Il cjant

– Moveisiii! – e vuicave il cjâf di Fiona, poiât sul comodin.

Chel altri toc di jê, cence vistîts e vergogne, al pocave ta la mobilie e su pai mûrs da la cjamare, spandint cun dispiet pissin e mierde tor pal paviment.

I vevin taiât il cjâf intant che a durmive, cjoche in bale di Guinness e sglonfe di salmon fumât. Al jere stât Liam a vê voie di provâ, istintîf come simpri. La none Abigail i al veve dit, che non sarès coventât a nuie, ma lui, cjastron come so pari, nol veve volût sinti nissune altre cjampane. Cuant che al veve plantât la manarie inta chel cuel tombadiç, Fiona e veve rutât cussì fuart di fâ tramâ lis tendis. Po dopo, intant che il cjâf al rodolave par tiere e i cjavei, luncs e ros, a si ingropavin tor il nâs e lis orelis, jê e veve tacât a ridi. E jere une ridade sgrasaiote, scuasit un vuicâ. Al pareve il ciulâ di un cjan striçât di une machine. A vevin ducj metût lis mans su lis orelis, gjavantlis cun solêf cuant che chel cuel taiât al someave vê finît di patî. Invezit, dopo un cidinôr durât un lamp, Fiona e veve començât, se pûr trabascjant e pastroçant lis peraulis, a cjantâ

E leve indevant a dî e tornâ a dî che litanie fastidiose, ancje se no come il ridi di prin. Lôr a capivin dome cualchi peraule: machine, triangul, budiei, rôl, gjugjule… ma nissun, in chês vocâls slungjadis fin spacâsi, al rivave adore a cjatâ une logjiche. A vevin crodût ducj che al fos un ultin deliri prin di tirâ su i scarpets. Dome la none e jere vignude blancje e ju veve obleâts a lâ subit fûr di che cjamare, sierant a clâf la puarte.

Lôr, cence bati voli, a vevin subit ubidît, plens di pôre par dut chel cjantâ sfuarçât e par chel cuarp che al cirive di dismontâ dal jet. Cuant che forin fûr de cjamare però, a vevin començât a riduçâ e a fâ i compliments a Liam. Prin o dopo Fiona e varès fermât di scjassâsi e lôr a varessin podût sintisi liberâts di chê malsane presince. Dome none Abigail, no si sintive plui cjantâ, no si jere dismolade. E stave cidine, cuntune muse a mieç fra il malcuiet e il rassegnât.

Tal imprin a vevin tacât ducj a ridile, disint che e jere la solite pessimiste, ma a vevin scugnût tornâ a mangjâsi lis peraulis dome un pâr di oris dopo, cuant che un poliziot da la Garde al veve sunât il campanel par dîsi che barbe Seamus al jere lât a sbati.

La ploie… l’asfalt slichignot… une distrazion… In chel cidinôr fûr di scuare chês peraulis a rodolavin come glaç intune tace vueide, ma lôr no lis sintivin plui.

Dut chest al capitave pôc mancul di un mês indaûr.

Di chê volte, dopo jessi stât tirât fûr dal acuari, dulà che Liam lu veve butât par scjafoiâlu, o almancul par fâlu tasê, chel cjâf al jere deventât simpri plui esigjent. Dal comodin dulà che lu vevin poiât, al veve cjantât une altre volte, par cunvinci ducj che la muart di barbe Seamus no jere un câs. Cussì e jere muarte la puare Eileen, sô cusine, ancje se i soi novante e passe agns, e il sô mastià e spudâ tabac di continuo, a vevin fât deventâ che tombule mortâl scuasit benvignude

A nissun però al jere scjampât il sô cjant, che pôcs minûts prin, stiçade par il blood pudding che no i vevin puartât, e veve intonât la litanie, contant cun particolâr gjonde il corot che ancjemò al veve di rivâ. Il telefon da la nonute al sunave za dibant, cuant che rivarin adore a intindi ce che al jere sucedût. Daspò di chel moment, par ducj, al jere stât un deliri.

