Conseis di rusin

'nd àn musis a triangul, cercli, losanghe; e une cere smavide o ruane, di zâl maladiç o un blu di chel altri mont, ancje se amì. Il plui bocons a son sfodrâts di conseis; i picinins, come simpri, a stan a inrusinîsi sul ôr, lôr o de strade e noaltris,  a stentis, o stin a sintî ce che a àn di dî.

Lançutis strupiadis

La strache e je un orloi piturât su la schene, e in numars a platin lis musis di doman. Di cui che al è di lâ a cjoli, a tornâ, di cui che ti spiete simpri intune stanzie o si fâs spietâ. E smalite un muscul, sin tarts: l'ôr smavît si sfracaie, lis matitis lis regalis, lis gomis si à di compralis.

Ecuilibriscj

Cualchi volte mi sconfont la superstrade, che no sai cemût, si cumbine cu lis stelis. Maluserie, lancûr, rivoc, a montin un parsore chel altri, slungjantsi fintremai a rompi il scûr dal cîl, piturât di criùre. Come ecuilibriscj di un circ a stuarzin i braçs, lis gjambis, il bust: a àn voie di tocjalis a cost di ducj i coscj, vaint, capriçôs, ma dulints. E no scoltâts.

La pipinate

la pipinate

e criche rosse di frêt

distudant la dì.

Muscli, pipinuts

Muscli, pipinuts.

Cence creance il gjat

al pisse sul mus.

Menant la code

Menant la code

Une stele e compagne

Piore e camêl.

In zâl ros vert blu

In zâl, ros, vert, blu.

Lusignis coloradis

a zimiin dal pin.

Padielin e scussis

Il vistît di un mandarin 

Si lasse gjavâ 

Mostrant agârs di gjoldi:

cercis d'Unvier.

Lu tiri, 

Ale narançon cence cuarp

che svuale e si poie sul spolert

disniçant odôrs

dal camarin dai ricuarts.

In bande, 

Un padielin che al à plui dai miei agns

Che son tancj, ma aromai avonde.

Il lat al clope, 

Tant che la man blancje di un vieli

Che al cîr il clip

Dal çarneli riçot de femine

Che no je plui.

Sot,

Tal Unfier dolç

E braurìn des boris

A crichin lis cjastinis:

Ancje lôr memorie,

Odôr

E scusse.

Sierade in cove

Si viodeve la Sierade, in cove, cui voi ferbints color di coce, limon, carote, pomodoro. Si rimpinave sù pai mûrs, intun cricâ di ongulis, o pûr e restave picjade sui lens cul cjâf par jù, in spiete, par colâ intor de schene di une bave di aiar, rondolâsi, mateâ cu lis aruedis, distirâsi sui prâts un pôc par volte. Qualchi volte si plate, si fâs pantagnoc li des curvis: zuarine o mortifare.

Lune mezane

Lune mezane.

Scunîts, in spiete dai muarts

Lassìn lis cocis.