lis pignatutis.

Prin di dut... metìn in clâr che domenie stade a vin cjapât 0 ponts e a meretavin almancul 1, miercus 'nt vin cjapâts trê ma a meretavin almancul doi di mancul.

E cumò lis pignatis!

Brkic 4,5/5 pignatutis. al à cjapade une pavee e riscjât di dispicjâ Zaza, ma al à fat dôs paradis che, o scomet almancul tre chilos di nutella, Kelava nol varès mai rivât. Si clame jessi svelt, e cuant che un portîr al è alt come lui, ma al va par tiere come une bilite, invezit che come un sac di patatis, al è fuart.

Danilo 2.5/5 pignatutis.. No i doi colpe sul gôl. No le à. Ma une difese che e patìs cussì no pues jessi dal dut lontane di chel che al à il compit di regjistrâle. Podopo, cuant che si sgance (e al à cualitât) al è simpri dibant..

Domizzi 3/5 pignatutis. Al covente. Ripet.. al è come meti un tratôr a fa rally cuintri lis motos... no i sta daûr, ma a rive dulà che al à di rivâ e al è miôr no stâi masse dongje (domandâ a Schelotto par referencis).

Naldo 3/5 pignatutis.. Se chel li al à i pîts brasilians jo soi Obama, no, no il gno cjan, il president. Ma no mi pâr di vê timp di pierdi a scoltâus al telefonin. 1,5/5 pignatutis. 

Gabriel Silva 3/5pignatutis. Mi è plasût, finalmentri un pôc di snait! e cun di plui de sô bande no jerin tancj fastidis.

Basta. 3/5pignatutis. Si, al à vût sfighe di ogni bande. Prime lu àn çuetât, podopo Danilo i creve lis cuestis... ma dut câs al è tornât a cori. Cjalait il rigôr, il Basta di dôs setemanis fa al sares stât doi metris indaûr e al varès fat fal lui.

Pereyra 4/5 pignatutis. Il miôr in cjamp dopo Brkic. Finalmentri al à capît di jessi bon di schiribiçâ l'om. E cuant che lu fâs e dopo la dâ, invezit di pierdile, a son fastidis... par chei altris!

Lazzari. 3/5 pignatutis. Soi une vôs fûr dal coro, lu sai. Ducj a cjacarin mâl di lui. Jo invezit o ai viodût un bon Lazzari, par la condizion fisiche, e finalmentri un Lazzari che al à capît che a chel centrocampo i vûl dât cualitât e timps. Purtrop, nol è il zuiadôr che al fasarà vinci lis partidis al Udin. I mancjin lis ideis e la capacitât di meti l'om in puarte o in fasse in verticâl. No rivi a capî parcè che l'an passât lis veve... Jo ai la mê idee, sul centri dal cjamp dal Udin... se no si cjate un "asamoah/pizarro" no si va in niò! E provâ un Zielinski, ta chel puest?

Allan 2/5 pignatutis. Nie di fa, chest an Allan al fâs fature. Lui al cor e al recupere balons come simpri, ma ju piert cuasi ducj. Forsit al stâ lavant lis scarpis cul savon, ma cence resentalis...

Di Natale. 2,5/5 pignatutis. Ae fin al à fat la sô oneste partide. Bon. Par un zuiadôr come un altri al sarès vonde. Ma no o vin un fuoriclasse. Chês da l'etât a son coionadis. un come lui al pues zuiâ di fer! il miôr de partide, par dî, lu à dât cuant che al rientrave a cjoli bale tal mieç dal cjamp e al vierzeve il zûc... no va ben. chel lavôr li al à di falu cualchidun altri. O ai cjalât, invezit, che al va pôc su lis fassis... e lui cuant che si sposte in fasse cuasi simpri al rive a fâ fur l'aversari... sùmo su, totò, met dentri doi gôi domenie, che tu tornis chel di l'an passât intune partide sole!

Muriel 1.5/5 pignatutis. Al à segnât, e alore? Daimo dai, no stin dî coionadis. Al è stât come zuiâ in 10 par dute la partide. Nol jere. Podopo chei da Sassuolo àn pensât ben di no marcjâlu e al à metude dentri une grande bale dal tucuman... ma nol baste. zuiâ in 11 al rint di plui di un gôl fat.

Bon, vonde.

Domenie?

