Tifôs dal Udin a Baires

Ma vuê mi va di inzornâ il blog juste par gust, anzit, plui che par gust par saludâ Carlos, un gno parint che al vîf a Baires e che mi à mandât di pôc chestis fotografiis.

Si, o vês capît... un pocut al tife Udinese!

A dî il vêr la so prime scuadre e je il Ferro Carril, una des 3264925786315 scuadris di Buenos Aires, che di ce che o ai capît al è un pôcs di agns che no rive ae prime division, ma une volte e jere stade.

Ma insome, dopo la sô scuadre, jessint sô mari di Vuirc, al tife cence fastidis Udinese.

E al è curiôs, che l'an passât al à organizât il viaç de vite, sì par viodi l'Europe, si par viodi il Friûl, ma soredut par viodi... Udinese - Milan! Al à tacât un an prime a dîmi che al sarès vignût e che o vevi di puartâlu al Stadi Friûl. Sigûr... e difat, lu ai puartât, inte ultime partide, che zero a zero cuntun rigôr sbaliât e il pass pe champios. Ce che al à dite? Dôs robis. La prime che al jere impensabil, des sôs bandis, viodi tifôs che passavin cu la bandiere blancje e nere dongje di chei altris e il contrari. Fantasience... a cjalave cui voi scocolâts. Lu ai capît soredut la sere, dopo, che nô o vivin pardabon in pâs. Di fat, cjaminant par Udin, une volte che dal Centro Studi soi passât pe viutis par lâ in centri, Karina e jere plene di pôre. No mi spiegavi di ce, e dopo mi à spiegât che no crodeve pussibil che si podès cjaminâ cussì, a scûr, par chês viutis, ancje feminis di bessolis, parfin. 

La seconde robe, invezit, mi à fat capî trop mal metûts come tifôs. Si è maraveât (disin pûr deludût, va) che i tifôs no cjantassin ducj, ma dome che cuatri, e soredût che no si saltas ducj insiemit,. fin a fâ tramâ il ciment dal stadi. Cussì al à di jessi, mi à dit, parcè voaltris no fasês cussì? A stan ducj cidins...

E tu âs reson! Ce âstu di fâ... furlans ve!

Pobon, fat al stâ, che a la fin al è stât content instes, i vin regalade la maie di Denis, l'unic argjentin che o vevin che nancje a dîlu al è lât vie un moment dopo, a fâ un sglavin di goi di une altre bande, e cumò al è lâ in argjentine ator par buenos Aires, cu la siarpe dal Udin e la bandiere dal Acuile!

Il cartel par Udinese Genoa

Sperant che e ledi ben, ve chi il cartel par la partide di vuê.

No sai se larai o mancul al stadi, e no soi nancje sigûr che si capissi la citazion artistiche dal disen.

Basta che chei dal Udin a capissin che 'nd àn di segnâ un gol plui di chei altris, va. :)

E in ogni câs, come ultin cartelon de stagjon, a mi mi plâs!

Il cartel par Udinese - Lazio

Domandâi il timp a un mat, no je une robe sane, ma jo vuê o rivi a cjatâlu e a meti sù chest cartel, par viodi se o rivìn adore e poiâ doi balins, tal cûl de acuile blancjeleste, di maniere che la zebrute furlane e puedi tirâsi sù un tichinin. 

Ah, pe cronache, o volevi fa le zebre cu la scolpe, pe cuistion dai balins, ma jessint che - stant a che cjavrui dai stuarts, - bielzà il cartel de setemane passade al jere masse violent (e pensâ che e jere une citazion de Bibie) o ai pensât di cambiâ la scolpe cu la fionde... tant, par tirâ ju une acuile no coventin masse imprescj...

Il cartel par Udinese - Inter

Ve chi... lu sai, lu sai che lu varês za viodût, ma nol è cambiât nuie: se vincìn o tornìn in corse par il tierç puest, jessint che dopo o vin di cjatâ la Lazio e podìn cjapâju.

In vêr, nol è tant al tierç puest che magari a vin di cjalâ, ma a restâ in Europe, che o pensi che e sedi za une grande robe... si che duncje, fuarce Udin!

E sclizzin chel madracat neri e blu!

La strie

O ai gjavât il post cul cartel pe partide di vuê.

Morosini no lu cognossevi, come zuiadôr, ma o leievi simpri il so non, inmò cuant che al zuiave inte primevere e no savevi nancje che al jere lât a livorno.

No vevi nissune voie di lâ al stadio, usgnot, e mi va benissim che a vedin sospendût le partide. No tu zuis plui, cuntune robe cussì. 

Di sigure al sarà cualchidun, ator, che al tirarà fûr il discors "ma parcè" "a môr int ogni altri dî, sedi plui zovins sedi mancul fortunâts" e vie indenant.

Vere, vere...

Ancje se in tal so câs no si pues dì che al vedi vude masse fortune, in famee. 

Ma i discors a stan pîts in ogni câs.