– Eehh! Eeeh! Eeeehh! – a businave ancjemò Fiona, une altre volte cjoche – Cuant al rivie il mê Powers!

Abigail, che di whiskey no si intindeve, a mateave cul telefonin, cirint di clamâ a un dai fîs, o a sô brût, o a un cualsisei dai nevôts.

A saveve che Doreen e jere dal rivendicul a cirî lis patatinis cul pevar, Sinead a cjoli il gjelat aromatizât cun la Guinness, Roan pai boscs cun Neil, a sgarfâ fûr tartufulis. Brenda e Cormac no si visave nancje dulà che a jerin lâts a pierdisi, par contentâ l’enesim estri. Il rest de famee al jere a durmî, scanât di chê continue tension che no vevin rivât a cjatâ altre soluzion, se no chê di ubidî.

Çuetant su la sô mace e jere lade dongje al cjadin li che e jere dentri il cjâf di chel spirt, cun l’idee di spiegâi che e veve di vê un pocje di pazience, e magari butantji tal glutâr altre bire, sperant che la volès. Masse tart. Fiona, cun mieze muse in muel inta ce che a veve za bevût e veve i smursiei ruans. E veve cjalât fis la puare Abigail cui soi voi verts, li che no jere nuie che al ricuardàs il judizi cjapât su i tancj secui di vite, ma e si viodeve dome morbin e matetât. Daspò si jere sclaride il cuel cuntun colp di tos, e veve començât a cjantâ.

Abigail, distrute, si jere sintade sul jet, cence fâ plui câs al cuarp cence cjâf che ogni tant i leve a sbati intor. La disperazion a le veve ingropade intune maniere che scuasit e sperave di jessi jê la protagoniste da la cjançon di chest colp. Jessi une famee numerose al jere il piês ingòs che ti podeve capitâ, se la tô banshee e dave di mat.

Si jere fate anim e jere jessude de cjamare, sierantsi le puarte su la schene, e jere lade a sintâsi dongje la puarte, cul telefon sui zenoi. Dome a chel pont e veve començât a vaî, cence savê par cui.

VERSION IN LENGHE TALIANE

Fotografiis, sbits, curiositâts e contis

Vuê e va cussì:
Soi masse strac par scrivi, masse pôc strac par durmì, ma vonde strac par no podê lei cence indurmidîmi.
Ven a stai che us scrîf chestis riis sul blog par il gust di cjacarâ e contâus alc.
Tant par començâ cjalait ce biele fotografie.
Nol è nuie ce fâ, l'art digjitâl a podarà ancje vê savoltât cheste maniere di mostrâ il mont, ma imagjinis come cheste e àn dentri une anime che al è une vore dificil cjatâ in dì di vuê.
Che in pîts a çampe e je mê mari che cumò 'nd à passâts i sessante e che inta che etât si taiave ancjemò i cjavei cu la scudiele (e si viôt!).
Bon, nuie, dut a chi. A volevi pandi il gust di cjalâ une imagjine di curtîl furlan dal secul passât. :)

Cambiant discors, vuê matine mi è capitât di fracâ su Fantats Furlans, che al jere un pôc che a no lavi a "cjatâju" e o ai scjamât la version pdf di sbit, un fregul fat par ridi, e a di dî il vêr un pâr di ridadis a lis ai fatis. Sarà ancje stât artesanâl, intai disens e inte grafie, ma se o sês int che e vûl e pues cjapâsi cinc minûts di pause in ufici, scjamaitlu e butait un voli.

Tierce robe, cussì, par cjacarà, ma savêso che il non dal repipin (ven a stâi, il regolo, per taliano) al ven dal non dal re (mi pâr dai Avars) che al veve gjestît il Friûl tor i Votcent? Parcè chest ucielut cussì picinin al è stât clamât come un Re. In veretât chest ucielut ancje se piçul, al è une vore voraç. Simpri a nivel di curiositâts o pues dîus che o stoi leint il strolic e che la gnove di vierzidure e jè la origjine furlane di Giulietta e Romeo, che in vie indirete a saressin rivâts ai voi dal bon William, cjapant la ispirazion di doi inamorâts furlans.