Domenie mi plasarès viodi zuiâ muriel e merkel. Herataux tal puest di Naldo e parcè di no, un zielinski se propite no vin voie dal mago. Baste che il Guido no mi vegni fûr cuntune scuadre a une sole ponte... Ah, Totò e Muriel, se a zuin come miercus, cul inter, no viodin nancje la puarte!

Il strisson par l'Udinese cu la Rome

Vuê no ai masse ce dî, sul Udin...

Sabide passade mi soi smonât... la partide e jere brutissime e costruide mâl, pues sucedi, ma sintî che di ogni bande (fûr che di chei che le àn cjalade) si diseve che l'Udinese al veve zuiât ben e no jere lade cussì mâl e bla bla bla mi à fat pensâ che in ciertis bandis a fossin des diretivis di parsore par fâle viodi intune cierte maniere.

E mi soi sintût cjolt pal cûl dôs voltis.

Mi àn dât fastidi, ancje, lis peraulis di tancj tifôs che magari no àn nancje cjalade la partide ma che di bot al pareve che Guidolin al fos il piês alenadôr dal mont e i zuiadôr ducj cence voie e vie indenant...

Però chel al è un presit di paiâ... nô tifôs, in medie, o sin stupits, cuant che si piert.

Pobon, in ogni câs, o leievi la formazion de Rome, e viodint il stât di forme di cierts zuiadôrs (pjanic, maicon, de rossi, benatia, lijaic...) podaressin dî che l'udin di chest an nol à sperance... veramentri... ancje chei che a devin plui sigurece (un Basta, par dî un) chest àn no àn verve, son plens di pôre...

Invezit di tirâ fûr i coions a stan a spietâ.

Jo pensi che un che al à zuiât di balon al cognòs chê maniere di zuiâ... ti capite cuant che tu pensis che tant, lant indenant cussì, il gôl al vignarà, une ocasion a vignarà, alc di bon al vignarà... parcè... parcè che tu vegnis di un periodi o di un àn dulà che chest al sucedeve (come l'an passât)

E invezit no. Nol capite.

Forsit al à reson Benatia, a dîsi che il mâl di chest àn al è di no vê vendût...

Cjalait Gabriel Silva, o Pereyra... mi somee che cuant che a zuin, cence volêlu, a disin... o, jo soi fuart, cumò lu savês, l'an passât... e cussì no fasin un caz.

Trops dribbling i sono vignûts?

Forsit un par om... dal inizi dal àn.

E pûr a varessin di visâsi cemût che a son deventâts fuarts... 

E alore insome, jo vuê o speri di viodi alc e altris... o vin une scuadre che se a vessin chei zuiadôrs li il Sassuolo o i Livorno o la Samp a saressin simpri titolârs e fasaressin faliscjis! Coventie fâ i nons? Fasin i cognoms! Zielinski, Maicosuel, Merkel, Nico Lopez, Bruno Fernandes... us parino brocs?!

Sumo su... viodin di fâ colâ chest imperi roman... almancul cuntun paregjo!

Lis pignatutis di Milan - Udinese

Alore... sì, vuê o soi stât cjase a viodi la partide... a proposit, cuant scomencie? Cemût? E je za finide?! Ah, no mi jeri inacuart... spiete che o voi a viodi i highlights...ve chi, 30 seconts di moments impuartants... un gol e une travierse. Benon!
E alore vuê si stâ une vore pôc a fâ lis pignatutis par l'Udin, e lis fâs.

KELAVA: e pensâ che a inizi campionât al jere chel che nol lave... al è l'unic che al pare ce che al à di parâ e nol pare ce che no si podeve parâ. Ciert... viodint la scuadre che faseve fature al veve di movisi di plui e cirî di lâ a fâ cualchi cross... magari vuadagnâ cualchi punizion dal limit... dai, la prossime volte.

NALDO: Al varès di jessi brasilian, nomo? Bon... il colôr al è just, il pît al devi jessi da la Terra del Fuoco, difat, ogni volte al somee che la bale e sedi bulint

DANILO: ma, no sai ce dîsi, ancje lui al rive a sbaliâ i passâçs, ma o pensi che al devi jessi par che al è un bon frut, e al voleve jessi solidâl cun ducj chei altris.