Ma us disarài, di zuiadôr di balon e tifôs che vuê al leve al stadi, che no ti ven voie di fâ fieste, di lâ a businâ. E alore no viôt nuie di mâl a fermâ, ogni tant, lis robis. Tant si dismenteis, doman matine mi jevi, come simpri, o compri il gjornâl, o cjalarai la formule un. Doi e trê dîs e si torne a tacâ, o sari pront di gnûf par lâ al stadi, businâ...

E je cussì che al funzione e di bon di chel.

A ogni mût vuê us lassi cuntune altre robe.

Une poesie.

Anzit, une cuasi poesie, di chês che ogni tant o buti jù. Poesiis veris, inte vite, 'nd ai scritis trê o cuatri.

E o ven cumò cumò di Basilian, dulà che soi stât a viodi lis premizions di Emozions di ingjustri, o ai cognossût Gianfranco Plume d'Ingjustri e ae fin, ancje se no jeri in vene di int e di cjacaris, no mi è displasût lâ.

La cuasi poesie e jere partide su chê strie di mê mari, e dopo e je deventadi plui universâl, partint dal començâ che la prime e forsit uniche strie che e cognossin, te vite, e je propite nestre mari.

Cussì, almancul, o viôt di inzornâ il blog cun alc altri, che no sedin cartei par l'udin.

 

STRIE

Lu vevi scuviert di piçul
che tu jeris une strie.


Tu cognossevis, no sai cemût,
la gjeografie des cjasis
e il dulà di ducj i miei parcês.


Tu jeris buine di stramudâ i cjalcjuts
in cjalçuts
e sierâju intun scansel.
Tu vevis incjantesims intrigôs
Par platâ cetancj savôrs
intune sole sedon
e i bêçs
sot dai cussins.


E tu savevis dulà meti mans,
lis ongulis mai netis,
par mugnestrâ cuviertis, pletis,
taculis,
grops tes scarpis e tal cuel.
E tu svolavis, pardabon
suntune scove, di une stanzie a di chê altre.


Ma cumò,
che tu âs vues di veri,
dincj di piere,
voi di cristal…
no mi vanze mai timp,
mari,
par jemplâ lis tôs sachetis
vueidis.

Il cartel par Udinese - Parma

Il cartel par Udinese Napoli

Ve chi, jessint che o zuin cul Napoli, che o vin doi napoletans in scuadre e che dut câs si clamin ducj i doi Antonio, vuê o fasês un pocje di enigmistiche, cussì, tant par cambiâ, e sperant che una di doi antonios la buti dentir, ancje se jo mi contentarès di viodi Barreto, che forsit e je ore di tacâ a recuperâ cualchidun, invezit di pierdi zuiadôrs.

Fuarce Udin e vie a tifâ!

Il cartel par Udinese - AZ

Metât cartel, vuê, lu à pensât me pari. L'ultin toc jo. Si podeve lâ a cirî un zûc di peraulis con AZ, sedi come alfabêt, sedi come marcje di dentifricio, ma insome... mi pareve scontât, e a la fin dut ce che i covente al Udin, par tentâ l'imprese, a son tre goi.

Goi che in dì di vuê a somein une chimere, jessint che ca nol segne plui nissun. Dopo la partide di domenie, dulà che une cualuncue tierce categorie e podeve fâ la sô porche figure, mi somee di viodi une vore di pocje sperance, e in efiets, o vin pocje robe di meti in campo, usgnot.

Sperin in Pinzi, che al è un che al tire fûr i coions, cuant che al covente, e pecjât par Basta, che ancje chel al cor par trê. Mi vegnin za i pei drets pensant che tocje tigni Ekstrand... sperin ben va, e sperin che int come Fabbrini par une volte e fâsi viodi di non savê dome cori dibant e colâ par tiere... Totò? Ma... al è un pôc ju di cuarde, si viôt.

Armero al somee vê dismenteât ce che al è il zûc dal balon, Benatià al fâs ogni 10 intervens bogns une capele galattiche. Insome... la viôt brute, ma se no i crodin nô, che o sin tifôs, cui ajal di crodi, chei altris?

Fuarce Udinese! 

Fur i coions par butâ fûr i olandês!

Spietant l'Olande...

E intant che spietìn la partide di doman, cun chê scuadre li che no ai capît ben se e je di balon o un dentifricio, che chi - via Frank - cualchi anticipazion dal Olande!

 

Il cartel par udinese - atalante

Sperant che Denis nol vedi voie di gjavâsi cualchi sodisfazion, e sperant che cun il tornâ di Pinzi e di un Totò e di un Asamoah, che 'nd àn polsât, viodin se meti il cartel prime al torne a puartâ bon, come che al veve simpri fat fintremai di chê partide sfigade cul Milan.

Dopo il premi a Guidolin non si podeve fâ di mancul di cjacarâ di lui e alore, jessint che al somee pardabon vê cjapât sù dutis lis carateristichis de gjenie furlane (tacant dal "viodarin" fin a "svolìn bas" e dut il rest) podìn propit dî che al è un di nô!