Ultime robe che mi fâs plasè segnalâus e je la nassite de prime Ostarie Leterarie Furlane che a podês cjatâ fracant a chi e dulà o ai cjatais une mê conte bielzà publicade su chel altri blog, par talian, ma inedite par furlan.

Bon, vonde par vuê. :)

Il cartel par l'Udinese cu la Sampdorie

Ve chi, i vûl començât l'an gnûf cuntune partide che nus dedi sodisfazion, a nô puar tifôs, e ce miôr di un biel incoragjament a la scuadre. Sperìn che doman e ledi drete...

Finiment e principi - une poesie par cambiâ an

Ju vevi scrits par talian, il mê bon finiment e il mê bon principi, ma mi plaseve començâ ancje chest blog cun lôr e cussì ju ai voltâts par furlan.

FINIMENT E PRINCIPI


Prin di scomençâ
I vûl finît
E che il finiment, nol sedi fat a câs
Sierâ i dêts
Intun pugn
E butâju vie
Lontan
Cui rimuars
Che a si fasin
Scontrins fruçâts
I displasès
Aiar
Che chel almancul
Nol coste nuie
Invezit pai prins
Tu âs bielzà finît di paiâ
Pai biei ricuarts
Al contrari
Nol varès di jessi intrigôs
Fâju deventâ coriandui
Emetiju in sachete
Par agns
Cence platâju mai

Dopo di chest o brami
Par ducj voaltris
Di rivâ adore a sporcjâ
Il vuestri ator
Cjocolate intal lat
Pluitost che il contrari
Visâsi che e baste une gote
Par tirâ su un mâr
Dilunc di une pagjine
E cence che lis peraulis
A sedin di burascje
Visâsi che une manece
No jentre inta chê altre man
Ma par ledrôs sì
E al fâs il so lavôr
E in ultin o speri
Di no dismenteâmi mai
Che al è plui impuartant il scat
Che la fotografie

Il regâl di Nadâl par i amîs dai blogs

Ve chi, amîs di blog, ancje par vôaltris che o leieis ogni tant chestes riis par furlan.
Us lassi il mê regâl di Nadâl par la fin da l'an e pal Bon Principi.
E di un scritôr ce regâl podeviso vê se no un... e-book di Nadâl?
Lu sai, al è par talian, ma a mê discolpe o pues dîus che une da lis contis che a son dentri e je nassude par Furlan, e dome daspò le ai voltade par talian, cambiant dut a câs il finâl.
Une altre conte e je ambientade a Ariis e a podês vele za lete. Lis fotografiis a son dutis di cjase nestre. (Baste che a cjalais la cuviertine). Par il rest a no varessis di cjatâ dute robe gnove, e une postfazion di un prometent scritôr come Daniele Bonfanti.
Ah, us visi, il spirit de contis al è une vore pôc "natalizi". ;)

L'e-book si scjame a cjase di cheste cjase editore, o a chi su e-book gratis.

MANDI A DUCJ E BON FINIMENT!

Confins

Chest colp o sin tor Bertiûl, intune Glesie, che Screncis, che cuant che mê none mi contave la storie o jeri simpri saneôs ti tornâ a sintile. Par chei che a no san la storie, la cjatais a chi. Par chei che àn fastidis cul furlan, a le cjatais ancje par talian.
Mandi e steit pronts che subit o varês buinis gnovis di bande di... Contis Curtis!

CONFINS

I colps i rivarin tal cjâf tant che sclopetadis.

Thump thump thump thump…

Gusto si tirà su da la sente come une suste, scaturît, spalancant i voi e lis orelis.

Thump thump thump thump thump thump thump…

I volè ancjemò un moment par capì che e jere la radio de machine a fâ dut chel casin. Al pontà subit il dêt sul boton par studâle e al si inacuarzè che no si studave.