HEARTAUX: ae fin forsit al è l'unic che al à capît di ce bande che e jere la puarte dal Milan... se no altri al à capît la direzion, dai.

GABRIEL SILVA: al devi vê pierdût alc li dongje de linee di metât campo: ogni volte che la passave al tornave indaûr cul cjâf bas a cirîle... se no altri, vuê, no vint fat nissun cross, nol à sbaliât nissun cross.

BASTA: al partìs e nol sa cefâ, si ferme, al zire tor ator la bale, fai un salto, fanne un altro, e tutti giù per terra... bon, dai, al à un zimul, no pues crodi che al sedi chel Basta che o cognossin. Il zimul, dut câs, nol è mâl... al pues benfâ in prime categorie... che nus torni a mandâ so fradi

PINZI: al è un zuidarôr onest, onestissim. Vint fat un fal di esplulsion,  lui di chel moment al zuiave come se al fos stât esplus. Se al cjapave la bale, la deve subite a chei altris, o pûr al cirive di lâ dulâ che no podevin passajale... un vêr om!

ALLAN: al è vignût fûr dal campo rabiôs come une bilite! Al veve rivât a sbaliâ ducj i passâçs, percentuâl dal 100%, ma propit ae fin al è sbrissât suntune spudade di robinho e le à passade a un dal Udin... pecjât!

LAZZARI: plui chê altri, Lazzaron, ancje se al è l'unic che forsit al à provât a meti un pôc di ordin, dome che insome... sì, a fuarce di lançâ par Totò al jere Silvestre che i domandave se par plasê al podeve fâ zuiâ ancje un pôc chei altris de so scuadre.

PEREYRA: Par impegnâsi si impegnave, al coreve, no dîs di no, ma Guidolin al devi vei dite di zuiâ "tra le linee", e lui al devi vê capît mâl e al tirave liniis tor pal campo, ma cence pensâsi di spietâ il balon...

DI NATALE: ma insome, ae fin, a zuiâ di bessôl, cuintri une difese interie, ce si ajal di dîsi... si scoionarès chiuncue, difat, i jerin cussì zirâts i codumars che sui corner al cirive di copâ l'om sul pâl, invezit che metile tal mieç

MURIEL: Ancje lui al è un bon frut... tu lu viodis in muse, no i leve di fâi fa brute figure a Basta, ven a stâi che al à zuiât piês... biei soredut i siei dribblings... cemût? no 'nd à fats? Apont!

ZIELINSKY: No esistin zuiadôrs che a jentrin a 10 minûts de fin dulâ che a zuin in 2 o 3 su 11 e cambin la partide... (gjavâts i câs dulâ che a fasìn 3-4 autogôi). E cui al jerial lui par gjavânus cheste convinzion? Al fâs viodi, se no altri, che al à cualchi idee di dulà che e je la puarte e cuâl che al è il balon...

RANEGIE: metilu dentri tal recuperi al vôl dî cjoli pal cûl... al è brâf a jentrâ cence mandâ a cagâ nissun e a dîle dute al veve cjapât ancje un rigôr, che in ogni câs no si meretavin.

MAICOSUEL:Brâf! Di bessôl al à fat tant che ducj i tîrs in puarte di dute la scuadre e ancje il stes numâr di dribblings... cemût? Nol è jentrât in campo. Bon, no impuarte, ce che o ai dit al vâl distes.

GUIDOLIN: nuie di fâ, la pome no cole lontan dal morâl, e cheste udinese plene di pôre, che no olse nuie, che e zuie come se stes vincint 2-0 ancje cuant che e piert... ben, e je la pome.