Thump thump thump thump thump…

Par istint ci cjalâ ator. Scûr. E frêt, parcè che al tramave dut. Al cjalà di gnûf la radio e i parè che al fos scrit alc, invezit dal numar de frecuence. Il siùm ai stave ancjemò invuluçant i pensîrs e nol rivave adore a difindisi di chel casin, ancje se al veve provât a fracâ ducj i botons.

Thump thump thump thump thump thump thump…

Come un frut che nol volè sintî Gusto si metè lis mans su lis orelis, cjalcjant fin a slontanâ chel sunôr, ma cun maravee che si voltà subit in pôre, al si inacuarzè che il rumôr a lu veve dentri dal cjâf. In chel, prime di rindisi cont se si stave insumiant o no, un cidinôr i colà intor come une cuvierte pesante, e al restà culì, cu lis orelis che a cisavin sot lis mans glaçadis.

Al fo dome dopo di chel moment, cuntun scûr che al mastiave la machine, che al començà a capî dulà che al si cjatave e al tacâ a visâsi che al veve cumbinât.

Si jere insumiât, chel al jere pôc ma sigûr, parcè che la radio e jere distudade. Al zirà le clâf de machine e cuntun colp di neteveris al gjavà la zulugne che no i faseve cjalâ fûr. Nuie di fâ. Il veri al restà blanc. Gusto al provà a netâlu par dentri, cu la manie de gjachete, e al scuvierzè che il veli di glaç al jere propit devant dal sô nâs. Pussibil?

Pussibil sì, si rispuindè di bessôl cuant che al vierzè le puarte al talpinâ li ator. Jessint de machine si sintive subit che al jere plui frêt dentri, che là di fûr.

Gusto al poià lis mans sul tapon dal motôr e al cjalà il mustic de machine, che i pareve no vê vût nissun dan. De bande li che al nol jere il volant al mancjave un spielut, ma al jere cussì sturnît che nol si visà nancje se al fos mai stât. Daspò di chel a si cjalà ator, par viodi dulà che al jere capitât. Une glesie possente e menaçose i stave denant come se lu judicàs. “Santuario B.V. di Screncis”, al jere scrit in grant. Al pensà che se al fos stât un tichinin plui religjôs al varès vût la cussience plene fin a sclopâ. Ma par lui, predis e sants a jerin come vistîts malbastîts par un cjan fof: no coventavin.

Al tornà a sintâsi in machine e al sierà lis puartieris. Daspò al zirà la clâf, par inviâ il motôr e meti in vore il riscjaldament. Al butà un voli al orloi digjitâl e al cruscot, al poià la schene e al sierà i voi. I pensîrs a tacarin a cori daûr da lis palpieris.

Duncje… e jerin trê di matine, al veve vuidât par dusinte e cincuante chilometris cence fermâsi, corint come un sfolmenât, parcè che l’ordenadôr de machine al segnave “average speed 90km/h”. Lis lûs e jerin a puest e nissun, al jere sigûr, al podeve vêlu viodût.

Intant che al jere pierdût in chei pensîrs un cricâ da la sinte in bande i fasè vierzi i voi. Si zirà al vuicâ come un mat cuant che al viodè, sintade in bande di lui, une zovine che a lu fissave cui voi spalancâts.

– Cui sêstu! – i businà plui che domandâ – E cemût âstu fat a jentrâ – al continuà, viodint che i crics de puartiere a jerin inmò sbassâts.

– Cuietiti cuietiti – i disè chê zovine.

E varà vût vincjecinc, forsit ancje vincj agns. E jere blancje come un linçûl e cun doi voi celescj e lusints. I cjavei i colavin di ca e di là de muse, clârs e lis, e intor e puartave un vistît blanc tant che la piel, lunc e stralusint, che al rivave fin tai pîts, ancje se chei, a parevin voltâts par contrari. Gusto, plui le cjalave e plui al sintive il sanc inglaçâsi tes venis.

– Jo o sai ben ce che ti è capitât, o disarès propit che tu varessis di tornâ indaûr,– i disè cheste, voi tai voi.

Gusto nol rivà adore a rispuindi. Nol rivave nancje a movisi, soredut parcè che chê fantate e veve fevelât cence vierzi nancje la bocje. I jere parût che la vôs, come la musiche di prin, e fos dome tal sô cjâf.

A ogni mût nol fasè in timp a pensâ nuie altri, parcè che in chel la fantate e tacà a deventâ fumate. Prin che al tiràs un grop di flât e jere za discomparide.

Gusto al restà imbambinît, intant che il veri de machine si disglaçave e il sanc al tornave a cjapâ il sô zîr. Daspò al tornà a impià la radio, al alçà il volum e al tornà a fâ dusinte e cincuante chilometris di buride, fin ta che strade plene di curvis e busis.

Si fermà e al cjalà par jù, pene di là dal guard-rail. Il cuarp al jere ancjemò culì, fer come un côl di tiere. A tor no jere anime vive, e a dî il vêr nol saveve nancje dulà che si cjatave, di precîs.

Al cjapà il man il telefonin, e al fracà dôs voltis l’1 e une volte il 2.

Dome dopo mês al vê il coraç di tornâ a Bertiûl e jentrâ in che glesie. Cuant che al cjalà il cuadri di che fantate no si maraveà che e ves une muse za viodude.

Il pensîr al tornâ a che sere, a chel moment li che al veve studât il telefonin cence fracâ il boton vert.

Al veve ancjemò tai voi il lusôr dal spielut, framieç lis fueis. Lu veve cjapât su, lu veve butât tal puartevalisis, e al jere tornât vie corint, par altris dusinte e cincuante chilometris. Al è propit vêr, al pensà cjalant chel cuadri, che il confin tra il ben e il mâl al è tenar.

E intant che la fantate dal cuadri i cimiave, al començà a cjantâ insiemit a chei altris fedêi, ancjemò convints che chê e fos une imagjine da la Madone[1].

---

[1] La tradizion e vûl che dulà che si cjate cumò il Santuari di Screncis, tal comun di Bertiûl, e fos une fuesse dulà che un pastôr al cjatà, intant che al tignive di voli lis pioris, un cuadri cu la imagjine da la Madone cul frut. A chel pont lu puartà inta la glesie dal paîs, ma tal doman il cuadri al fo cjatât intal stes puest. Lu puartarin alore inta la glesie de Santissime Trinitât, ma la robe si ripetè. Cussì, a fo fate su une glesie propit inta chel puest dal cuadri.

Lis aganis a son creaturis che a vivin dongje lis aghis e dispès a vegnin viodudis vistudis di blanc, sedi sot forme di bielis zovinis, sedi sot l’aspiet di vecjatis. A podin jessi buinis o tristis.

Visions e Visionari du intune gnot

Ben po, no us al è fâs lungje.

Îr di sere mi è capitât di là a la premiazion dal concors par tescj cinematografics in lenghe furlane (il numar siet) inmaneât dal CEC. La serade che a si è tignude culì dal cine Visionari e je stade une vore biele.
Tant par començâ parcè che il trionfadôr de serade a lu cognòs e se a fracais a chi a viodarês che a lu cognossês ancje voaltris.
Par seconde robe a pues dî di vê metût il piç tal lavôr che il bon Stiefin Furlan al à metût adun in forme di senegjature, parcè che l'idee di fonde di là che nas la trame a la vin scrite a cuatri mans.
Tierce robe parcè che Stiefin al à fat propit un bon lavôr e il tocut che al à interpretât insiemit cun altris trê atôrs di Remanzâs al mostrave propit che al podarès par vêr saltâ fûr une opare cinematografiche.
Se nol fos vonde no pues che contâus il rest
A son stâts une vore biei i omenuts, cartons par fruts piçui voltât par furlan, che se o vês di fâ un regâl origjinâl e furlan a Nadâl vait li de Filologjiche e compraitju.
Altre robe che mi è plasude, tecnichementri cjacarant, al è stât il curt li che a jerin misturadis vôs e poesiis di pierluigi Cappello cun imagjinis de sô tiere. Bielis tecnichis, ancje se no gnovis, ma gjestidis ben. Insomit... Une serade.
A veleve la pene di jessi furlans :)