blave, cash, favitis e vinars

Ma si puedial scomençâ un post cence vê nuie di dî?
Ma... Jo lu comenci istès, ancje par che mi da fastidi viodi chest puâr Salvadeat che nol ven inzornât se nol zuie l'Udin...
Vuê al è vinars.
Vinars e je la piçule Vierte de setemane, lu dîs simpri.
E vuê, ma ancje îr, e intant che o jeri a passâ blave o pensavi, come che simpri o pensi, ce vite misare che o vin, che cuant che a son chestis zornadis, no saressin di butalis vie par lavorâ, stâ sierât denant di un ordenadôr o un imprest o un cualsisei argagn di fier, ma al sarès di gjoldi, di stâ fûr, magari sì, vivi cun mancul, ducj, e invezit... ma pobon, al è un discors che al larès fat cu la eternitât e la gjenie umane dute.
Insome... us disevi se si pues scrive cence vê di scrivi... sì, ae fin, ancje chest blog al à come smire di sparniçâ bielis robis e alore jo us dîs:
- che se o vês voie di lâ a mangjâ a la favite, come che soi stât a mangjâ jo, sabite stade, vait che mi soi cjatât ben, e ancje che la favite, par talian, al è il "scricciolo";
- che Cash al fâs cover che a son miôr o compagn dal origjinâl... ducj magari a cognossês chê dai nine inch nails, ma magari us è scjampade chê dai soundgarden, maraveose, o chê di Bonnie Prince Billy, ancjemò plui maraveose...
- che usgnot, ancje se o ai cincsietcutuardis ponts in bocje o voi istès al prin apontament di teatri par lei ai fruts... sperin di cumbinâ...
- che o sopuarti simpri piês lis derivis di coions dai furlans... jo soi cressût zuiant di balon, o ai vût tancj alenadôrs, e magari si rît e si scherze, sui aversaris che si fasin mâl, ma mai nissun mi à insegnât a sperâ e a gjoldi par chel. Anzit... ognidun che o ai vût al à simpri vût voie di vinci cuintri che altris cuant che son fuarts. Disìn che mi àn insegnât a no vê pôre, mai. Ben po... viodi che ducj i coments dai furlans sul infortuni di Balotelli a son o di rabie, o di Ce gust, o di insults mi fâs capî che o sin un popul di sotans, stupits e sotans. No rivarin mai a vinci nuie e al è just cussì.
E vonde cussì, dai. voi a mangjâ e mandi e bon fin di setemane...

il strisson par Udinese - Cagliari

E vuê o si cjacare un pôc di Udin, va. 

Ciert, al sarès biel domandâi a chel dal messagjero che mi invidave a segnalâi lis falopis dal gjornâl cemût mai che l'incident di Bertiûl al è stât spostât a Porpêt, ma bon, no stin pierdisi daûr di chestis robis e pensin al Udin...

Vuê o voi al stadi, sì. O voi ancje se mi ven pocje voie, chest an.

Vûstu par che l'Udinese no je tant di gjoldi, cjacarant di voie. Lassin stâ la partide di Bergamo, che o ancjemò tai voi i stops sbaliâts e i cros a tirâ jù çoris e corvats. Fasìn fente di nuie e viodìn cui che al va in campo vuê...

Mi spieti ancje jo Nico Lopez... ma dome se Muriel nol è. No che o pensi che chest Lopez al sedi miôr, ma mi pareve l'unic, che altre sabide, insiemit a Maicosuel, che al veve voie, rabie, cussience che par vinci si à di cori e di riscjâ.

Chest àn o viôt int che mi somee che a sà za di vê il puest in scuadre e che al baste zuiâ li, cuiets, cence fâ masse robe, che prin o dopo lis partidis si vincin... possigûrpo!

Ancje chê ultime volte in cjase, no stin dismenteâsi, l'Udin al à vint su autogôl a 10 minûts de fin... e la partide e jere stade dominade, sì, ma a part une paradone dal lôr portîr, nol è che i vevin fat masse pôre a un Bologne che nol è cuissâ ce e che al jere vignût chi dome par no cjapalis.

Pobon, la mê prevision?

A zuin Totò e Muriel, se al il colombian al stâ ben, si no o viodìn chest Lopez. Il mago o ai pôre che al tornarà in panche, pur jessint stât tri miôr in campo cuant che al à zuiât... purtrop, metintlu li, nol è zûc par lui. Tal mieç Lazzari, e se al stâ ben Pinzi, Badu si sente, e Pereira, boh... no si capìs nuie di lui, e forsit ancje chel sintât. Daûr naldo-danilo-heartaux, e sperant che si dedin une regolade.

Kelava, o speri che chel del radiocronache nol fasivi come ogni volte, che dopo cinc minûts di partide al tache a clamâlu Kevala, che mi somee il non di une midisine, un une arme di len del Papua gnove ghinee... ve lì il cagliari, tiri il kevala!

A proposit, vuê us met ancje une foto dal manovâl, che dopo al esponarà il cartel...
Ve chi gno pari, daûr a lavorâ!