Il cartel par l'Udinese cu la Lazio

Ve chi che o soi!
L'Udinese a stâ vincint trê a un e sperin che a ledi insomp cussì.
Tant al è che ancje vuê il cartel al jere par furlan!
Us al lassi chi sot... a lu ai cjapât in extremis prin che me pari lu invuluci par partâlu vie. :)


A ogni mût, sperant che vuê l'Udinese la puarti fûr (e gjoldint pal Chievo che le sta ficjant al Inter e pal Cagliari che la stâ ficjant a la Rome) viodêt di fâ fieste pal magjic Sclaunic che cun vuê, e cul 5 a 1 ficjât al Orgnan, al je campion d'unvier :D

ps L'Udinese ind à cjapât un altri... tocje preâ e fâ i cuars!

Un tocut a la volte

Alore. Ma ce blog di scritôr isal chest se no us fâs lei mai ce che scrîf?

Vês reson.
Ve chi alore la buine gnove che ai vinciût ancje chest concors di contis da l'orôr, cun mê grande sodisfazion. La conte, inte sô version origjinâl, la podês cjatâ a chi.
Ma par voaltris amîs di web, us lassi la version voltade par furlan, che come simpri e rive a dî alc di biel.
Si che no 'nd ai masse gjonde a scrivi par passât remot, us domandi scuse se o ai fat cualchi falope cui verps. ;)

UN TOCUT A LA VOLTE

A sedis agns si inamorisi ogni doi, e cuant che dut al finìs, ti somee che il cûr ti scjampi vie sdrumant lis cuestis.
Dopo i vincj dut ti pâr un zûc, e tu ti sintis plen di cûrs, tant di tirâju di ca e di là.
Passâts i trente la vuere e je finide, e la pâs al è polvar su lis robis di ogni dì.
Ce che propit non tu pensaressis mai al è che ti sucedi il contrari: vê cuarante agns e inamorâsi tant di crodi di podê sopuartâ dut.


– Pierdarès ogni sens par stati dongje – i veve dit Luciano, gjavant i voi de strade e pontantju in chei di Claudie.
Jê i veve ridût, tenare. Cuete ancje plui di lui. Tresinte metris plui indevant, framieç lamarin e ramaçs, lu veve lassât di bessol.


Il prin al fo il gust.
Ogni mangjâ ai si ingropave intal cuel come coton strafont e al scugnive gloti par campâ. Pocjis setemanis daûr al pierdè l’odorât, ma al fo cussì facil usâsi che par dîs no si inacuarzè di nuie.
Al è il colp, i disè l’otorinolaringoiatri, ma nol veve nissune cure di dâi.
Cuant che e tocjà a la uldide, Luciano al veve pene tornât a començâ a vivi. Al jere tornât a vore, in ostarie, al cine. Cussì al scugnì pierdi mês par imparâ a lei i lavris, e al vaì di rabie parsore i soi discs, aromai cence nissune vôs.
Une matine, fasintsi la barbe, al veve viodût un vier ros che i vignive jù dal cuel fin al pet. Al capì subit ce che al jere sucedût e i vignî voie di copâsi.
Cuant che al deventâ vuarp, al provà pardabon. Nol jere passât nancje un an.
E je une infezion, i disevin, neurons che morin.
Lui nol veve nancje rispuindût.
Al veve capît, e i scjampâ di ridi.
Al imparà a movisi framieç il so jessi vuarp, viodint lis robis cu la lint dai ricuarts. No si maraveà il dì cuant che si sveà cence un braç.
– Vularà dî che ti puartarai simpri cun mê – i veve dit Claudie in chel dì – vessio di vignî a cjolti un tocut a la volte.

Il cartel par l'Udinese cu la Dinamo Zagabrie

Ve chi, fasin contente la Priscilla, che a mi capìs ben jê, e metin un biel cartel pe partide di vuè, sperant che l'Udin nus fâsi dismenteâ lis ultimis partidis...